Read Aramaic Peshita Numbers 36 Bible Online

Numbers 36 - Aramaic Peshita bible

Numbers 36

¹ܘܲܩܪܸܒ̣ܘ ܪܹ̈ܫܲܝ ܐܲܒ̣ܵܗܹ̈ܐ ܕܫܲܪܒ̇ܬ̣ܵܐ ܕܲܒ̣̈ܢܲܝ ܓܸܠܥܵܕ݂: ܒܲܪ ܡܵܟ݂ܝܼܪ: ܒܲܪ ܡܢܲܫܹܐ: ܡ̣ܢ ܫܲܪܒ̇ܬ̣ܵܐ ܕܲܡܢܲܫܹܐ ܒܲܪ ܝܵܘܣܸܦ. ܘܡܲܠܸܠܘ ܩܕ݂ܵܡ ܡܘܼܫܹܐ: ܘܲܩܕ݂ܵܡ ܐܹܠܝܼܥܵܙܲܪ ܟܵܗܢܵܐ: ܘܲܩܕ݂ܵܡ ܪܵܘ̱ܪ̈ܒ̣ܵܢܹܐ ܕܲܟ݂ܢܘܼܫܬܵܐ: ܪܹ̈ܫܹܐ ܕܐܲܒ̣ܵܗܹ̈ܐ ܕܲܒ̣̈ܢܲܝ ܝܼܣܪܵܝܹܠ.

²ܘܐܸܡܲܪܘ. ܠܡܵܪܲܢ ܦܲܩܸܕ݂ ܡܵܪܝܵܐ ܠܡܸܬܲܠ ܐܲܪܥܵܐ ܠܝܘܼܪܬܵܢܵܐ ܒܦܸܨܹ̈ܐ ܠܲܒ̣̈ܢܲܝ ܝܼܣܪܵܝܹܠ: ܘܡܵܪܲܢ ܐܸܬ̣ܦܲܩܲܕ݂ ܡ̣ܢ ܡܵܪܝܵܐ: ܕܢܸܬܸ̇ܠ ܝܵܪܬ̇ܘܼܬܹܗ ܕܲܨܠܸܦܚܲܕ݂ ܐܲܚܘܼܢ ܠܲܒ̣̈ܢܵܬܹܗ.

³ܘܐܸܢ ܢܸܗ̱ܘ̈ܝܵܢ ܠܚܲܕ݂ ܡ̣ܢ ܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ ܢܸܫܹ̈ܐ: ܬܸܬ̣ܒܲܨܲܪ ܝܵܪܬ̇ܘܼܬ̣ܗܹܝܢ ܡ̣ܢ ܝܵܪܬ̇ܘܼܬ̣ܵܐ ܕܐܲܒ̣ܘܼܗܹܝܢ: ܘܬܸܬܵܘܣܲܦ ܥܲܠ ܝܵܪܬ̇ܘܼܬ̣ܵܐ ܕܫܲܒ̣̈ܛܹܐ ܕܢܸܗ̱ܘ̈ܝܵܢ ܠܗܘܿܢ: ܡ̣ܢ ܦܸܨܬ̣ܵܐ ܕܝܵܪܬ̇ܘܼܬܲܢ ܬܸܬ̣ܒܲܨܲܪ.

⁴ܘܐܸܢ ܢܸܗܘܹܐ ܦܘܼܢܵܝܵܐ ܠܲܒ̣̈ܢܲܝ ܝܼܣܪܵܝܹܠ: ܬܸܬܵܘܣܲܦ ܝܵܪܬ̇ܘܼܬ̣ܗܹܝܢ ܥܲܠ ܝܵܪܬ̇ܘܼܬ̣ܵܐ ܕܫܲܒ̣̈ܛܹܐ ܕܢܸܗ̱ܘ̈ܝܵܢ ܠܗܘܿܢ: ܡ̣ܢ ܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܐܲܒ̣ܘܼܗܹܝܢ ܬܸܬ̣ܒܲܨܲܪ ܝܵܪܬ̇ܘܼܬ̣ܗܹܝܢ.

⁵ܘܦܲܩܸܕ݂ ܡܘܼܫܹܐ ܠܲܒ̣̈ܢܲܝ ܝܼܣܪܵܝܹܠ ܥܲܠ ܡܸܠܲܬ̣ ܦܘܼܡܹܗ ܕܡܵܪܝܵܐ: ܘܐܸܡܲܪ: ܟܹܐܢܵܐܝܼܬ̣ ܡܡܲܠܠܝܼܢ ܫܲܒ̣ܛܵܐ ܕܲܒ̣̈ܢܲܝ ܝܵܘܣܸܦ.

⁶ܗܵܢܵܐ ܦܸܬ̣ܓ̣ܵܡܵܐ ܕܦܲܩܸܕ݂ ܡܵܪܝܵܐ ܥܲܠ ܒ̈ܢܵܬܹܗ ܕܲܨܠܸܦܚܲܕ݂: ܘܐܸܡܲܪ: ܕܲܠܡܵܢ ܕܫܵܦܲܪ ܒܥܲܝܢܲܝ̈ܗܹܝܢ ܢܸܗ̱ܘ̈ܝܵܢ ܢܸܫܹ̈ܐ: ܒܪܲܡ ܠܫܲܒ̣ܛܵܐ ܕܫܲܪܒ̇ܬ̣ܵܐ ܕܐܲܒ̣ܘܼܗܹܝܢ ܢܸܗ̱ܘ̈ܝܵܢ.

⁷ܘܠܐ ܬܸܬ̣ܟ̇ܪܸܟ݂ ܝܵܪܬ̇ܘܼܬ̣ܵܐ ܕܲܒ̣̈ܢܲܝ ܝܼܣܪܵܝܹܠ ܡ̣ܢ ܫܲܒ̣ܛܵܐ ܠܫܲܒ̣ܛܵܐ ܐ̄ܚܪܹܢܵܐ: ܐܸܠܵܐ ܓܒܲܪ ܒܝܵܪܬ̇ܘܼܬ̣ܵܐ ܕܫܲܒ̣ܛܵܐ ܕܐܲܒ̣ܘܼܗܝ ܢܸܬ̣ܢܲܩܦܘܼܢ ܒ̈ܢܲܝ ܝܼܣܪܵܝܹܠ.

⁸ܘܟ݂ܠ ܒܲܪܬܵܐ ܕܝܵܪܬܵܐ ܝܘܼܪܬܵܢܵܐ ܡ̣ܢ ܫܲܒ̣ܛܹܐ ܕܲܒ̣̈ܢܲܝ ܝܼܣܪܵܝܹܠ: ܠܚܲܕ݂ ܡ̣ܢ ܫܲܒ̣ܛܵܐ ܕܫܲܪܒ̇ܬ̣ܵܐ ܕܐܲܒ̣ܘܼܗ̇ ܬܸܗܘܹܐ ܐܲܢ̄ܬ̇ܬ̣ܵܐ: ܘܢܹܐܪܬ̇ܘܿܢ ܒ̈ܢܲܝ ܝܼܣܪܵܝܹܠ ܐ̄ܢܵܫ ܝܵܪܬ̇ܘܼܬ̣ܵܐ ܕܐܲܒ̣ܘܼܗܝ.

⁹ܘܠܵܐ ܬܸܬ̣ܟ̇ܪܸܟ݂ ܝܵܪܬ̇ܘܼܬ̣ܵܐ ܡ̣ܢ ܫܲܒ̣ܛܵܐ ܠܫܲܒ̣ܛܵܐ ܐ̄ܚܪܹܢܵܐ: ܐܸܠܵܐ ܓܒܲܪ ܒܝܵܪܬ̇ܘܼܬܹܗ ܢܸܬ̣ܢܲܩܦܘܼܢ ܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ.

¹⁰ܘܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܥܒܲܕ݂ ܒ̈ܢܵܬܹܗ ܕܲܨܠܸܦܚܲܕ݂.

¹¹ܘܲܗ̤ܘܲܝ̈ ܡܲܚܠܵܐ: ܘܬܲܪܨܵܐ: ܘܚܲܓ̣ܠܵܐ: ܘܡܸܠܟܵܐ: ܘܝܲܥܵܐ: ܒ̈ܢܵܬܹܗ ܕܲܨܠܸܦܚܲܕ݂. ܠܲܒ̣̈ܢܲܝ ܕܵܕܲܝ̈ܗܹܝܢ.

¹²ܠܫܲܪ̈ܒ̣ܵܬ̣ܵܐ ܕܲܒ̣̈ܢܲܝ ܡܢܲܫܹܐ ܒܲܪ ܝܵܘܣܸܦ ܗ̤ܘܲܝ̈: ܘܲܗܘ̤ܵܬ̣ ܝܵܪܬ̇ܘܼܬ̣ܗܹܝܢ ܥܲܠ ܫܲܒ̣ܛܵܐ ܕܫܲܪܒ̇ܬ̣ܵܐ ܕܐܲܒ̣ܘܼܗܹܝܢ.

¹³ܗܵܠܹܝܢ ܦܘܼܩ̈ܕܵܢܹܐ ܘܢܵܡܘܿܣܹ̈ܐ ܘܕ݂ܝܼܢܹ̈ܐ ܕܦܲܩܸܕ݂ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ ܥܲܠ ܒ̈ܢܲܝ ܝܼܣܪܵܝܹܠ: ܒܥܲܪܒ̣ܘܼܬ̣ ܡܘܼܐܵܒ̣ ܕܥܲܠ ܝܘܿܪܕ̇ܢܵܢ ܕܐܝܼܪܝܼܚܘܿ.