Read Aramaic Peshita Numbers 25 Bible Online

Numbers 25 - Aramaic Peshita bible

Numbers 25

¹ܘܝܼܬܸܒ̣ ܝܼܣܪܵܝܹܠ ܒܣܵܛܝܼܡ: ܘܫܲܪܝܼ ܥܲܡܵܐ ܠܲܡܙܲܢܵܝܘܼ ܒܲܒ̣̈ܢܵܬ̣ ܡܘܼܐܵܒ̣.

²ܘܲܩܪ̈ܲܝ ܠܥܲܡܵܐ ܠܕܸܒ̣ܚܹ̈ܐ ܕܐܲܠܵܗܲܝ̈ܗܹܝܢ: ܘܐܸܟܲܠܘ ܥܲܡܵܐ ܘܲܣܓܸܕ݂ܘ ܠܐܲܠܵܗܲܝ̈ܗܹܝܢ.

³ܘܐܸܫܬܲܡܠܝܼ ܝܼܣܪܵܝܹܠ ܒܲܒ̣ܥܸܠ ܦܥܘܿܪ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܡܵܪܝܵܐ ܥܲܠ ܒ̈ܢܲܝ ܝܼܣܪܵܝܹܠ.

⁴ܘܐܸܡܲܪ ܡܵܪܝܵܐ ܠܡܘܼܫܹܐ: ܕܒܲܪ ܠܟ݂ܠܗܘܿܢ ܪܹ̈ܫܹܐ ܕܥܲܡܵܐ: ܘܦܲܪܣܵܐ ܐܸܢܘܿܢ ܩܕ݂ܵܡ ܡܵܪܝܵܐ ܠܘܼܩܒܲܠ ܫܸܡܫܵܐ: ܘܬܸܗܦܘܿܟ݂ ܚܸܡܬ̣ܵܐ ܕܪܘܼܓ̣ܙܝ ܡ̣ܢ ܒ̈ܢܲܝ ܝܼܣܪܵܝܹܠ.

⁵ܘܐܸܡܲܪ ܡܘܼܫܹܐ ܠܕܲܝܵܢܹ̈ܐ ܕܝܼܣܪܵܝܹܠ: ܩܛܘܿܠܘ ܐ̄ܢܵܫ ܓܲܒ̣ܪ̈ܵܘܗܝ ܐܲܝܠܹܝܢ ܕܐܸܫܬܲܡܠܝܼܘ ܒܲܒ̣ܥܸܠ ܦܥܘܿܪ.

⁶ܘܗܵܐ ܓܲܒ̣ܪܵܐ ܡ̣ܢ ܒ̈ܢܲܝ ܝܼܣܪܵܝܹܠ: ܐܸܬ̣ܵܐ ܘܩܪܸܒ̣ ܩܕ݂ܵܡ ܐܲܚܵܘ̈ܗܝ: ܘܥܲܠ ܥܲܠ ܡܸܕ݂ܝܵܢܵܝܬܵܐ: ܠܥܹܝܢ ܡܘܼܫܹܐ: ܘܲܠܥܹܝܢ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ. ܘܗܸܢܘܿܢ ܒܵܟ݂ܝܢ ܗ̄ܘ̣ܵܘ ܒܬܲܪܥܵܐ ܕܡܲܫܟܲܢܙܲܒ̣ܢܵܐ.

⁷ܘܲܚܙܵܝܗܝ ܦܝܼܢܚܸܣ ܒܲܪ ܐܹܠܝܼܥܵܙܲܪ ܒܲܪ ܐܲܗܪܘܿܢ ܟܵܗܢܵܐ: ܘܩܵܡ ܡ̣ܢ ܓܵܘ ܟܢܘܼܫܬܵܐ: ܘܲܢܣܲܒ̣ ܪܘܼܡܚܵܐ ܒܐܝܼܕܹܗ.

⁸ܘܥܲܠ ܒܵܬܲܪ ܓܲܒ̣ܪܵܐ ܒܲܪ ܝܼܣܪܵܝܹܠ ܠܩܸܠܵܝܬܵܐ: ܘܲܕ݂ܩܲܪ ܐܸܢܘܿܢ ܠܲܬ̣ܪ̈ܲܝܗܘܿܢ: ܠܓܲܒ̣ܪܵܐ ܒܲܪ ܝܼܣܪܵܝܹܠ ܘܠܲܐܢ̄ܬ̇ܬ̣ܵܐ ܒܟܲܪܣܵܗ̇ ܒܩܸܠܵܝܬܵܐ: ܘܐܸܬ̣ܟ̇ܠܝܼ ܡܵܘܬܵܢܵܐ ܕܡ̣ܢ ܫܸܠܝܵܐ ܡ̣ܢ ܝܼܣܪܵܝܹܠ:

⁹ܘܲܗܘ̤ܵܘ ܕܡܝܼܬ̣ܘ ܒܡܵܘܬܵܢܵܐ ܕܡ̣ܢ ܫܸܠܝܵܐ: ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹⁰ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

¹¹ܦܝܼܢܚܸܣ ܒܲܪ ܐܹܠܝܼܥܵܙܲܪ ܒܲܪ ܐܲܗܪܘܿܢ ܟܵܗܢܵܐ ܐܲܗܦܸܟ݂ ܚܸܡܬ̣ܝ ܡ̣ܢ ܒ̈ܢܲܝ ܝܼܣܪܵܝܹܠ: ܘܛܲܢ ܛܢܵܢܝ ܒܲܝܬ̣ܗܘܿܢ: ܘܠܵܐ ܐܵܘܒ̇ܕܹܬ̣ ܠܲܒ̣̈ܢܲܝ ܝܼܣܪܵܝܹܠ ܒܲܛܢܵܢܝ.

¹²ܡܸܛܠ ܗܵܢܵܐ ܐܸܡ̇ܪܹܬ̣: ܕܗܵܐ ܝܵܗܹ̇ܒ̣ ܐ̄ܢܵܐ ܠܹܗ ܩܝܵܡܵܐ ܕܲܫܠܵܡܵܐ.

¹³ܘܢܸܗܘܹܐ ܠܹܗ: ܘܠܲܒ̣ܢܵܘ̈ܗܝ ܡ̣ܢ ܒܵܬ̣ܪܹܗ: ܩܝܵܡܵܐ ܕܟ݂ܵܗܢܘܼܬ̣ܵܐ ܠܥܵܠܲܡ: ܚܠܵܦ ܕܛܲܢ ܒܐܲܠܵܗܹܗ: ܘܚܲܣܝܼ ܥܲܠ ܒ̈ܢܲܝ ܝܼܣܪܵܝܹܠ.

¹⁴ܘܲܫܡܹܗ ܕܓܲܒ̣ܪܵܐ ܒܲܪ ܝܼܣܪܵܝܹܠ ܩܛܝܼܠܵܐ: ܕܐܸܬ̣ܩܛܸܠ ܥܲܡ ܡܸܕ݂ܝܵܢܵܝܬܵܐ: ܙܲܡܪܝܼ ܒܲܪ ܣܲܠܘܿ: ܪܹܫ ܒܹܝܬ̣ ܐܲܒ̣ܵܗܹ̈ܐ ܕܫܲܒ̣ܛܵܐ ܕܫܸܡܥܘܿܢ.

¹⁵ܘܲܫܡܵܗ̇ ܕܐܲܢ̄ܬ̇ܬ̣ܵܐ ܡܸܕ݂ܝܵܢܵܝܬܵܐ: ܟܘܼܣܒ̇ܝܼ ܒܲܪܬ̣ ܨܘܿܪ: ܪܹܫ ܐܘܼܡܬ̣ܵܐ ܕܒܹܝܬ̣ ܐܲܒ̣ܵܗܹ̈ܝܗ̇ ܒܡܸܕ݂ܝܲܢ ܗ̤ܘܝܘܼ ܗܘ̤ܵܐ.

¹⁶ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

¹⁷ܐܲܥܝܼܩ ܠܡܸܕ݂ܝܵܢܵܝܹ̈ܐ: ܘܲܚܪܘܿܒ̣ ܐܸܢܘܿܢ.

¹⁸ܡܸܛܠ ܕܲܡܥܝܼܩܝܼܢ ܠܟ݂ܘܿܢ: ܒܢܸܟ݂ܠ̱ܗܘܿܢ ܕܐܸܬ̣ܢ̱ܟ݂ܠܘ ܥܠܲܝܟ̇ܘܿܢ ܒܲܨܒ̣ܘܼܬ̣ܵܐ ܕܲܦܥܘܿܪ: ܘܒܲܨܒ̣ܘܼܬ̣ܵܐ ܕܟ݂ܘܼܣܒܲܝ ܒܲܪܬ̣ ܪܹ̈ܫܹܐ ܕܡܸܕ݂ܝܲܢ ܚܵܬ̣ܗܘܿܢ: ܕܐܸܬ̣ܩܲܛܠܲܬ̤ ܒܝܵܘܡܵܐ ܕܲܡܚܘܿܬ̣ܵܐ ܕܡ̣ܢ ܫܸܠܝܵܐ ܒܲܨܒ̣ܘܼܬ̣ܵܐ ܕܲܦܥܘܿܪ.