Read Aramaic Peshita Numbers 17 Bible Online

Numbers 17 - Aramaic Peshita bible

Numbers 17

¹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²ܡܲܠܸܠ ܥܲܡ ܒ̈ܢܲܝ ܝܼܣܪܵܝܹܠ: ܘܣܲܒ̣ ܡܸܢܗܘܿܢ ܫܲܒ̣ܛܵܐ ܫܲܒ̣ܛܵܐ ܠܒܹܝܬ̣ ܐܲܒ̣ܵܗܹ̈ܐ ܡ̣ܢ ܠܘܵܬ̣ ܟܠ ܪܵܘ̱ܪ̈ܒ̣ܵܢܲܝܗܘܿܢ: ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܬܪܸܥܣܲܪ ܫܲܒ̣̈ܛܝܼܢ. ܘܲܓ̣ܒܲܪ ܫܡܹܗ ܟܬ̣ܘܿܒ̣ ܥܲܠ ܫܲܒ̣ܛܹܗ.

³ܘܲܫܡܵܐ ܕܐܲܗܪܘܿܢ ܟܬ̣ܘܿܒ̣ ܥܲܠ ܫܲܒ̣ܛܵܐ ܕܠܹܘܝܼ: ܡܸܛܠ ܕܚܲܕ݂ ܚܲܕ݂ ܫܲܒ̣ܛܵܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ.

⁴ܘܣܝܼܡ ܐܸܢܘܿܢ ܒܡܲܫܟܲܢܙܲܒ̣ܢܵܐ ܩܕ݂ܵܡ ܣܵܗܕ̇ܘܼܬ̣ܵܐ: ܕܡܸܬ̣ܘܲܥܲܕ݂ ܐ̄ܢܵܐ ܠܟ݂ܘܿܢ ܬܲܡܵܢ.

⁵ܘܢܸܗܘܹܐ ܓܲܒ̣ܪܵܐ ܕܐܸܨܛܒܹܐ ܒܹܗ: ܢܵܘܥܹܐ ܫܲܒ̣ܛܹܗ: ܘܐܲܦܪܸܩ ܡܹܢܝ ܪܸܛܢܵܐ ܕܲܒ̣̈ܢܲܝ ܝܼܣܪܵܝܹܠ: ܕܲܡܪܲܛܢܝܼܢ ܥܠܲܝܟ̇ܘܿܢ.

⁶ܘܐܸܡܲܪ ܡܘܼܫܹܐ ܠܲܒ̣̈ܢܲܝ ܝܼܣܪܵܝܹܠ: ܘܝܲܗ̄ܒ̣ܘ ܠܹܗ ܟܠܗܘܿܢ ܪܵܘ̱ܪ̈ܒ̣ܵܢܲܝܗܘܿܢ: ܫܲܒ̣ܛܵܐ ܫܲܒ̣ܛܵܐ ܠܪܹܫܵܐ ܠܟ݂ܠܗܘܿܢ ܒܹܝܬ̣ ܐܲܒ̣ܵܗܲܝ̈ܗܘܿܢ: ܬܪܸܥܣܲܪ ܫܲܒ̣̈ܛܝܼܢ: ܘܫܲܒ̣ܛܵܐ ܕܐܲܗܪܘܿܢ ܒܓ̣ܵܘ ܫܲܒ̣̈ܛܲܝܗܘܿܢ:

⁷ܘܣܵܡ ܐܸܢܘܿܢ ܡܘܼܫܹܐ ܠܫܲܒ̣ܛܹ̈ܐ ܩܕ݂ܵܡ ܡܵܪܝܵܐ ܒܓ̣ܵܘ ܡܲܫܟܲܢܙܲܒ̣ܢܵܐ ܕܣܵܗܕ̇ܘܼܬ̣ܵܐ.

⁸ܘܲܠܝܵܘܡܵܐ ܐ̄ܚܪܹܢܵܐ: ܥܲܠ ܡܘܼܫܹܐ ܠܡܲܫܟ̇ܢܵܐ ܕܣܵܗܕ̇ܘܼܬ̣ܵܐ: ܘܲܚܙܵܐ ܕܐܲܦܪܲܥ ܫܲܒ̣ܛܵܐ ܕܐܲܗܪܘܿܢ ܕܒܹܝܬ̣ ܠܹܘܝܼ: ܘܐܲܦܸܩ ܛܲܪ̈ܦܹܐ ܘܲܟ݂ܦܲܬ̣ ܠܘܼܙܹ̈ܐ.

⁹ܘܐܲܦܸܩ ܐܸܢܘܿܢ ܡܘܼܫܹܐ: ܠܟ݂ܠܗܘܿܢ ܫܲܒ̣ܛܹ̈ܐ ܡ̣ܢ ܩܕ݂ܵܡ ܡܵܪܝܵܐ ܠܘܵܬ̣ ܟܠܗܘܿܢ ܒ̈ܢܲܝ ܝܼܣܪܵܝܹܠ: ܘܲܚܙܵܘ: ܘܲܢܣܲܒ̣ ܐ̄ܢܵܫ ܫܲܒ̣ܛܹܗ.

¹⁰ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܗܦܸܟ݂ ܫܲܒ̣ܛܵܐ ܕܐܲܗܪܘܿܢ ܩܕ݂ܵܡܘ ܣܵܗܕ̇ܘܼܬ̣ܵܐ: ܕܢܸܬ̣ܢ̱ܛܲܪ ܠܐܵܬ̤ܵܐ ܠܲܒ̣̈ܢܲܝܵܐ ܡܡܲܪܡܪܵܢܹܐ: ܕܢܸܓ̣ܡܲܪ ܪܸܛܢ̱ܗܘܿܢ ܡܹܢܝ ܘܠܵܐ ܢܡܘܼܬ̣ܘܼܢ.

¹¹ܘܲܥܒܲܕ݂ ܡܘܼܫܹܐ ܐܲܝܟ݂ ܕܦܲܩܕܹܗ ܡܵܪܝܵܐ ܗܵܟܲܢܵܐ ܥܒܲܕ݂.

¹²ܘܐܸܡܲܪܘ ܒ̈ܢܲܝ ܝܼܣܪܵܝܹܠ ܠܡܘܼܫܹܐ: ܗܵܐ ܣܵܦ̄ܢ ܘܐܸܒ̇ܕ̄ܢ: ܘܟ݂ܠܲܢ ܓ̣ܡܲܪ̄ܢ.

¹³ܘܟ݂ܠ ܕܡܸܬ̣ܩܲܪܲܒ̣ ܠܡܲܫܟ̇ܢܹܗ ܕܡܵܪܝܵܐ ܡܵܐܹ̇ܬ̣: ܘܗܵܐ ܐܵܦ ܚܢܲܢ ܐܲܩܸܦ̄ܢ ܠܲܡܣܵܦ.