Read Aramaic Peshita Numbers 29 Bible Online

Numbers 29 - Aramaic Peshita bible

Numbers 29

¹ܘܲܒ̣ܚܲܕ݂ ܒܝܲܪܚܵܐ ܕܫܲܒ̣ܥܵܐ: ܩܲܪܝܵܐ ܘܩܲܕ̇ܝܼܫܵܐ ܢܸܗܘܹܐ ܠܟ݂ܘܿܢ: ܘܟ݂ܠ ܥܒܲܕ݂ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ: ܝܵܘܡܵܐ ܕܝܘܼܒܵܒ̣ܵܐ ܢܸܗܘܹܐ ܠܟ݂ܘܿܢ.

²ܘܲܥܒܸܕ݂ܘ ܝܲܩ̈ܕܹ̇ܐ ܫܲܠܡܹ̈ܐ: ܠܪܹܝܚܵܐ ܕܲܣܘܵܬ̣ܵܐ ܠܡܵܪܝܵܐ: ܬܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܫܲܒ̣ܥܵܐ: ܕܠܲܝܬ̇ ܒܗܘܿܢ ܡܘܼܡܵܐ.

³ܘܩܘܼܪܒܵܢܗܘܿܢ ܢܫܝܼܦܵܐ ܕܦܝܼܠ ܒܡܸܫܚܵܐ: ܬܠܵܬ̣ܵܐ ܥܸܣܪ̈ܘܿܢܝܼܢ ܠܬ̣ܵܘܪܵܐ ܚܲܕ݂: ܘܲܬ̣ܪܹܝܢ ܥܸܣܪ̈ܘܿܢܝܼܢ ܠܕܸܟ݂ܪܵܐ ܚܲܕ݂.

⁴ܘܥܸܣܪܘܿܢܵܐ ܚܲܕ݂ ܠܐܸܡܪܵܐ ܚܲܕ݂: ܗܵܟܲܢܵܐ ܠܫܲܒ̣ܥܵܬܲܝ̈ܗܘܿܢ ܐܸܡܪܹ̈ܐ.

⁵ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܚܛܵܗܵܐ: ܠܲܡܚܲܣܵܝܘܼ ܥܠܲܝܟ̇ܘܿܢ.

⁶ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܕܪܹܫ ܝܲܪܚܵܐ: ܘܲܣܡܝܼܕܹܗ: ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕ݂ܗܘܿܢ: ܘܢܘܼܩܵܗܘܿܢ: ܐܲܝܟ݂ ܙܸܕ݂ܩܗܘܿܢ: ܠܪܹܝܚ ܣܘܵܬ̣ܵܐ ܩܘܼܪܒܵܢܵܐ ܠܡܵܪܝܵܐ.

⁷ܘܒܲܥܣܲܪܬܵܐ ܒܝܲܪܚܵܐ ܗܵܢܵܐ ܕܫܲܒ̣ܥܵܐ: ܩܲܪܝܵܐ ܘܩܲܕܝܼܫܵܐ ܢܸܗܘܹܐ ܠܟ݂ܘܿܢ: ܘܟ݂ܠ ܥܒ̣ܵܕ݂ܵܐ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ.

⁸ܘܩܲܪܸܒ̣ܘ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ ܠܪܹܝܚܵܐ ܕܲܣܘܵܬ̣ܵܐ: ܬܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܫܲܒ̣ܥܵܐ: ܕܠܲܝܬ̇ ܒܗܘܿܢ ܡܘܼܡܵܐ.

⁹ܘܩܘܼܪܒܵܢܗܘܿܢ ܢܫܝܼܦܵܐ ܕܦܝܼܠ ܒܡܸܫܚܵܐ: ܬܠܵܬ̣ܵܐ ܥܸܣܪ̈ܘܿܢܝܼܢ ܠܬ̣ܵܘܪܵܐ: ܘܲܬ̣ܪܹܝܢ ܥܸܣܪ̈ܘܿܢܝܼܢ ܠܕܸܟ݂ܪܵܐ.

¹⁰ܘܥܸܣܪܘܿܢܵܐ ܚܲܕ݂ ܠܐܸܡܪܵܐ ܚܲܕ݂: ܗܵܟܲܢܵܐ ܠܫܲܒ̣ܥܵܬܲܝ̈ܗܘܿܢ ܐܸܡܪܹ̈ܐ.

¹¹ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܕܚܘܼܣܵܝܵܐ ܝܲܩܕܵܐ ܫܲܠܡܵܐ ܐܲܡܝܼܢܵܐ: ܘܲܣܡܝܼܕ݂ܗܘܿܢ: ܘܢܘܼܩܵܝܗܘܿܢ.

¹²ܘܲܒ̣ܚܲܡܫܲܥܸܣܪܵܐ ܒܝܲܪܚܵܐ ܗܵܢܵܐ ܕܫܲܒ̣ܥܵܐ: ܩܲܪܝܵܐ ܘܩܲܕ̇ܝܼܫܵܐ ܢܸܗܘܹܐ ܠܟ݂ܘܿܢ: ܘܟ݂ܠ ܥܒ̣ܵܕ݂ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ: ܘܲܥܒܸܕ݂ܘ ܥܲܕ݂ܥܹܕ݂ܵܐ ܠܡܵܪܝܵܐ ܫܲܒ̣ܥܵܐ ܝܵܘ̈ܡܝܼܢ.

¹³ܘܩܲܪܸܒ̣ܘ ܝܲܩ̈ܕܹܐ ܫܲܠܡܹ̈ܐ ܩܘܼܪܒܵܢܵܐ ܕܪܹܝܚܵܐ ܕܲܣܘܵܬ̣ܵܐ ܠܡܵܪܝܵܐ: ܬܵܘܪܹ̈ܐ ܒ̈ܢܲܝ ܒܲܩܪܵܐ ܬܠܵܬܲܥܣܲܪ: ܘܕܸܟܪܹ̈ܐ ܬܪܹܝܢ ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܬܲܥܣܲܪ ܕܠܲܝܬ̇ ܒܗܘܿܢ ܡܘܼܡܵܐ.

¹⁴ܘܩܘܼܪܒܵܢܗܘܿܢ ܢܫܝܼܦܵܐ ܕܦܝܼܠ ܒܡܸܫܚܵܐ: ܬܠܵܬ̣ܵܐ ܥܸܣܪ̈ܘܿܢܝܼܢ ܠܬ̣ܵܘܪܹ̈ܐ ܚܲܕ݂: ܗܵܟܲܢܵܐ ܠܲܬ̣ܠܵܬܲܥܣܲܪ ܬܵܘܪ̈ܝܼܢ: ܘܲܬ̣ܪܹܝܢ ܥܸܣܪܘܿܢܝܼܢ ܠܕܸܟ݂ܪܵܐ ܚܲܕ݂: ܗܵܟܲܢܵܐ ܠܲܬ̣ܪܹܝܢ ܕܸܟ݂ܪ̈ܝܼܢ.

¹⁵ܘܥܸܣܪܘܿܢܵܐ ܚܲܕ݂ ܠܐܸܡܪܵܐ ܚܲܕ݂: ܗܵܟܲܢܵܐ ܠܐܲܪܒܲܬܲܥܣܲܪ ܐܸܡܪ̈ܝܼܢ.

¹⁶ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ: ܘܢܘܼܩܵܝܹܗ.

¹⁷ܘܲܒ̣ܝܵܘܡܵܐ ܕܲܬ̣ܪܹܝܢ: ܬܵܘܪܹ̈ܐ ܒ̈ܢܲܝ ܒܲܩܪܵܐ ܬܪܸܥܣܲܪ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܥܣܲܪ: ܕܠܲܝܬ̇ ܒܗܘܿܢ ܡܘܼܡܵܐ.

¹⁸ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ ܘܲܪܕܸܟ݂ܪܹ̈ܐ ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

¹⁹ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ: ܘܢܘܼܩܵܝܹܗ.

²⁰ܘܲܒ̣ܝܵܘܡܵܐ ܕܲܬ̣ܠܵܬ̣ܵܐ: ܬܵܘܪܹ̈ܐ ܚܕܲܥܣܪ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܥܣܲܪ: ܕܠܲܝܬ̇ ܒܗܘܿܢ ܡܘܼܡܵܐ.

²¹ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ ܘܲܪܕܸܟ݂ܪܹ̈ܐ ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

²²ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ: ܘܢܘܼܩܵܝܹܗ.

²³ܘܲܒ̣ܝܵܘܡܵܐ ܕܐܲܪܒ̇ܥܵܐ: ܬܵܘܪܹ̈ܐ ܥܸܣܪܵܐ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܬܲܥܣܲܪ: ܕܠܲܝܬ̇ ܒܗܘܿܢ ܡܘܼܡܵܐ.

²⁴ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ ܘܲܪܕܸܟ݂ܪܹ̈ܐ ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

²⁵ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ: ܘܲܣܡܝܼܕܹܗ: ܘܢܘܼܩܵܝܹܗ.

²⁶ܘܲܒ̣ܝܵܘܡܵܐ ܕܚܲܡܫܵܐ: ܬܵܘܪܹ̈ܐ ܬܸܫܥܵܐ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܬܲܥܣܲܪ: ܕܠܲܝܬ̇ ܒܗܘܿܢ ܡܘܼܡܵܐ.

²⁷ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ ܘܲܕ̇ܕܸܟ݂ܪܹ̈ܐ ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

²⁸ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ: ܘܢܘܼܩܵܝܹܗ.

²⁹ܘܲܒ̣ܝܵܘܡܵܐ ܕܸܫܬܵܐ: ܬܵܘܪܹ̈ܐ ܬܡܵܢܝܵܐ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܬܲܥܣܲܪ ܕܠܲܝܬ̇ ܒܗܘܿܢ ܡܘܼܡܵܐ.

³⁰ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ: ܘܲܕ̇ܕܸܟ݂ܪܹ̈ܐ: ܘܕܸܐܡܪܹ̈ܐ ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

³¹ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ ܘܲܣܡܝܼܕܹܗ: ܘܢܘܼܩܵܝܹܗ.

³²ܘܲܒ̣ܝܵܘܡܵܐ ܕܫܲܒ̣ܥܵܐ: ܬܵܘܪܹ̈ܐ ܫܲܒ̣ܥܵܐ: ܘܕܸܟ݂ܪܹ̈ܐ ܬܪܹܝܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒܲܬܲܥܣܲܪ ܕܠܲܝܬ̇ ܒܗܘܿܢ ܡܘܼܡܵܐ.

³³ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ: ܕܬ̣ܵܘܪܹ̈ܐ: ܘܲܕ̇ܕܸܟ݂ܪܹ̈ܐ: ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

³⁴ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ: ܘܲܣܡܝܼܕܹܗ ܘܢܘܼܩܵܝܹܗ.

³⁵ܘܲܒ̣ܝܵܘܡܵܐ ܕܲܬ̣ܡܵܢܝܵܐ ܗ̤ܘܲܝܬ̇ܘܿܢ ܟܵܢܫܝܼܢ: ܘܟ݂ܠ ܥܒ̣ܵܕ݂ ܕܦܘܼܠܚܵܢܵܐ ܠܵܐ ܬܸܥܒ̇ܕ݂ܘܼܢ.

³⁶ܘܩܲܪܸܒ̣ܘ ܝܲܩ̈ܕܹ̇ܐ ܫܲܠܡܹ̈ܐ ܩܘܼܪܒܵܢܵܐ ܠܪܹܝܚ ܣܘܵܬ̣ܵܐ ܠܡܵܪܝܵܐ: ܬܵܘܪܵܐ ܚܲܕ݂ ܒܲܪ ܒܲܩܪܵܐ. ܘܕܸܟ݂ܪܵܐ ܚܲܕ݂: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܐܲܪܒ̇ܥܵܐ ܕܠܲܝܬ̇ ܒܗܘܿܢ ܡܘܼܡܵܐ.

³⁷ܘܲܣܡܝܼܕ݂ܗܘܿܢ ܘܢܘܼܩܵܝܗܘܿܢ ܕܬ̣ܵܘܪܹ̈ܐ ܘܲܕ̇ܕܸܟ݂ܪܹ̈ܐ: ܘܕܸܐܡܪܹ̈ܐ: ܒܡܸܢܝܵܢܗܘܿܢ ܐܲܝܟ݂ ܙܸܕ݂ܩܗܘܿܢ.

³⁸ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܠܲܚܛܵܗܵܐ: ܣܛܲܪ ܡ̣ܢ ܝܲܩܕܵܐ ܫܲܠܡܵܐ ܐܲܡܝܼܢܵܐ: ܘܲܣܡܝܼܕܹܗ: ܘܢܘܼܩܵܝܹܗ.

³⁹ܗܵܠܹܝܢ ܗ̤ܘܲܝܬ̇ܘܿܢ ܥܵܒ̣ܕ̇ܝܼܢ ܠܡܵܪܝܵܐ ܒܥܲܕ݂ܥܹ̈ܕܲܝܟ̇ܘܿܢ: ܣܛܲܪ ܡ̣ܢ ܢܸܕ݂ܪ̈ܲܝܟ̇ܘܿܢ: ܘܲܣܛܲܪ ܡ̣ܢ ܦܘܼܪ̈ܫܵܢܲܝܟ̇ܘܿܢ: ܘܝܲܩܕܲܝ̈ܟ̇ܘܿܢ ܫܲܠܡܹ̈ܐ: ܘܲܣܡܝܼܕ݂ܟ݂ܘܿܢ ܘܢܘܼܩܵܝܟ݂ܘܿܢ: ܘܩܘܼܪ̈ܒܵܢܲܝܟ̇ܘܿܢ.