Read Aramaic Peshita Jonah 3 Bible Online

Jonah 3 - Aramaic Peshita bible

Jonah 3

¹ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܝܵܘܢܵܢ ܕܬܲܪܬܹ̇ܝܢ ܙܲܒ̣ܢ̈ܝܼܢ ܠܡܹܐܡܲܪ.

²ܩܘܼܡ ܙܸܠ ܠܢܝܼܢܘܹܐ ܡܕ݂ܝܼܢ̄ܬܵܐ ܪܲܒ̇ܬ̣ܵܐ: ܘܐܲܟ݂ܪܸܙ ܥܠܹܝܗ̇ ܟܵܪܘܿܙܘܼܬ̣ܵܐ ܕܐܵܡܲܪ ܐ̄ܢܵܐ ܠܵܟ݂.

³ܘܩܵܡ̣ ܝܵܘܢܵܢ ܘܐܸܙܲܠ̣ ܠܢܝܼܢܘܹܐ ܐܲܝܟ݂ ܡܸܠܬܹܗ ܕܡܵܪܝܵܐ: ܘܢܝܼܢܘܹܐ ܡܕ݂ܝܼܢ̄ܬܵܐ ܗ̄ܘܼܵܬ̣ ܪܲܒ̇ܬ̣ܵܐ ܠܐܲܠܵܗܵܐ: ܡܲܪܕܹ̇ܐ ܬܠܵܬ̣ܵܐ ܝܵܘܡ̈ܝܼܢ.

⁴ܘܫܲܪܝܼ ܝܵܘܢܵܢ ܠܡܸܥܲܠ ܠܢܝܼܢܘܹܐ ܡܲܪܕܹ̇ܐ ܝܵܘܡܵܐ ܚܲܕ݂: ܘܐܲܟ݂ܪܸܙ ܘܐܸܡܲܪ: ܡܸܟܵܐ ܠܐܲܪܒ̇ܥܝܼܢ: ܝܵܘܡ̈ܝܼܢ ܢܝܼܢܘܹܐ ܡܸܬ̣ܗܲܦܟܵܐ.

⁵ܘܗܲܝܡܸܢܘ ܐ̄ܢܵܫܹܝ̈ܗ̇ ܕܢܝܼܢܘܹܐ ܒܐܲܠܵܗܵܐ: ܘܲܦܣܲܩ̣ܘ ܨܵܘܡܵܐ: ܘܲܠܒܸܫ̣ܘ ܣܲܩܹ̈ܐ: ܡ̣ܢ ܪܵܘܪ̈ܒ̣ܵܢܲܝܗܘܿܢ ܘܲܥܕܲܡܵܐ ܠܲܙܥܘܿܪ̈ܲܝܗܘܿܢ.

⁶ܘܲܡܛܵܬ̤ ܡܸܠܬ̣ܵܐ ܠܡܲܠܟܵܐ ܕܢܝܼܢܘܹܐ: ܘܩܵܡ̣ ܡ̣ܢ ܟܘܼܪܣܝܹܗ: ܘܲܫ̣ܩܲܠ ܬܵܓܹܗ ܡܸܢܹܗ: ܘܲܠܒܸܫ ܣܲܩܵܐ: ܘܝܼܬܸܒ̣ ܥܲܠ ܩܸܛܡܵܐ.

⁷ܘܐܲܟ݂ܪܸܙܘ ܘܐܸܡ̣ܲܪ ܒܢܝܼܢܘܹܐ: ܡ̣ܢ ܦܘܼܩܕܵܢܵܐ ܕܡܲܠܟܵܐ ܘܲܕ݂ܪܵܘܪ̈ܒ̣ܵܢܵܘܗܝ: ܒܢܲܝ̈ܢܵܫܵܐ ܘܲܒ̣ܥܝܼܪܵܐ ܘܬ̣ܵܘܪܹ̈ܐ ܘܥܵـ̈ـܢܵܐ: ܠܵܐ ܢܸܛܥ̱ܡܘܼܢ ܡܸܕܸ̇ܡ ܘܠܵܐ ܢܸܪܥܘܿܢ: ܐܵܦܠܵܐ ܡܲـ̈ـܝܵܐ ܢܸܫܬ̄ܘܿܢ.

⁸ܐܸܠܵܐ ܢܸܬ̣ܟܲܣܘܿܢ ܣܲܩܹ̈ܐ ܒܢܲܝ̈ܢܵܫܵܐ ܘܲܒ̣ܥܝܼܪܵܐ: ܘܢܸܩܪܘܿܢܹܗ ܠܐܲܠܵܗܵܐ ܒܲܚܢܲܓ̣ܬ̣ܵܐ: ܘܢܸܗܦܘܿܟ݂ ܐ̄ܢܵܫ ܡ̣ܢ ܐܘܼܪܚܹܗ ܒܝܼܫܬܵܐ: ܘܡ̣ܢ ܚܛܘܼܦܝܵܐ ܕܐܝܼܬ̣ ܒܐܝܼܕ݂ܵܘ̈ܗܝ.

⁹ܡܲܢ ܝܵܕܲܥ ܐܸܢ ܡܸܬ̣ܦܢܸܐ ܐܲܠܵܗܵܐ ܘܲܡܪܲܚܸܡ ܥܠܲܝܢ: ܘܡܲܗܦܸܟ݂ ܡܸܢܲܢ ܚܸܡܬ̣ܵܐ ܕܪܘܼܓ̣ܙܹܗ ܕܠܵܐ ܢܹܐܒܲܕ݂.

¹⁰ܘܲܚܙܵܐ ܐܲܠܵܗܵܐ ܥܒ̣ܵܕܲܝ̈ܗܘܿܢ ܕܬ̣ܵܒ̣ܘ ܡ̣ܢ ܐܘܼܪ̈ܚܵܬ̣ܗܘܿܢ ܒܝܼ̈ܫܵܬ̣ܵܐ: ܘܐܲܦܸܟ݂ ܡܸܢܗܘܿܢ ܚܸܡܬ̣ܵܐ ܕܪܘܼܓ̣ܙܹܗ ܘܠܵܐ ܐܵܘܒܸ̇ܕ݂ ܐܸܢܘܿܢ.