Read Aramaic Peshita Numbers 30 Bible Online

Numbers 30 - Aramaic Peshita bible

Numbers 30

¹ܘܐܸܡܲܪ ܡܘܼܫܹܐ ܠܲܒ̣̈ܢܲܝ ܝܼܣܪܵܝܹܠ: ܟܠ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

²ܘܡܲܠܸܠ ܡܘܼܫܹܐ ܥܲܡ ܪܹ̈ܫܹܐ ܕܫܲܒ̣ܛܹ̈ܐ ܕܲܒ̣̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܗܵܢܵܘ ܦܸܬ̣ܓ̣ܵܡܵܐ ܕܦܲܩܕܲܢܝ ܡܵܪܝܵܐ.

³ܓܲܒ̣ܪܵܐ ܟܲܕ݂ ܢܸܕ̇ܘܿܪ ܢܸܕ݂ܪܵܐ ܠܡܵܪܝܵܐ: ܘܢܹܐܡܹܐ ܒܡܵܘܡܵܬ̣ܵܐ: ܘܢܹܐܣܘܿܪ ܐܲܣܵܪܵܐ ܥܲܠ ܢܲܦ̮ܫܹܗ: ܠܵܐ ܢܒܲܛܸܠ ܡܸܠܬܹܗ. ܟܠܡܸܕܸ̇ܡ ܕܲܢܦܲܩ ܡ̣ܢ ܦܘܼܡܹܗ ܢܸܥܒܸ̇ܕ݂.

⁴ܘܐܲܢ̄ܬ̇ܬ̣ܵܐ ܟܲܕ݂ ܬܸܕ̇ܘܿܪ ܢܸܕ݂ܪܵܐ ܠܡܵܪܝܵܐ: ܘܬܹܐܣܘܿܪ ܐܲܣܵܪܵܐ ܥܲܠ ܢܲܦ̮ܫܵܗ̇ ܒܛܲܠܝܘܼܬ̣ܵܗ̇ ܒܹܝܬ̣ ܐܲܒ̣ܘܼܗ̇.

⁵ܘܢܸܫܡܲܥ ܐܲܒ̣ܘܼܗ̇ ܢܸܕ݂ܪܵܐ ܘܐܲܣܵܪܵܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇: ܘܢܸܫܬ̇ܘܿܩ ܠܹܗ ܐܲܒ̣ܘܼܗ̇: ܢܸܬ̣ܩܲܝܡܘܼܢ ܟܠܗܘܿܢ ܢܸܕ݂ܪܹ̈ܐ ܘܐܲܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇.

⁶ܘܐܸܢ ܢܒܲܛܸܠ ܐܸܢܘܿܢ ܐܲܒ̣ܘܼܗܝ ܒܝܵܘܡܵܐ ܕܫܵܡܲܥ ܟܠܗܘܿܢ ܢܸܕ݂ܪܹ̈ܐ: ܘܟ݂ܠܗܘܿܢ ܐܲܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇: ܠܵܐ ܢܸܬ̣ܩܲܝܡܘܿܢ: ܘܡܵܪܝܵܐ ܢܸܫܒ̇ܘܿܩ ܠܵܗ̇: ܡܸܛܠ ܕܒܲܛܸܠ ܐܸܢܘܿܢ ܐܲܒ̣ܘܼܗܝ.

⁷ܘܐܸܢ ܬܸܗܘܹܐ ܠܓܲܒ̣ܪܵܐ: ܘܢܸܕ݂ܪܹ̈ܝܗ̇ ܥܠܹܝܗ̇: ܐܵܘ ܦܘܼܪܫܵܢܵܐ ܕܣܸܦ̈ܘܵܬ̣ܵܗ̇ ܕܐܸܣܪܲܬ̤ ܥܲܠ ܢܲܦ̮ܫܵܗ̇.

⁸ܘܢܸܫܡܲܥ ܒܲܥܠܵܗ̇: ܒܝܵܘܡܵܐ ܕܫܵܡܲܥ ܘܢܸܫܬ̇ܘܿܩ ܠܹܗ: ܢܸܬ̣ܩܲܝܡܘܿܢ ܟܠܗܘܿܢ ܢܸܕ݂ܪܹ̈ܐ: ܘܐܲܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇ ܢܸܬ̣ܩܲܝܡܘܼܢ.

⁹ܘܐܸܢ ܒܝܵܘܡܵܐ ܕܲܫܡܲܥ ܒܲܥܠܵܗ̇ ܒܲܛܸܠ ܐܸܢܘܿܢ: ܢܸܒ̣ܛܠܘܼܢ ܢܸܕ݂ܪܹ̈ܐ ܘܦܘܼܪ̈ܫܵܢܹܐ ܕܣܸܦ̈ܘܵܬ̣ܵܗ̇ ܕܐܸܣܪܲܬ̤ ܥܲܠ ܢܲܦ̮ܫܵܗ̇: ܘܡܵܪܝܵܐ ܢܸܫܒ̇ܘܿܩ ܠܵܗ̇.

¹⁰ܘܢܸܕ݂ܪܵܐ ܕܐܲܪܡܲܠܬܵܐ: ܘܕܲܫܒ̣ܝܼܩܬܵܐ: ܟܠ ܕܐܵܣܪܵܐ ܥܲܠ ܢܲܦ̮ܫܵܗ̇ ܢܸܬ̣ܩܲܝܲܡ ܥܠܹܝܗ̇.

¹¹ܘܐܸܢ ܒܹܝܬ̣ ܒܲܥܠܵܗ̇ ܢܸܕ݂ܪܲܬ̤: ܐܵܘ ܐܸܣܪܲܬ̤ ܐܲܣܵܪܵܐ ܥܲܠ ܢܲܦ̮ܫܵܗ̇ ܒܡܵܘܡܵܬ̣ܵܐ.

¹²ܘܢܸܫܡܲܥ ܒܲܥܠܵܗ̇ ܘܢܸܫܬ̇ܘܿܩ ܠܹܗ ܘܠܵܐ ܢܒܲܛܸܠ ܐܸܢܘܿܢ: ܢܸܬ̣ܩܲܝܡܘܼܢ ܟܠܗܘܿܢ ܢܸܕ݂ܪܹ̈ܐ: ܘܟ݂ܠܗܘܿܢ ܐܲܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇ ܢܸܬ̣ܩܲܝܡܘܼܢ.

¹³ܘܐܸܢ ܡܒܲܛܵܠܘܼ ܢܒܲܛܸܠ ܐܸܢܘܿܢ ܒܲܥܠܵܗ̇ ܒܝܵܘܡܵܐ ܕܫܵܡܲܥ: ܟܠ ܡܸܕܸ̇ܡ ܕܲܢܦܲܩ ܡ̣ܢ ܣܸܦ̈ܘܵܬ̣ܵܗ̇ ܠܢܸܕ݂ܪܹ̈ܐ: ܘܠܲܐܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇: ܠܵܐ ܢܸܬ̣ܩܲܝܡܘܼܢ: ܡܸܛܠ ܕܒܲܥܠܵܗ̇ ܒܲܛܸܠ ܐܸܢܘܿܢ: ܘܡܵܪܝܵܐ ܢܸܫܒ̇ܘܿܩ ܠܵܗ̇.

¹⁴ܟܠܗܘܿܢ ܢܸܕ݂ܪܹ̈ܐ ܘܟ݂ܠܗܹܝܢ ܡܵܘ̈ܡܵܬ̣ܵܐ ܕܐܲܣܵܪܹ̈ܐ ܕܲܡܣܲܓ̇ܦܝܼܢ ܢܲܦ̮ܫܵܐ: ܒܲܥܠܵܗ̇ ܢܩܲܝܸܡ ܐܸܢܘܿܢ ܘܒܲܥܠܵܗ̇ ܢܒܲܛܸܠ ܐܸܢܘܿܢ.

¹⁵ܘܐܸܢ ܡܸܫܬܲܩ ܢܸܫܬ̇ܘܿܩ ܠܹܗ ܒܲܥܠܵܗ̇ ܡ̣ܢ ܝܘܿܡ ܠܝܘܿܡ: ܢܸܬ̣ܩܲܝܡܘܼܢ ܟܠܗܘܿܢ ܢܸܕ݂ܪܹ̈ܐ: ܘܟ݂ܠܗܘܿܢ ܐܲܣܵܪܹ̈ܐ ܕܐܸܣܪܲܬ̤ ܥܲܠ ܢܲܦ̮ܫܵܗ̇: ܡܸܛܠ ܕܲܫܬܸܩ ܠܹܗ ܒܲܥܠܵܗ̇ ܒܝܵܘܡܵܐ ܕܲܫܡܲܥ.

¹⁶ܘܐܸܢ ܡܒܲܛܵܠܘܼ ܢܒܲܛܸܠ ܐܸܢܘܿܢ ܡ̣ܢ ܒܵܬܲܪ ܕܫܵܡܲܥ: ܢܩܲܒܸ̇ܠ ܚܛܵܗܵܗ̇.

¹⁷ܗܵܠܹܝܢ ܢܵܡܘܿܣܹ̈ܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ ܒܹܝܬ̣ ܓܲܒ̣ܪܵܐ ܠܐܲܢ̄ܬ̇ܬܹܗ: ܘܒܹܝܬ̣ ܐܲܒ̣ܵܐ ܠܒܲܪܬܹܗ ܒܛܲܠܝܘܼܬ̣ܵܗ̇ ܒܹܝܬ̣ ܐܲܒ̣ܘܼܗܝ.