Read Aramaic Peshita Numbers 28 Bible Online

Numbers 28 - Aramaic Peshita bible

Numbers 28

¹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ:

²ܦܲܩܸܕ݂ ܠܲܒ̣̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܩܘܼܪ̈ܒܵܢܲܝ: ܘܠܲܚܡܵܐ ܕܩܘܼܪ̈ܒܵܢܲܝ: ܘܪܹܝܚܵܐ ܕܲܣܘܵܬ̣ܵܐ: ܢܸܗܘܘܿܢ ܢܵܛܪܝܼܢ ܘܲܡܩܲܪܒ̣ܝܼܢ ܠܝܼ ܒܙܲܒ̣ܢܲܝ̈ܗܘܿܢ.

³ܘܐܸܡܲܪ ܠܗܘܿܢ: ܗܵܢܵܐ ܩܘܼܪܒܵܢܵܐ ܕܬܸܗܘܘܿܢ ܡܩܲܪܒ̣ܝܼܢ ܠܡܵܪܝܵܐ: ܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܕܠܲܝܬ̇ ܒܗܘܿܢ ܡܘܼܡܵܐ: ܬܪܹܝܢ ܒܝܵܘܡܵܐ ܠܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣.

⁴ܐܸܡܪܵܐ ܚܲܕ݂ ܩܲܪܸܒ̣ ܒܨܲܦܪܵܐ: ܘܐܸܡܪܵܐ ܐ̄ܚܪܹܢܵܐ ܩܲܪܸܒ̣ ܒܹܝܬ̣ ܪܲܡܫܹܐ.

⁵ܘܚܲܕ݂ ܡ̣ܢ ܠܣܲܐܬ̣ܵܐ ܢܫܝܼܦܵܐ: ܩܘܼܪܒܵܢܵܐ ܕܦܝܼܠ ܒܡܸܫܚܵܐ ܥܨܝܼܪܵܐ ܪܘܼܒ̣ܥܹܗ ܕܗܹܡܝܼܢܵܐ.

⁶ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣: ܕܐܸܬ̣ܥ̱ܒܸܕ݂ ܒܛܘܼܪܵܐ ܕܣܝܼܢܲܝ: ܠܪܹܝܚܵܐ ܕܲܣܘܵܬ̣ܵܐ ܩܘܼܪܒܵܢܵܐ ܠܡܵܪܝܵܐ.

⁷ܘܢܘܼܩܵܝܹܗ ܚܲܡܪܵܐ ܪܘܼܒ̣ܥܹܗ ܕܗܹܡܝܼܢܵܐ: ܠܐܸܡܪܵܐ ܚܲܕ݂: ܒܩܘܼܕ݂ܫܵܐ ܢܸܬ̣ܢܲܩܐ ܢܘܼܩܵܝܵܐ ܕܥܲܬ̇ܝܼܩܵܐ ܩܕ݂ܵܡ ܡܵܪܝܵܐ.

⁸ܘܐܸܡܪܵܐ ܐܚܪܹܢܵܐ ܥܒܸܕ݂ ܒܹܝܬ̣ ܪ̈ܲܡܫܹܐ: ܐܲܝܟ݂ ܩܘܼܪܒܵܢܵܐ ܕܨܲܦܪܵܐ: ܘܐܲܝܟ݂ ܢܘܼܩܵܝܹܗ ܥܒܸܕ݂: ܩܘܼܪܒܵܢܵܐ ܠܪܹܝܚܵܐ ܕܲܣܘܵܬ̣ܵܐ ܠܡܵܪܝܵܐ.

⁹ܘܲܒ̣ܝܵܘܡܵܐ ܕܫܲܒ̇ܬ̣ܵܐ: ܐܸܡܪܹ̈ܐ ܬܪܹܝܢ ܒ̈ܢܲܝ ܫܲܢ̄ܬܵܐ ܕܠܲܝܬ̇ ܒܗܘܿܢ ܡܘܼܡܵܐ: ܘܲܬ̣ܪܹܝܢ ܥܸܣܪ̈ܘܿܢܝܼܢ ܢܫܝܼܦܵܐ ܕܩܘܼܪܒܵܢܵܐ ܕܦܝܼܠ ܒܡܸܫܚܵܐ: ܘܢܘܼܩܵܝܹܗ.

¹⁰ܝܲܩܕܵܐ ܫܲܠܡܵܐ ܕܫܲܒ̇ܬ̣ܵܐ ܒܫܲܒ̇ܬ̣ܵܐ: ܥܲܠ ܩܲܝܕܵܐ ܫܲܠܡܵܐ ܐܲܡܝܼܢܵܐܝܼܬ̣: ܘܢܘܼܩܵܝܹܗ.

¹¹ܘܲܒ̣ܪܹܫ ܝܲܪ̈ܚܲܝܟ̇ܘܿܢ: ܩܲܪܸܒ̣ܘ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܬܵܘܪܹ̈ܐ ܒ̈ܢܲܝ ܒܲܩܪܵܐ ܬܪܹܝܢ: ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܫܲܢ̄ܬܵܐ ܫܲܒ̣ܥܵܐ ܕܠܲܝܬ̇ ܒܗܘܿܢ ܡܘܼܡܵܐ.

¹²ܘܲܬ̣ܠܵܬ̣ܵܐ ܥܸܣܪ̈ܘܿܢܝܼܢ ܢܫܝܼܦܵܐ ܕܩܘܼܪܒܵܢܵܐ ܕܦܝܼܠ ܒܡܸܫܚܵܐ ܠܬ̣ܵܘܪܵܐ ܚܲܕ݂: ܘܲܬ̣ܪܹܝܢ ܥܸܣܪ̈ܘܿܢܝܼܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܕܸܟ݂ܪܵܐ ܚܲܕ݂.

¹³ܘܥܸܣܪܘܿܢܵܐ ܚܲܕ݂ ܢܫܝܼܦܵܐ ܕܩܘܼܪܒܵܢܵܐ ܕܦܝܼܠ ܒܡܸܫܚܵܐ ܠܐܸܡܪܵܐ ܚܲܕ݂: ܝܲܩܕܵܐ ܫܲܠܡܵܐ ܠܪܹܝܚ ܣܘܵܬ̣ܵܐ ܠܡܵܪܝܵܐ.

¹⁴ܘܢܘܼܩܵܝܗܘܿܢ ܚܲܡܪܵܐ: ܦܠܸܓܹ̇ܗ ܕܗܹܡܝܼܢܵܐ ܢܸܗܘܹܐ ܠܬ̣ܵܘܪܵܐ: ܘܬ̣ܘܼܠܬܹܗ ܕܗܹܡܝܼܢܵܐ ܢܸܗܘܹܐ ܠܕܸܟ݂ܪܵܐ: ܘܪܘܼܒ̣ܥܹܗ ܕܗܹܡܝܼܢܵܐ ܠܐܸܡܪܵܐ: ܗܵܢܵܘ ܝܲܩܕܵܐ ܫܲܠܡܵܐ ܕܪܹܫ ܝܲܪܚܵܐ ܒܟ݂ܠܗܘܿܢ ܝܲܪ̈ܚܹܐ ܕܫܲܢ̄ܬܵܐ.

¹⁵ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ ܠܡܵܪܝܵܐ: ܥܲܠ ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣ ܢܸܬ̣ܥ̱ܒܸܕ݂: ܗ̤ܘ ܘܢܘܼܩܵܝܹܗ.

¹⁶ܘܒܲܐܪܒܲܥܸܣܪܵܐ ܒܝܲܪܚܵܐ ܩܲܕ݂ܡܵܝܵܐ ܦܸܨܚܵܐ ܗ̄ܘ̣ ܠܡܵܪܝܵܐ.

¹⁷ܘܲܒܚܲܡܫܵܥܸܣܪܵܐ ܒܹܗ ܒܝܲܪܚܵܐ ܥܲܕ݂ܥܹܕܵܐ: ܫܲܒ̣ܥܵܐ ܝܵܘ̈ܡܝܼܢ ܦܲܛܝܼܪܵܐ ܢܸܬ̣ܐ̱ܟܸܠ.

¹⁸ܝܵܘܡܵܐ ܩܲܕ݂ܡܵܝܵܐ ܩܲܪܝܵܐ ܘܩܲܕ̇ܝܼܫܵܐ: ܘܟ݂ܠ ܥܒ̣ܵܕܵܐ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ.

¹⁹ܘܩܲܪܸܒ̣ܘ ܩܘܼܪ̈ܒܵܢܹܐ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܬܵܘܪܹ̈ܐ ܒ̈ܢܲܝ ܒܲܩܪܵܐ ܬܪܹܝܢ: ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܫܲܒ̣ܥܵܐ: ܕܠܲܝܬ̇ ܒܗܘܿܢ ܡܘܼܡܵܐ ܢܸܗܘܘܿܢ ܠܟ݂ܘܿܢ .

²⁰ܘܩܘܼܪܒܵܢܗܘܿܢ ܢܫܝܼܦܵܐ ܕܦܝܼܠ ܒܡܸܫܚܵܐ: ܬܠܵܬ̣ܵܐ ܥܸܣܪ̈ܘܿܢܝܼܢ ܠܬ̣ܵܘܪܵܐ: ܘܲܬ̣ܪܹܝܢ ܥܸܣܪ̈ܘܿܢܝܼܢ ܠܕܸܟ݂ܪܵܐ ܬܸܥܒ̇ܕ݂ܘܼܢ.

²¹ܘܥܸܣܪܘܿܢܵܐ ܚܲܕ݂ ܠܐܸܡܪܵܐ ܚܲܕ݂ ܗܵܟܲܢܵܐ ܥܒܸܕ݂ܘ ܠܫܲܒ̣ܥܵܬܲܝ̈ܗܘܿܢ ܐܸܡܪܹ̈ܐ.

²²ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ ܠܲܡܚܲܣܵܝܘܼ ܥܠܲܝܟ̇ܘܿܢ.

²³ܠܒܲܪ ܡ̣ܢ ܝܲܩܕܵܐ ܫܲܠܡܵܐ ܕܨܲܦܪܵܐ: ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣ ܬܸܥܒ̇ܕ݂ܘܼܢ.

²⁴ܗܵܠܹܝܢ ܗ̤ܘܲܝܬ̇ܘܿܢ ܥܵܒ̣ܕ̇ܝܼܢ ܒܟ݂ܠܝܘܿܡ ܫܲܒ̣ܥܵܐ ܝܵܘ̈ܡܝܼܢ: ܩܘܼܪܒܵܢܵܐ ܕܠܲܚܡܵܐ ܠܪܹܝܚܵܐ ܕܲܣܘܵܬ̣ܵܐ ܠܡܵܪܝܵܐ: ܥܲܠ ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣ ܢܸܬ̣ܥ̱ܒܸܕ݂: ܗ̤ܘ ܘܢܘܼܩܵܝܹܗ.

²⁵ܘܝܵܘܡܵܐ ܕܫܲܒ̣ܥܵܐ ܩܲܪܝܵܐ ܘܩܲܕ̇ܝܼܫܵܐ ܢܸܗܘܹܐ ܠܟ݂ܘܿܢ: ܘܟ݂ܠ ܥܒ̣ܵܕ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ.

²⁶ܘܲܒ̣ܝܵܘܡܵܐ ܕܒܲܟܵܪܹ̈ܐ: ܡܵܐ ܕܲܡܩܲܪܒ̣ܝܼܢ ܐ̄ܢܬ̇ܘܿܢ ܣܡܝܼܕ݂ܵܐ ܡ̣ܢ ܚܲܕ݂ܬ̣ܵܐ ܠܡܵܪܝܵܐ: ܒܫܵܒ̣ܘܿܥܲܝ̈ܟ̇ܘܿܢ: ܩܲܪܝܵܐ ܘܩܲܕ̇ܝܼܫܵܐ ܢܸܗܘܹܐ ܠܟ݂ܘܿܢ: ܘܟܠ ܥܒ̣ܵܕ݂ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ.

²⁷ܘܩܲܪܸܒ̣ܘ ܝܲܩ̈ܕܹ̇ܐ ܫܲܠܡܹ̈ܐ ܠܪܹܝܚ ܣܘܵܬ̣ܵܐ ܠܡܵܪܝܵܐ: ܬܵܘܪܹ̈ܐ ܒ̈ܢܲܝ ܒܲܩܪܵܐ ܬܪܹܝܢ: ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܫܲܒ̣ܥܵܐ.

²⁸ܘܩܘܼܪܒܵܢܗܘܿܢ ܢܫܝܼܦܵܐ ܕܦܝܼܠ ܒܡܸܫܚܵܐ: ܬܠܵܬ̣ܵܐ ܥܸܣܪ̈ܘܿܢܝܼܢ ܠܬ̣ܵܘܪܵܐ ܚܲܕ݂: ܘܲܬ̣ܪܹܝܢ ܥܸܣܪ̈ܘܿܢܝܼܢ ܠܕܸܟ݂ܪܵܐ ܚܲܕ݂.

²⁹ܘܥܸܣܪܘܿܢܵܐ ܚܲܕ݂ ܠܐܸܡܪܵܐ ܚܲܕ݂: ܗܵܟܲܢܵܐ ܠܫܲܒ̣ܥܵܬܲܝ̈ܗܘܿܢ ܐܸܡܪܹ̈ܐ.

³⁰ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܡܚܲܣܵܝܘܼ ܥܠܲܝܟ̇ܘܿܢ.

³¹ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ ܗ̤ܘܲܝܬ̇ܘܿܢ ܥܵܒ̣ܕ̇ܝܼܢ: ܕܠܲܝܬ̇ ܒܗܘܿܢ ܡܘܼܡܵܐ: ܘܢܘܼܩܵܝܗܘܿܢ.