Read Aramaic Peshita Numbers 31 Bible Online

Numbers 31 - Aramaic Peshita bible

Numbers 31

²ܐܸܬ̇ܬ̇ܒܲܥ ܥܝܵܪܬܵܐ ܕܲܒ̣̈ܢܲܝ ܝܼܣܪܵܝܹܠ ܡ̣ܢ ܡܸܕ݂ܝܵܢܵܝܹ̈ܐ: ܘܗܵܝܕܹ̇ܝܢ ܬܸܬ̣ܟ̇ܢܸܫ ܠܘܵܬ̣ ܥܲܡܵܟ݂.

³ܘܐܸܡܲܪ ܡܘܼܫܹܐ ܠܥܲܡܵܐ: ܙܲܝܸܢܘ ܡܸܢܟ݂ܘܿܢ ܓܲܒ̣ܪܹ̈ܐ ܠܚܲܝܠܵܐ: ܘܢܸܗܘܘܿܢ ܥܲܠ ܡܸܕ݂ܝܵܢܵܝܹ̈ܐ ܘܢܸܬ̇ܬܲܒ̣ܥܘܼܢ ܬܒܲܥܬܹܗ ܕܡܵܪܝܵܐ ܡ̣ܢ ܡܸܕ݂ܝܵܢܵܝܹ̈ܐ.

⁴ܐܵܠܹܦ ܐܵܠܹܦ ܡ̣ܢ ܫܲܒ̣ܛܵܐ: ܡ̣ܢ ܟܠܗܘܿܢ ܫܲܒ̣ܛܹ̈ܐ ܕܲܒ̣ܢܲܝ ܝܼܣܪܵܝܹܠ: ܫܲܕܲܪܘ ܒܚܲܝܠܵܐ.

⁵ܘܐܸܬ̣ܓ̇ܒ̣ܝܼܘ ܡ̣ܢ ܫܲܒ̣ܛܹ̈ܐ ܕܲܒ̣̈ܢܲܝ ܝܼܣܪܵܝܹܠ ܐܲܠܦܵܐ ܐܲܠܦܵܐ ܡ̣ܢ ܫܲܒ̣ܛܵܐ: ܬܪܸܥܣܲܪ ܐܲܠܦ̈ܝܼܢ ܕܲܡܙܲܝܢܝܼܢ ܒܚܲܝܠܵܐ.

⁶ܘܫܲܕܲܪ ܐܸܢܘܿܢ ܡܘܼܫܹܐ ܐܵܠܹܦ ܡ̣ܢ ܫܲܒ̣ܛܵܐ: ܬܪܸܥܣܲܪ ܐܲܠܦ̈ܝܼܢ ܕܲܡܙܲܝܢܝܼܢ: ܠܗܘܿܢ ܘܲܠܦܝܼܢܚܸܣ ܒܲܪ ܐܹܠܝܼܥܵܙܲܪ ܟܵܗܢܵܐ ܒܚܲܝܠܵܐ: ܘܡܵܐܢܹ̈ܐ ܕܩܘܼܕ݂ܫܵܐ ܘܩܲܪ̈ܢܵܬ̣ܵܐ ܕܝܘܼܒܵܒ̣ܵܐ ܒܐܝܼܕܹܗ.

⁷ܘܐܸܬ̣ܚܲܝܲܠܘ ܥܲܠ ܡܸܕ݂ܝܲܢ ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܘܩܲܛܸܠܘ ܟܠ ܕܸܟ݂ܪܵܐ.

⁸ܘܲܠܡܲܠܟܹ̈ܐ ܕܡܸܕ݂ܝܲܢ ܩܛܲܠ̣ܘ ܥܲܡ ܩܛܝܼܠܲܝ̈ܗܘܿܢ: ܠܐܘܿܝ ܘܠܲܪܩܸܡ: ܘܲܠܨܘܿܪ: ܘܲܠܚܘܿܪ: ܘܠܲܪܒ̣ܵܥ: ܚܲܡܫܵܐ ܡܲܠܟܹ̈ܐ ܡܸܕ݂ܝܵܢܵܝܹ̈ܐ: ܘܲܠܒܸܠܥܵܡ ܒܲܪ ܒܥܘܿܪ ܩܛܲܠܘ ܒܚܲܪܒܵܐ.

⁹ܘܲܫܒ̣ܵܘ ܒ̈ܢܲܝ ܝܼܣܪܵܝܹܠ ܠܢܸܫܹ̈ܐ ܕܡܸܕ݂ܝܵܢ: ܘܠܝܼܩܲܪܬ̇ܗܘܿܢ: ܘܲܠܟ݂ܠܵܗ̇ ܒܥܝܼܪܗܘܿܢ: ܘܲܠܟ݂ܠܹܗ ܩܸܢܝܵܢܗܘܿܢ: ܘܲܠܟ݂ܠܗܘܿܢ ܢܸܟ݂ܣܲܝ̈ܗܘܿܢ ܒܲܙܘ.

¹⁰ܘܲܠܟ݂ܠܗܹܝܢ ܩܘܼܪ̈ܝܵܐ ܕܒܹܝܬ̣ ܡܲܥܡܲܪܗܘܿܢ: ܘܲܠܟ݂ܠܗܘܿܢ ܫܸܛܚܲܝ̈ܗܘܿܢ ܐܵܘܩܸܕ݂ܘ ܒܢܘܼܪܵܐ.

¹¹ܘܲܕ݂ܒܲܪܘ ܠܟ݂ܠܵܗ̇ ܫܒ̣ܝܼܬ̣ܵܐ: ܘܲܠܟ݂ܠܵܗ̇ ܕܒ̣ܵܪܬܵܐ ܕܲܒ̣ܢܲܝܢܵܫܵܐ: ܘܕܲܒ̣ܥܝܼܪܵܐ.

¹²ܘܐܲܝܬ̇ܝܘܼܗ̇ ܠܘܵܬ̣ ܡܘܼܫܹܐ: ܘܲܠܘܵܬ̣ ܐܹܠܝܼܥܵܙܲܪ ܟܵܗܢܵܐ: ܘܲܠܘܵܬ̣ ܟܠܵܗ̇ ܟܢܘܼܫܬܵܐ ܕܲܒ̣̈ܢܲܝ ܝܼܣܪܵܝܹܠ: ܫܒ̣ܝܼܬ̣ܵܐ: ܘܲܕ݂ܒ̣ܵܪܬܵܐ: ܘܒܸܙܬܵܐ ܠܡܲܫܪܝܼܬ̣ܵܐ: ܠܥܲܪܒ̣ܘܼܬ̣ ܡܘܼܐܵܒ̣ ܕܥܲܠ ܝܘܿܪܕ̇ܢܵܢ ܕܐܝܼܪܝܼܚܘܿ.

¹³ܘܲܢܦܲܩܘ ܡܘܼܫܹܐ ܘܐܹܠܝܼܥܵܙܲܪ ܟܵܗܢܵܐ: ܘܟ݂ܠܗܘܿܢ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ ܠܐܘܼܪܥ̱ܗܘܿܢ ܠܒܲܪ ܡ̣ܢ ܡܲܫܪܝܼܬ̣ܵܐ.

¹⁴ܘܲܪܓܸܙ ܡܘܼܫܹܐ ܥܲܠ ܦܵܩ̈ܘܿܕܹܐ ܕܚܲܝܠܵܐ: ܪܹ̈ܫܲܝ: ܐܲܠܦܹ̈ܐ: ܘܪܹ̈ܫܲܝ ܡܲܐ̈ܘܵܬ̣ܵܐ: ܕܐܸܬ̣ܵܘ ܡ̣ܢ ܚܲܝܠܵܐ ܕܲܩܪܵܒ̣ܵܐ.

¹⁵ܘܐܸܡܲܪ ܠܗܘܿܢ ܡܘܼܫܹܐ: ܠܡܵܢܵܐ ܐܲܚܝܼܬ̇ܘܿܢ ܟܠܗܹܝܢ ܢܸܩ̈ܒ̣ܵܬ̣ܵܐ.

¹⁶ܕܗܸܢܹܝܢ ܗ̤ܘܲܝ ܬܘܼܩ̱ܠܬ̣ܵܐ ܠܲܒ̣̈ܢܲܝ ܝܼܣܪܵܝܹܠ ܒܡܸܠܬܹܗ ܕܒܸܠܥܵܡ: ܘܲܡܪܲܕ݂ܘ ܘܐܲܥܝܼܠܘ ܒܡܵܪܝܵܐ ܒܲܨܒ̣ܘܼܬ̣ܵܐ ܕܲܦܥܘܿܪ: ܘܲܗܘ̤ܵܐ ܡܵܘܬܵܢܵܐ ܕܡ̣ܢ ܫܸܠܝܵܐ ܒܲܟ݂ܢܘܼܫܬܹ̇ܗ ܕܡܵܪܝܵܐ.

¹⁷ܗܵܫܵܐ ܩܛܘܿܠܘ ܟܠܗܘܿܢ ܛܠܵܝܹ̈ܐ ܕܸܟ݂ܪܹ̈ܐ. ܘܟ݂ܠ ܐܲܢ̄ܬ̇ܬܵܐ ܕܝܵܕ݂ܥܵܐ ܡܲܕ݂ܡ̱ܟ݂ܵܐ ܕܕܸܟ݂ܪܵܐ: ܩܛܘܿܠܘ.

¹⁸ܘܟ݂ܠ ܝܼܩܲܪܬܵܐ ܕܢܸܫܹ̈ܐ ܕܠܵܐ ܝܼܕܲܥ ܡܲܕ݂ܡ̱ܟ݂ܵܐ ܕܕܸܟ݂ܪܵܐ ܐܲܚܵܘ ܠܟ݂ܘܿܢ.

¹⁹ܐܲܢ̄ܬ̇ܘܿܢ ܕܹܝܢ ܫܪܵܘ ܠܒܲܪ ܡ̣ܢ ܡܲܫܪܝܼܬ̣ܵܐ ܫܲܒ̣ܥܵܐ ܝܵܘ̈ܡܝܼܢ: ܟܠ ܕܲܩܛܲܠ ܢܲܦ̮ܫܵܐ ܘܟ݂ܠ ܕܲܩܪܸܒ̣ ܠܲܩܛܝܼܠܵܐ: ܪܘܿܣܘ ܥܠܵܘܗܝ ܒܝܵܘܡܵܐ ܕܲܬ̣ܠܵܬ̣ܵܐ: ܘܲܒ̣ܝܵܘܡܵܐ ܕܫܲܒ̣ܥܵܐ: ܐܲܢ̄ܬ̇ܘܿܢ ܘܲܫܒ̣ܝܼܬ̣ܟ݂ܘܿܢ.

²⁰ܘܟ݂ܠܵܗ̇ ܬܲܟ݂ܣܝܼܬ̣ܵܐ: ܘܟ݂ܠ ܡܵܐܢܵܐ ܕܡܸܫܟܵܐ: ܘܟ݂ܠ ܡܵܐܢܵܐ ܕܣܲܥܪܵܐ: ܘܟ݂ܠ ܡܵܐܢܵܐ ܕܩܲܝܣܵܐ ܪܘܿܣܘ ܥܠܵܘܗܝ.

²¹ܘܐܸܡܲܪ ܐܹܠܝܼܥܵܙܲܪ ܟܵܗܢܵܐ ܠܓܲܒ̣ܪܹ̈ܐ ܕܚܲܝܠܵܐ ܕܐܸܬ̣ܵܘ ܡ̣ܢ ܩܪܵܒ̣ܵܐ: ܗܵܢܵܐ ܦܘܼܩܕܵܢܵܐ ܕܢܵܡܘܿܣܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

²²ܒܪܲܡ ܕܹܝܢ ܕܲܗܒ̣ܵܐ: ܘܣܹܐܡܵܐ: ܘܲܢܚܵܫܵܐ: ܘܦܲܪܙܠܵܐ: ܘܐܲܢܟ݂ܵܐ: ܘܐܲܒ̣ܵܪܵܐ.

²³ܘܟ݂ܠ ܡܸܕܸ̇ܡ ܕܥܵܐܹ̇ܠ ܠܟ݂ܘܼܪܵܐ: ܐܲܥܒ̇ܪܘܼܗܝ ܒܢܘܼܪܵܐ: ܘܢܸܬ̇ܕܲܟܸ̇ܐ: ܘܡܲـ̈ـܝܵܐ ܕܲܪܣܵܣܵܐ ܪܘܿܣܘ ܥܠܵܘܗܝ: ܘܟ݂ܠ ܕܠܵܐ ܥܵܒܲܪ ܒܢܘܼܪܵܐ ܐܲܥ̱ܡܕ݂ܘܼܗܝ ܒܡܲـ̈ـܝܵܐ.

²⁴ܘܚܲܠܸܠܘ ܡܵܐܢܲܝ̈ܟ̇ܘܿܢ ܒܝܵܘܡܵܐ ܕܫܲܒ̣ܥܵܐ ܘܬܸܬ̇ܕܲܟ̇ܘܿܢ: ܘܒ̣ܵܬܲܪܟܸ̇ܢ ܬܸܥܠܘܿܢ ܠܡܲܫܪܝܼܬ̣ܵܐ.

²⁵ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²⁶ܩܲܒܸ̇ܠ ܚܘܼܫܒܵܢܵܐ ܕܲܕ݂ܒ̣ܵܪܬܵܐ: ܘܕܲܫܒ̣ܝܼܬ̣ܵܐ ܕܲܒ̣ܢܲܝ̈ܢܵܫܵܐ: ܘܕܲܒ̣ܥܝܼܪܵܐ: ܐܲܢ̄ܬ̇ ܘܐܹܠܝܼܥܵܙܲܪ ܟܵܗܢܵܐ: ܘܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܕܲܟ݂ܢܘܼܫܬܵܐ.

²⁷ܘܦܲܠܸܓ̣ܘ ܕܒ̣ܵܪܬܵܐ ܒܹܝܬ̣ ܓܲܒ̣ܪܹ̈ܐ ܥܵܒ̣̈ܕܲܝ ܩܪܵܒ̣ܵܐ ܕܲܢܦܲܩ̣ܘ ܒܚܲܝܠܵܐ: ܘܒܹܝܬ̣ ܟܠܵܗ̇ ܟܢܘܼܫܬܵܐ.

²⁸ܘܲܦܪܘܿܫܘ ܡܲܟ݂ܣܵܐ ܠܡܵܪܝܵܐ ܡ̣ܢ ܓܲܒ̣ܪܹ̈ܐ ܥܵܒ̣̈ܕܲܝ ܩܪܵܒ̣ܵܐ ܕܲܢܦܲܩܘ ܒܚܲܝܠܵܐ ܡ̣ܢ ܟܠܵܗ̇ ܟܢܘܼܫܬܵܐ: ܚܕ݂ܵܐ ܢܲܦ̮ܫܵܐ ܡ̣ܢ ܚܲܡܫܝܼܢ ܡ̣ܢ ܒܢܲܝ̈ܢܵܫܵܐ: ܘܡ̣ܢ ܬܵܘܪܹ̈ܐ: ܘܡ̣ܢ ܚܸܡܪܵܐ: ܘܡ̣ܢ ܥܵـ̈ـܢܵܐ.

²⁹ܘܡ̣ܢ ܦܵܠܓ̇ܘܼܬ̣ܗܘܿܢ ܣܲܒ̣: ܘܗܲܒ̣ ܠܐܹܠܝܼܥܵܙܲܪ ܟܵܗܢܵܐ ܦܘܼܪܫܵܢܹܗ ܕܡܵܪܝܵܐ.

³⁰ܘܡ̣ܢ ܦܵܠܓ̇ܘܼܬ̣ܵܐ ܕܲܒ̣̈ܢܲܝ ܝܼܣܪܵܝܹܠ: ܣܲܒ̣ ܚܲܕ݂ ܡ̣ܢ ܚܲܡܫܝܼܢ ܡ̣ܢ ܐ̄ܢܵܫܵܐ: ܘܡ̣ܢ ܬܵܘܪܹ̈ܐ: ܘܡ̣ܢ ܚܸܡܪܵܐ: ܘܡ̣ܢ ܟܠܵܗ̇ ܒܥܝܼܪܵܐ: ܘܗܲܒ̣ ܐܸܢܘܿܢ ܠܠܹܘܵܝܹ̈ܐ ܕܢܵܛܪܝܼܢ ܡܲܛܲܪܬܵܐ ܕܡܲܫܟ̇ܢܹܗ ܕܡܵܪܝܵܐ.

³¹ܘܲܥܒܲܕ݂ܘ ܡܘܼܫܹܐ ܘܐܹܠܝܼܥܵܙܲܪ ܟܵܗܢܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

³²ܘܲܗܘ̤ܵܬ̣ ܕܒ̣ܵܪܬܵܐ ܘܲܫܒ̣ܝܼܬ̣ܵܐ ܕܒܲܙܘ ܥܲܡܵܐ ܘܚܲܝܠܵܐ: ܥܵܢܵܐ ܫܸܬ̣ܡܵܐܐ ܘܫܲܒ̣ܥܝܼܢ ܘܚܲܡܫܵܐ ܐܲܠܦ̈ܝܼܢ.

³³ܘܬ̣ܵܘܪܹ̈ܐ ܫܲܒ̣ܥܝܼܢ ܘܲܬ̣ܪܹܝܢ ܐܲܠܦ̈ܝܼܢ.

³⁴ܘܚܸܡܪܵܐ ܫܬ̇ܝܼܢ ܘܚܲܕ݂ ܐܲܠܦ̈ܝܼܢ.

³⁵ܘܢܲܦ̮̈ܫܵܬ̣ܵܐ ܕܐ̄ܢܵܫܵܐ ܡ̣ܢ ܢܸܫܹ̈ܐ ܕܠܵܐ ܝܼܕܲܥ̣ ܡܢܲܕ݂ܡ̱ܟ݂ܵܐ ܕܕܸܟ݂ܪܵܐ: ܟܠܗܹܝܢ ܢܲܦ̮̈ܫܵܬ̣ܵܐ ܬܠܵܬ̣ܝܼܢ ܘܲܬ̣ܪܹܝܢ ܐܲܠܦ̈ܝܼܢ.

³⁶ܘܲܗܘ̤ܵܬ̣ ܦܵܠܓ̇ܘܼܬ̣ܵܐ ܒܲܡܢܵܬ̣ܵܐ ܕܐܲܝܠܹܝܢ ܕܲܢܦܲܩܘ ܒܚܲܝܠܵܐ: ܥܵـ̈ـܢܵܐ ܬܠܵܬ̣ܡܵܐܐ ܘܲܬ̣ܠܵܬ̣ܝܼܢ ܘܫܲܒ̣ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ.

³⁷ܘܲܗܘ̤ܵܐ ܡܲܟ݂ܣܵܐ ܠܡܵܪܝܵܐ ܡ̣ܢ ܥܵܢܵܐ: ܫܬܵܐ ܐܲܠܦ̈ܝܼܢ ܘܲܫܒܲܥܡܵܐܐ ܘܚܲܡܫܝܼܢ.

³⁸ܘܬ̣ܵܘܪܹ̈ܐ ܬܠܵܬ̣ܝܼܢ ܘܸܫܬܵܐ ܐܲܠܦ̈ܝܼܢ: ܘܡܲܟ݂ܣܗܘܿܢ ܠܡܵܪܝܵܐ ܫܒܲܥܡܵܐܐ ܘܥܸܣܪܝܼܢ.

³⁹ܘܚܸܡܪܵܐ ܬܠܵܬ̣ܝܼܢ ܐܲܠܦ̈ܝܼܢ ܘܚܲܡܸܫܡܵܐܐ: ܘܡܲܟ݂ܣܗܘܿܢ ܠܡܵܪܝܵܐ ܫܸܬ̣ܡܵܐܐ ܘܥܸܣܪܵܐ.

⁴⁰ܘܢܲܦ̮̈ܫܵܬ̣ܵܐ ܕܐ̄ܢܵܫܵܐ ܫܸܬ̇ܬܲܥܣܲܪ ܐܲܠܦ̈ܝܼܢ: ܘܡܲܟ݂ܣܗܘܿܢ ܠܡܵܪܝܵܐ ܬܠܵܬ̣ܡܵܐܐ ܘܥܸܣܪܝܼܢ ܢܲܦ̮̈ܫܵܢ.

⁴¹ܘܝܲܗ̄ܒ̣ ܡܘܼܫܹܐ ܡܲܟ݂ܣܵܐ ܕܦܘܼܪܫܵܢܵܐ ܕܡܵܪܝܵܐ ܠܐܹܠܝܼܥܵܙܲܪ ܟܵܗܢܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

⁴²ܡ̣ܢ ܦܵܠܓ̇ܘܼܬ̣ܵܐ ܕܲܒ̣̈ܢܲܝ ܝܼܣܪܵܝܹܠ: ܕܦܲܠܸܓ̣ ܠܗܘܿܢ ܡܘܼܫܹܐ ܡ̣ܢ ܓܲܒ̣ܪܹ̈ܐ ܕܲܢܦܲܩܘ ܒܚܲܝܠܵܐ.

⁴³ܘܲܗܘ̤ܵܬ̣ ܦܵܠܓ̇ܘܼܬ̣ܵܐ ܕܲܟ݂ܢܘܼܫܬܵܐ ܡ̣ܢ ܥܵـ̈ـܢܵܐ: ܬܠܵܬ̣ܡܵܐܐ. ܘܲܬ̣ܠܵܬ̣ܝܼܢ ܘܫܲܒ̣ܥܵܐ ܐܲܠܦ̈ܝܼܢ ܘܚܲܡܸܫ ܡܵܐܐ.

⁴⁴ܘܬ̣ܵܘܪܹ̈ܐ ܬܠܵܬ̣ܝܼܢ ܘܸܫܬܵܐ ܐܲܠܦ̈ܝܼܢ.

⁴⁵ܘܚܸܡܪܵܐ ܬܠܵܬ̣ܝܼܢ ܐܲܠܦ̈ܝܼܢ ܘܚܲܡܸܫܡܵܐܐ.

⁴⁶ܘܢܲܦ̮̈ܫܵܬ̣ܵܐ ܕܐ̄ܢܵܫܵܐ ܫܸܬ̇ܬܲܥܣܲܪ ܐܲܠܦ̈ܝܼܢ.

⁴⁷ܘܲܢܣܲܒ̣ ܡܘܼܫܹܐ ܡ̣ܢ ܦܵܠܓ̇ܘܼܬ̣ܵܐ ܕܲܒ̣̈ܢܲܝ ܝܼܣܪܵܝܹܠ: ܚܲܕ݂ ܡ̣ܢ ܚܲܡܫܝܼܢ ܡ̣ܢ ܒܢܲܝ̈ܢܵܫܵܐ ܘܡ̣ܢ ܒܥܝܼܪܵܐ: ܘܝܲܗ̄ܒ̣ ܐܸܢܘܿܢ ܠܠܹܘܵܝܹ̈ܐ ܕܢܵܛܪܝܼܢ ܡܲܛܲܪܬܵܐ ܕܡܲܫܟ̇ܢܹܗ ܕܡܵܪܝܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ.

⁴⁸ܘܲܩܪܸܒ̣ܘ ܠܘܵܬ̣ ܡܘܼܫܹܐ ܓܲܒ̣ܪܹ̈ܐ ܕܲܦܩܝܼܕ݂ܝܼܢ ܥܲܠ ܐܲܠܦܹ̈ܐ ܕܚܲܝܠܵܐ: ܪܹ̈ܫܲܝ ܐܲܠܦܹ̈ܐ: ܘܪܹ̈ܫܲܝ ܡܲܐ̈ܘܵܬ̣ܵܐ.

⁴⁹ܘܐܸܡܲܪܘ ܠܡܘܼܫܹܐ: ܥܲܒ̣ܕܲܝ̈ܟ ܩܲܒܸ̇ܠܘ ܚܘܼܫܒܵܢܵܐ ܕܓܲܒ̣ܪܹ̈ܐ ܕܚܲܝܠܵܐ ܥܵܒ̣ܕܲܝ̈ ܩܪܵܒ̣ܵܐ ܕܥܲܡܲܢ: ܘܠܵܐ ܛܥܵܐ ܡܸܢܲܢ ܓܒܲܪ.

⁵⁰ܘܩܲܪܒ̣̄ܢ ܩܘܼܪܒܵܢܹܗ ܕܡܵܪܝܵܐ: ܓܲܒ̣ܪܵܐ ܕܐܸܫܟܲܚ ܡܵܐܢܹ̈ܐ ܕܕܲܗܒ̣ܵܐ: ܐܲܩ̈ܠܵܢܹܐ: ܘܫܹܐܪܹ̈ܐ: ܘܥܸܙ̈ܩܵܬ̣ܵܐ: ܘܲܩ̈ܕ݂ܵܫܹܐ: ܘܗܲܡܢܝܼ̈ܟܹܐ: ܕܲܢܚܲܣܹܐ ܥܲܠ ܢܲܦ̮̈ܫܵܬܲܢ ܩܕ݂ܵܡ ܡܵܪܝܵܐ.

⁵¹ܘܲܢܣܲܒ̣ ܡܘܼܫܹܐ ܘܐܹܠܝܼܥܵܙܲܪ ܟܵܗܢܵܐ ܕܲܗܒ̣ܵܐ ܡܸܢܗܘܿܢ: ܟܠܗܘܿܢ ܡܵܐܢܹ̈ܐ ܕܲܥܒ̣ܵܕ݂ܵܐ.

⁵²ܘܲܗܘ̤ܵܐ ܟܠܹܗ ܕܲܗܒ̣ܵܐ ܕܦܘܼܪܫܵܢܵܐ ܕܐܲܦܪܸܫܘ ܠܡܵܪܝܵܐ: ܫܸܬ̇ܬܲܥܣܲܪ ܐܲܠܦ̈ܝܼܢ ܘܲܫܒܲܥ ܡܵܐܐ ܘܚܲܡܫܝܼܢ ܡܲܬ̣ܩܵܠܝܼ̈ܢ: ܡ̣ܢ ܪܹ̈ܫܲܝ ܐܲܠܦܹ̈ܐ: ܘܡ̣ܢ ܪܹ̈ܫܲܝ ܡܲܐ̈ܘܵܬ̣ܵܐ.

⁵³ܓܲܒ̣ܪܹ̈ܐ ܕܹܝܢ ܕܚܲܝܠܵܐ: ܒܲܙܘ ܠܗܘܿܢ ܐ̄ܢܵܫ ܠܢܲܦ̮ܫܹܗ.

⁵⁴ܘܲܢܣܲܒ̣ ܡܘܼܫܹܐ ܘܐܹܠܝܼܥܵܙܲܪ ܟܵܗܢܵܐ: ܕܲܗܒ̣ܵܐ ܡ̣ܢ ܪܹ̈ܫܲܝ ܐܲܠܦܹ̈ܐ: ܘܡ̣ܢ ܪܹ̈ܫܲܝ ܡܲܐ̈ܘܵܬ̣ܵܐ: ܘܐܲܝܬ̇ܝܼܘܗܝ ܠܡܲܫܟܲܢ ܙܲܒ̣ܢܵܐ: ܕܘܼܟ݂ܪܵܢܵܐ ܠܲܒ̣̈ܢܲܝ ܝܼܣܪܵܝܹܠ ܩܕ݂ܵܡ ܡܵܪܝܵܐ.