Read Aramaic Peshita Amos 1 Bible Online

Amos 1 - Aramaic Peshita bible

Amos 1

¹ܦܸܬ̣ܓ̣ܵܡܵܘ̈ܗܝ ܕܥܵܡܘܿܣ ܕܲܗܘ̤ܵܐ ܡ̣ܢ ܢܵܩ̈ܕܹ̇ܐ ܕܲܒ̣ܢܲܝ̈ ܬܩܘܿܥ: ܕܲܚܙ̣ܵܐ ܥܲܠ ܒܢܲܝ̈ ܝܑܼܣܪܵܝܹܠ: ܒܝܵܘ̈ܡܵܘܗܝ ܕܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܲܒ̣ܝܵܘ̈ܡܵܘܗܝ ܕܝܘܿܪܲܒ̣ܥܲܡ ܒܲܪ ܝܘܿܐܵܫ ܡܲܠܟܵܐ ܕܝܼܣܪܵܝܹܠ: ܬܲܪܬܹ̇ܝܢ ܫܢ̈ܝܼܢ ܡ̣ܢ ܩܕ݂ܵܡ ܙܵܘܥܵܐ.

²ܘܐܸܡܲܪ ܡܵܪܝܵܐ ܡ̣ܢ ܨܸܗܝܘܿܢ ܢܸܢܗܲܡ: ܘܡ̣ܢ ܐܘܿܪܸܫܠܸܡ ܢܸܬܸ̇ܠ ܩܵܠܹܗ: ܘܢܸـ̈ـܬ̇ܒ̣ܵܢ ܒܐܸܒ̣ܠܵܐ ܕܲܝܪܹ̈ܐ ܕܪ̈ܵܥܘܼܬ̣ܵܐ: ܘܢܹܐܒܲܫ ܪܹܫܹܗ ܕܟܲܪܡ̄ܠܵܐ.

³ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘ̈ܒܹ̇ܝܗ̇ ܕܕܲܪܡܣܘܿܩ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܕ݂ܵܫ̣ܘ ܒܣܸ̈ܟܹ̇ܐ ܕܦܲܪܙܠܵܐ ܠܓܸܠܥܵܕ݂.

⁴ܐܹܫܲܕܲܪ ܢܘܼܪܵܐ ܠܒܲܝܬܹ̇ܗ ܕܲܚܙܵܐܹܝܠ: ܘܬܹܐܟ݂ܘܿܠ ܣܵܚܪ̈ܵܬܹܗ ܕܒܲܪ ܗܕ݂ܵܕ݂.

⁵ܘܐܹܬܲܒܲܪ ܡܘܼܟ݂̈ܠܹܐ ܕܕܲܪܡܣܘܿܩ: ܘܐܵܘܒܸ̇ܕ݂ ܥܵܡܘܿܪܵܐ ܡ̣ܢ ܦܩܲܥܬ̣ܵܐ ܕܐܘܿܢ: ܘܣܵܡܹ̇ܟ݂ ܫܲܒ̣ܛܵܐ ܡ̣ܢ ܒܹܝܬ̣ ܥܲܕܵܢ: ܘܢܸܫܬ̇ܒ̣ܘܿܢ ܥܲܡܵܐ ܕܐܵܪܵܡ ܠܩܝܼܪ ܐܵܡܲܪ ܡܵܪܝܵܐ.

⁶ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘ̈ܒܹ̇ܝܗ̇ ܕܥܵܐܙܵܐ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܲܫ̣ܒ̣ܵܘ ܫܒ̣ܝܼܬ̣ܵܐ ܫܲܠܡܬ̣ܵܐ ܕܢܲܫ̱ܠܡܘܼܢ ܠܐܲܕ݂ܘܿܡ.

⁷ܐܹܫܲܕܲܪ ܢܘܼܪܵܐ ܒܫܘܼܪܹ̈ܝܗ̇ ܕܥܵܐܙܵܐ: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇.

⁸ܘܐܵܘܒܸ̇ܕ݂ ܥܵܡܘܿܪܵܐ ܡ̣ܢ ܐܲܫܕ̇ܘܿܕ݂: ܘܣܵܡܹ̇ܟ݂ ܫܲܒ̣ܛܵܐ ܡ̣ܢ ܐܲܫܩܵܠܘܿܢ: ܘܐܲܗܦܸܟ݂ ܐܝܼܕ݂ܝ ܥܲܠ ܥܸܩܪܘܿܢ: ܘܢܹܐܒ̣ܕ̇ܘܼܢ ܫܲܪܟܵܐ ܕܲܦܠܸܫ̈ܬܵܝܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁹ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘ̈ܒܹ̇ܝܗ̇ ܕܨܘܿܪ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܐܲܫܠܸܡܘ ܫܒ̣ܝܼܬ̣ܵܐ ܫܲܠܡܬ̣ܵܐ ܠܐܲܕ݂ܘܿܡ: ܘܠܵܐ ܥ̣ܗܲܕ݂ܘ ܩܝܵܡܵܐ ܕܐܲܚܘܼܬ̣ܵܐ.

¹⁰ܐܹܫܲܕܲܪ ܢܘܼܪܵܐ ܒܫܘܼܪܹ̈ܝܗ̇ ܕܨܘܿܪ: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇.

¹¹ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘܒܵܘ̈ܗܝ ܕܐܲܕ݂ܘܿܡ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܲܪܕܲܦ̣ ܒܚܲܪܒܵܐ ܠܐܲܚܘܼܗܝ: ܘܚܲܒܸ̇ܠ ܪ̈ܲܚܡܵܘܗܝ: ܘܲܢܛܲܪ ܠܥܵܠܲܡ ܪܘܼܓ̣ܙܹܗ: ܘܐܲܟ̇ܬܹܗ ܢ̣ܛܲܪ ܠܥܵܠܡܝܼܢ.

¹²ܐܹܫܲܕܲܪ ܢܘܼܪܵܐ ܠܬܲܝܡܵܢ: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇ ܕܒ̣ܘܼܨ̄ܪ.

¹³ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܬܠܵܬ̣ܵܐ ܚܵܘ̈ܒܲܝܗܘܿܢ ܕܲܒ̣ܢܲܝ̈ ܥܲܡܘܿܢ: ܘܕܲܐܪܒ̇ܥܵܐ ܠܵܐ ܐܲܗܦܸܟ݂ ܡܸܢܗܘܿܢ: ܥܲܠ ܕܦܲܪܸܬ̣ܘ ܒܲܛ̈ܢܵܬ̣ܵܐ ܕܓܸܠܥܵܕ݂: ܕܢܲܪ̱ܘܚܘܼܢ ܬܚܘܼܡܗܘܿܢ.

¹⁴ܐܸܫܒ̇ܘܿܩ ܢܘܼܪܵܐ ܒܫܘܼܩܹ̈ܝܗ̇ ܕܪܲܒܲܬ̣: ܘܬܹܐܟ݂ܘܿܠ ܣܵܚܪ̈ܵܬ̣ܵܗ̇: ܒܲܩܥܵܬ̣ܵܐ ܒܝܵܘܡܵܐ ܕܲܩܪܵܒ̣ܵܐ: ܒܥܲܠܥܵܠܵܐ ܒܝܵܘܡܵܐ ܕܲܥܪܘܼܪܵܐ.

¹⁵ܘܢܹܐܙܲܠ ܡܲܠܟ̇ܘܿܡ ܒܲܫܒ̣ܝܼܬ̣ܵܐ: ܘܟ݂ܘܼܡܪ̈ܵܘܗܝ ܘܪܵܘܪ̈ܒ̣ܵܢܵܘܗܝ ܐܲܟ݂ܚ̄ܕ݂ܵܐ ܐܵܡܲܪ ܡܵܪܝܵܐ.