Read Aramaic Peshita Micah 6 Bible Online

Micah 6 - Aramaic Peshita bible

Micah 6

¹ܫܡܲܥܘ ܡܸܟܹ̇ܝܠ ܡܸܕܸ̇ܡ ܕܐܸܡܲܪ ܡܵܪܝܵܐ: ܩܘܼܡ ܕܘܼܢ ܥܲܡ ܛܘܼܪܹ̈ܐ: ܘܢܸܫ̱ܡ̈ܥܵܢ ܩܵܠܵܟ݂ ܪ̈ܵܡܵܬ̣ܵܐ.

²ܫܡܲܥܘ ܛܘܼܪܹ̈ܐ ܕܝܼܢܹܗ ܕܡܵܪܝܵܐ: ܘܥܘܼܡܩܹ̈ܐ ܕܫܲܬ̣ܐ̱ܣܹܝ̈ܗ̇ ܕܐܲܪܥܵܐ: ܕܕ݂ܵܐܹ̇ܢ ܡܵܪܝܵܐ ܥܲܡ ܥܲܡܹܗ. ܘܠܝܼܣܪܵܝܹܠ ܡܲܟܸ̇ܣ.

³ܥܲܡܝ ܡܵܢܵܐ ܥܸܒ̣̇ܕܹ̇ܬ̣ ܠܵܟ݂: ܐܵܘ ܒܡܵܢܵܐ ܐܲܟ݂ܪܝܬ̇ ܠܵܟ݂: ܐܲܣܗܸܕ݂ܝܢܝ.

⁴ܠܵܐ ܐܲܣܸܩ̇ܬܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ: ܘܡ̣ܢ ܒܹܝܬ̣ ܥܲܒ̣ܕ̇ܘܼܬ̣ܵܐ ܦܪܲܩܬܵܟ݂: ܘܫܲܕ̇ܪܹܬ̣ ܩܕ݂ܵܡܲܝܟ ܠܡܘܼܫܹܐ ܘܠܲܐܗܪܘܼܢ ܘܲܠܡܲܪܝܲܡ.

⁵ܥܲܡܝ ܐܸܬ̇ܕܲܟ݂ܪ ܗܵܟܹܝܠ ܡܵܢܵܐ ܐܸܬܪܲܥܝܼ ܥܠܲܝܟ ܒܵܠܵܩ ܡܲܠܟܵܐ ܕܡܘܼܐܵܒ̣: ܘܡܵܢܵܐ ܥܢ̣ܝܗܝ ܒܸܠܥܵܡ ܒܲܪ ܒܥܘܿܪ: ܡ̣ܢ ܣܵܛܝܼܡ ܘܲܥܕܲܡܵܐ ܠܓܲܠܓܵܠ: ܡܸܛܠ ܕܝܼܕܲܥ̣ ܙܲܕ̇ܝܼܩܘܼܬܹܗ ܕܡܵܪܝܵܐ.

⁶ܒܡܵܢܵܐ ܐܹܩܲܕܸ̇ܡ ܠܡܵܪܝܵܐ: ܘܐܸܫܦܲܪ ܠܐܲܠܵܗܵܐ ܡܪܲܝܡܵܐ: ܐܹܩܲܕ̇ܡܝܼܘܗܝ ܒܝܲܩ̈ܕܹ̇ܐ ܫܲܠܡܹ̈ܐ: ܐܵܘ ܒܥܸܓ̣ܠܹ̈ܐ ܒܢܲܝ̈ ܫܲܢ̄ܬܵܐ.

⁷ܠܵܐ ܡܸܨܛܒܸܐ ܡܵܪܝܵܐ ܒܐܲܠܦܹ̈ܐ ܕܕܸܟ݂ܪܹ̈ܐ: ܐܵܦܠܵܐ ܒܪܸ̈ܒ̇ܘܵܬ̣ܵܐ ܕܚܲܝܠܵܐ ܕܡܘܼܫܚܹ̈ܐ. ܐܸܢ ܐܸܬܸ̇ܠ ܒܘܼܟ݂ܪܝ ܥܵܘܼܠܵܐ ܗ̄ܘܼ ܠܝܼ: ܘܦܹܐܪܹ̈ܐ ܕܟܲܪܣܝ ܚܛܝܼܬ̣ܵܐ ܐܸܢܘܿܢ ܕܢܲܦ̮ܫܝ.

⁸ܚܵܘܝܼܬ̣ܵܟ݂ ܒܲܪܢܵܫܵܐ ܡܸܕܸ̇ܡ ܕܲܡܥܲܕܲܪ ܕܬ̣ܵܒܲܥ ܠܵܟ݂ ܡܵܪܝܵܐ: ܕܬܸܥܒܸ̇ܕ݂ ܕܝܼܢܵܐ ܘܬܸܪܚܲܡ ܛܲܝܒ̇ܘܼܬ̣ܵܐ: ܘܬܸܗܘܹܐ ܥܬ̣ܝܼܕ݂ ܠܡܹܐܙܲܠ ܒܵܬܲܪ ܐܲܠܵܗܵܟ݂.

⁹ܩܵܠܹܗ ܕܡܵܪܝܵܐ ܥܲܠ ܡܕ݂ܝܼܢ̄ܬܵܐ: ܡܲܟ݂ܪܸܙ ܝܘܼܠܦܵܢܵܐ ܠܕ݂ܵܚܠܲܝ̈ ܫܡܹܗ: ܫܡܲܥ ܫܲܒ̣ܛܹܐ ܡܲܢ ܢܲܣܗܸܕ݂.

¹⁰ܕܬ̣ܘܼܒ̣ ܢܘܼܪܵܐ ܒܒܲܝܬܹ̇ܗ ܕܥܵܘܵܠܵܐ: ܘܐܵܘܨܪܹ̈ܐ ܕܥܵܘܼܠܵܐ: ܘܲܟ݂ܝܵܠܬܵܐ ܙܥܘܿܪܬܵܐ ܕܥܸܬܵܐ.

¹¹ܐܲܝܟܲܢܵܐ ܢܸܙܕܲܕ̇ܩܘܼܢ ܒܡܲܣܲܐܬ̣ܵܐ ܕܥܵܘܼܠܵܐ: ܘܲܒ̣ܡܲܪܣܘܼܦܵܐ ܕܡܲܬ̣ܩܵܠܹ̈ܐ ܕܢܸܟ݂ܠܵܐ.

¹²ܕܥܲܬ̇ܝܼܪܹ̈ܝܗ̇ ܡܠܹܝܢ ܥܸܬܵܐ: ܘܥܵܡܘܿܪܹ̈ܝܗ̇ ܡܡܲܠܠܝܼܢ ܕܲܓܵܠܘܼܬ̣ܵܐ: ܘܠܸܫܵܢܗܘܿܢ ܢܟ݂ܝܼܠ ܒܦܘܼܡܗܘܿܢ.

¹³ܐܵܦ ܐܸܢܵܐ ܐܹܫܲܪܸܐ ܠܡܸܡ̄ܚܝܵܟ݂: ܘܐܹܚܲܒ̇ܠܵܟ݂ ܡܸܛܠ ܚܛܵܗܲܝ̈ܟ.

¹⁴ܘܬܹܐܟ݂ܘܿܠ ܘܠܵܐ ܬܸܣܒܲܥ: ܘܥܵܒܲܪܬܵܐ ܬܸܗܘܹܐ ܒܓ̣ܵܘܵܟ݂: ܘܬܲܕ݂ܪܸܟ݂ ܘܠܵܐ ܬܦܲܨܹܐ: ܘܡܸܕܸ̇ܡ ܕܲܬ̣ܦܲܨܹܐ ܠܚܲܪܒܵܐ ܐܲܫܠܸܡ.

¹⁵ܐܲܢ̄ܬ̇ ܬܸܙܪܘܿܥ ܘܠܵܐ ܬܸܚܨܘܿܕ݂: ܐܲܢ̄ܬ̇ ܬܸܥܨܘܿܪ ܙܲܝ̈ܬܹ̇ܐ ܘܠܵܐ ܬܸܡܫܘܿܚ ܡܸܫܚܵܐ: ܘܬܸܥܨܘܿܪ ܚܲܡܪܵܐ ܘܠܵܐ ܬܸܫܬܸ̇ܐ.

¹⁶ܥܲܠ ܕܲܢܛܲܪܬ̇ ܦܘܼܩܕܵܢܵܘ̈ܗܝ ܕܥܲܡܪܝܼ: ܘܟ݂ܠܗܘܿܢ ܥܒ̣ܵܕܹ̈ܐ ܕܒܹܝܬ̣ ܐܵܚܵܒ̣: ܘܗܲܠܸܟ݂ܬ̇ܘܿܢ ܒܬܲܪ̈ܥܝܵܬ̣ܗܘܿܢ: ܡܸܛܠ ܗܵܢܵܐ ܝܲܗܒ̣̇ܬܵܗ̇ ܒܬܸܡܗܵܐ: ܘܥܵܡܘܿܪܹ̈ܝܗ̇ ܒܡܲܫܪܘܿܩܝܼܬ̣ܵܐ: ܘܚܸܣܕܹ̇ܗ ܕܥܲܡܝ ܬܩܲܒ̇ܠܘܼܢ.