Read Aramaic Peshita Numbers 7 Bible Online

Numbers 7 - Aramaic Peshita bible

Numbers 7

¹ܘܲܗܘ̤ܵܐ ܒܝܵܘܡܵܐ ܕܫܲܠܸܡ ܡܘܼܫܹܐ ܠܲܡܩܵܡܘܼܬܹܗ ܠܡܲܫܟ̇ܢܵܐ: ܡܲܫܚܹܗ ܘܩܲܕ̇ܫܹܗ ܠܹܗ ܘܲܠܟ݂ܠܗܘܿܢ ܡܵܐܢܵܘ̈ܗܝ: ܘܲܠܡܲܕ݂ܒ̇ܚܵܐ ܘܲܠܟ݂ܠܗܘܿܢ ܡܵܐܢܵܘ̈ܗܝ: ܡܫܲܚ ܐܸܢܘܿܢ ܘܩܲܕܸ̇ܫ ܐܸܢܘܿܢ.

²ܘܩܲܪܸܒ̣ܘ ܪܵܘ̱ܪ̈ܒ̣ܵܢܹܐ ܕܒ̣̈ܢܲܝ ܝܼܣܪܵܝܹܠ: ܪܹ̈ܫܹܐ ܕܒܹܝܬ̣ ܐܲܒ̣ܵܗܲܝ̈ܗܘܿܢ: ܗܸܢܘܿܢ ܪܵܘ̱ܪ̈ܒܵܢܹܐ ܕܫܲܒ̣̈ܛܹܐ: ܗܵܢܘܿܢ ܕܩܵܝܡܝܼܢ ܥܲܠ ܡܸܢܝܵܢܹ̈ܐ.

³ܘܐܲܝܬ̇ܝܼܘ ܩܘܼܪ̈ܒܵܢܲܝܗܘܿܢ ܩܕ݂ܵܡ ܡܵܪܝܵܐ: ܫܸܬ̣ ܥ̈ܓ̣ܠܵܢ ܟܲܕ݂ ܡܲܬ̣ܩ̈ܢܵܢ: ܘܲܬ̣ܪܸܥܣܲܪ ܬܵܘܪ̈ܝܼܢ: ܥܲܓܠܬܵܐ ܠܲܬ̣ܪܹܝܢ ܪܵܘ̱ܪ̈ܒ̣ܵܢܝܼܢ: ܘܬ̣ܵܘܪܵܐ ܠܚܲܕ݂: ܘܩܲܪܸܒ̣ܘ ܐܸܢܘܿܢ ܩܕ݂ܵܡ ܡܲܫܟ̇ܢܵܐ.

⁴ܘܐܸܡܲܪ ܡܵܪܝܵܐ ܠܡܘܼܫܹܐ.

⁵ܣܲܒ̣ ܡܸܢܗܘܿܢ: ܘܢܸܗܘܘܿܢ ܠܡܸܦܠܲܚ ܒܗܘܿܢ ܦܘܼܠܚܵܢܵܐ ܕܡܲܫܟܲܢ ܙܲܒ̣ܢܵܐ: ܘܗܲܒ̣ ܐܸܢܘܿܢ ܠܠܹܘܵܝܹ̈ܐ ܐ̄ܢܵܫ ܡܸܣܲܬ̣ ܦܘܼܠܚܵܢܹܗ.

⁶ܘܲܕ݂ܒܲܪ ܡܘܼܫܹܐ ܬܵܘܪܹ̈ܐ ܘܥܵـ̈ـܓ̣ܠܵܬ̣ܵܐ: ܘܐܲܫܠܸܡ ܐܸܢܘܿܢ ܠܠܹܘܵܝܹ̈ܐ.

⁷ܬܲܪܬܹ̇ܝܢ ܥܵـ̈ـܓ̣ܠܵܢ ܘܐܲܪܒ̇ܥܵܐ ܬܵܘܪ̈ܝܼܢ: ܝܲܗ̄ܒ̣ ܠܲܒ̣̈ܢܲܝ ܓܸܪܫܘܿܢ: ܡܸܣܲܬ̣ ܦܘܼܠܚܵܢܗܘܿܢ.

⁸ܘܐܲܪܒܲܥ ܥܵܓ̣̈ܠܵܢ ܘܲܬ̣ܡܵܢܝܵܐ ܬܵܘܪ̈ܝܼܢ: ܝܲܗ̄ܒ̣ ܠܲܒ̣̈ܢܲܝ ܡܪܵܪܝ: ܡܸܣܲܬ̣ ܦܘܼܠܚܵܢܗܘܿܢ: ܒܐܝܼܕ݂ܵܐ ܕܐܝܼܬ̣ܵܡܵܪ ܒܪܹܗ ܕܐܲܗܪܘܿܢ ܟܵܗܢܵܐ.

⁹ܘܠܲܒ̣̈ܢܲܝ ܩܵܗܵܬ̣ ܠܵܐ ܝܲܗ̄ܒ̣: ܡܸܛܠ ܕܦܘܼܠܚܵܢܵܐ ܕܩܘܼܕ݂ܫܵܐ ܡܲܫܠܲܡ ܠܗܘܿܢ: ܘܥܲܠ ܟܲܬ̣ܦܵܬ̣̈ܗܘܿܢ ܫܵܩܠܝܼܢ.

¹⁰ܘܩܲܪܸܒ̣ܘ ܪܵܘ̱ܪ̈ܒ̣ܵܢܹܐ ܩܘܼܪܒܵܢܵܐ ܕܚܘܼܕܵܬ̣ܵܐ ܕܡܲܕ݂ܒ̇ܚܵܐ ܒܝܵܘܡܵܐ ܕܡܲܫܚܘܼܗܝ: ܘܩܲܪܸܒ̣ܘ ܪܵܘ̱ܪ̈ܒ̣ܵܢܹܐ ܩܘܼܪ̈ܒܵܢܲܝܗܘܿܢ ܩܕ݂ܵܡ ܡܵܪܝܵܐ.

¹¹ܘܐܸܡܲܪ ܡܵܪܝܵܐ ܠܡܘܼܫܹܐ: ܚܲܕ݂ ܚܲܕ݂ ܪܲܒܵܐ ܒܝܵܘܡܵܐ ܢܸܗܘܘܿܢ ܡܒܲܪܒ̣ܝܼܢ ܩܘܼܪ̈ܒܵܢܲܝܗܘܿܢ ܠܚܘܼܕܵܬ̣ܵܐ ܕܡܲܕ݂ܒ̇ܚܵܐ.

¹²ܘܲܗܘ̤ܵܬ̣ ܕܲܡܩܲܪܸܒ̣ ܒܝܵܘܡܵܐ ܩܲܕ݂ܡܵܝܵܐ ܩܘܼܪܒܵܢܹܗ: ܢܸܚܫܘܿܢ ܒܲܪ ܥܲܡܝܼܢܵܕܵܒ̣: ܪܹܫ ܫܲܒ̣ܛܵܐ ܕܒܹܝܬ̣ ܝܼܗܘܼܕ݂ܵܐ.

¹³ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠ̈ܝܼܢ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪܲܝܗܘܿܢ ܟܲܕ݂ ܡܠܹܝܢ ܣܡܝܼܕ݂ܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

¹⁴ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ ܘܡܲܠܝܵܐ ܒܸܣܡܹ̈ܐ.

¹⁵ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

¹⁶ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

¹⁷ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܢܸܚܫܘܿܢ: ܒܲܪ ܥܲܡܝܼܢܵܕ݂ܵܒ̣.

¹⁸ܘܲܒ̣ܝܵܘܡܵܐ ܕܲܬ̣ܪܹܝܢ: ܩܲܪܸܒ̣ ܪܹܫ ܫܲܒ̣ܛܵܐ ܕܐܝܼܣܵܟ݂ܵܪ: ܢܲܬ̣ܢܝܼܐܹܝܠ ܒܲܪ ܨܘܵܥܵܪ.

¹⁹ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣̈ܩܵܠܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܣܡܝܼܕ݂ܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

²⁰ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

²¹ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

²²ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

²³ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܢܲܬ̣ܢܝܼܐܹܝܠ ܒܲܪ ܨܘܿܥܵܪ.

²⁴ܘܲܒ̣ܝܵܘܡܵܐ ܕܲܬ̣ܠܵܬ̣ܵܐ: ܩܲܪܸܒ̣ ܪܹܫ ܫܲܒ̣ܛܵܐ ܕܲܙܒ̣ܘܿܠܘܿܢ: ܐܸܠܝܲܒ̣ ܒܲܪ ܚܲܠܘܿܢ.

²⁵ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

²⁶ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

²⁷ܘܬ݂ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

²⁸ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

²⁹ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܹܠܝܲܒ̣ ܒܲܪ ܚܲܠܘܿܢ.

³⁰ܘܲܒ̣ܝܵܘܡܵܐ ܕܐܲܪܒ̇ܥܵܐ: ܩܲܪܸܒ̣ ܪܹܫ ܫܲܒ̣ܛܵܐ ܕܪܘܼܒܹܝܠ: ܐܹܠܝܼܨܘܿܪ ܒܲܪ ܫܲܕܐܘܿܪ.

³¹ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

³²ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

³³ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

³⁴ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

³⁵ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܹܠܝܼܨܘܿܪ ܒܲܪ ܫܲܕ݂ܐܘܿܪ.

³⁶ܘܲܒ̣ܝܵܘܡܵܐ ܕܚܲܡܫܵܐ: ܩܲܪܸܒ̣ ܪܹܫ ܫܲܒ̣ܛܵܐ ܕܫܸܡܥܘܿܢ: ܫܲܠܡܘܼܐܹܝܠ ܒܲܪ ܨܘܿܪܝܼܫܲܕܲܝ.

³⁷ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

³⁸ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

³⁹ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁴⁰ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁴¹ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܫܲܠܡܘܼܐܹܝܠ ܒܲܪ ܨܘܿܪܝܼܫܲܕܲܝ.

⁴²ܘܲܒ̣ܝܵܘܡܵܐ ܕܸܫܬܵܐ: ܩܲܪܸܒ̣ ܪܹܫ ܫܲܒ̣ܛܵܐ ܕܓ̣ܵܕ݂: ܐܹܠܝܵܣܵܦ ܒܲܪ ܪܥܘܼܐܹܝܠ.

⁴³ܩܘܼܪܝܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ ܬܪ̈ܲܝܗܘܿܢ ܟܲܕ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁴⁴ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁴⁵ܘܬܲܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁴⁶ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁴⁷ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܹܠܝܵܣܵܦ ܒܲܪ ܪܥܘܼܐܹܝܠ.

⁴⁸ܘܲܒ̣ܝܵܘܡܵܐ ܕܫܲܒ̣ܥܵܐ ܩܲܪܸܒ̣ ܪܹܫ ܫܲܒ̣ܛܵܐ ܕܐܲܦܪܹܝܡ: ܐܹܠܝܼܫܡܲܥ ܒܲܪ ܥܲܡܝܼܗܘܼܕ݂.

⁴⁹ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁵⁰ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁵¹ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܥܠܵܬ̣ܵܐ.

⁵²ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁵³ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܹܠܝܼܫܡܲܥ ܒܲܪ ܥܲܡܝܼܗܘܼܕ݂.

⁵⁴ܘܲܒ̣ܝܵܘܡܵܐ ܕܲܬ̣ܡܵܢܝܵܐ: ܩܲܪܸܒ̣ ܪܹܫ ܫܲܒ̣ܛܵܐ ܕܲܡܢܲܫܹܐ: ܓܲܡܠܝܼܐܹܝܠ ܒܲܪ ܦܲܪܨܘܿܪ.

⁵⁵ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁵⁶ܘܟܲܦܬ̣ܵܐ ܚܕ݂ܵܐ ܡ̣ܢ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁵⁷ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁵⁸ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁵⁹ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢܞܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܓܲܡܠܝܼܐܹܝܠ ܒܲܪ ܦܲܪܨܘܿܪ.

⁶⁰ܘܲܒ̣ܝܵܘܡܵܐ ܕܬܸܫܥܵܐ ܩܲܪܸܒ̣ ܪܹܫ ܫܲܒ̣ܛܵܐ ܕܒܸܢܝܵܡܹܝܢ: ܐܲܒ̣ܝܼܕܵܢ ܒܲܪ ܓܸܕ݂ܥܘܿܢܝܼ.

⁶¹ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁶²ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁶³ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁶⁴ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁶⁵ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܲܒ̣ܝܼܕܵܢ ܒܲܪ ܓܸܕ݂ܥܘܿܢܝܼ.

⁶⁶ܘܲܒ̣ܝܵܘܡܵܐ ܕܥܸܣܪܵܐ ܩܲܪܸܒ̣ ܪܹܫ ܫܲܒ̣ܛܵܐ ܕܕܵܢ: ܐܲܚܝܼܥܵܙܲܪ ܒܲܪ ܥܲܡܝܼܕܲܝ.

⁶⁷ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁶⁸ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁶⁹ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁷⁰ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁷¹ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܗ ܕܐܲܚܝܼܥܵܙܲܪ ܒܲܪ ܥܲܡܝܼܫܲܕܲܝ.

⁷²ܘܲܒ̣ܝܵܘܡܵܐ ܕܲܚܕܲܥܣܲܪ ܩܲܪܸܒ̣ ܪܹܫ ܫܲܒ̣ܛܵܐ ܕܐܵܫܹܝܪ: ܦܲܓ̣ܥܵܐܹܝܠ ܒܲܪ ܥܲܟ݂ܪܵܢ.

⁷³ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁷⁴ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ: ܘܡܲܠܝܵܐ ܒܸܣܡܹ̈ܐ.

⁷⁵ܘܬ̣ܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁷⁶ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁷⁷ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܦܲܓ̣ܥܵܐܹܝܠ ܒܲܪ ܥܲܟ݂ܪܵܢ.

⁷⁸ܘܲܒ̣ܝܵܘܡܵܐ ܕܲܬ̣ܪܸܥܣܲܪ ܩܲܪܸܒ̣ ܪܹܫ ܫܲܒ̣ܛܵܐ ܕܢܲܦ̮ܬܵܠܝܼ: ܐܲܚܝܼܕܲܥ ܒܲܪ ܥܲܝܢܵܢ.

⁷⁹ܩܘܼܪܒܵܢܹܗ ܦܝܼܠܵܣܵܐ ܚܲܕ݂ ܕܣܹܐܡܵܐ: ܡ̣ܢ ܡܵܐܐ ܘܲܬ̣ܠܵܬ̣ܝܼܢ ܡܲܬ̣ܩܵܠܹܗ: ܘܫܵܚܠܵܐ ܚܲܕ݂ ܕܣܹܐܡܵܐ: ܡ̣ܢ ܫܲܒ̣ܥܝܼܢ ܡܲܬ̣ܩܵܠ̈ܝܼܢ ܒܡܲܬ̣ܩܵܠܵܐ ܕܩܘܼܕ݂ܫܵܐ: ܬܪ̈ܲܝܗܘܿܢ ܟܲܕ݂ ܡܠܹܝܢ ܢܫܝܼܦܵܐ ܕܦܝܼܠ ܒܡܸܫܚܵܐ ܠܩܘܼܪܒܵܢܵܐ.

⁸⁰ܘܟܲܦܬ̣ܵܐ ܚܕ݂ܵܐ ܡ̣ܢ ܥܸܣܪܵܐ ܕܕܲܗܒ̣ܵܐ ܘܡܲܠܝܵܐ ܒܸܣܡܹ̈ܐ.

⁸¹ܘܬ̣ܵܘܪܵܐ ܚܲܕ݂ ܒܲܪ ܒܵܩܪܵܐ: ܘܕܸܟ݂ܪܵܐ ܚܲܕ݂: ܘܐܸܡܪܵܐ ܚܲܕ݂ ܒܲܪ ܫܲܢ̄ܬܵܐ ܠܲܥܠܵܬ̣ܵܐ.

⁸²ܘܨܸܦܪܵܝܵܐ ܚܲܕ݂ ܕܥܸܙܹ̈ܐ ܚܠܵܦ ܚܛܵܗܵܐ.

⁸³ܘܲܠܕܸܒ̣ܚܵܐ ܫܲܠܡܵܐ: ܬܵܘܪܹ̈ܐ ܬܪܹܝܢ: ܘܕܸܟ݂ܪܹ̈ܐ ܚܲܡܫܵܐ: ܘܲܓ̣ܕܲܝܵܐ ܚܲܡܫܵܐ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܚܲܡܫܵܐ. ܗܵܢܵܘ ܩܘܼܪܒܵܢܹܗ ܕܐܲܚܝܼܕܲܥ ܒܲܪ ܥܲܝܢܵܢ.

⁸⁴ܗܵܢܵܘ ܩܘܼܪܒܵܢܵܐ ܕܚܘܼܕܵܬ̣ܵܐ ܕܡܲܕ݂ܒ̇ܚܵܐ: ܒܝܵܘܡܵܐ ܕܐܸܬ̣ܡ̱ܫܲܚ ܡ̣ܢ ܠܘܵܬ̣ ܪܵܘ̱ܪ̈ܒ̣ܵܢܹܐ ܕܝܼܣܪܵܝܹܠ: ܦܝܼܠܵܣܹ̈ܐ ܬܪܸܥܣܲܪ ܕܣܹܐܡܵܐ: ܘܫܵܚ̈ܠܹܐ ܬܪܸܥܣܲܪ ܕܣܹܐܡܵܐ: ܘܟܲܦܹ̈ܐ ܬܲܪܬܲܥܸܣܪܹ̈ܐ ܕܕܲܗܒ̣ܵܐ.

⁸⁵ܡܵܐܐ ܘܲܬ̣ܠܵܬ̣ܝܼܢ ܗܵܘܹ̇ܐ ܡܲܬ̣ܩܵܠܹܗ ܕܦܝܼܠܵܣܵܐ ܚܲܕ݂ ܕܣܹܐܡܵܐ: ܘܫܲܒ̣ܥܝܼܢ ܕܫܵܚܠܵܐ ܚܲܕ݂. ܟܠܹܗ ܣܹܐܡܵܐ ܕܡܵܐܢܹ̈ܐ ܬܪܹܝܢ ܐܲܠܦ̈ܝܼܢ ܘܐܲܪܒܲܥܡܵܐܐ ܒܡܲܬ̣ܩܵܠܵܐ ܕܩܘܼܕ݂ܫܵܐ.

⁸⁶ܘܟܲܦܹ̈ܐ ܕܕܲܗܒ̣ܵܐ ܬܲܪܬܲܥܸܣܪܹ̈ܐ ܕܡܲܠ̈ܝܵܢ ܒܸܣܡܹ̈ܐ. ܡ̣ܢ ܥܸܣܪܵܐ ܥܸܣܪܵܐ ܡܲܬ̣ܩܵܠ̈ܝܼܢ ܗܵܘܝܵܐ ܗ̄ܘ̣ܵܬ̣ ܟܲܦܬ̣ܵܐ: ܒܡܲܬ̣ܩܵܠܵܐ ܕܩܘܼܕ݂ܫܵܐ. ܟܠܹܗ ܕܲܗܒ̣ܵܐ ܕܟܲܦܹ̈ܐ ܡܵܐܐ ܘܥܸܣܪܝܼܢ.

⁸⁷ܘܟ݂ܠܗܘܿܢ ܬܵܘܪܹ̈ܐ ܠܲܥܠܵܬ̣ܵܐ ܬܪܸܥܣܲܪ: ܘܕܸܟ݂ܪܹ̈ܐ ܬܪܸܥܣܲܪ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܬܪܸܥܣܲܪ: ܘܲܢܫܝܼܦܗܘܿܢ: ܘܨܸܦܪ̈ܵܝܹܐ ܕܥܸܙܹ̈ܐ ܬܪܸܥܣܲܪ: ܠܲܚܛܵܗܵܐ.

⁸⁸ܘܟ݂ܠܗܘܿܢ ܬܵܘܪܹ̈ܐ ܠܕܸܒ̣ܚܵܐ ܫܲܠܡܵܐ ܥܸܣܪܝܼܢ ܘܐܲܪܒ̇ܥܵܐ: ܘܕܸܟ݂ܪܹ̈ܐ ܫܬ̇ܝܼܢ: ܘܲܓ̣ܕܲܝܵܐ ܫܬ̇ܝܼܢ: ܘܐܸܡܪܹ̈ܐ ܒ̈ܢܲܝ ܫܲܢ̄ܬܵܐ ܫܬ̇ܝܼܢ: ܗܵܢܵܘ ܚܘܼܕܵܬ̣ܵܗ̇ ܕܡܲܕ݂ܒ̇ܚܵܐ ܡ̣ܢ ܒܵܬܲܪ ܕܐܸܬ̣ܡ̱ܫܲܚ.

⁸⁹ܘܟܲܕ݂ ܥܲܠ ܡܘܼܫܹܐ ܠܡܲܫܟܲܢܙܲܒ̣ܢܵܐ: ܫܡܲܥ ܩܵܠܵܐ ܕܲܡܡܲܠܸܠ ܥܲܡܹܗ ܡ̣ܢ ܚܘܼܣܵܝܵܐ ܕܲܠܥܸܠ ܡ̣ܢ ܩܹܒ̣ܘܼܬ̣ܵܐ ܕܣܵܗܕ̇ܘܼܬ̣ܵܐ: ܡ̣ܢ ܒܲܝܢܵܬ̣ ܬܪܹܝܢ ܟܪ̈ܘܿܒ̣ܝܼܢ: ܡܲܠܸܠ ܥܲܡܹܗ.