Read Aramaic Peshita Amos 6 Bible Online

Amos 6 - Aramaic Peshita bible

Amos 6

¹ܘܵܝ ܠܲܕ݂ܫܵܝܛܝܼܢ ܠܨܸܗܝܘܿܢ: ܘܲܬ̣ܟ݂ܝܼܠܝܼܢ ܒܛܘܼܪܵܐ ܕܫܵܡܪܹܝܢ: ܦܵܪ̈ܫܲܝ ܠܪܹ̈ܫܹܐ ܕܥܲܡܡܹ̈ܐ: ܘܓܲܠܝܼܘ ܠܗܘܿܢ ܒܢܲܝ̈ ܝܑܼܣܪܵܝܹܠ.

²ܥܒܲܪܘ ܠܟܲܠܝܵܐ ܘܲܚܙܵܘ: ܘܙܸܠܘ ܡ̣ܢ ܬܲܡܵܢ ܠܲܚܡܵܬ̣ ܪܲܒܵܐ: ܘܚܘܿܬ̣ܘ ܠܓ̣ܵܬ̣ ܕܲܦܠܸܫ̈ܬܵܝܹܐ: ܕܛܵܒ̣ܵܐ ܗ̄ܝܼ ܡ̣ܢ ܟܠܗܹܝܢ ܡܲܠ̈ܟ̇ܘܵܬ̣ܵܐ ܗܵܠܹܝܢ: ܐܸܢ ܣܲܓ̇ܝܼ ܬܚܘܼܡܗܘܿܢ ܡ̣ܢ ܬܚܘܼܡܟ݂ܘܿܢ.

³ܕܲܡܣܲܟܹ̇ܝܢ ܠܝܵܘܡܵܐ ܒܝܼܫܵܐ: ܘܲܡܩܲܪܒ̣ܝܼܢ ܠܫܲܒ̇ܬ̣ܵܐ ܕܲܚܛܘܼܦܝܵܐ.

⁴ܘܫܵܟ݂ܒ̇ܝܼܢ ܥܲܠ ܥܲܪ̈ܣܵܬ̣ܵܐ ܕܫܸܢܵܐ: ܘܡܸܬ̣ܠܲܥܒ̣ܝܼܢ ܥܲܠ ܬܸܫ̱ܘ̈ܝܵܬ̣ܗܘܿܢ: ܕܐܵܟ݂ܠܝܼܢ ܡܦܲܛܡܹ̈ܐ ܡ̣ܢ ܥܵـ̈ـܢܵܐ: ܘܥܸܓ̣̈ܠܹܐ ܡ̣ܢ ܓܵܘ ܒܲܩܪܹ̈ܐ.

⁵ܕܢܵܩܫܝܼܢ ܥܲܠ ܦܘܼܡܵܐ ܕܟܸܢܵܪܹ̈ܐ: ܘܐܲܝܟ݂ ܕܵܘܝܼܕ݂ ܚܫܝܼܒ̣ܝܼܢ ܠܗܘܿܢ ܡܵܐܢܲܝ̈ ܙܡܵܪܵܐ.

⁶ܕܫܵܬܹ̇ܝܢ ܚܲܡܪܵܐ ܡܨܲܠܠܵܐ: ܘܡܸܫܚܵܢܹ̈ܐ ܪܹ̈ܫܵܝܹܐ ܡܵܫ̇ܚܝܼܢ: ܘܠܵܐ ܒܛܝܼܠ ܠܗܘܿܢ ܥܲܠ ܬܒ̣ܵܪܹܗ ܕܝܵܘܣܸܦ.

⁷ܡܸܛܠܗܵܢܵܐ ܢܸܫܬ̇ܒ̣ܘܿܢ ܒܪܹܫ ܫܒ̣ܝܼܬ̣ܵܐ: ܘܢܸܫܬ̇ܩܸܠ ܪܘܵܙܵܐ ܡ̣ܢ ܫܲܠܝܼܛܵܢܲܝ̈ܗܘܿܢ.

⁸ܝܑܼܡܵܐ ܡܵܪܹܐ ܡܵܪ̈ܵܘܵܬ̣ܵܐ ܒܢܲܦ̮ܫܹܗ: ܘܐܸܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܡܲܣܠܸܐ ܐ̄ܢܵܐ ܠܐܝܼܩܵܪܹܗ ܕܝܲܥܩܘܿܒ̣: ܘܲܠܣܵܚܪ̈ܵܬܹܗ ܣܢܹ̇ܝܬ̣: . ܐܲܫܠܸܡ ܡܕ݂ܝܼܢ̄ܬܵܐ ܒܲܡܠܹܐܵܗ̇.

⁹ܘܐܸܢ ܢܸܫܬܲܚܪܘܼܢ ܥܸܣܪܵܐ ܓܲܒ̣ܪ̈ܝܼܢ ܒܒܲܝܬܵܐ ܚܲܕ݂ ܢܡܘܼܬ̣ܘܼܢ.

¹⁰ܘܢܸܫܩܠܝܼܘܗܝ ܕܵܕܹܗ ܐܵܘ ܡܲܢ ܕܩܲܪܝܼܒ̣ ܠܹܗ ܕܢܲܦܸܩ ܓܲܪ̈ܡܹܐ ܡ̣ܢ ܒܲܝܬܵܐ: ܘܢܹܐܡܲܪ ܠܡܲܢ ܕܐܝܼܬ̣ ܒܹܗ ܒܒܲܝܬܵܐ: ܐܝܼܬ̣ ܐ̄ܢܵܫ ܬܘܼܒ̣ ܥܲܡܵܟ݂ ܒܒܲܝܬܵܐ: ܘܢܹܐܡܲܪ ܠܹܗ ܠܲܝܬ̇: ܡܸܛܠ ܕܣܵܦ̣ܘ ܠܗܘܿܢ: ܥܲܠ ܕܠܵܐ ܡܲܕ݂ܟ̇ܪܝܼܢ ܗ̄ܘܼܵܘ ܒܲܫܡܹܗ ܕܡܵܪܝܵܐ.

¹¹ܡܸܛܠ ܕܗܵܐ ܡܵܪܝܵܐ ܢܵܦܹ̇ܩ: ܘܢܸܡܚܸܐ ܠܒܲܝܬܵܐ ܪܵܡܵܐ ܘܢܲܪܥ̄ܠܝܼܘܗܝ: ܘܲܠܒܲܝܬܵܐ ܙܥܘܿܪܵܐ ܘܢܲܨܕܹ̇ܝܘܗܝ.

¹²ܕܲܠܡܵܐ ܪܵܗܛ̇ܝܼܢ ܥܲܠ ܫܘܿܥܵܐ ܪ̈ܲܟ݂ܫܵܐ: ܐܵܘ ܕܵܒ̣ܪܝܼܢ ܒܗܘܿܢ ܦܲܕܵܢܵܐ: ܡܸܛܠ ܕܲܗܦܲܟ݂ܬ̇ܘܿܢ ܕܝܼܢܵܐ ܠܲܡܪܵܪܹ̈ܐ: ܘܦܹܪܹ̈ܐ ܕܙܲܕ̇ܝܼܩܘܼܬ̣ܵܐ ܠܓܸ̈ܕ̇ܕܹ̇ܐ.

¹³ܕܚܵܕ݂ܝܼܢ ܥܲܠ ܠܵܐ ܡܸܕܹ̇ܡ: ܘܐܵܡܪܝܼܢ: ܕܲܠܡܵܐ ܠܵܐ ܗ̄ܘܼܵܐ ܒܚܲܝܠܲܢ ܢ̣ܣܲܒ̣ܢ ܠܲܢ ܩܪܝܼܬ̣ܵܐ.

¹⁴ܡܸܛܠ ܕܗܵܐ ܐܸܢܵܐ ܡܩܝܼܡ ܐ̄ܢܵܐ ܥܠܲܝܟ̇ܘܿܢ ܒܹܝܬ̣ ܝܑܼܣܪܵܝܹܠ: ܥܲܡܵܐ ܐܵܡܲܪ ܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܘܢܸܕ݂ܚ̄ܩܘܼܢܵܟ݂ܘܿܢ ܡ̣ܢ ܡܲܥܠܵܢܵܐ ܕܲܚܡܵܬ̣: ܘܲܥܕܲܡܵܐ ܠܢܲܚܠܵܐ ܕܥܵܪܵܒ̣ܵܐ.