Read Aramaic Peshita Amos 5 Bible Online

Amos 5 - Aramaic Peshita bible

Amos 5

¹ܫܡܲܥܘ ܡܸܠܬ̣ܵܐ ܗܵܕܹܐ: ܕܐܸܢܵܐ ܫܵܩܹ̇ܠ ܥܠܲܝܟ̇ܘܿܢ ܐܘܿܠܝܼܬ̣ܵܐ ܒܹܝܬ̣ ܝܑܼܣܪܵܝܹܠ.

²ܢܸܦܠܲܬ̤ ܘܠܵܐ ܬܵܘܣܸܦ ܠܲܡܩܵܡ ܒܬ̣ܘܼܠܬܵܐ ܕܝܼܣܪܵܝܹܠ: ܐܸܫܬܲܒ̣ܩܲܬ̤ ܥܲܠ ܐܲܪܥܵܐ ܘܠܲܝܬ̇ ܕܲܡܩܝܼܡ ܠܵܗ̇.

³ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܕ݂ܝܼܢ̄ܬܵܐ ܕܢܵܦܩܝܼܢ ܗ̄ܘܼܵܘ ܡܸܢܵܗ̇ ܐܵܠܹܦ: ܢܸܫܬܲܚܪܘܼܢ ܒܵܗ̇ ܡܵܐܐ: ܘܲܕ݂ܢܵܦܩܝܼܢ ܗ̄ܘܼܵܘ ܡܸܢܵܗ̇ ܡܵܐܐ: ܢܸܫܬܲܚܪܘܼܢ ܒܵܗ̇ ܥܸܣܪܵܐ ܠܲܕ݂ܒܹܝܬ̣ ܝܑܼܣܪܵܝܹܠ.

⁴ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܠܲܕ݂ܒܹܝܬ̣ ܝܑܼܣܪܵܝܹܠ: ܒܥܵܐܘܼܢܝ ܠܝܼ ܘܲܚܝܵܘ.

⁵ܘܠܵܐ ܬܸܒ̣ܥܘܿܢ ܠܒܹܝܬ̣ ܐܹܝܠ: ܘܲܠܓܲܠܓܵܠܵܐ ܠܵܐ ܬܸܥܠܘܼܢ: ܘܲܠܒܹܪܫܒܲܥ ܠܵܐ ܬܸܥܒ̇ܪܘܼܢ: ܡܸܛܠ ܕܓܲܠܓܵܠܵܐ ܡܸܫܬ̇ܒ̣ܵܝܘܼ ܬܸܫܬ̇ܒܸܐ: ܘܒܹܝܬ̣ ܐܹܝܠ ܢܸܗܘܹܐ ܐܲܝܟ݂ ܕܠܵܐ ܐܝܼܬ̣ܵܘܗܝ.

⁶ܒܥܵܘ ܠܡܵܪܝܵܐ ܘܲܚܝܵܘ: ܕܠܵܐ ܢܹܐܩܲܕ݂ ܐܲܝܟ݂ ܢܘܼܪܵܐ ܒܹܝܬ̣ ܝܵܘܣܸܦ. ܘܢܹܐܟ݂ܘܿܠ ܠܒܹܝܬ̣ ܐܹܝܠ ܘܠܲܝܬ̇ ܕܲܡܕܲܥܸܟ݂.

⁷ܕܗܵܦ̇ܟ̇ܝܼܢ ܕܝܼܢܵܐ ܠܲܡܪܵܪܹ̈ܐ: ܘܙܲܕ̇ܝܼܩܘܼܬ̣ܵܐ ܠܐܲܪܥܵܐ.

⁸ܫܒܲܩ̣ܘ ܠܡܲܢ ܕܲܥܒܲܕ݂ ܟܝܼܡܵܐ ܘܥܝܼܘܿܬ̣ܵܐ: ܘܲܗܦܲܟ݂ ܠܨܲܦܪܵܐ ܛܸܠܵܠܲܝ̈ ܡܵܘܬܵܐ: ܘܐܝܼܡܵܡܵܐ ܠܠܸܝܵܐ ܐܲܚܫܸܟ݂: ܕܲܩ̣ܪܵܐ ܠܡܲـ̈ـܝܵܐ ܕܝܲܡܵܐ: ܘܐܸܫܲܕ݂ ܐܸܢܘܿܢ ܥܲܠ ܐܲܦܹ̈ܝܗ̇ ܕܐܲܪܥܵܐ ܡܵܪܝܵܐ ܫܡܹܗ.

⁹ܕܲܡܫܲܠܸܛ ܚܲܠܵܫܵܐ ܥܲܠ ܥܲܫܝܼܢܵܐ: ܘܡܲܟ̇ܝܼܟ݂ܵܐ ܥܲܠ ܪܵܡܵܐ ܡܥܲܠܸܐ.

¹⁰ܕܣܵܢܹ̇ܝܢ ܒܬܲܪܥܵܐ ܠܡܸܣܟܹ̇ܢܵܐ: ܘܲܠܡܲܢ ܕܲܡܡܲܠܸܠ ܬܪ̈ܝܼܨܵܬ̣ܵܐ ܡܲܣܠܹܝܢ.

¹¹ܡܸܛܠ ܗܵܢܵܐ ܚܠܵܦ ܕܩܲܦܚ̣ܬ̇ܘܿܢ ܠܡܸܣܟܹ̇ܢܵܐ: ܘܩܘܼܪ̈ܒܵܢܹܐ ܓܒܲـ̈ـܝܵܐ ܢ̣ܣܲܒ̣ܬ̇ܘܿܢ ܡܸܢܹܗ: ܒܵـ̈ـܬܹܐ ܕܲܦ̮ܣܝܼܠܬܵܐ ܕܲܒ̣ܢܲܝ̣ܬ̇ܘܿܢ ܠܵܐ ܬܸܬ̇ܒ̣ܘܼܢ ܒܗܘܿܢ. ܘܟܲܪ̈ܡܹܐ ܕܪܸܓ̇ܬ̣ܵܐ ܕܲܢܨܲܒ̣ܬ̇ܘܿܢ ܠܵܐ ܬܸܫܬ̇ܘܿܢ ܚܲܡ̱ܪܗܘܿܢ.

¹²ܡܸܛܠ ܕܝܵܕܲܥ̇ ܐ̄ܢܵܐ ܕܣܲܓ̇ܝܼܐܝܼܢ ܚܵܘܒܲܝ̈ܟ̇ܘܿܢ: ܘܥܲܫܝܼܢܝܼܢ ܚܛܵܗܲܝ̈ܟ̇ܘܿܢ: ܐܵܠܘܿܨܵܘ̈ܗܝ ܕܙܲܕ̇ܝܼܩܵܐ ܢܣܲܒ̣ܘ ܫܘܼܚܕܵܐ: ܘܲܠܡܸܣܟܹ̇ܢܵܐ ܒܬܲܪܥܵܐ ܨܠ̣ܵܘ.

¹³ܡܸܛܠ ܗܵܢܵܐ ܡܲܢ ܕܡܸܣܬܲܟܲܠ ܒܙܲܒ̣ܢܵܐ ܗܵܘܿ ܢܸܫܬ̇ܘܿܩ ܠܹܗ: ܡܸܛܠ ܕܙܲܒ̣ܢܵܐ ܗ̄ܘܼ ܕܒ̣ܝܼܫܬܵܐ.

¹⁴ܒܥܵܘ ܛܵܒ̣ܵـ̈ـܬ̣ܵܐ ܘܠܵܐ ܒܝܼ̈ܫܵܬ̣ܵܐ ܕܬܸܚܘܿܢ: ܘܢܸܗܘܹܐ ܗܵܟܲܢܵܐ ܡܵܪܝܵܐ ܚܲܝܠܬ̣ܵܢܵܐ ܥܲܡܟ݂ܘܿܢ: ܐܲܝܟ݂ ܕܐܸܡܲܪܬ̇ܘܿܢ.

¹⁵ܣܢܵܘ ܒܝܼ̈ܫܵܬ̣ܵܐ ܘܲܪܚܲܡܘ ܛܵܒ̣ܵـ̈ـܬ̣ܵܐ: ܘܐܲܩܝܼܡܘ ܒܬܲܪܥܵܐ ܕܝܼܢܵܐ: ܟܒܲܪ ܢܪܲܚܸܡ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܥܲܠ ܫܲܪܟܹ̇ܗ ܕܝܵܘܣܸܦ.

¹⁶ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܒܟ݂ܠܗܘܿܢ ܫܘܼܩܹ̈ܐ ܡܲܪ̈ܩܕ݂ܵܬ̣ܵܐ: ܘܲܒ̣ܟ݂ܠܗܹܝܢ ܒܸܪ̈ܝܵܬ̣ܵܐ ܢܹܐܡܪܘܼܢ ܗܹܘܵܝ: ܗܹܘܵܝ: ܘܢܸܩܪܘܿܢ ܠܐܲܟܵܪܹ̈ܐ ܠܐܸܒ̣ܠܵܐ: ܘܲܠܡܲܪ̈ܩܕ݂ܵܬ̣ܵܐ ܠܝܵܕ݂ܥܲܝ̈ ܐܘܿܠ̈ܝܵܬ̣ܵܐ.

¹⁷ܘܲܒ̣ܟ݂ܠܗܘܿܢ ܟܲܪ̈ܡܹܐ ܡܲܪ̈ܩܕ݂ܵܬ̣ܵܐ: ܡܸܛܠ ܕܥܵܒܲܪ ܐ̄ܢܵܐ ܒܓܵܘܹܟ݂ܝ ܐܵܡܲܪ ܡܵܪܝܵܐ.

¹⁸ܘܵܝ ܠܲܕ݂ܪܵܓ̇ܝܼܢ ܠܝܵܘܡܹܗ ܕܡܵܪܝܵܐ: ܠܡܵܢܵܐ ܗܵܘܹ̇ܐ ܝܵܘܡܹܗ ܕܡܵܪܝܵܐ: ܕܚܸܫܘܿܟ݂ ܗ̄ܘܼ ܘܠܵܐ ܢܲܗܝܼܪ.

¹⁹ܐܲܝܟ݂ ܕܥܵܪܹܩ ܓܲܒ̣ܪܵܐ ܡ̣ܢ ܩܕ݂ܵܡ ܐܲܪܝܵܐ: ܘܦܵܓܥܵܐ ܒܹܗ ܕܸܒܵܐ: ܘܥܵܐܹ̇ܠ ܠܒܲܝܬܵܐ ܘܣܵܡܹ̇ܟ݂ ܐܝܼܕܹܗ ܥܲܠ ܐܸܣܬ̣ܵܐ: ܘܢܵܟܹ̇ܬ̣ ܠܹܗ ܚܸܘܝܵܐ.

²⁰ܗܵܟܲܢܵܐ ܗ̄ܘܼ ܝܵܘܡܹܗ ܕܡܵܪܝܵܐ: ܚܸܫܘܿܟ݂ ܗ̄ܘܼ ܘܠܵܐ ܢܲܗܝܼܪ: ܥܲܡܘܼܛ ܗ̄ܘܼ ܘܠܲܝܬ̇ ܒܹܗ ܙܲܗܪܵܐ.

²¹ܣܢܹ̇ܝܬ̣ ܘܐܲܣܠܝܼܬ̣ ܥܲܕ݂ܥܹܕܲܝ̈ܟ̇ܘܿܢ: ܘܠܵܐ ܐܲܪܝܼܚ ܒܸܥܨܵܪ̈ܵܬ̣ܟ݂ܘܿܢ.

²²ܐܵܦܸܢ ܬܲܣܩܘܼܢ ܠܝܼ ܝܲܩ̈ܕܹ̇ܐ ܫܲܠܡܹ̈ܐ: ܒܩܘܼܪ̈ܒܵܢܲܝܟ̇ܘܿܢ ܠܵܐ ܐܸܨܛܒܸܐ: ܘܲܒ̣ܫܘܼܦܪܵܐ ܕܲܡܦܲܛܡܲܝ̈ܟ̇ܘܿܢ ܠܵܐ ܐܹܚܘܼܪ.

²³ܐܲܥܒܲܪ ܡܹܢܝ ܩܵܠܵܐ ܕܲܙܡܵܪܵܟ݂: ܘܲܙܡܝܼܪܬܵܐ ܕܟܸܢܵܪܵܟ݂ ܬܘܼܒ̣ ܠܵܐ ܐܹܫܡܲܥ.

²⁴ܘܢܸܬ̣ܓ̇ܠܹܐ ܕܝܼܢܵܐ ܐܲܝܟ݂ ܡܲـ̈ـܝܵܐ: ܘܙܲܕ̇ܝܼܩܘܼܬ̣ܵܐ ܐܲܝܟ݂ ܪܓܸܠܬܵܐ ܥܲܫܝܼܢܬܵܐ.

²⁵ܕܲܠܡܵܐ ܕܸܒ̣ܚܹ̈ܐ ܘܩܘܼܪ̈ܒܵܢܹܐ ܩܲܪܸܒ̣ܬ̇ܘܿܢ ܠܝܼ ܐܲܪܒ̇ܥܝܼܢ ܫܢ̈ܝܼܢ ܒܡܲܕ݂ܒ̇ܪܵܐ ܒܹܝܬ̣ ܝܑܼܣܪܵܝܹܠ.

²⁶ܐܸܠܵܐ ܫܩܲܠ̣ܬ̇ܘܿܢ ܡܲܫܟ̇ܢܹܗ ܕܡܲܠܟ̇ܘܿܡ: ܘܟܹܐܘܵܢ ܨܲܠܡܟ݂ܘܿܢ: ܟܵܘܟ̇ܒ̣ܵܐ ܕܲܥܒܲܕ̇ܬ̇ܘܿܢ ܠܟ݂ܘܿܢ ܐܲܠܵܗܵܐ.

²⁷ܐܲܫܒܹ̇ܝܟ݂ܘܿܢ ܠܗܲܠ ܡ̣ܢ ܕܲܪܡܣܘܿܩ: ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܫܡܹܗ.