Read Aramaic Peshita Amos 9 Bible Online

Amos 9 - Aramaic Peshita bible

Amos 9

¹ܚܙܹ̇ܝܬܹܗ ܠܡܵܪܝܵܐ ܕܩܵܐܹ̇ܡ ܥܲܠ ܡܲܕ݂ܒ̇ܚܵܐ: ܘܐܵܡܲܪ: ܡܚܝܼ ܠܚܲܙܘܼܪܵܐ: ܘܲܢܙܘܼ̈ܥܵܢ ܐܸܣ̈ܟ̇ܦܵܬ̣ܵܐ ܘܢܸܟ݂ܠ̱ܗܘܿܢ ܒܪܹܫ ܟܠܗܘܿܢ: ܘܚܲܪܬ̣ܗܘܿܢ ܒܚܲܪܒܵܐ ܐܹܩܲܛܸܠ: ܠܵܐ ܢܲܡܸܕ݂ ܡܸܢܗܘܿܢ ܕܥܵܪܹܩ: ܘܠܵܐ ܢܸܫܬܵܘܙܲܒ̣ ܡܸܢܗܘܿܢ ܕܡܸܬ̣ܦܲܨܹܐ.

²ܐܸܢ ܢܸܚܬ̣ܘܼܢ ܠܲܫܝܘܿܠ ܡ̣ܢ ܬܲܡܵܢ ܬܲܣܸܩ ܐܸܢܘܿܢ ܐܝܼܕ݂ܝܼ: ܘܐܸܢ ܢܸܣܩܘܼܢ ܠܲܫܡܲܝܵܐ ܡ̣ܢ ܬܲܡܵܢ ܐܲܚܸܬ̣ ܐܸܢܘܿܢ.

³ܘܐܸܢ ܢܸܛܫܘܿܢ ܒܪܹܫܹܗ ܕܟܲܪܡ̄ܠܵܐ: ܡ̣ܢ ܬܲܡܵܢ ܐܸܒ̣ܨܸܐ ܘܐܸܣܲܒ̣ ܐܸܢܘܿܢ: ܘܐܸܢ ܢܸܛܫܘܿܢ ܡ̣ܢ ܩܕ݂ܵܡ ܥܲܝܢܲܝ̈ ܒܲܬ̣ܗܘܿܡܵܘ̈ܗܝ ܕܝܲܡܵܐ: ܬܲܡܵܢ ܐܸܦܩܘܿܕ݂ ܠܚܸܘܝܵܐ ܘܲܢܢܲܟܸ̇ܬ̣ ܐܸܢܘܿܢ.

⁴ܘܐܸܢ ܢܹܐܙܠ̄ܘܼܢ ܒܫܸܒ̣ܝܵܐ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ: ܬܲܡܵܢ ܐܸܦܩܘܿܕ݂ ܠܣܲܝܦܵܐ ܘܲܢܩܲܛܸܠ ܐܸܢܘܿܢ: ܘܐܹܣܝܼܡ ܥܲܝܢܝ ܥܠܲܝܗܘܿܢ ܠܒ̣ܝܼܫܬܵܐ ܘܠܵܐ ܠܛܵܒ̣ܬ̣ܵܐ.

⁵ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܚܲܝܠܬ̣ܵܢܵܐ: ܕܩܵܪܹܒ̣ ܠܐܲܪܥܵܐ ܘܙܵܝ̇ܥܵܐ: ܘܝܵܬ̣ܒ̇ܝܼܢ ܒܐܸܒ̣ܠܵܐ ܟܠܗܘܿܢ ܥܵܡܘܿܪܹ̈ܝܗ̇: ܘܣܵܠܹ̇ܩ ܩܸܨܵܗ̇ ܐܲܝܟ݂ ܢܲܗܪܵܐ: ܘܢܵܚܹ̇ܬ̣ ܐܲܝܟ݂ ܢܲܗܪܵܐ ܕܡܸܨܪܹܝܢ.

⁶ܕܲܒ̣ܢܵܐ ܒܲܫܡܲܝܵܐ ܡܲܣܩܵܢܵܘ̈ܗܝ: ܘܡܘܼܠܟܵܢܹܗ ܒܐܲܪܥܵܐ ܡܲܬ̣ܩܲܢ: ܕܩܵܪܹܐ ܠܡܲـ̈ـܝܵܐ ܕܝܲܡܵܐ: ܘܐܵܫܹ̇ܕ݂ ܠܗܘܿܢ ܥܲܠ ܐܲܦܹܝ̈ܗ̇ ܕܐܲܪܥܵܐ ܡܵܪܝܵܐ ܚܲܝܠܬ̣ܵܢܵܐ ܫܡܹܗ.

⁷ܗܵܐ ܐܲܝܟ݂ ܒܢܲܝ̈ ܟܘܼܫܵܝܹ̈ܐ ܐܲܢ̄ܬ̇ܘܿܢ ܠܝܼ ܒܢܲܝ̈ ܝܑܼܣܪܵܝܹܠ ܐܵܡܲܪ ܡܵܪܝܵܐ: ܗܵܐ ܠܝܼܣܪܵܝܹܠ ܐܲܣܩܹ̇ܬ̣ ܡ̣ܢ ܐܲܪܥܵܐ ܕܡܸܨܪܹܝܢ: ܘܠܲܦܠܸܫܬܵܝܹ̈ܐ ܡ̣ܢ ܩܵܦܵܕ݂ܘܿܩܝܼ: ܘܠܵܐܪܵܡ ܡ̣ܢ ܩܝܼܪ.

⁸ܗܵܐ ܥܲܝܢܵܘ̈ܗܝ ܕܡܵܪܹܐ ܡܵܪ̈ܵܘܵܬ̣ܵܐ ܒܡܲܠܟ̇ܘܼܬ̣ܵܐ ܚܲܛܵܝܬܵܐ: ܘܐܵܘܒ̇ܕܹܝܼܗ̇ ܡ̣ܢ ܐܲܦܹܝ̈ܗ̇ ܕܐܲܪܥܵܐ: ܒܪܲܡ ܠܵܐ ܗܵܟܲܢܵܐ ܐܵܘܒ̇ܕ݂ܝܼܘܗܝ ܠܒܲܝܬܹ̇ܗ ܕܝܲܥܩܘܿܒ̣ ܐܵܡܲܪ ܡܵܪܝܵܐ.

⁹ܡܸܛܠ ܕܗܵܐ ܐܸܢܵܐ ܦܵܩܹ̇ܕ݂ ܐ̄ܢܵܐ: ܘܐܹܒܲܕܲܪ ܒܟ݂ܠܗܘܿܢ ܥܲܡܡܹ̈ܐ ܠܲܕ݂ܒܹܝܬ̣ ܝܼܣܪܵܝܹܠ: ܐܲܝܟ݂ ܕܥܵܪܒ̇ܝܼܢ ܒܥܲܪܒܵܠܵܐ: ܘܠܵܐ ܢܸܦܸܠ ܕܲܩܝܼܩܗܘܿܢ ܥܲܠ ܐܲܪܥܵܐ.

¹⁰ܒܚܲܪܒܵܐ ܢܸܦܠܘܼܢ ܟܠ ܚܲܛܵܝܵܘ̈ܗܝ ܕܥܲܡܝ: ܕܐܵܡ̇ܪܝܼܢ: ܠܵܐ ܬܸܩܪܘܿܒ̣ ܘܠܵܐ ܬܸܡܛܹܝܢ ܒܝܼܫܬܵܐ.

¹¹ܒܹܗ ܒܝܵܘܡܵܐ ܗܵܘܿ: ܐܲܩܝܼܡ ܡܲܫܟ̇ܢܹܗ ܕܕ݂ܵܘܝܼܕ݂ ܕܲܢܦܲܠ̣: ܐܸܣܘܿܓ̣ ܬܘܼܪ̈ܥܵܬ̣ܗܘܿܢ: ܘܲܡܣܲܚ̈ܦܵܬ̣ܗܘܿܢ ܐܲܩܝܼܡ: ܘܐܸܒ̣ܢܹܝܗ̇ ܐܲܝܟ݂ ܝܵܘ̈ܡܵܬ̣ܵܐ ܕܥܵܠܲܡ: ܘܐܲܝܟ݂ ܫܢܲـ̈ـܝܵܐ ܕܕ݂ܵܪܕܵܪ̈ܝܼܢ.

¹²ܡܸܛܠ ܕܢܹܐܪܬ̇ܘܿܢ ܫܲܪܟܵܐ ܕܐܲܕ݂ܘܿܡ: ܘܟ݂ܠܗܘܿܢ ܥܲܡܡܹ̈ܐ ܕܐܸܬ̣ܩܪܝܼ ܫܹܡܝ ܥܠܲܝܗܘܿܢ: ܐܵܡܲܪ ܡܵܪܝܵܐ ܕܥܵܒܹ̇ܕ݂ ܗܵܠܹܝܢ.

¹³ܗܵܐ ܝܵܘ̈ܡܵܬ̣ܵܐ ܐܵܬ̇ܝܢ ܐܵܡܲܪ ܡܵܪܝܵܐ: ܘܢܲܕ݂ܪܸܟ݂ ܐܸܕ̇ܪܵܐ ܠܲܩܛܵܦܵܐ: ܘܲܥܨܵܪܵܐ ܕܥܸܢܒܹ̈ܐ ܠܙܲܪܥܵܐ: ܘܢܲܪܕ̇ܘܿܢ ܛܘܼܪܹ̈ܐ ܚܲܠܝܘܼܬ̣ܵܐ: ܘܟ݂ܠܗܹܝܢ ܪ̈ܵܡܵܬ̣ܵܐ ܢܸܬ̣ܒܲܣ̈ܡܵܢ.

¹⁴ܘܐܲܗܦܸܟ݂ ܫܒ̣ܝܼܬ̣ܵܐ ܕܥܲܡܝ ܝܑܼܣܪܵܝܹܠ: ܘܢܸܒ̣ܢܘܿܢ ܡܕ݂ܝܼ̈ܢܵܬ̣ܵܐ ܚܲܪ̈ܒ̣ܵܬ̣ܵܐ ܘܢܸܬ̇ܒ̣ܘܼܢ: ܘܢܸܨܒ̣ܘܼܢ ܟܲܪ̈ܡܹܐ ܘܢܸܫܬ̇ܘܿܢ ܚܲܡ̱ܪܗܘܿܢ: ܘܢܸܫܬ̇ܠܘܼܢ ܦܲܪ̈ܕܲܝܣܵܐ ܘܢܹܐܟ݂ܠܘܼܢ ܦܹܐܪ̈ܲܝܗܘܿܢ.

¹⁵ܘܐܸܨܘܿܒ̣ ܐܸܢܘܿܢ ܒܐܲܪܥ̱ܗܘܿܢ: ܘܠܵܐ ܢܸܬ̣ܥܲܩܪܘܼܢ ܬܘܼܒ̣ ܡ̣ܢ ܐܲܪܥ̱ܗܘܿܢ ܕܝܸ̇ܗ̄ܒܹ̇ܬ̣ ܠܗܘܿܢ: ܐܵܡܲܪ ܡܵܪܝܵܐ ܐܲܠܵܗܵܟ݂.