Read Aramaic Peshita Numbers 35 Bible Online

Numbers 35 - Aramaic Peshita bible

Numbers 35

¹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܒܥܲܪܒ̣ܘܿܬ̣ ܡܘܼܐܵܒ̣: ܕܥܲܠ ܝܘܿܪܕ̇ܢܵܢ ܕܐܝܼܪܝܼܚܘܿ: ܘܐܸܡܲܪ ܠܹܗ.

²ܦܲܩܸܕ݂ ܠܲܒ̣̈ܢܲܝ ܝܼܣܪܵܝܹܠ: ܘܢܸܬ̇ܠܘܼܢ ܠܠܹܘܵܝܹ̈ܐ ܡ̣ܢ ܝܘܼܪܬܵܢܵܐ ܕܐܘܼܚܕܵܢܗܘܿܢ ܩܘܼܪ̈ܝܵܐ ܠܡܸܬܲܒ̣: ܘܐܵܓ̣ܘܿܪ̈ܣܹܐ ܕܩܘܼܪ̈ܝܵܐ ܕܒܲܚܕ݂ܵܪ̈ܲܝܗܹܝܢ ܢܸܬ̇ܠܘܿܢ ܠܠܹܘܵܝܹ̈ܐ.

³ܘܢܸܗ̱ܘ̈ܝܵܢ ܠܗܘܿܢ ܩܘܼܪ̈ܝܵܬܐ ܠܡܸܬܲܒ̣: ܘܐܵܓ̣ܘܿܪ̈ܣܲܝܗܹܝܢ ܢܸܗܘܘܿܢ ܠܲܒ̣ܥܝܼܪܗܘܿܢ ܘܲܠܩܸܢܝܵܢܗܘܿܢ: ܘܲܠܟ݂ܠܵܗ̇ ܚܲܝܘܲܬ̣ܗܘܿܢ.

⁴ܘܐܵܓ̣ܘܿܪ̈ܣܹܐ ܕܩܘܼܪ̈ܝܵܐ ܕܬܸܬ̇ܠܘܼܢ ܠܠܹܘܵܝܹ̈ܐ ܡ̣ܢ ܐܸܣܬ̣ܵܐ ܕܲܩܪܝܼܬ̣ܵܐ ܘܲܠܒܲܪ: ܐܵܠܹܦ ܐܲܡ̈ܝܼܢ ܟܲܕ݂ ܚܵܕ݂ܪܵܐ.

⁵ܘܲܡܫܘܿܚ ܡ̣ܢ ܠܒܲܪ ܠܲܩܪܝܼܬ̣ܵܐ ܠܣܸܛܪܵܐ ܕܡܲܕ݂ܢ̱ܚܵܐ: ܬܪܹܝܢ ܐܲܠܦ̈ܝܼܢ ܐܲܡ̈ܝܼܢ: ܘܲܠܣܸܛܪܵܐ ܕܬܲܝ̱ܡܢܵܐ ܬܪܹܝܢ ܐܲܠܦ̈ܝܼܢ ܐܲܡ̈ܝܼܢ: ܘܲܠܣܸܛܪܵܐ ܕܡܲܥܪ̱ܒ̣ܵܐ ܬܪܹܝܢ ܐܲܠܦ̈ܝܼܢ ܐܲܡ̈ܝܼܢ: ܘܲܠܣܸܛܪܵܐ ܕܓܲܪܒ̇ܝܵܐ ܬܪܹܝܢ ܐܲܠܦ̈ܝܼܢ ܐܲܡ̈ܝܼܢ: ܘܲܩܪܝܼܬ̣ܵܐ ܒܲܡܨܲܥܬ̣ܵܐ: ܗܵܢܵܐ ܢܸܗܘܹܐ ܠܟ݂ܘܿܢ ܫܸܛܚܵܐ ܕܩܘܼܪܝܵܐ.

⁶ܘܩܘܼܪ̈ܝܵܐ ܕܝܵܗ̄ܒ̇ܝܼܢ ܐ̄ܢܬ̇ܘܿܢ ܠܠܹܘܵܝܹ̈ܐ: ܫܸܬ̣ ܩܘܼܪ̈ܝܵܐ ܕܒܹܝܬ̣ ܓܵܘܣܵܐ ܢܸܗ̱ܘ̈ܝܵܢ ܠܟ݂ܘܿܢ: ܕܢܸܗܘܹܐ ܥܵܪܹܩ ܠܬܲܡܵܢ ܩܵܛܘܿܠܵܐ ܕܩܵܛܹܠ ܠܚܲܒ̣ܪܹܗ ܕܠܵܐ ܒܨܸܒ̣ܝܵܢܹܗ: ܘܲܥܠܲܝܗܘܿܢ ܐܲܪܒ̇ܥܝܼܢ ܘܬܸܪܬܹ̇ܝܢ ܩܘܼܪ̈ܝܵܐ.

⁷ܟܠܗܹܝܢ ܩܘܼܪ̈ܝܵܐ ܕܝܵܗ̄ܒ̇ܝܼܢ ܐ̄ܢܬ̇ܘܿܢ ܠܠܹܘܵܝܹ̈ܐ: ܐܲܪܒ̇ܥܝܼܢ ܘܲܬ̣ܡܵܢܹܐ ܩܘܼܪ̈ܝܵܐ: ܗܸܢܹܝܢ ܘܫܸܛܚܲܝ̈ܗܹܝܢ.

⁸ܘܩܘܼܪ̈ܝܵܐ ܕܝܵܗܒ̇ܝܼܢ ܐ̄ܢܬ̇ܘܿܢ ܡ̣ܢ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܝܼܣܪܵܝܹܠ: ܡ̣ܢ ܣܲܓ̇ܝܼ̈ܐܹܐ ܬܲܣܓ̇ܘܿܢ: ܘܡ̣ܢ ܙܥܘܿܪܹ̈ܐ ܬܲܙܥ̱ܪܘܼܢ. ܐ̄ܢܵܫ ܐܲܝܟ݂ ܠܦܘܼܬ̣ ܝܵܪܬ̇ܘܼܬ̣ܵܐ ܕܝܵܪܹܬ̣: ܢܸܬܸ̇ܠ ܡ̣ܢ ܩܘܼܪ̈ܝܹܗ ܠܠܹܘܵܝܹ̈ܐ.

⁹ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ.

¹⁰ܡܲܠܸܠ ܥܲܡ ܒ̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ ܡܵܐ ܕܲܥܒܲܪܬ̇ܘܿܢ ܝܘܿܪܕ̇ܢܵܢ ܠܐܲܪܥܵܐ ܕܲܟ݂ܢܲܥܢ.

¹¹ܛܲܝܸܒ̣ܘ ܠܟ݂ܘܿܢ ܩܘܼܪ̈ܝܵܐ ܠܒܹܝܬ̣ ܓܵܘܣܵܐ ܕܢܸܗ̱ܘܝܵܢ ܠܟ݂ܘܿܢ: ܕܢܸܥܪܘܿܩ ܠܬܲܡܵܢ ܩܵܛܘܿܠܵܐ ܐܲܝܢܵܐ ܕܢܸܩܛܘܿܠ ܢܲܦ̮ܫܵܐ ܒܛܘܼܥܝܲܝ.

¹²ܘܢܸܗ̱ܘ̈ܝܵܢ ܠܟ݂ܘܿܢ ܗܵܠܹܝܢ ܩܘܼܪ̈ܝܵܐ ܠܒܹܝܬ̣ ܓܵܘܣܵܐ: ܡ̣ܢ ܬܵܒܲܥ ܥܝܵܪܬܵܐ ܕܲܕ݂ܡܵܐ: ܘܠܵܐ ܢܸܬ̣ܩܛܸܠ ܩܵܛܘܿܠܵܐ: ܥܕܲܡܵܐ ܕܩܵܐܹ̇ܡ ܩܕ݂ܵܡ ܟܢܘܼܫܬܵܐ ܒܕ݂ܝܼܢܵܐ.

¹³ܘܩܘܼܪ̈ܝܵܐ ܕܝܵܗ̄ܒ̇ܝܼܢ ܐ̄ܢܬ̇ܘܿܢ: ܫܸܬ̣ ܩܘܼܪ̈ܝܵܐ ܕܒܹܝܬ̣ ܓܵܘܣܵܐ ܢܸܗ̱ܘ̈ܝܵܢ ܠܟ݂ܘܿܢ.

¹⁴ܬܠܵܬ̣ ܩܘܼܪ̈ܝܵܐ ܗܲܒ̣ܘ ܒܥܸܒ̣ܪܵܐ ܕܝܘܿܪܕ̇ܢܵܢ: ܘܲܬ̣ܠܵܬ̣ ܩܘܼܪ̈ܝܵܐ ܗܲܒ̣ܘ ܒܐܲܪܥܵܐ ܕܲܟ݂ܢܲܥܢ: ܩܘܼܪ̈ܝܵܐ ܕܒܹܝܬ̣ ܓܵܘܣܵܐ ܢܸܗ̱ܘ̈ܝܵܢ: ܠܲܒ̣̈ܢܲܝ ܝܼܣܪܵܝܹܠ.

¹⁵ܘܠܲܐܝܢܵܐ ܕܡܸܬ̣ܦܢܹܐ ܠܘܵܬ̣ܝ: ܘܠܲܐܝܠܹܝܢ ܕܥܵܡܪܝܼܢ ܒܲܝܢܵܬ̣ܟ݂ܘܿܢ: ܘܢܸܗ̱ܘ̈ܝܵܢ ܠܟ݂ܘܿܢ ܗܵܠܹܝܢ ܫܸܬ̣ ܩܘܼܪ̈ܝܵܐ ܠܒܹܝܬ̣ ܓܵܘܣܵܐ: ܕܢܸܥܪܘܿܩ ܠܗܹܝܢ ܟܠ ܕܩܵܛܹ̇ܠ ܢܲܦ̮ܫܵܐ ܒܛܘܼܥܝܲܝ.

¹⁶ܘܐܸܢ ܒܡܵܐܢܵܐ ܕܦܲܪܙܠܵܐ ܡܚܲܝܗܝ ܐܲܝܟ݂ ܕܲܢܡܘܼܬ̣ ܘܡܝܼܬ̣: ܩܵܛܘܿܠܵܐ ܗ̄ܘ̣. ܡܸܬ̣ܩܛܵܠܘܼ ܢܸܬ̣ܩܛܸܠ ܩܵܛܘܿܠܵܐ ܗܵܘ̇.

¹⁷ܘܐܸܢ ܒܟܹܐܦܵܐ ܒܐܝܼܕ݂ܵܐ ܡ̣ܚܵܝܗܝ ܐܲܝܟ݂ ܕܲܢܡܘܼܬ̣ ܘܡܝܼܬ̣: ܡܸܬ̣ܩܛܵܠܘܼ ܢܸܬ̣ܩܛܸܠ ܩܵܛܘܿܠܵܐ ܗܵܘ̇.

¹⁸ܐܵܘ ܒܡܵܐܢܵܐ ܕܩܲܝܣܵܐ ܒܐܝܼܕ݂ܵܐ ܡ̣ܚܵܝܗܝ ܐܲܝܟ݂ ܕܲܢܡܘܼܬ̣ ܘܡܝܼܬ̣: ܩܵܛܘܿܠܵܐ ܗ̄ܘ̣. ܡܸܬ̣ܩܛܵܠܘܼ ܢܸܬ̣ܩܛܸܠ ܩܵܛܘܿܠܵܐ ܗܵܘ̇.

¹⁹ܬܵܒܲܥ ܥܝܵܪܬܵܐ ܕܲܕ݂ܡܵܐ: ܗ̤ܘ ܢܸܩܛܠܝܼܘܗܝ ܠܩܵܛܘܿܠܵܐ ܡܵܐ ܕܦܵܥܓ̣ ܒܹܗ.

²⁰ܘܐܸܢ ܒܣܸܢ̱ܐܬ̣ܵܐ ܡܚܵܝܗܝ: ܐܵܘ ܫܕ݂ܵܐ ܒܹܗ ܒܢܸܟ݂ܠܵܐ ܘܡܝܼܬ̣: ܩܵܛܘܿܠܵܐ ܗ̄ܘ̣.

²¹ܒܲܒ̣ܥܸܠܕ̇ܒ̣ܵܒ̣ܘܼܬ̣ܵܐ ܡܚܵܝܗܝ ܒܐܝܼܕܹܗ ܐܲܝܟ݂ ܕܲܢܡܘܼܬ̣: ܘܡܝܼܬ̣: ܩܵܛܘܿܠܵܐ ܗ̄ܘ̣ ܡܸܬ̣ܩܛܵܠܘܼ ܢܸܬ̣ܩܛܸܠ. ܬܵܒܲܥ ܥܝܵܪܬܵܐ ܕܲܕ݂ܡܵܐ: ܗܘ̣ ܢܸܩܛܠܝܼܘܗܝ ܠܩܵܛܘܿܠܵܐ ܡܵܐ ܕܦܵ̃ܓܲܥ ܒܹܗ.

²²ܘܐܸܢ ܡ̣ܢ ܫܸܠܝܵܐ ܕܠܵܐ ܒܥܸܠܕ̇ܒ̣ܵܒ̣ܘܼܬ̣ܵܐ ܡܚܵܝܗܝ: ܐܵܘ ܫܕ݂ܵܐ ܒܹܗ ܟܠ ܡܵܐܹܢ ܕܠܵܐ ܒܢܸܟ݂ܠܵܐ.

²³ܐܵܘ ܒܟ݂ܠ ܟܹܐܦ ܕܩܸܛܠܵܐ: ܟܲܕ݂ ܠܵܐ ܚܙܵܐ: ܫܕ݂ܵܐ ܥܠܵܘܗܝ ܘܡܝܬ̣: ܘܠܵܐ ܗܘ̤ܵܐ ܒܥܸܠܕ̇ܒ̣ܵܒܹܗ: ܘܠܵܐ ܨܵܒܹ̇ܐ ܗ̄ܘ̣ܵܐ ܠܒ̣ܝܼܫܬܹ̇ܗ.

²⁴ܬܕ݂ܘܼܢ ܟܢܘܼܫܬܵܐ ܒܹܝܬ̣ ܩܵܛܘܿܠܵܐ ܠܬܲܒܲܥ ܥܝܵܪܬܵܐ ܕܲܕ݂ܡܵܐ ܥܲܠ ܕܝܼܢܹ̈ܐ ܗܵܠܹܝܢ.

²⁵ܘܲܬ̣ܦܲܨܝܼܘܗܝ ܟܢܘܼܫܬܵܐ ܠܩܵܛܘܿܠܵܐ ܡ̣ܢ ܬܵܒܲܥ ܥܝܵܪܬܵܐ ܕܲܕ݂ܡܵܐ: ܘܲܬ̣ܫܲܕܪܝܼܘܗܝ ܟܢܘܼܫܬܵܐ ܠܲܩܪܝܼܬ̣ܵܐ ܕܒܹܝܬ̣ ܓܵܘܣܵܐ ܕܲܥܪܲܩ ܗ̄ܘ̣ܵܐ ܠܵܗ̇: ܘܢܸܬܸ̇ܒ̣ ܒܵܗ̇ ܥܕܲܡܵܐ ܕܲܢܡܘܼܬ̣ ܟܵܗܢܵܐ ܪܲܒܵܐ ܕܐܸܬ̣ܡ̱ܫܲܚ ܒܡܸܫܚܵܐ ܕܩܘܼܕ݂ܫܵܐ.

²⁶ܘܐܸܢ ܢܸܦܘܿܩ ܩܵܛܘܿܠܵܐ ܠܒܲܪ ܡ̣ܢ ܬܚܘܼܡܵܐ ܕܲܩܪܝܼܬ̣ܵܐ ܕܒܹܝܬ̣ ܓܵܘܣܵܐ ܕܲܥܪܲܩ ܠܵܗ̇.

²⁷ܘܢܸܫܟ̇ܚܝܼܘܗܝ ܬܵܒܲܥ ܥܝܵܪܬܵܐ ܕܲܕ݂ܡܵܐ ܠܒܲܪ ܡ̣ܢ ܬܚܘܼܡܹ̈ܐ ܕܲܩܪܝܼܬ̣ܵܐ ܕܒܹܝܬ̣ ܓܵܘܣܵܐ: ܘܢܸܩܛܘܿܠ ܬܵܒܲܥ ܥܝܵܪܬܵܐ ܕܲܕ݂ܡܵܐ ܠܩܵܛܘܿܠܵܐ: ܠܲܝܬ̇ ܠܹܗ ܥܝܵܪܬܵܐ.

²⁸ܡܸܛܠ ܗܵܢܵܐ ܒܲܩܪܝܼܬ̣ܵܐ ܕܒܹܝܬ̣ ܓܵܘܣܵܐ ܢܸܬܸ̇ܒ̣: ܥܕܲܡܵܐ ܕܲܢܡܘܼܬ̣ ܟܵܗܢܵܐ ܪܲܒܵܐ. ܘܡܵܐ ܕܡܝܼܬ̣ ܟܵܗܢܵܐ ܪܲܒܵܐ: ܢܸܗܦܘܿܟ݂ ܩܵܛܘܿܠܵܐ ܠܐܲܪܥܵܐ ܕܝܵܪܬ̇ܘܼܬܹܗ.

²⁹ܘܢܸܗܘܘܿܢ ܠܟ݂ܘܿܢ ܗܵܠܹܝܢ ܢܵܡܘܿܣܹ̈ܐ ܠܥܵܠܲܡ ܠܕܵܪ̈ܲܝܟ̇ܘܿܢ ܒܟ݂ܠܹܗ ܒܹܝܬ̣ ܡܲܥܡܲܪܟ݂ܘܿܢ.

³⁰ܟܠ ܕܢܸܩܛܘܿܠ ܢܲܦ̮ܫܵܐ: ܥܲܠ ܦܘܼܡ ܣܵܗ̈ܕܹ̇ܐ ܢܸܬ̣ܩܛܸܠ ܩܵܛܘܿܠܵܐ: ܘܣܵܗܕܵܐ ܚܲܕ݂ ܠܵܐ ܢܲܣܗܸܕ݂ ܥܲܠ ܢܲܦ̮ܫܵܐ ܕܲܬ̣ܡܘܼܬ̣.

³¹ܘܠܵܐ ܬܩܲܒ̇ܠܘܼܢ ܫܘܼܚܕܵܐ ܥܲܠ ܢܲܦ̮ܫܵܐ ܕܩܵܛܘܿܠܵܐ ܕܚܲܝܵܒ̣ ܡܵܘܬܵܐ: ܐܸܠܵܐ ܡܸܬ̣ܩܛܵܠܘܼ ܢܸܬ̣ܩܛܸܠ.

³²ܘܠܵܐ ܬܸܣܒ̣ܘܿܢ ܫܘܼܚܕܵܐ ܕܢܸܥܪܘܿܩ ܠܲܩܪܝܼܬ̣ܵܐ ܕܒܹܝܬ̣ ܓܵܘܣܵܐ: ܘܢܹܐܙܲܠ ܘܢܸܬܸ̇ܒ̣ ܒܐܲܪܥܵܐ ܥܕܲܡܵܐ ܕܲܢܡܘܼܬ̣ ܟܵܗܢܵܐ ܪܲܒܵܐ.

³³ܠܵܐ ܬܛܲܢܦܘܼܢܵܗ̇ ܠܐܲܪܥܵܐ ܕܥܵܡ̇ܪܝܼܢ ܐ̄ܢܬ̇ܘܿܢ ܒܵܗ̇. ܡܸܛܠ ܕܲܕ݂ܡܵܐ ܗ̄ܘ̣ ܡܛܲܢܸܦ ܠܐܲܪܥܵܐ ܘܐܲܪܥܵܐ ܕܲܕ݂ܡܵܐ ܐܲܫܝܼܕ݂ ܒܵܗ̇: ܠܵܐ ܢܸܬ̣ܚܲܣܹܐ ܥܠܹܝܗ̇: ܐܸܠܵܐ ܐܸܢ ܐܸܬ̣ܐ̱ܫܸܕ݂ ܒܵܗ̇ ܕܡܵܐ ܕܗܵܘ̇ ܡ̇ܢ ܕܐܲܫܕܹ̇ܗ.

³⁴ܘܠܵܐ ܬܛܲܡܐܘܼܢܵܗ̇ ܠܐܲܪܥܵܐ ܕܥܵܡ̇ܪܝܼܢ ܐ̄ܢܬ̇ܘܿܢ ܒܵܗ̇ ܕܫܵܪܹܐ ܐ̄ܢܵܐ ܒܓ̣ܵܘܵܗ̇: ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܕܫܪܹܐ ܐ̄ܢܵܐ ܒܲܝܢܵܬ̣ ܒ̈ܢܲܝ ܝܼܣܪܵܝܹܠ.