Read Aramaic Peshita Numbers 34 Bible Online

Numbers 34 - Aramaic Peshita bible

Numbers 34

¹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

²ܦܲܩܸܕ݂ ܠܲܒ̣̈ܢܲܝ ܝܼܣܪܵܝܹܠ: ܘܐܸܡܲܪ ܕܲܟ݂ܢܲܥܢ: ܗܵܕܹܐ ܐܲܪܥܵܐ ܬܸܬ̣ܦܲܠܲܓ̣ ܠܟ݂ܘܿܢ ܒܝܘܼܪܬܵܢܵܐ: ܐܲܪܥܵܐ ܕܲܟ݂ܢܲܥܢ ܒܲܬ̣ܚܘܼܡܹ̈ܝܗ̇.

³ܘܢܸܗܘܹܐ ܠܟ݂ܘܿܢ ܣܸܛܪܵܐ ܕܬܲܝ̱ܡܢܵܐ: ܡ̣ܢ ܡܲܕ݂ܒ̇ܪܵܐ ܕܨܝܼܢ ܥܲܠ ܬܚܘܼܡܵܐ ܕܐܲܕ݂ܘܿܡ. ܘܢܸܗܘܹܐ ܠܟ݂ܘܿܢ ܬܚܘܼܡܵܐ ܕܬܲܝ̱ܡܢܵܐ: ܡ̣ܢ ܣܘܿܦ ܝܲܡܵܐ ܕܡܸܠܚܵܐ ܡ̣ܢ ܡܲܕ݂ܢ̱ܚܵܐ.

⁴ܘܢܸܗܘܹܐ ܟܵܪܹܟ݂ ܬܚܘܼܡܟ݂ܘܿܢ ܡ̣ܢ ܬܲܝ̱ܡܢܵܐ ܠܡܲܣܩܵܢܵܐ ܕܲܣܦܲܪܘܝܼܡ: ܘܢܸܗܘܹܐ ܥܵܒܲܪ ܠܨܝܼܢ: ܘܢܸܗܘܘܿܢ ܡܵܦܩܵܢܵܘ̈ܗܝ ܡ̣ܢ ܬܲܝ̱ܡܢܵܐ ܠܲܪܩܸܡ ܕܓܲܝܵܐ: ܘܢܸܦܘܿܩ ܥܲܠ ܚܸܨܵܪ ܐܸܕܲܪ: ܘܢܸܥܒܲܪ ܠܥܸܨܡܘܿܢ.

⁵ܘܢܸܬ̣ܟ̇ܪܸܟ݂ ܬܚܘܼܡܵܐ ܡ̣ܢ ܥܸܨܡܘܿܢ ܠܢܲܚܠܵܐ ܕܡܸܨܪܹܝܢ: ܘܢܸܗܘܘܿܢ ܡܲܦܩܵܢܵܘ̈ܗܝ ܠܝܲܡܵܐ.

⁶ܘܲܬ̣ܚܘܼܡܵܐ ܕܝܲܡܵܐ ܢܸܗܘܹܐ ܠܟ݂ܘܿܢ: ܝܲܡܵܐ ܪܲܒܵܐ ܘܲܬ̣ܚܘܼܡܹܗ: ܗܵܢܵܐ ܢܸܗܘܹܐ ܠܟ݂ܘܿܢ ܬܚܘܼܡܵܐ ܕܝܲܡܵܐ.

⁷ܘܗܵܢܵܐ ܢܸܗܘܹܐ ܠܟ݂ܘܿܢ ܬܚܘܼܡܵܐ ܕܓܲܪܒ̇ܝܵܐ: ܡ̣ܢ ܝܲܡܵܐ ܪܲܒܵܐ ܬܬܲܚܡܘܼܢ ܠܟ݂ܘܿܢ ܠܗܘܿܪ ܛܘܼܪܵܐ.

⁸ܘܡ̣ܢ ܗܘܿܪ ܛܘܼܪܵܐ ܬܬܲܚܡܘܼܢ ܠܡܲܥܠܵܢܵܐ ܕܲܚܡܵܬ̣: ܘܢܸܗܘܘܿܢ ܡܲܦܩܵܢܵܘ̈ܗܝ ܕܲܬ̣ܚܘܼܡܵܐ ܠܲܨܕܵܕ݂.

⁹ܘܢܸܗܘܹܐ ܢܵܦܹ̇ܩ ܬܚܘܼܡܵܐ ܠܙܸܦܪܘܿܢ: ܘܢܸܗܘܘܿܢ ܡܲܦܩܵܢܵܘ̈ܗܝ ܠܲܚܨܲܪ ܥܲܝܢܵܢ: ܗܵܠܹܝܢ ܢܸܗܘܘܿܢ ܠܟ݂ܘܿܢ ܬܚܘܼܡܹ̈ܐ ܕܓܲܪܒ̇ܝܵܐ.

¹⁰ܘܲܬ̇ܬܲܚܡܘܼܢ ܠܟ݂ܘܿܢ ܬܚܘܼܡܵܐ ܕܡܲܕ݂ܢ̱ܚܵܐ: ܡ̣ܢ ܚܨܲܪ ܥܲܝܢܵܢ ܠܫܵܦܵܡ.

¹¹ܘܢܸܗܘܹܐ ܢܵܚܹ̇ܬ̣ ܬܚܘܼܡܵܐ ܡ̣ܢ ܫܵܦܵܡ ܠܕܸܒ̣ܠܲܬ̣: ܡ̣ܢ ܡܲܕ݂ܢܲܚ ܠܥܹܝܢ: ܘܢܸܗܘܹܐ ܢܵܚܹ̇ܬ̣ ܬܚܘܼܡܵܐ: ܘܢܸܗܘܹܐ ܣܵܡܹ̇ܟ݂ ܠܣܸܛܪܵܐ ܕܝܲܡܵܐ ܕܟܸܢܪܲܬ̣ ܡ̣ܢ ܡܲܕ݂ܢ̱ܚܵܐ.

¹²ܘܢܸܗܘܹܐ ܢܵܚܹ̇ܬ̣ ܬܚܘܼܡܵܐ ܠܝܘܿܪܕ̇ܢܵܢ. ܘܢܸܗܘܘܿܢ ܡܲܦܩܵܢܵܘ̈ܗܝ ܠܝܲܡܵܐ ܕܡܸܠܚܵܐ. ܗܵܕܹܐ ܬܸܗܘܹܐ ܠܟ݂ܘܿܢ ܐܲܪܥܵܐ ܒܲܬ̣ܚܘܼܡܹ̈ܝܗ̇ ܟܲܕ݂ ܚܵܕ݂ܪܵܐ.

¹³ܘܦܲܩܸܕ݂ ܡܘܼܫܹܐ ܠܲܒ̣̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܗܵܕܲܐ ܗ̄ܝ̣ ܐܲܪܥܵܐ ܕܲܬ̣ܦܲܠܓ̣ܘܼܢ ܒܦܸܨܹ̈ܐ: ܕܦܲܩܸܕ݂ ܡܵܪܝܵܐ ܠܡܸܬܲܠ ܠܬܸܫܥܵܐ ܫܲܒ̣̈ܛܝܼܢ: ܘܲܠܦܸܠܓ̇ܘܼܬ̣ ܫܲܒ̣ܛܵܐ.

¹⁴ܡܸܛܠ ܕܲܢܣܲܒ̣ܘ ܫܲܒ̣̱ܛܵܐ ܕܲܒ̣̈ܢܲܝ ܪܘܼܒܹܝܠ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܘܫܲܒ̣ܛܵܐ ܕܲܒ̣ܢܲܝ ܓܵܕ݂ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܘܦܸܠܓܹ̇ܗ ܕܫܲܒ̣ܛܵܐ ܕܲܡܢܲܫܹܐ ܩܲܒܸ̇ܠܘ ܝܵܪܬ̇ܘܼܬ̇ܗܘܿܢ.

¹⁵ܬܪܹܝܢ ܫܲܒ̣̈ܛܝܼܢ ܘܦܸܠܓ̇ܘܼܬ̣ ܫܲܒ̣ܛܵܐ: ܩܲܒܸ̇ܠܘ ܝܵܪܬ̇ܘܼܬ̣ܗܘܿܢ ܡ̣ܢ ܥܸܒ̣ܪܵܐ ܕܝܘܿܪܕ̇ܢܵܢ ܕܐܝܼܪܝܼܚܘܿ: ܩܲܕ݂ܡܵܝܑܬ̣ ܡ̣ܢ ܡܲܕ݂ܢ̱ܚܵܐ.

¹⁶ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

¹⁷ܗܵܠܹܝܢ ܫܡܵܗܹ̈ܐ ܕܓܲܒ̣ܪܹ̈ܐ ܕܡܵܘܪܬ̣ܝܼܢ ܠܟ݂ܘܿܢ ܐܲܪܥܵܐ: ܐܹܠܝܼܥܵܙܲܪ ܟܵܗܢܵܐ: ܘܝܼܫܘܼܥ ܒܲܪܢܘܿܢ.

¹⁸ܘܚܲܕ݂ ܚܲܕ݂ ܪܹܫܵܐ ܡ̣ܢ ܫܲܒ̣ܛܵܐ ܕܒܲܪܘ ܕܲܢܦܲܠܓ̣ܘܿܢ ܠܟ݂ܘܿܢ ܐܲܪܥܵܐ.

¹⁹ܘܗܵܠܹܝܢ ܫܡܵܗܹ̈ܐ ܕܪܹ̈ܫܹܐ ܕܓܲܒ̣ܪܹ̈ܐ: ܡ̣ܢ ܫܲܒ̣ܛܵܐ ܕܲܝܗܘܼܕ݂ܵܐ: ܟܵܠܵܒ̣ ܒܲܪ ܝܘܿܦܲܢܵܐ.

²⁰ܡ̣ܢ ܫܲܒ̣ܛܵܐ ܕܫܸܡܥܘܿܢ: ܫܲܠܡܘܼܐܹܝܠ ܒܲܪ ܥܲܡܝܼܗܘܿܪ.

²¹ܡ̣ܢ ܫܲܒ̣ܛܵܐ ܕܒܸܢܝܵܡܹܝܢ ܐܸܠܕ݂ܵܕ݂ ܒܲܪ ܟܸܣܠܘܿܢ.

²²ܡ̣ܢ ܫܲܒ̣ܛܵܐ ܕܕ݂ܵܢ: ܒܲܩܝܼ ܒܲܪ ܝܲܓ̣ܠܝܼ.

²³ܡ̣ܢ ܫܲܒ̣ܛܵܐ ܕܝܵܘܣܸܦ: ܡ̣ܢ ܫܲܒ̣ܛܵܐ ܕܲܡܢܲܫܹܐ: ܢܲܚܠܵܐܹܝܠ ܒܲܪ ܐܵܦܘܿܕ݂.

²⁴ܘܡ̣ܢ ܫܲܒ̣ܛܵܐ ܕܐܲܦܪܹܝܡ: ܩܲܡܘܼܐܹܝܠ ܒܲܪ ܫܲܦܛܵܢ.

²⁵ܡ̣ܢ ܫܲܒ̣ܛܵܐ ܕܲܙܒ̣ܘܿܠܘܿܢ ܐܹܐܸܠܝܼܨܦܲܢ ܒܲܪ ܦܲܪܢܵܟ݂.

²⁶ܡ̣ܢ ܫܲܒ̣ܛܵܐ ܕܐܝܼܣܵܟ݂ܵܪ: ܦܛܵܐܹܝܠ ܒܲܪ ܥܵܙܘܿܪ.

²⁷ܡ̣ܢ ܫܲܒ̣ܛܵܐ ܕܐܵܫܹܝܪ: ܐܲܚܝܼܗܘܿܕ݂ ܒܲܪ ܫܲܠܘܿܡܝܼ.

²⁸ܡ̣ܢ ܫܲܒ̣ܛܵܐ ܕܢܲܦ̮ܬܵܠܝܼ: ܦܕ݂ܵܐܹܝܠ ܒܲܪ ܥܲܡܝܼܗܘܿܕ݂.

²⁹ܠܗܵܠܹܝܢ ܦܲܩܸܕ݂ ܡܵܪܝܵܐ ܕܢܵܘܪܬ̣ܘܿܢ ܠܲܒ̣̈ܢܲܝ ܝܼܣܪܵܝܹܠ ܒܐܲܪܥܵܐ ܕܲܟ݂ܢܲܥܢ.