Read Aramaic Peshita Numbers 16 Bible Online

Numbers 16 - Aramaic Peshita bible

Numbers 16

¹ܘܐܸܬ̣ܦܠܸܓ̣ ܩܘܿܪܚ ܒܲܪ ܝܲܨܗܵܪ: ܒܲܪ ܩܵܗܵܬ̣: ܒܲܪ ܠܹܘܝܼ: ܘܕ݂ܵܬ̣ܵܢ ܘܐܲܒ̣ܝܼܪܵܡ: ܒ̈ܢܲܝ ܐܹܠܝܲܒ̣: ܘܐܘܿܢ ܒܲܪ ܦܲܠܲܬ̣: ܒ̈ܢܲܝ ܪܘܼܒܹܝܠ.

²ܘܩܵܡܘ ܩܕ݂ܵܡ ܡܘܼܫܹܐ: ܘܓܲܒ̣ܪܹ̈ܐ ܡ̣ܢ ܒ̈ܢܲܝ ܝܼܣܪܵܝܹܠ: ܡܲܐܬܹ̇ܝܢ ܘܚܲܡܫܝܼܢ ܪܹ̈ܫܹܐ ܕܲܟ݂ܢܘܼܫܬܵܐ: ܕܡܸܬ̣ܩܪܹܝܢ ܠܙܲܒ̣ܢܵܐ ܓܲܒ̣ܪܹ̈ܐ ܕܲܫܡܵـ̈ـܗܵܬ̣ܵܐ.

³ܘܐܸܬ̣ܟܲܢܲܫܘ ܥܲܠ ܡܘܼܫܹܐ ܘܥܲܠ ܐܲܗܪܘܿܢ ܘܐܸܡܲܪܘ ܠܗܘܿܢ: ܠܵܐ ܟܲܕ̇ܘܼ ܠܟ݂ܘܿܢ ܕܟ݂ܠܵܗ̇ ܟܢܘܼܫܬܵܐ ܟܠܗܘܿܢ ܩܲܕ̇ܝܼܫܝܼܢ: ܘܡܵܪܝܵܐ ܒܗܘܿܢ: ܐܸܠܵܐ ܕܬܸܫܬܲܩܠܘܼܢ ܥܲܠ ܟܠܵܗ̇ ܟܢܘܼܫܬܹ̇ܗ ܕܡܵܪܝܵܐ.

⁴ܘܲܫܡܲܥ ܡܘܼܫܹܐ: ܘܲܢܦܲܠ ܥܲܠ ܐܲܦܵܘ̈ܗܝ.

⁵ܘܡܲܠܸܠ ܥܲܡ ܩܘܿܪܚ ܘܥܲܡ ܟܠܵܗ̇ ܟܢܘܼܫܬܹ̇ܗ: ܘܐܸܡܲܪ ܠܗܘܿܢ: ܒܨܲܦܪܵܐ ܢܚܵܘܹܐ ܡܵܪܝܵܐ ܡ̇ܢ ܕܕ݂ܝܼܠܹܗ ܗ̄ܘ̣: ܘܲܕ݂ܩܲܕ̇ܝܼܫ ܢܸܬ̣ܩܲܪܲܒ̣ ܓܘܵܬܹܗ: ܘܐܲܝܢܵܐ ܕܲܓ̣ܒܹܐ ܠܹܗ ܢܸܬ̣ܩܲܪܲܒ̣ ܠܘܵܬܹܗ.

⁶ܗܵܟܲܢܵܐ ܥܒܸܕ݂ܘ: ܣܲܒ̣ܘ ܠܟ݂ܘܿܢ ܦܝܼܪ̈ܡܹܐ: ܐܲܢ̄ܬ̇ ܩܘܿܪܲܚ ܘܟ݂ܠܵܗ̇ ܟܢܘܼܫܬܵܟ݂.

⁷ܘܣܝܼܡܘ ܒܗܘܿܢ ܢܘܼܪܵܐ: ܘܣܝܼܡܘ ܒܗܘܿܢ ܒܸܣܡܹ̈ܐ ܩܕ݂ܵܡ ܡܵܪܝܵܐ ܡܚܵܪ: ܘܓܲܒ̣ܪܵܐ ܕܓ̣ܵܒܹܐܠܹܗ ܡܵܪܝܵܐ: ܗ̤ܘ ܢܸܗܘܹܐ ܩܲܕܝܼܫ. ܟܲܕ̇ܘܼ ܠܟ݂ܘܿܢ ܒ̈ܢܲܝ ܠܹܘܝܼ.

⁸ܘܐܸܡܲܪ ܡܘܼܫܹܐ ܠܩܘܿܪܚ: ܫܡܲܥܘ ܬܘܼܒ̣ ܒ̈ܢܲܝ ܠܹܘܝܼ.

⁹ܠܵܐ ܟܲܕ̇ܘܼ ܠܟ݂ܘܿܢ ܕܲܦܪܲܫܟ݂ܘܿܢ ܐܲܠܵܗܵܐ ܕܝܼܣܪܵܝܹܠ ܡ̣ܢ ܟܠܵܗ̇ ܟܢܘܼܫܬܵܐ ܕܝܼܣܪܵܝܹܠ: ܘܩܲܪܸܒ̣ܟ݂ܘܿܢ ܠܘܵܬܹܗ ܠܡܸܦܠܲܚ ܦܘܼܠܚܵܢܵܐ ܕܡܲܫܟ̇ܢܹܗ ܕܡܵܪܝܵܐ: ܘܠܲܡܩܵܡ ܩܕ݂ܵܡ ܟܢܘܼܫܬܵܐ ܠܲܡܫܲܡܵܫܘܼ ܐܸܢܘܿܢ.

¹⁰ܘܩܲܪܒ̣ܵܟ݂ ܠܵܟ݂ ܘܲܠܟ݂ܠܗܘܿܢ ܐܲܚܲܝ̈ܟ ܒ̈ܢܲܝ ܠܹܘܝܼ ܥܲܡܵܟ݂: ܐܸܠܵܐ ܒܵܥܹ̇ܝܢ ܐ̄ܢܬ̇ܘܿܢ ܐܵܦ ܟܵܗܢܘܼܬ̣ܵܐ.

¹¹ܡܸܛܠ ܗܵܕܹܐ ܐܲܢ̄ܬ̇ ܘܟ݂ܠܵܗ̇ ܟܢܘܼܫܬܵܟ݂: ܐܸܬ̣ܘܲܥܲܕ݂ܘ ܩܕ݂ܵܡ ܡܵܪܝܵܐ ܡܚܵܪ. ܘܐܲܗܪܘܿܢ ܡܵܢܵܘ ܕܪܵܛܢܝܼܢ ܐ̄ܢܬ̇ܘܿܢ ܥܠܵܘܗܝ.

¹²ܘܫܲܕܲܪܘ ܡܘܼܫܹܐ ܠܡܸܩܪܵܐ ܠܕ݂ܵܬ̣ܵܢ ܘܠܲܐܒ̣ܝܼܪܵܡ ܒ̈ܢܲܝ ܐܹܠܝܲܒ̣: ܘܐܸܡܲܪܘ ܠܵܐ ܣܵܠܩܝܼܢܲܢ.

¹³ܠܵܐ ܟܲܕܘܼ ܠܟ݂ܘܿܢ ܕܐܲܣܩܬ̇ܘܿܢܵܢ ܡ̣ܢ ܐܲܪܥܵܐ ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ ܠܲܡܩܲܛܵܠܘܼܬܲܢ ܒܡܲܕ݂ܒ̇ܪܵܐ: ܐܸܠܵܐ ܡܸܬ̣ܪܵܘܪܒ̣ܝܼܬ̇ܘܿܢ ܥܠܲܝܢ ܐܵܦ ܡܸܬ̣ܪܵܘܪܵܒ̣ܘܼ.

¹⁴ܘܠܲܐܪܥܵܐ ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ ܠܵܐ ܐܲܥܸܠܬܵܢ: ܘܠܵܐ ܝܲܗ̄ܒ̣ܬ̇ ܠܲܢ ܝܵܪܬ̇ܘܼܬ̣ܵܐ ܕܚܲܩ̈ܠܵܬ̣ܵܐ ܘܲܕ݂ܟܲܪ̈ܡܹܐ. ܐܸܢ ܥܲܝܢܲܝ̈ܢ ܡܥܵܘܲܪ ܐܲܢ̄ܬ̇: ܠܵܐ ܣܵܠܩܝܼܢܲܢ.

¹⁵ܘܐܸܬ̣ܒ̇ܐܸܫ ܛܵܒ̣ ܠܡܘܼܫܹܐ: ܘܐܸܡܲܪ ܩܕ݂ܵܡ ܡܵܪܝܵܐ: ܠܵܐ ܬܸܦܢܹܐ ܥܲܠ ܩܘܼܪ̈ܒܵܢܲܝܗܘܿܢ: ܡܸܛܠ ܕܠܵܐ ܚܡܵܪܵܐ ܕܚܲܕ݂ ܡܸܢܗܘܿܢ ܕܸܒ̣ܪܹܬ̣: ܐܵܦܠܵܐ ܐܲܒ̣ܐ̱ܫܹܬ̣ ܠܚܲܕ݂ ܡܸܢܗܘܿܢ.

¹⁶ܘܐܸܡܲܪ ܡܘܼܫܹܐ ܠܩܘܿܪܚ: ܐܲܢ̄ܬ̇ ܘܟ݂ܠܵܗ̇ ܟܢܘܼܫܬܵܟ݂ ܗܘ̤ܵܘ ܩܕ݂ܵܡ ܡܵܪܝܵܐ: ܐܲܢ̄ܬ̇ ܘܗܸܢܘܿܢ ܘܐܲܗܪܘܿܢ ܡܚܵܪ.

¹⁷ܣܲܒ̣ܘ ܓܒܲܪ ܦܝܼܪܡܹܗ: ܘܣܝܼܡܘ ܒܗܘܿܢ ܢܘܼܪܵܐ: ܘܣܝܼܡܘ ܒܗܘܿܢ ܒܸܣܡܹ̈ܐ: ܘܩܲܪܸܒ̣ܘ ܩܕ݂ܵܡ ܡܵܪܝܵܐ ܓܒܲܪ ܦܝܼܪܡܹܗ: ܡܲܐܬܹ̇ܝܢ ܘܚܲܡܫܝܼܢ ܦܝܼܪ̈ܡܝܼܢ: ܘܐܲܢ̄ܬ̇ ܘܐܲܗܪܘܿܢ ܓܒܲܪ ܦܝܼܪܡܹܗ.

¹⁸ܘܲܢܣܲܒ̣ܘ ܓܒܲܪ ܦܝܼܪܡܹܗ: ܘܣܵܡ̣ܘ ܒܗܘܿܢ ܢܘܼܪܵܐ: ܘܣܵܡ̣ܘ ܒܗܘܿܢ ܒܸܣܡܹ̈ܐ: ܘܩܵܡ̣ܘ ܩܕ݂ܵܡ ܡܲܫܟܲܢ ܙܲܒ̣ܢܵܐ ܡܘܼܫܹܐ ܘܐܲܗܪܘܿܢ.

¹⁹ܘܟܲܢܸܫ ܥܠܲܝܗܘܿܢ ܩܘܼܪܚ ܠܟ݂ܠܵܗ̇ ܟܢܘܼܫܬܵܐ ܠܬܲܪܥܵܐ ܕܡܲܫܟ̇ܢ ܙܲܒ̣ܢܵܐ: ܘܐܸܬ̣ܓ̇ܠܝܼ ܫܘܼܒ̣ܚܹܗ ܕܡܵܪܝܵܐ ܥܲܠ ܟܠܵܗ̇ ܟܢܘܼܫܬܵܐ.

²⁰ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܥܲܡ ܐܲܗܪܘܿܢ: ܘܐܸܡܲܪ ܠܗܘܿܢ.

²¹ܐܸܬ̣ܦܲܪ̄ܫܘ ܡ̣ܢ ܓܵܘ ܟܢܘܼܫܬܵܐ ܗܵܕܹܐ: ܘܐܵܘܒܸ̇ܕ݂ ܐܸܢܘܿܢ ܒܲܚܕ݂ܵܐ ܫܵܥܵܐ.

²²ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܘܐܸܡܲܪܘ: ܐܹܝܠ ܐܲܠܵܗܵܐ ܕܪ̈ܘܼܚܵܬ̣ܵܐ ܕܟ݂ܠܒ̇ܣܲܪ: ܓܲܒ̣ܪܵܐ ܚܲܕ݂ ܢܸܚܛܹܐ. ܘܥܲܠ ܟܠܵܗ̇ ܟܢܘܼܫܬܵܐ ܢܸܗܘܹܐ ܪܘܼܓ̣ܙܵܐ.

²³ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²⁴ܡܲܠܸܠ ܥܲܡ ܟܠܵܗ̇ ܟܢܘܼܫܬܵܐ: ܘܐܸܡܲܪ ܠܗܘܿܢ: ܐܸܬ̣ܦܲܪ̄ܫܘ ܡ̣ܢ ܚܕ݂ܵܪ̈ܵܘܗܝ ܕܡܲܫܟ̇ܢܵܐ ܕܩܘܿܪܚ: ܘܲܕ̇ܕܵܬܲܢ: ܘܕܲܐܒ̣ܝܼܪܵܡ.

²⁵ܘܩܵܡ ܡܘܼܫܹܐ ܘܐܸܙܲܠ ܠܘܵܬ̣ ܕܵܬܲܢ ܘܐܲܒ̣ܝܼܪܵܡ: ܘܐܸܙܲܠܘ ܒܵܬ̣ܪܹܗ ܣܵܒܹ̈ܐ ܕܝܼܣܪܵܝܹܠ:

²⁶ܘܡܲܠܸܠ ܥܲܡ ܟܠܵܗ̇ ܟܢܘܼܫܬܵܐ ܘܐܸܡܲܪ ܠܗܘܿܢ: ܐܸܬ̣ܦܲܪ̄ܩܘ ܡ̣ܢ ܡܲܫܟ̇ܢܲܝ̈ܗܘܿܢ ܕܓܲܒ̣ܪܹ̈ܐ ܗܵܠܹܝܢ ܚܲܛܵܝܹ̈ܐ: ܘܠܵܐ ܬܸܬ̣ܩܲܪܒ̣ܘܼܢ ܠܟ݂ܠܡܸܕܸ̇ܡ ܕܐܝܼܬ̣ ܠܗܘܿܢ: ܕܠܵܐ ܬܸܒ̣ܠ̱ܥܘܼܢ ܒܲܚܛܵܗܲܝ̈ܗܘܿܢ.

²⁷ܘܐܸܬ̣ܦܲܪܲܩܘ ܡ̣ܢ ܡܲܫܟ̇ܢܵܐ ܕܩܘܿܪܚ: ܘܲܕ̇ܕܵܬ̣ܵܢ: ܘܕܲܐܒ̣ܝܼܪܵܡ. ܘܕ݂ܵܬ̣ܵܢ ܘܐܲܒ̣ܝܼܪܵܡ ܢܦܲܩܘ ܟܲܕ݂ ܩܵܝܡܝܼܢ ܒܬܲܪܥܵܐ ܕܡܲܫܟ̇ܢܲܝ̈ܗܘܿܢ: ܘܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ ܘܝܼܩܲܪܬ̇ܗܘܿܢ.

²⁸ܘܐܸܡܲܪ ܡܘܼܫܹܐ ܒܗܵܕܹܐ ܬܸܕ̇ܥܘܼܢ ܕܡܵܪܝܵܐ ܫܲܕ̇ܪܲܢܝ: ܠܡܸܥܒܲܕ݂ ܗܵܠܹܝܢ ܟܠܗܘܿܢ ܥܒ̣ܵܕܹ̈ܐ: ܘܠܵܐ ܗ̄ܘ̣ܵܐ ܡ̣ܢ ܪܸܥܝܵܢܝ.

²⁹ܐܸܢ ܐܲܝܟ݂ ܡܵܘܬܵܐ ܕܟܠܢܵܫ ܢܡܘܼܬ̣ܘܼܢ ܗܵܠܹܝܢ: ܘܦܘܼܩܕܵܢܵܐ ܐܲܝܟ݂ ܕܥܲܠ ܟܠܢܵܫ ܢܸܬ̣ܦ̄ܩܸܕ݂ ܥܠܲܝܗܘܿܢ: ܠܵܐ ܗ̄ܘ̣ܵܐ ܡܵܪܝܵܐ ܫܲܕ̇ܪܲܢܝ.

³⁰ܘܐܸܢ ܒܪܝܼܬ̣ܵܐ ܢܸܒ̣ܪܸܐ ܡܵܪܝܵܐ: ܘܬܸܦ̮ܬܲܚ ܐܲܪܥܵܐ ܦܘܼܡܵܗ̇: ܘܬܹܒ̣ܠܲܥ ܐܸܢܘܿܢ: ܠܗܘܿܢ ܘܲܠܟ݂ܠܡܸܕܸ̇ܡ ܕܐܝܼܬ̣ ܠܗܘܿܢ: ܘܢܸܚܬ̣ܘܿܢ ܟܲܕ݂ ܚܲܝܝܼܢ ܠܲܫܝܘܿܠ: ܬܸܕ̇ܥܘܼܢ ܕܐܲܪܓܸ̇ܙܘ ܓܲܒ̣ܪܹ̈ܐ ܗܵܠܹܝܢ ܠܡܵܪܝܵܐ.

³¹ܘܟܲܕ݂ ܫܲܠܸܡ ܡܘܼܫܹܐ ܠܡܹܐܡܲܪ ܗܵܠܹܝܢ ܟܠܗܘܿܢ ܦܸܬ̣ܓ̣ܵܡܹ̈ܐ: ܐܸܬ̣ܦܲܬ̣ܚܲܬ̤ ܐܲܪܥܵܐ ܕܲܬ̣ܚܘܿܬܲܝܗܘܿܢ.

³²ܘܦܸܬ̣ܚܲܬ̤ ܐܲܪܥܵܐ ܦܘܼܡܵܗ̇ ܘܒ̣ܠܥܲܬ̤ ܐܸܢܘܿܢ: ܠܗܘܿܢ ܘܲܠܒ̣ܵܬܲܝ̈ܗܘܿܢ ܘܲܠܟ݂ܠܗܘܿܢ ܒܢܲـ̈ܝܢܵܫܵܐ ܕܥܲܡ ܩܘܿܪܚ: ܘܲܠܟ݂ܠܹܗ ܩܸܢܝܵܢܗܘܿܢ.

³³ܘܲܢܚܸܬ̣ܘ ܗܸܢܘܿܢ: ܘܟ݂ܠܡܸܕܸ̇ܡ ܕܐܝܼܬ̣ ܠܗܘܿܢ ܟܲܕ݂ ܚܲܝܝܼܢ ܠܲܫܝܘܿܠ: ܘܐܸܬ̣ܟܲܣܝܲܬ̤ ܐܲܪܥܵܐ ܠܥܸܠ ܡܸܢܗܘܿܢ: ܘܐܸܒܲܕ݂ܘ ܡ̣ܢ ܓܵܘ ܟܢܘܼܫܬܵܐ.

³⁴ܘܟ݂ܠܗܘܿܢ ܒ̈ܢܲܝ ܝܼܣܪܵܝܹܠ ܕܒܲܚܕܵܪ̈ܲܝܗܘܿܢ ܥܪܲܩ̣ܘ ܡ̣ܢ ܩܵܠܗܘܿܢ: ܕܐܸܡܲܪܘ ܕܲܠܡܵܐ ܬܸܒ̣ܠܥܲܢ ܐܲܪܥܵܐ.

³⁵ܘܢܸܦܩܲܬ̤ ܢܘܼܪܵܐ ܡ̣ܢ ܩܕ݂ܵܡ ܡܵܪܝܵܐ: ܘܐܸܟ݂ܠܲܬ̤ ܠܡܲܐܬܹ̇ܝܢ ܘܚܲܡܫܝܼܢ ܓܲܒ̣ܪ̈ܝܼܢ ܕܲܡܩܲܪܒ̣ܝܼܢ ܗ̄ܘ̣ܵܘ ܒܸܣܡܹ̈ܐ.

³⁶ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

³⁷ܐܸܡܲܪ ܠܐܹܠܝܼܥܵܙܲܪ ܒܲܪ ܐܲܗܪܘܿܢ ܟܵܗܢܵܐ: ܣܲܒ̣ ܦܝܼܪ̈ܡܹܐ ܡ̣ܢ ܒܲܝܢܵܬ̣ ܡܵܘܩ̈ܕܹܐ: ܘܢܘܼܪܵܐ ܫܕ݂ܝܼ ܠܗܲܠ ܡܸܛܠ ܕܐܸܬ̣ܩܲܕܲܫܘ.

³⁸ܦܝܼܪ̈ܡܲܝܗܘܿܢ ܕܚܲܛܵܝܹ̈ܐ ܗܵܠܹܝܢ ܒܢܲܦ̮ܫܵܬ̣̈ܗܘܿܢ: ܘܲܥܒܸܕ݂ ܐܸܢܘܿܢ ܛܲܣܹ̈ܐ ܪܲܩܝܼܩܹܐ ܩܪܵܡܵܐ ܠܡܲܕ݂ܒ̇ܚܵܐ: ܡܸܛܠ ܕܩܲܪܸܒ̣ܘ ܐܸܢܘܿܢ ܩܕ݂ܵܡ ܡܵܪܝܵܐ: ܘܐܸܬ̣ܩܲܕܲܫܘ: ܢܸܗܘܘܿܢ ܠܐܵܬ̤ܵܐ ܒܲܒ̣̈ܢܲܝ ܝܼܣܪܵܝܹܠ.

³⁹ܘܲܢܣܲܒ̣ ܐܹܠܝܼܥܵܙܲܪ ܟܵܗܢܵܐ ܦܝܼܪ̈ܡܹܐ ܕܲܢܚܵܫܵܐ ܕܩܲܪܸܒ̣ܘ ܡܵܘܩ̈ܕܹܐ: ܘܐܲܪܸܩܘ ܐܸܢܘܿܢ ܛܲܣܹ̈ܐ ܠܡܲܕ݂ܒ̇ܚܵܐ.

⁴⁰ܕܘܼܟ݂ܪܵܢܵܐ ܠܲܒ̣̈ܢܲܝ ܝܼܣܪܵܝܹܠ: ܕܠܵܐ ܢܸܗܘܹܐ ܩܵܪܹܒ̣ ܓܲܒ̣ܪܵܐ ܢܘܼܟ݂ܪܵܝܵܐ ܐܲܝܢܵܐ ܕܠܵܐ ܗ̄ܘ̣ܵܐ ܡ̣ܢ ܙܲܪܥܹܗ ܕܐܲܗܪܘܿܢ: ܠܲܡܣܵܡ ܥܸܛܪܵܐ ܕܒܸܣܡܹ̈ܐ ܩܕ݂ܵܡ ܡܵܪܝܵܐ: ܘܠܵܐ ܢܸܗܘܹܐ ܐܲܝܟ݂ ܩܘܿܪܚ ܘܐܲܝܟ݂ ܟܢܘܼܫܬܹ̇ܗ: ܟܠܵܗ̇ ܕܦܸܬ̣ܚܲܬ̤ ܐܲܪܥܵܐ ܦܘܼܡܵܗ̇ ܘܒܸܠܥܲܬ̤ ܐܸܢܘܿܢ: ܐܲܝܟ݂ ܕܐܸܡܲܪ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ.

⁴¹ܘܲܪܛܲܢܘ ܟܠܵܗ̇ ܟܢܘܼܫܬܵܐ ܕܲܒ̣ܢܲܝ ܝܼܣܪܵܝܹܠ ܒܵܬܲܪ ܝܵܘܡܵܐ: ܥܲܠ ܡܘܼܫܹܐ ܘܥܲܠ ܐܲܗܪܘܿܢ: ܘܐܸܡܲܪܘ ܠܗܘܿܢ: ܐܲܢ̄ܬ̇ܘܿܢ ܩܛܲܠܬ̇ܘܿܢ ܠܥܲܡܹܗ ܕܡܵܪܝܵܐ.

⁴²ܘܟܲܕ݂ ܐܸܬ̣ܟܲܢܫܲܬ̤ ܟܠܵܗ̇ ܟܢܘܼܫܬܵܐ ܥܲܠ ܡܘܼܫܹܐ ܘܥܲܠ ܐܲܗܪܘܿܢ: ܐܸܬ̣ܦ̄ܢܝܼܘ ܠܡܲܫܟܲܢܙܲܒ̣ܢܵܐ: ܘܲܚܙܵܘ ܕܟܲܣܝܵܬܹܗ ܥܢܵܢܵܐ: ܘܐܸܬ̣ܓ̇ܠܝܼ ܫܘܼܒ̣ܚܹܗ ܕܡܵܪܝܵܐ.

⁴³ܘܐܸܬ̣ܵܐ ܡܘܼܫܹܐ ܘܐܲܗܪܘܿܢ ܩܕ݂ܵܡ ܡܲܫܟܲܢ ܙܲܒ̣ܢܵܐ.

⁴⁴ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ: ܘܐܸܡܲܪ ܠܗܘܿܢ.

⁴⁵ܐܸܬ̣ܦܲܪ̄ܫܘ ܡ̣ܢ ܓܵܘ ܟܢܘܼܫܬܵܐ ܗܵܕܹܐ: ܘܐܵܘܒܸ̇ܕ݂ ܐܸܢܘܿܢ ܒܲܚܕ݂ܵܐ ܫܵܥܵܐ. ܘܲܢܦܲܠܘ ܥܲܠ ܐܲܦܲܝ̈ܗܘܿܢ

⁴⁶ܡܘ: ܘܐܸܡܲܪ ܡܘܼܫܹܐ ܠܐܲܗܪܘܿܢ: ܣܲܒ̣ ܦܝܼܪܡܵܐ ܘܣܝܼܡ ܒܹܗ ܢܘܼܪܵܐ: ܘܣܝܼܡ ܒܹܗ ܒܸܣܡܹ̈ܐ: ܘܐܵܘܒܸ̇ܠ ܒܲܥܥܠ ܠܲܟ݂ܢܘܼܫܬܵܐ ܘܚܲܣܵܐ ܥܠܲܝܗܘܿܢ: ܡܸܛܠ ܕܲܢܦܲܩ ܪܘܼܓ̣ܙܵܐ ܡ̣ܢ ܩܕ݂ܵܡ ܡܵܪܝܵܐ: ܘܫܲܪܝܼ ܡܵܘܬܵܢܵܐ ܡ̣ܢ ܫܸܠܝܵܐ ܒܥܲܡܵܐ.

⁴⁷ܘܲܢܣܲܒ̣ ܐܲܗܪܘܿܢ ܐܲܝܟ݂ ܕܐܸܡܲܪ ܠܹܗ ܡܘܼܫܹܐ: ܘܲܪܗܸܛ ܠܓ̣ܵܘ ܟܢܘܼܫܬܵܐ: ܘܲܚܙ̣ܵܐ ܕܫܲܪܝܼ ܡܵܘܬܵܢܵܐ ܕܡ̣ܢ ܫܸܠܝܵܐ ܒܥܲܡܵܐ: ܘܣܵܡ ܒܸܣܡܹ̈ܐ ܘܚܲܣܝܼ ܥܲܠ ܥܲܡܵܐ.

⁴⁸ܘܩܵܡ ܒܹܝܬ̣ ܡܝܼ̈ܬܹܐ ܠܚܲܝܹ̈ܐ: ܘܐܸܬ̣ܟ̇ܠܝܼ ܡܘܬܵܢܵܐ ܕܡ̣ܢ ܫܸܠܝܵܐ.

⁴⁹ܘܲܗܘ̤ܵܘ ܕܡܝܼܬ̣ܘ ܒܡܵܘܬܵܢܵܐ ܕܡ̣ܢ ܫܸܠܝܵܐ: ܐܲܪܒܲܬܲܥܣܲܪ ܐܲܠܦ̈ܝܼܢ ܘܲܫܒܲܥ ܡܵܐܐ: ܣܛܲܪ ܡ̣ܢ ܕܡܝܼܬ̣ܘ ܒܦܵܠܓܘܼܬܹܗ ܕܩܘܿܪܚ.

⁵⁰ܘܲܗܦܲܟ݂ ܐܲܗܪܘܿܢ ܠܘܵܬ̣ ܡܘܼܫܹܐ ܠܬܲܪܥܵܐ ܕܡܲܫܟܲܢܙܲܒ̣ܢܵܐ: ܘܐܸܬ̣ܟ̇ܠܝܼ ܡܵܘܬܵܢܵܐ ܕܡ̣ܢ ܫܸܠܝܵܐ.