Read Aramaic Peshita Jonah 1 Bible Online

Jonah 1 - Aramaic Peshita bible

Jonah 1

¹ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܝܵܘܢܵܢ ܒܲܪ ܡܲܬܲܝ ܠܡܹܐܡܲܪ.

²ܩܘܼܡ ܙܸܠ ܠܢܝܼܢܘܹܐ ܡܕ݂ܝܼܢ̄ܬܵܐ ܪܲܒ̇ܬ̣ܵܐ: ܘܐܲܟ݂ܪܸܙ ܥܠܹܝܗ̇: ܡܸܛܠ ܕܣܸܠܩܲܬ̤ ܒܝܼܫܘܼܬ̣ܗܘܿܢ ܩܕ݂ܵܡܲܝ.

³ܘܩܵܡ̣ ܝܵܘܢܵܢ ܠܡܸܥܪܲܩ ܠܬܲܪܫܝܼܫ ܡ̣ܢ ܩܕ݂ܵܡ ܡܵܪܝܵܐ: ܘܲܢ̣ܚܸܬ̣ ܠܝܘܿܦܹܐ: ܘܐܸܫ̣ܟܲܚ ܐܸܠܦܵܐ ܕܥܵܐ̇ܠܵܐ ܠܬܲܪܫܝܼܫ: ܘܝܲܗ̄ܒ̣ ܐܲܓ̣ܪܵܐ ܘܲܢ̣ܚܸܬ̣ ܠܵܗ̇: ܠܡܸܥܲܠ ܥܲܡܗܘܿܢ ܠܬܲܪܫܝܼܫ: ܠܡܸܥܪܲܩ ܡ̣ܢ ܩܕ݂ܵܡ ܡܵܪܝܵܐ.

⁴ܘܡܵܪܝܵܐ ܐܲܪܡ̣ܝܼ ܪܘܼܚܵܐ ܪܲܒ̇ܬ̣ܵܐ ܒܝܲܡܵܐ: ܘܲܗܘ̤ܵܐ ܡܲܚܫܘܼܠܵܐ ܪܲܒܵܐ ܒܝܲܡܵܐ: ܘܐܸܠܦܵܐ ܡܸܬ̣ܗܲܦܟܵܐ ܗ̄ܘܼܵܬ̣ ܠܡܸܬ̇ܬ̇ܒ̣ܵܪܘܼ.

⁵ܘܲܕ݂ܚܸܠ̣ܘ ܡܲܠܵܚܹ̈ܐ: ܘܲܓ̣ܠܵܘ̣ ܐ̄ܢܵܫ ܠܘܵܬ̣ ܐܲܠܵܗܹܗ: ܘܲܫܕ݂ܵܘ ܡܵܐܢܹ̈ܐ ܡ̣ܢ ܐܸܠܦܵܐ ܒܝܲܡܵܐ: ܕܢܲܩܠܘܼܢ ܡܸܢܗܘܿܢ. ܝܵܘܢܵܢ ܕܹܝܢ ܢ̣ܚܸܬ̣ ܠܹܗ ܠܐܸܫܬܵܗ̇ ܕܐܸܠܦܵܐ ܘܲܕ݂ܡܸܟ݂.

⁶ܘܲܩ̣ܪܸܒ̣ ܠܘܵܬܹܗ ܪܲܒ̇ ܡܲܠܵܚܹ̈ܐ: ܘܐܸܡܲܪ ܠܹܗ: ܡܵܢܵܐ ܕܲܡܝܼܟ݂ ܐܲܢ̄ܬ̇: ܩܘܼܡ ܩܪܝܼ ܠܐܲܠܵܗܵܟ݂: ܟܒܲܪ ܢܦܲܨܹܝܢ ܐܲܠܵܗܵܐ: ܘܠܵܐ ܢܹܐܒܲܕ݂.

⁷ܘܐܸܡ̣ܲܪ ܓܒܲܪ ܠܚܲܒ̣ܪܹܗ: ܬܵܘ ܢܲܪܡܸܐ ܦܸܨܹ̈ܐ: ܘܢܸܕܲܥ ܒܝܼܫܬܵܐ ܗܵܕܹܐ ܡܸܛܠ ܡܲܢ ܐܸܬ̣ܵܬ̤ ܥܠܲܝܢ: ܘܐܲܪܡܝܼܘ ܦܸܨܹ̈ܐ: ܘܣܸܠܩܲܬ̤ ܦܸܨܬܹܗ ܕܝܵܘܢܵܢ.

⁸ܘܐܸܡ̣ܲܪܘ ܠܹܗ: ܚܵܘܵܢ ܒܝܼܫܬܵܐ ܗܵܕܹܐ ܡܸܛܠ ܡܵܢܵܐ ܐܸܬ̣ܵܬ̤ ܥܠܲܝܢ: ܡܵܢܵܘ ܥܒ̣ܵܕ݂ܵܟ݂: ܘܡ̣ܢ ܐܲܝܡܸܟܵܐ ܐܲܢ̄ܬ̇: ܘܐܲܝܕܵܐ ܗ̄ܝܼ ܐܲܪܥܵܟ݂: ܘܡ̣ܢ ܐܲܝܢܵܐ ܐܲܢ̄ܬ̇ ܥܲܡܵܐ.

⁹ܐܵܡܲܪ ܠܗܘܿܢ ܝܵܘܢܵܢ: ܥܸܒ̣ܪܵܝܵܐ ܐ̄ܢܵܐ: ܘܲܠܡܵܪܝܵܐ ܐܲܠܵܗܵܐ ܕܲܫܡܲܝܵܐ ܕܵܚܹ̇ܠ ܐ̄ܢܵܐ: ܕܲܥ̣ܒܲܕ݂ ܝܲܡܵܐ ܘܝܲܒ̣ܫܵܐ.

¹⁰ܘܲܕ݂ܚܸܠ̣ܘ ܓܲܒ̣ܪܹ̈ܐ ܗܵܢ̇ܘܿܢ ܕܸܚ̱ܠܬ̣ܵܐ ܪܲܒ̇ܬ̣ܵܐ: ܘܐܸܡܲܪܘ ܠܹܗ: ܡܵܢܵܐ ܥ̣ܒܲܕ̇ܬ̇: ܡܸܛܠ ܕܝܼܕܲܥ̣ܘ ܐ̄ܢܵܫܵܐ ܗܵܢܘܿܢ: ܕܡ̣ܢ ܩܕ݂ܵܡ ܡܵܪܝܵܐ ܥܪܲܩ̣.

¹¹ܘܟܲܕ݂ ܚܵܘܝܼ ܐܸܢܘܿܢ: ܐܵܡ̇ܪܝܼܢ ܠܹܗ: ܡܵܢܵܐ ܒܸܥܒܸܕ݂ ܠܵܟ݂ ܘܢܸܫܠܸܐ ܝܲܡܵܐ ܡܸܢܢ: ܡܸܛܠ ܕܝܲܡܵܐ ܗܵܐ ܐܵܙܹ̇ܠ ܘܡܸܬ̇ܕܲܠܲܚ ܥܠܲܝܢ.

¹²ܐܸܡ̣ܲܪ ܠܗܘܿܢ ܝܵܘܢܵܢ: ܫܘܼܩܠܘܼܢܝ ܘܐܲܪܡܵܐܘܼܢܝ ܒܝܲܡܵܐ: ܘܢܸܫܠܸܐ ܝܲܡܵܐ ܡܸܢܟ݂ܘܿܢ: ܡܸܛܠ ܕܝܵܕܲܥ ܐ̄ܢܵܐ ܕܗܵܢܵܐ ܡܲܚܫܘܼܠܵܐ ܪܲܒܵܐ ܡܸܛܠܵܬ̣ܝ ܗ̄ܘܼ ܗܘ̤ܵܐ ܥܠܲܝܟ̇ܘܿܢ.

¹³ܘܐܸܬ̣ܟܲܬܲܫܘ ܐ̄ܢܵܫܵܐ ܗܵܢ̇ܘܿܢ ܕܢܸܗܦܟ݂ܘܿܢ ܠܝܲܒ̣ܫܵܐ ܘܠܵܐ ܐܸܫ̣ܟܲܚܘ: ܡܸܛܠ ܕܝܲܡܵܐ ܐܵܙܹ̇ܠ ܗ̄ܘܼܵܐ ܘܡܸܬ̇ܕܲܠܲܚ ܥܠܲܝܗܘܿܢ.

¹⁴ܘܲܩ̣ܪܵܘ ܠܡܵܪܝܵܐ: ܘܐܸܡ̣ܲܪܘ: ܐܘܿܢ ܡܵܪܝܵܐ: ܠܵܐ ܢܹܐܒܲܪ ܒܢܲܦ̮ܫܹܗ ܕܓܲܒ̣ܪܵܐ ܗܵܢܵܐ: ܘܠܵܐ ܬܸܚܫܘܿܒ̣ ܥܠܲܝܢ ܕܡܵܐ ܙܲܟܵܝܵܐ: ܡܸܛܠ ܕܐܲܢ̄ܬ̇ ܗ̄ܘܼ ܡܵܪܝܵܐ: ܘܐܲܝܟ݂ ܕܨܵܒܹ̇ܐ ܐܲܢ̄ܬ̇ ܥܵܒܹ̇ܕ݂ ܐܲܢ̄ܬ̇.

¹⁵ܘܫܲܩ̣ܠܘܼܗܝ ܠܝܵܘܢܵܢ ܘܲܫܕ݂ܵܐܘܼܗܝ ܒܝܲܡܵܐ: ܘܐܸܬ̇ܬ̇ܢܝܼܚ ܝܲܡܵܐ ܡ̣ܢ ܡܲܚܫܘܼܠܵܘ̈ܗܝ.

¹⁶ܘܲܕ݂ܚܸܠ̣ܘ ܐ̄ܢܵܫܵܐ ܗܵܢ̇ܘܿܢ ܕܸܚ̱ܠܬ̣ܵܐ ܪܲܒ̇ܬ̣ܵܐ ܡ̣ܢ ܩܕ݂ܵܡ ܡܵܪܝܵܐ: ܘܕܲܒܲܚܘ ܕܸܒ̣ܚܹ̈ܐ ܠܡܵܪܝܵܐ: ܘܲܢܕܲܪܘ ܢܸܕ݂ܪܹ̈ܐ.

¹⁷ܘܛܲܝܸܒ̣ ܡܵܪܝܵܐ ܢܘܼܢܵܐ ܪܲܒܵܐ ܘܒܲܠܥܹܗ ܠܝܵܘܢܵܢ: ܘܲܗܘ̤ܵܐ ܝܵܘܢܵܢ ܒܲܡܥܵܘ̈ܗܝ ܕܢܘܼܢܵܐ: ܬܠܵܬ̣ܵܐ ܐܝܼܡܵܡܝܼ̈ܢ ܘܲܬ̣ܠܵܬ̣ܵܐ ܠܲܝ̈ܠܵܘܵܢ.