Read Aramaic Peshita Numbers 27 Bible Online

Numbers 27 - Aramaic Peshita bible

Numbers 27

¹ܘܲܩܪܸܒ̣ ܒ̈ܢܵܬܹܗ ܕܲܨܠܝܼܦܚܲܕ݂: ܒܲܪ ܚܵܦܵܪ: ܒܲܪ ܓܸܠܥܵܕ݂: ܒܲܪ ܡܵܟ݂ܝܼܪ: ܒܲܪ ܡܢܲܫܹܐ: ܡ̣ܢ ܫܲܪܒ̇ܬ̣ܵܐ ܕܲܡܢܲܫܹܐ ܒܲܪ ܝܵܘܣܸܦ: ܘܗܵܠܹܝܢ ܫܡܵܗܹ̈ܐ ܕܲܒ̣̈ܢܵܬܹܗ: ܡܲܚܠܵܐ: ܘܝܲܥܵܐ: ܘܚܲܓ̣ܠܵܐ: ܘܡܸܠܟܵܐ: ܘܬܲܪܨܵܐ.

²ܘܩܵܡ ܩܕ݂ܵܡ ܡܘܼܫܹܐ: ܘܲܩܕ݂ܵܡ ܐܹܠܝܼܥܵܙܲܪ ܟܵܗܢܵܐ: ܘܲܩܕ݂ܵܡ ܪܵܘ̱ܪ̈ܒ̣ܵܢܹܐ: ܘܲܩܕ݂ܵܡ ܟܠܵܗ̇ ܟܢܘܼܫܬܵܐ: ܒܬܲܪܥܵܐ ܕܡܲܫܟܲܢ ܙܲܒ̣ܢܵܐ: ܘܐܵܡ̇ܪ̈ܵܢ.

³ܐܲܒ̣ܘܼܢ ܡܝܼܬ̣ ܒܡܲܕ݂ܒ̇ܪܵܐ: ܘܠܵܐ ܗ̄ܘ̣ܵܐ ܒܓ̣ܵܘ ܟܢܘܼܫܬܵܐ ܗ̄ܘ̣ܵܐ ܗܵܝ̇ ܕܩܵܡܲܬ̣ ܩܕ݂ܵܡ ܡܵܪܝܵܐ ܒܲܟ݂ܢܘܼܫܬܹ̇ܗ ܕܩܘܿܪܚ: ܡܸܛܠ ܕܒܲܚܛܵܗܵܘ̈ܗܝ ܓܹܝܪ ܡܝܼܬ̣: ܘܲܒ̣ܢܲـ̈ـܝܵܐ ܠܵܐ ܗܘ̤ܵܘ ܠܹܗ.

⁴ܠܡܵܢܵܐ ܡܸܬ̣̱ܥܛܹܐ ܫܡܹܗ ܕܐܲܒ̣ܘܼܢ ܡ̣ܢ ܓܵܘ ܫܲܪܒ̇ܬܹܗ ܕܠܲܝܬ̇ ܠܹܗ ܒܪܵܐ: ܗܲܒ̣ ܠܲܢ ܝܵܪܬ̇ܘܼܬ̣ܵܐ ܒܲܝܢܵܬ̣ ܐܲܚܹ̈ܐ ܕܐܲܒ̣ܘܼܢ.

⁵ܘܩܲܪܸܒ̣ ܡܘܼܫܹܐ ܕܝܼܢܗܹܝܢ ܩܕ݂ܵܡ ܡܵܪܝܵܐ.

⁶ܘܐܸܡܲܪ ܡܵܪܝܵܐ ܠܡܘܼܫܹܐ.

⁷ܟܸܐܢܵܐܝܼܬ̣ ܐܵܡܪ̈ܵܢ ܒܢܵܬܹ̈ܗ ܕܲܨܠܸܦܚܲܕ݂: ܗܲܒ̣ ܠܗܹܝܢ ܐܘܼܚܕܵܢܵܐ ܝܵܪܬ̇ܘܼܬ̣ܵܐ ܒܲܝܢܵܬ̣ ܐܲܚܵܘ̈ܗܝ ܕܐܲܒ̣ܘܼܗܹܝܢ: ܘܐܲܩܝܼܡ ܠܗܹܝܢ ܝܵܪܬ̇ܘܼܬ̣ܵܐ ܕܐܲܒ̣ܘܼܗܹܝܢ.

⁸ܘܐܸܡܲܪ ܠܲܒ̣̈ܢܲܝ ܝܼܣܪܵܝܹܠ: ܓܲܒ̣ܪܵܐ ܟܲܕ݂ ܢܡܘܼܬ̣ ܘܠܲܝܬ̇ ܠܹܗ ܒܪܵܐ: ܗܲܒ̣ܘ ܝܵܪܬ̇ܘܼܬܹܗ ܠܒܲܪܬܹܗ.

⁹ܘܐܸܢ ܠܲܝܬ̇ ܠܹܗ ܒܲܪܬ̣ܵܐ: ܗܲܒ̣ܘ ܝܵܪܬ̇ܘܼܬܹܗ ܠܐܲܚܵܘ̈ܗܝ.

¹⁰ܘܐܸܢ ܠܲܝܬ̇ ܠܹܗ ܐܲܚܹ̈ܐ: ܗܲܒ̣ܘ ܝܵܪܬ̇ܘܼܬܹܗ ܠܕ݂ܵܕ݂ܵܘ̈ܗܝ.

¹¹ܘܐܸܢ ܠܲܝܬ̇ ܠܹܗ ܕܵܪܹ̈ܐ: ܗܲܒ̣ܘ ܝܵܪܬ̇ܘܼܬܹܗ ܠܐܲܝܢܵܐ ܕܩܲܪܝܼܒ̣ ܠܹܗ ܡ̣ܢ ܫܲܪܒ̇ܬܹܗ ܘܢܹܐܪܬ̇ܝܼܘܗܝ: ܘܢܸܗܘܹܐ ܠܲܒ̣̈ܢܲܝ ܝܼܣܪܵܝܹܠ ܢܵܡܘܿܣܵܐ ܕܕ݂ܝܼܢܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

¹²ܘܐܸܡܲܪ ܡܵܪܝܵܐ ܠܡܘܼܫܹܐ: ܣܲܩ ܠܛܘܼܪܵܐ ܗܵܢܵܐ ܕܥܸܒ̣ܪ̈ܵܝܹܐ: ܘܲܚܙܝܼܗ̇ ܠܐܲܪܥܵܐ ܕܲܟ݂ܢܲܥܢ ܕܝܵܗܹ̇ܒ̣ ܐ̄ܢܵܐ ܠܲܒ̣̈ܢܲܝ ܝܼܣܪܵܝܹܠ.

¹³ܚܙܝܼܗ̇ ܘܐܸܬ̣ܟܲܢ̄ܫ ܐܵܦ ܐܲܢܬ̇ ܠܘܵܬ̣ ܥܲܡܵܟ݂: ܐܲܝܟ݂ ܕܐܸܬ̣ܟܲܢܸܫ ܐܲܗܪܘܿܢ ܐܲܚܘܼܟ݂.

¹⁴ܥܲܠ ܕܡܲܪܡܲܪܬ̇ܗܘܿܢ ܡܸܠܲܬ̣ ܦܘܼܡܝ ܒܡܲܕ݂ܒ̇ܪܵܐ ܕܨܝܼܢ: ܒܡܲܨܘܼܬ̣ܵܐ ܕܲܟ݂ܢܘܼܫܬܵܐ: ܘܠܵܐ ܩܲܕ݂ܫܬ̇ܘܿܢܵܢܝ ܒܡܲـ̈ـܝܵܐ ܠܥܹܢܲܝܗܘܿܢ ܗܵܢܘܿܢ ܐܸܢܘܿܢ ܡܲـ̈ـܝܵܐ ܕܡܲܨܘܼܬ̣ܵܐ: ܕܲܪܩܸܡ ܒܡܲܕ݂ܒ̇ܪܵܐ ܕܨܝܼܢ. : ܘܡܲܠܸܠ ܡܘܼܫܹܐ

¹⁵ܩܕ݂ܵܡ ܡܵܪܝܵܐ: ܘܐܸܡܲܪ.

¹⁶ܢܸܦܩܘܿܕ݂ ܡܵܪܝܵܐ ܐܲܠܵܗܵܐ ܕܪ̈ܘܼܚܵܬ̣ܵܐ ܕܟ݂ܠܒ̇ܣܲܪ ܓܲܒ̣ܪܵܐ ܚܲܕ݂ ܥܲܠ ܟܢܘܼܫܬܵܐ.

¹⁷ܕܢܸܦܘܿܩ ܩܕ݂ܵܡܲܝܗܘܿܢ: ܘܲܕ݂ܢܸܥܘܿܠ ܩܕ݂ܵܡܲܝܗܘܿܢ: ܘܲܕ݂ܢܲܦܸܩ ܐܸܢܘܿܢ: ܘܲܕ݂ܢܲܥܸܠ ܐܸܢܘܿܢ: ܕܠܵܐ ܬܸܗܘܹܐ ܟܢܘܼܫܬܹ̇ܗ ܕܡܵܪܝܵܐ ܐܲܝܟ݂ ܥܵـ̈ـܢܵܐ ܕܠܲܝܬ̇ ܠܵܗ̇ ܪܵܥܝܵܐ.

¹⁸ܘܐܸܡܲܪ ܡܵܪܝܵܐ ܠܡܘܼܫܹܐ: ܕܒܲܪ ܠܵܟ݂ ܠܝܼܫܘܿܥ ܒܲܪܢܘܿܢ ܓܲܒ̣ܪܵܐ ܕܪܘܼܚܵܐ ܒܹܗ: ܘܣܝܼܡ ܐܝܼܕ݂ܵܟ݂ ܥܠܵܘܗܝ.

¹⁹ܘܐܲܩܝܼܡܲܝܗܝ ܩܕ݂ܵܡ ܐܹܠܝܼܥܵܙܲܪ ܟܵܗܢܵܐ: ܘܲܩܕ݂ܵܡ ܟܠܵܗ̇ ܟܢܘܼܫܬܵܐ: ܘܦܲܩܕܲܝܗܝ ܠܥܹܢܲܝܗܘܿܢ:

²⁰ܘܗܲܒ̣ ܡ̣ܢ ܫܘܼܒ̣ܚܵܟ݂ ܥܠܵܘܗܝ: ܕܢܸܫܡ̱ܥܘܼܢܹܗ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ.

²¹ܘܲܩܕ݂ܵܡ ܐܹܠܝܼܥܵܙܲܪ ܟܵܗܢܵܐ ܢܩܘܼܡ: ܘܢܸܗܘܹܐ ܫܵܐܹ̇ܠ ܠܹܗ ܢܵܡܘܿܣܵܐ ܕܫܸܐ̱ܠܬ̣ܵܐ ܩܕ݂ܵܡ ܡܵܪܝܵܐ. ܒܡܸܠܲܬ̣ ܦܘܼܡܹܗ ܢܸܗܘܘܿܢ ܢܵܦܩܝܼܢ: ܘܲܒ̣ܡܸܠܲܬ̣ ܦܘܼܡܹܗ ܥܵܐ̇ܠܝܼܢ: ܘܟ݂ܠܗܘܿܢ ܒ̈ܢܲܝ ܝܼܣܪܵܝܹܠ ܥܲܡܹܗ: ܘܟ݂ܠܵܗ̇ ܟܢܘܼܫܬܵܐ.

²²ܘܲܥܒܲܕ݂ ܡܘܼܫܹܐ ܐܲܝܟ݂ ܕܦܲܩܕܹܗ ܡܵܪܝܵܐ: ܘܲܕ݂ܒܲܪ ܠܝܼܫܘܿܥ: ܘܐܲܩܝܼܡܹܗ ܩܕ݂ܵܡ ܐܸܠܝܼܥܵܙܲܪ ܟܵܗܢܵܐ: ܘܲܩܕ݂ܵܡ ܟܠܵܗ̇ ܟܢܘܼܫܬܵܐ:

²³ܘܣܵܡ ܐܝܼܕܹܗ ܥܠܵܘܗܝ: ܘܦܲܩܕܹܗ: ܐܲܝܟܲܢܵܐ ܕܡܲܠܸܠ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ.