Read Aramaic Peshita Amos 3 Bible Online

Amos 3 - Aramaic Peshita bible

Amos 3

¹ܫܡܲܥܘ ܡܸܠܬ̣ܵܐ ܗܵܕܹܐ ܕܐܸܡܲܪ ܡܵܪܝܵܐ ܥܠܲܝܟ̇ܘܿܢ ܒܢܲܝ̈ ܝܑܼܣܪܵܝܹܠ: ܥܲܠ ܟܠܵܗ̇ ܫܲܪܒ̇ܬ̣ܵܐ ܕܐܲܣܩܹ̇ܬ̣ ܡ̣ܢ ܐܲܪܥܵܐ ܕܡܸܨܪܹܝܢ.

²ܘܐܸܡ̇ܪܹܬ̣ ܕܲܠܟ݂ܘܿܢ ܒܲܠܚܘܿܕ݂ ܝܸܕ݂ܥܹ̇ܬ̣ ܡ̣ܢ ܟܠܗܘܿܢ ܥܲܡܡܹ̈ܐ: ܘܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܐܲܪܥܵܐ: ܡܸܛܠ ܗܵܢܵܐ ܐܸܦܩܘܿܕ݂ ܥܠܲܝܟ̇ܘܿܢ ܟܠܗܘܿܢ ܚܵܘ̈ܒܲܝܟ̇ܘܿܢ.

³ܕܲܠܡܵܐ ܐܵܙ̇ܠ̄ܝܼܢ ܬܪܹܝܢ: ܐܲܟ݂ܚ̄ܕ݂ܵܐ: ܐܸܠܵܐ ܐܸܢ ܐܹܬ̣ܘܲܥܲܕ݂ܘ.

⁴ܕܲܠܡܵܐ ܢܵܗܹ̇ܡ ܐܲܪܝܵܐ ܒܥܵܒ̣ܵܐ: ܡܵܐ ܕܠܲܝܬ̇ ܠܹܗ ܓܸܙܪܵܐ: ܐܵܘ ܕܲܠܡܵܐ ܡܪܝܼܡ ܩܵܠܹܗ ܐܲܪܝܵܐ ܡ̣ܢ ܡܲܪܒ̇ܘܿܥܝܼܬܹܗ: ܐܸܠܵܐ ܐܸܢ ܬܵܒܲܪ.

⁵ܕܲܠܡܵܐ ܢܵܦ̇ܠܵܐ ܨܸܦܪܵܐ ܒܦܲܚܵܐ ܒܐܲܪܥܵܐ ܒܸܠܥܵܕ݂ ܡ̣ܢ ܨܲܝܵܕ݂ܵܐ: ܐܵܘ ܕܲܠܡܵܐ ܫܵܘܲܪ ܦܲܚܵܐ ܡ̣ܢ ܐܲܪܥܵܐ ܘܐܵܚܹܕ݂.

⁶ܕܲܠܡܵܐ ܡܸܬ̣ܩܪܸܐ ܫܝܼܦܘܿܪܵܐ ܒܲܡܕ݂ܝܼܢ̄ܬܵܐ: ܘܥܲܡܵܐ ܠܵܐ ܙܵܐܲܥ̇: ܐܵܘ ܕܲܠܡܵܐ ܗܵܘ̇ܝܵܐ ܒܝܼܫܬܵܐ ܒܲܡܕ݂ܝܼܢ̄ܬܵܐ ܕܡܵܪܝܵܐ ܠܵܐ ܥܵܒܹ̇ܕ݂.

⁷ܡܸܛܠ ܕܠܵܐ ܥܵܒܹ̇ܕ݂ ܡܵܪܹܐ ܡܵܪ̈ܵܘܵܬ̣ܵܐ ܡܸܕܸ̇ܡ: ܐܸܠܵܐ ܐܸܢ ܓܠ̣ܵܐ ܐ̄ܪܵܙܹܗ ܠܥܲܒ̣ܕܵܘ̈ܗܝ ܢܒ̣ܝܹ̈ܐ.

⁸ܐܲܪܝܵܐ ܢܗܲܡ̣ ܡܲܢ ܠܵܐ ܢܸܕ݂ܚܲܠ: ܡܵܪܹܐ ܡܵܪ̈ܵܘܵܬ̣ܵܐ ܡܲܠܸܠ̣ ܡܲܢ ܠܵܐ ܢܸܬ̣ܢܲܒܸ̇ܐ.

⁹ܐܲܫܡܲܥܘ ܥܲܠ ܣܵܚܪ̈ܵܬ̣ܵܗ̇ ܕܐܲܫܕ̇ܘܿܕ݂: ܘܥܲܠ ܣܵܚܪ̈ܵܬ̣ܵܗ̇ ܕܐܲܪܥܵܐ ܕܡܸܨܪܹܝܢ: ܘܐܸܡܲܪܘ ܐܸܬ̣ܟܲܢܲܫܘ ܟܠܟ݂ܘܿܢ ܠܛܘܼܪܵܐ ܕܫܵܡܪܹܝܢ: ܘܲܚܙܵܘ ܕܠܘܼܚܝܵܐ ܣܲܓ̇ܝܼܵܐܐ ܕܲܒ̣ܓ̣ܵܘܵܗ̇: ܘܲܥܫܘܼܩܝܵܐ ܕܒ̣ܵܗ̇.

¹⁰ܘܠܵܐ ܝܵܕ݂ܥܝܼܢ ܠܡܸܥܒܲܕ݂ ܡܲܟ̇ܣܵܢܘܼܬ̣ܵܐ ܐܵܡܲܪ ܡܵܪܝܵܐ: ܘܚܵܡ̇ܠܝܼܢ ܚܛܘܼܦܝܵܐ ܘܒܸܙܬ̣ܵܐ ܒܣܵܚܪ̈ܵܬ̣ܗܘܿܢ.

¹¹ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ: ܐܘܼܠܨܵܢܵܐ ܢܸܚܕ̇ܪܝܼܗ̇ ܠܐܲܪܥܵܐ: ܘܢܸܚܘܿܬ̣ ܡܸܢܵܗ̇ ܥܘܼܫܢܵܗ̇ ܘܢܸܬ̣ܒܲܙ̈ܙܵܢ ܣܵܚܪ̈ܵܬ̣ܵܗ̇.

¹²ܗܵܟܲܢܵܐ ܐܵܡܲܪ ܡܵܪܝܵܐ: ܐܲܝܟ݂ ܕܡܲܥܕܸ̇ܐ ܪܵܥܝܵܐ ܡ̣ܢ ܦܘܼܡܵܐ ܕܐܲܪܝܵܐ: ܬܲܪܬܹ̇ܝܢ ܟܪ̈ܵܥܝܼܢ ܐܵܘ ܛܲܪܦܵܐ ܕܐܸܕ݂ܢܵܐ: ܗܵܟܲܢܵܐ ܢܸܬ̣ܦܲܨܘܿܢ ܒܢܲܝ̈ ܝܑܼܣܪܵܝܹܠ ܕܝܵܬ̣ܒ̇ܝܼܢ ܒܫܵܡܪܹܝܢ: ܒܚܘܼܛܪܵܐ ܕܡ̣ܢ ܫܹܠܝ: ܘܲܒ̣ܥܲܡܵܐ ܕܡ̣ܢ ܕܲܪܡܣܘܿܩ.

¹³ܫܡܲܥܘ ܘܐܲܣܗܸܕ݂ܘ ܒܒܲܝܬܵܐ ܕܝܲܥܩܘܿܒ̣: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ.

¹⁴ܡܸܛܠ ܕܲܒ̣ܝܵܘܡܵܐ ܕܦܵܩܹ̇ܕ݂ ܐ̄ܢܵܐ ܥܵܘܼܠܹܗ ܕܝܼܣܪܵܝܹܠ ܥܠܵܘܗܝ: ܐܸܦܩܘܿܕ݂ ܥܲܠ ܡܲܕ݂ܒ̇ܚܹ̈ܐ ܕܒܹܝܬ̣ ܐܹܝܠ: ܘܢܸܬ̣ܓܲܕ̇ܡܵܢ ܩܲܪ̈ܢܵܬ̣ܗܘܿܢ ܕܡܲܕ݂ܒ̇ܚܹ̈ܐ: ܘܢܸܦ̈ܠܵܢ ܥܲܠ ܐܲܪܥܵܐ.

¹⁵ܘܐܵܘܒܸ̇ܕ݂ ܒܹܝܬ̣ ܣܲܬ̣ܘܵܐ ܥܲܡ ܒܹܝܬ̣ ܩܲܝܛܵܐ: ܘܢܹܐܒ̣ܕ̇ܘܼܢ ܒܵـ̈ـܬܹܐ ܕܫܸܢܵܐ: ܘܲܢܣܘܼܦܘܼܢ ܒܵـ̈ـܬܹ̇ܐ ܣܲܓ̇ܝܹ̈ܐܐ ܐܵܡܲܪ ܡܵܪܝܵܐ.