Read Aramaic Peshita Micah 1 Bible Online

Micah 1 - Aramaic Peshita bible

Micah 1

¹ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܡܝܼܟ݂ܵܐ ܡܹܐܪܫܵܝܵܐ: ܒܝܵܘ̈ܡܵܘܗܝ ܕܝܘܿܬ̣ܵܡ: ܘܕ݂ܵܐܚܵܙ: ܘܲܕ݂ܚܸܙܲܩܝܵܐ: ܡܲܠ̈ܟܹ̇ܐ ܕܲܝܗܘܼܕ݂ܵܐ: ܕܲܚ̣ܙܵܐ ܥܲܠ ܫܵܡܪܹܝܢ: ܘܥܲܠ ܐܘܿܪܸܫܠܸܡ.

²ܫܡܲܥܘ ܟܠܟ݂ܘܿܢ ܥܲܡܡܹ̈ܐ: ܘܨܘܼܬ̣ܝ ܐܲܪܥܵܐ ܒܲܡܠܹܐܵܗ̇: ܘܢܸܗܘܹܐ ܒܟ݂ܘܿܢ ܡܵܪܹܐ ܡܵܪ̈ܵܘܵܬ̣ܵܐ ܣܵܗܕܵܐ: ܡܵܪܝܵܐ ܡ̣ܢ ܗܲܝܟ̇ܠܵܐ ܕܩܘܼܕܫܹܗ.

³ܡܸܛܠ ܕܗܵܐ ܡܵܪܝܵܐ ܢܵܦܹ̇ܩ ܡ̣ܢ ܐܲܬ̣ܪܹܗ: ܘܢܵܚܹ̇ܬ̣ ܘܕܵܪܸܟ݂ ܥܲܠ ܪܵܘܡܵܗ̇ ܕܐܲܪܥܵܐ.

⁴ܘܢܸܬ̣ܦܲܫܪܘܼܢ ܛܘܼܪܹ̈ܐ ܬܚܘܿܬ̣ܵܘܗܝ: ܘܥܘܼܡܩܹ̈ܐ ܢܸܬ̇ܬܲܠܚܘܼܢ ܐܲܝܟ݂ ܫܥܘܿܬ̣ܵܐ ܡ̣ܢ ܩܕ݂ܵܡ ܢܘܼܪܵܐ: ܘܐܲܝܟ݂ ܡܲـ̈ـܝܵܐ ܕܢܵܕ݂ܪܝܼܢ ܒܡܲܚܲܬ̇ܬܵܐ.

⁵ܗܵܠܹܝܢ ܟܠܗܹܝܢ ܡܸܛܠ ܥܵܘܼܠܹܗ ܕܝܲܥܩܘܿܒ̣: ܘܡܸܛܠ ܚܛܵܗܹ̈ܐ ܕܒܹܝܬ̣ ܝܑܼܣܪܵܝܹܠ: ܡܵܢܵܘ ܥܵܘܼܠܹܗ ܕܝܲܥܩܘܿܒ̣: ܐܸܠܵܐ ܐܸܢ ܫܵܡܪܹܝܢ: ܘܡܵܢܲܐܗ̄ܝܼ ܚܛܝܼܬܹܗ ܕܲܝܗܘܼܕ݂ܵܐ: ܐܸܠܵܐ ܐܸܢ ܐܘܿܪܸܫܠܸܡ.

⁶ܘܐܸܥܒ̇ܕ݂ܝܼܗ̇ ܠܫܵܡܪܹܝܢ ܒܹܝܬ̣ ܕܒ̣ܵܪܵܐ ܕܚܲܩܠܵܐ: ܘܢܸܨܒ̇ܬ̣ܵܐ ܕܟܲܪܡܵܐ: ܘܐܸܟ݂ܫܸܐ ܟܹܐܦܹ̈ܝܗ̇ ܒܝܲܓ̣ܪܵܐ: ܘܐܸܓ̣ܠܸܐ ܫܲܬ̣ܐ̱ܣܹ̈ܝܗ̇.

⁷ܘܟ݂ܠܗܘܿܢ ܓܠܝܼܦܹ̈ܝܗ̇ ܡܸܬ̇ܬܲܒܵܪܘܼ ܢܸܬ̇ܬܲܒ̇ܪܘܼܢ: ܘܟ݂ܠܗܹܝܢ ܕܸܚ̈ܠܵܬ̣ܵܗ̇ ܢܹܐܩ̈ܕܵܢ ܒܢܘܼܪܵܐ: ܘܟ݂ܠܗܘܿܢ ܦܬܲܟ݂ܪܹ̈ܝܗ̇ ܐܸܥܒܸ̇ܕ݂ ܠܲܚܒ̣ܵܠܵܐ: ܡܸܛܠ ܕܡ̣ܢ ܐܲܓ̣ܪܵܐ ܕܙܵܢܝܼܬ̣ܵܐ ܐܸܬ̣ܟܲܢܲܫ̣ܘ: ܘܠܲܐܓ̣ܪܵܐ ܕܙܵܢܝܼܬ̣ܵܐ ܢܸܗ̄ܦܟ݂ܘܿܢ.

⁸ܥܲܠ ܗܵܠܹܝܢ ܐܲܪܩܸܕ݂ܝ ܘܐܲܝܠܸܠܝ: ܘܗܲܠܸܟ݂ܝ ܚܸܦܝܵܝ ܘܥܲܪܛܸܠ: ܘܲܥܒܸܕ݂ܝ ܡܲܪܩܘܼܕ̇ܬܵܐ ܐܲܝܟ݂ ܕܝܵܪܘܿܪܵܐ: ܘܐܸܒ̣ܠܵܐ ܐܲܝܟ݂ ܕܒܲܪܬ̣ ܝܵܪܘܿܪܵܐ.

⁹ܡܸܛܠ ܕܟ݂ܵܝ̇ܫܵܐ ܗ̄ܝܼ ܡܚܘܿܬ̣ܵܗ̇: ܘܲܡܛܵܬ̤ ܠܲܝܗܘܼܕ݂ܵܐ: ܘܩܸܪܒܲܬ̤ ܥܕܲܡܵܐ ܠܬܲܪܥܹܗ ܕܥܲܡܝ ܠܐܘܿܪܸܫܠܸܡ.

¹⁰ܒܓ̣ܵܬ̣ ܠܵܐ ܬܸܚܕ̇ܘܿܢ: ܘܡܸܒ̣ܟܵܐ ܠܵܐ ܬܸܒ̣ܟ̇ܘܿܢ: ܒܒ̣ܵـ̈ـܬܹ̇ܐ ܕܥܘܼܦܪܵܐ ܐܸܬ̣ܦܲܠܦܲܠܘ ܒܥܲܦܪܵܐ.

¹¹ܥܒܸܕ݂ܝ ܠܹܟ݂ܝ ܥܵܡܘܿܪܬܵܐ ܕܫܲܦܝܼܪ: ܥܲܪܛܸܠ ܢܸܦܩܲܬ̤ ܘܠܵܐ ܒܸܗܬܲܬ̤ ܥܵܡܘܿܪܬܵܐ ܕܨܵܥܵܢ: ܡܲܪܩܘܼܕ̇ܬܵܐ ܕܒܹܝܬ̣ ܐܘܿܨܹܝܠ ܬܸܣܲܒ̣ ܡܸܢܟ݂ܘܿܢ ܡܚܘܿܬ̣ܵܗ̇.

¹²ܡܸܛܠ ܕܐܸܬ̣ܟܲܪܗܲܬ̤ ܠܛܲܒ̣ܬ̣ܵܐ ܥܵܡܘܿܪܬܵܐ ܕܡܸܪܕܲܬ̤: ܥܲܠ ܕܢܸܚܬܲܬ̤ ܒܝܼܫܬܵܗ̇ ܡ̣ܢ ܩܕ݂ܵܡ ܡܵܪܝܵܐ ܥܲܠ ܬܲܪ̈ܥܹܝܗ̇ ܕܐܘܿܪܸܫܠܸܡ.

¹³ܦܲܓ̇ܕܲܬ̤ ܡܲܪ̈ܟ̇ܒ̣ܵܬ̣ܵܐ ܕܪ̈ܲܟ݂ܫܵܐ: ܥܵܡܘܿܪܬܵܐ ܕܲܠܟ݂ܝܼܫ: ܪܹܫ ܚܛܝܼܬ̣ܵܐ ܗ̄ܝܼ ܠܒܲܪܬ̣ ܨܸܗܝܘܿܢ: ܡܸܛܠ ܕܒܹܟ݂ܝ ܐܸܫܬ̇ܟܲܚܘ ܚܛܵܗܵܘ̈ܗܝ ܕܝܼܣܪܵܝܹܠ.

¹⁴ܡܸܛܠܗܵܢܵܐ ܬܸܬ̇ܠܝܼܢ ܫܘܼܒ̣ܩܵܢܵܐ ܠܝܵܪܬ̇ܘܼܬ̣ܵܐ ܕܓ̣ܵܬ̣: ܒܵـ̈ـܬܹ̇ܐ ܕܲܣܪܝܼܩܘܼܬ̣ܵܐ ܗܘ̤ܵܘ ܠܲܣܪܝܼܩܘܼܬ̣ܵܐ: ܠܡܲܠ̈ܟܹ̇ܐ ܕܝܼܣܪܵܝܹܠ.

¹⁵ܐܲܝܬܹ̇ܐ ܠܹܟ݂ܝ ܬܘܼܒ̣ ܝܵܪܘܿܬ̣ܵܐ ܥܵܡܘܿܪܬܵܐ ܕܡܹܐܪܫܵܐ: ܥܕܲܡܵܐ ܠܥܵܠܲܡ ܢܥܲܠܸܐ ܐܝܼܩܵܪܹܗ ܕܝܼܣܪܵܝܹܠ.

¹⁶ܡܪܘܿܛܝ ܘܓ̣ܘܿܙܝ ܥܲܠ ܒܢܲܝ̈ ܡܦܲܢܩܘܼܬܹܟ݂ܝ: ܐܲܣܓܵܝ ܡܸܪܛܹܟ݂ܝ ܐܲܝܟ݂ ܕܢܸܫܪܵܐ: ܡܸܛܠ ܕܐܹܫܬ̇ܒ̣ܝܼܘ ܡܸܢܹܟ݂ܝ.