Read Aramaic Peshita Micah 3 Bible Online

Micah 3 - Aramaic Peshita bible

Micah 3

¹ܘܐܸܡܲܪ: ܫܡܲܥܘ ܗܵܟܹܝܠ ܗܵܠܹܝܢ ܪܹ̈ܫܹܐ ܕܒܹܝܬ̣ ܝܲܥܩܘܿܒ̣: ܘܫܲܠܝܼܛܵܢܹ̈ܐ ܕܒܹܝܬ̣ ܝܑܼܣܪܵܝܹܠ: ܠܵܐ ܗ̄ܘܼܵܐ ܠܟ݂ܘܿܢ ܘܵܠܹܐ ܠܡܸܕܲܥ ܕܝܼܢܵܐ.

²ܣܵܢ̈ܝܲܝ ܛܵـ̈ـܒ̣ܵܬ̣ܵܐ ܘܪ̈ܵܚܡܲܝ ܒܝܼ̈ܫܵܬ̣ܵܐ: ܕܚܵܛ̇ܦܝܼܢ ܐ̄ܢܬ̇ܘܿܢ ܡܸܫܟ̇ܗܘܿܢ ܡܸܢܗܘܿܢ ܘܒܸܣ̱ܪܗܘܿܢ ܡ̣ܢ ܓܲܪ̈ܡܲܝܗܘܿܢ.

³ܕܐܸܟ݂ܠܘ ܒܸܣܪܹܗ ܕܥܲܡܝ: ܘܡܸܫܟ̇ܗܘܿܢ ܡܸܢܗܘܿܢ ܐܲܫ̣ܠܲܚܘ: ܘܓܲܪ̈ܡܲܝܗܘܿܢ ܬܲܒܲܪܘ: ܘܐܲܪܡܝܼܘ ܐܝܟ݂ ܕܲܒ̣ܩܲܕ݂ܣܵܐ: ܘܐܲܝܟ݂ ܒܸܣܪܵܐ ܒܩܸܕ݂ܪܵܐ.

⁴ܗܵܝܕܹ̇ܝܢ ܢܸܓ̣ܥܘܿܢ ܠܘܵܬ̣ ܡܵܪܝܵܐ ܘܠܵܐ ܢܸܥܢܸܐ ܐܸܢܘܿܢ: ܘܢܲܗܦܸܟ݂ ܐܲܦܵܘ̈ܗܝ ܡܸܢܗܘܿܢ ܒܙܲܒ̣ܢܵܐ ܗܵܘܿ: ܥܲܠ ܕܐܲܒ̣ܐܸܫܘ ܥܒ̣ܵܕܲܝ̈ܗܘܿܢ.

⁵ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܢܒ̣ܝܹ̈ܐ ܕܡܲܛܥܹܝܢ ܠܥܲܡܝ: ܕܢܵܟ݂ܬ̇ܝܼܢ ܒܫܸܢܲܝ̈ܗܘܿܢ ܘܡܲܟ݂ܪ̱ܙܝܼܢ ܫܠܵܡܵܐ: ܘܡܲܢ ܕܠܵܐ ܪܵܡܹ̇ܐ ܒܦܘܼܡܗܘܿܢ ܡܲܟ݂ܪ̱ܙܝܼܢ ܥܠܵܘܗܝ ܩܪܵܒ̣ܵܐ.

⁶ܡܸܛܠ ܗܵܢܵܐ ܠܸܠܝܵܐ ܠܟ݂ܘܿܢ ܡ̣ܢ ܚܸܙܘܵܐ: ܘܬܸܚܫܲܟ݂ ܠܟ݂ܘܿܢ ܡ̣ܢ ܩܸܨܡܵܐ: ܘܬܸܥܪܲܒ̣ ܫܸܡܫܵܐ ܥܲܠ ܢܒ̣ܝܹ̈ܐ: ܘܢܸܥܡܲܛ ܥܠܲܝܗܘܿܢ ܝܵܘܡܵܐ.

⁷ܘܢܸܒ̣ܗ̱ܬ̣ܘܼܢ ܐܲܝܠܹܝܢ ܕܚܵܙܹ̇ܝܢ ܚܸܙܘܵܢܹ̈ܐ: ܘܢܸܚ̄ܦܪܘܼܢ ܩܵܨܘܿܡܹ̈ܐ: ܘܢܸܬ̣ܥܲܛܦܘܼܢ ܟܠܗܘܿܢ ܥܲܠ ܣܸܦ̈ܘܵܬ̣ܗܘܿܢ: ܡܸܛܠ ܕܠܵܐ ܥܵܢܹ̇ܐ ܠܗܘܿܢ ܐܲܠܵܗܵܐ.

⁸ܒܪܲܡ ܕܹܝܢ ܐܸܢܵܐ ܡܠܸܐ ܐ̄ܢܵܐ ܚܲܝܠܵܐ ܕܪܘܼܚܹܗ ܕܡܵܪܝܵܐ: ܘܕ݂ܝܼܢܵܐ ܘܓܲܢ̄ܒܵܪܘܼܬ̣ܵܐ: ܕܐܹܚܵܘܸܐ ܠܝܲܥܩܘܿܒ̣ ܥܵܘܼܠܹܗ: ܘܠܝܼܣܪܵܝܹܠ ܚܛܝܼܬܹܗ.

⁹ܫܡܲܥܘ ܗܵܟܹܝܠ ܗܵܕܹܐ ܪܹ̈ܫܹܐ ܕܒܹܝܬ̣ ܝܲܥܩܘܿܒ̣: ܘܫܲܠܝܼܛܵܢܹ̈ܐ ܕܒܹ̇ܝܬ̣ ܝܑܼܣܪܵܝܹܠ: ܕܡܲܣܠܹܝܢ ܕܝܼܢܵܐ ܘܲܡܥܲܩܡܝܼܢ ܟܠܗܹܝܢ ܬܪ̈ܝܼܨܵܬ̣ܵܐ.

¹⁰ܕܒ̣ܵܢܹ̇ܝܢ ܠܨܸܗܝܘܿܢ ܒܲܕܡܵܐ: ܘܠܐܘܿܪܸܫܠܸܡ ܒܥܵܘܼܠܵܐ.

¹¹ܪܹ̈ܫܹܝܗ̇ ܒܫܘܼܚܕܵܐ ܘܵܝܢܝܼܢ: ܘܟ݂ܵܗ̈ܢܹܝܗ̇ ܒܐܲܓ̣ܪܵܐ ܡܲܠܦܝܼܢ: ܘܲܢܒ̣ܝܹ̈ܝܗ̇ ܒܟܸܣܦܵܐ ܩܵܨ̇ܡܝܼܢ: ܘܥܲܠ ܡܵܪܝܵܐ ܡܸܬ̇ܬܲܟ݂ܠܝܼܢ: ܘܐܵܡ̇ܪܝܼܢ: ܗܵܐ ܡܵܪܝܵܐ ܒܲܝܢܵܬܲܢ ܠܵܐ ܐܬ̣ܝܵܐ ܥܠܲܝܢ ܒܝܼܫܬܵܐ.

¹²ܡܸܟܹ̇ܝܠ ܡܸܛܠܵܬ̣ܟ݂ܘܿܢ ܨܸܗܝܘܿܢ ܚܲܩܠܵܐ ܬܸܬ̇ܕ̇ܒܲܪ: ܘܐܘܿܪܸܫܠܸܡ ܚܲܪܒ̇ܬ̣ܵܐ ܬܸܗܘܹܐ: ܘܛܘܼܪ ܒܲܝܬܵܐ ܠܒܹܝܬ̣ ܥܵܒ̣ܵܐ.