Read Aramaic Peshita Micah 7 Bible Online

Micah 7 - Aramaic Peshita bible

Micah 7

¹ܘܵܝܠܝܼ ܕܲܗܘܹ̇ܝܬ̣ ܐܲܝܟ݂ ܠܩܵܛܵܐ ܕܩܲܝܛܵܐ: ܘܐܲܝܟ݂ ܒܘܼܥܵܪܵܐ ܕܲܩܛܵܦܵܐ: ܠܲܝܬ̇ ܣܓ̣ܘܼܠܵܐ ܠܡܹܐܟܲܠ: ܘܲܠܒܲܟܵܪܬܵܐ ܪܸܓܲܬ̤ ܢܲܦ̮ܫܝ.

²ܐܸܒܲܕ݂ ܚܲܣܝܵܐ ܡ̣ܢ ܐܲܪܥܵܐ: ܘܠܲܝܬ̇ ܕܲܬ̣ܪܝܼܨ ܒܲܒ̣ܢܲܝ̈ܢܵܫܵܐ: ܟܠܗܘܿܢ ܟܡܹܐܢܹ̈ܐ ܟܵܡ̇ܢܝܼܢ: ܘܲܓ̣ܒܲܪ ܠܐܲܚܘܼܗܝ ܨܵܝ̇ܕ̇ܝܼܢ ܠܐܲܒ̣ܕܵܢܵܐ.

³ܐܝܼܕܲܝ̈ܗܘܿܢ ܡܛܲܝ̈ܒ̣ܵܢ ܠܒ̣ܝܼܫܬܵܐ ܘܠܵܐ ܡܸܛܐ̱ܒ̣ܝܼܢ: ܫܲܠܝܼܛܵܐ ܫܵܐܹ̇ܠ ܕܗܲܒ̣: ܘܕܲܝܵܢܵܐ ܐܵܡܲܪ ܫܚܘܿܕ݂: ܘܪܲܒܵܐ ܡܡܲܠܸܠ ܨܸܒ̣ܝܵܢܵܐ ܕܢܲܦ̮ܫܹܗ.

⁴ܘܐܲܣܠܝܼܘ ܛܵܒܲܬ̣ܗܘܿܢ: ܐܲܝܟ݂ ܐܘܼܪܩܲܥܬ̣ܵܐ ܕܐܸܟܲܠ̣ ܣܵܣܵܐ: ܝܵܘܡܵܐ ܕܕ݂ܵܘܩܲܝ̈ܟ̇ܝ ܘܲܕ݂ܦܘܼܪܩܵܢܹܟ݂ܝ ܐܸܬ̣ܵܐ: ܡܸܟܹ̇ܝܠ ܢܸܗܘܹܐ ܒܹܝܬ̣ ܒܵܟܲܝ̈ܗܘܿܢ.

⁵ܠܵܐ ܬܗܲܝܡܢܘܼܢ ܠܪ̈ܵܚܡܲܝܟ̇ܘܿܢ: ܘܠܵܐ ܬܸܬܲܟ݂ܠܘܼܢ ܥܲܠ ܩܲܪ̈ܝܼܒܲܝܟ̇ܘܿܢ: ܘܡ̣ܢ ܐܲܢ̄ܬ̇ܬ̣ܵܟ݂ ܛܲܪ ܡܸܠܲܝ̈ ܦܘܼܡܵܟ݂.

⁶ܡܸܛܠ ܕܲܒ̣ܪܵܐ ܡܨܲܥܲܪ ܠܐܲܒ̣ܘܼܗܝ: ܘܒܲܪܬ̣ܵܐ ܩܵܝ̇ܡܵܐ ܠܘܼܩܒܲܠ ܐܸܡܵܗ̇: ܘܟܲܠܬ̣ܵܐ ܠܘܼܩܒܲܠ ܚܡܵܬ̣ܵܗ̇: ܘܲܒ̣ܥܸܠܕ̇ܒ̣ܵܒ̣ܵܘ̈ܗܝ ܕܓܲܒ̣ܪܵܐ ܒܢܲܝ̈ ܒܲܝܬܹ̇ܗ.

⁷ܐܸܢܵܐ ܕܹܝܢ ܠܡܵܪܝܵܐ ܐܹܚܘܼܪ: ܘܐܹܣܲܟܸ̇ܐ ܠܐܲܠܵܗܵܐ ܦܵܪܘܿܩܝ: ܘܢܸܫ̱ܡܥܲܢܝ ܐܲܠܵܗܝ.

⁸ܠܵܐ ܬܸܚܕܹ̇ܝܢ ܠܝܼ ܒܥܸܠܕ̇ܒ̣ܵܒ̣ܬ̇ܝ ܕܢܸܦܠܹ̇ܬ̣: ܬܘܼܒ̣ ܩܵܝ̇ܡܵܐ ܐ̄ܢܵܐ: ܘܲܕ݂ܝܸܬܒܹ̇ܬ̣ ܒܚܸܫܘܿܟ݂ܵܐ ܡܵܪܝܵܐ ܡܲܢܗܲܪ ܠܝܼ.

⁹ܡܚܘܿܬܹܗ ܕܡܵܪܝܵܐ ܐܹܣܲܝܒܲܪ ܥܲܠ ܕܲܚܛܹܝܬ̣ ܠܹܗ: ܥܕܲܡܵܐ ܕܲܢܕ݂ܘܼܢ ܕܝܼܢܝ ܘܢܸܥܒܸ̇ܕ݂ ܬܒܲܥܬ̣ܝ: ܘܢܲܦܩܲܢܝ ܠܢܘܼܗܪܵܐ ܘܐܸܚܙܹܐ ܒܙܲܕ̇ܝܼܩܘܼܬܹܗ.

¹⁰ܘܬܸܚܙܹܐ ܒܥܸܠܕ̇ܒ̣ܵܒ̣ܬ̇ܝ ܘܲܬ̣ܟܲܣܹܝܗ̇ ܒܸܗܬ̇ܬ̣ܵܐ: ܕܐܵܡ̇ܪܵܐ ܗ̄ܘܼܵܬ̣ ܠܝܼ ܐܲܝܟܵܐ ܗ̄ܘܼ ܡܵܪܝܵܐ ܐܲܠܵܗܹܟ݂ܝ: ܥܲܝܢܲܝ̈ ܢܸܚܙ̈ܝܵܢ ܒܵܗ̇: ܡܸܟܹ̇ܝܠ ܬܸܗܘܹܐ ܠܲܕ݂ܝܵܫܵܐ ܐܲܝܟ݂ ܣܝܵܢܵܐ ܕܫܘܼܩܹ̈ܐ.

¹¹ܝܵܘܡܵܐ ܗ̄ܘܼ ܠܡܸܒ̣ܢܵܐ ܣܝܵܓܲܝ̈ܟ̇ܝ: ܝܵܘܡܵܐ ܗ̄ܘܼ ܕܬܸܫܬܲܩܠܝܼܢ.

¹²ܝܵܘܡܵܐ ܗ̄ܘܼ ܕܙܲܒ̣ܢܹܟ݂ܝ ܢܹܐܬܹܐ ܡ̣ܢ ܐܵܬ̣ܘܿܪ: ܘܡ̣ܢ ܡܕ݂ܝܼܢܵܬ̣ܵܐ ܥܲܫܝܼ̈ܢܵܬ̣ܵܐ: ܘܡ̣ܢ ܨܘܿܪ ܘܲܥܕܲܡܵܐ ܠܢܲܗܪܵܐ: ܘܡ̣ܢ ܝܲܡܵܐ ܘܲܥܕܲܡܵܐ ܠܝܲܡܵܐ: ܘܲܥܕܲܡܵܐ ܠܗܘܿܪ ܛܘܼܪܵܐ.

¹³ܘܬܸܗܘܹܐ ܐܲܪܥܵܐ ܠܲܚܒ̣ܵܠܵܐ ܠܥܵܡܘܿܪܹ̈ܝܗ̇: ܡܸܛܠ ܦܹܐܪܹ̈ܐ ܕܲܥܒ̣ܵܕܲܝ̈ܗܘܿܢ.

¹⁴ܪܥܝܼ ܠܥܲܡܵܟ݂ ܒܫܲܒ̣ܛܵܟ݂ ܘܲܠܥܵـ̈ـܢܵܐ ܕܝܵܪܬ̇ܘܼܬ̣ܵܟ݂: ܢܸܫܪܘܿܢ ܒܲܠܚܘܿܕܲܝܗܘܿܢ ܐܲܝܟ݂ ܥܵـ̈ـܢܵܐ ܒܓ̣ܵܘ ܟܲܪܡ̄ܠܵܐ: ܢܸܪܥܘܿܢ ܒܡܲܬ̣ܢܝܼܢ ܘܲܒ̣ܓܸܠܥܵܕ݂ ܐܲܝܟ݂ ܝܵܘ̈ܡܵܬ̣ܵܐ ܕܡ̣ܢ ܥܵܠܲܡ.

¹⁵ܘܐܲܝܟ݂ ܝܵܘܡܵܐ ܕܲܢܦܲܩ̣ܘ ܒܹܗ ܡ̣ܢ ܐܲܪܥܵܐ ܕܡܸܨܪܹܝܢ: ܐܹܚܵܘܹܐ ܐܸܢܘܿܢ ܬܸܕ݂ܡܪ̈ܵܬ̣ܵܐ.

¹⁶ܘܢܸܚܙܘܿܢ ܥܲܡܡܹ̈ܐ ܘܢܸܒ̣ܗ̱ܬ̣ܘܼܢ ܡ̣ܢ ܟܠܵܗ̇ ܓܲܢ̄ܒܵܪܘܼܬ̣ܗܘܿܢ: ܢܣܝܼܡܘܼܢ ܐܝܼܕܲܝ̈ܗܘܿܢ ܥܲܠ ܦܘܼܡܗܘܿܢ: ܘܐܸܕ݂ܢܲܝ̈ܗܘܿܢ ܢܸܬ̣ܚܲܪ̈ܫܵܢ.

¹⁷ܘܢܸܠܚ̄ܟ݂ܘܼܢ ܥܲܦܪܵܐ ܐܲܝܟ݂ ܚܸܘܝܵܐ: ܘܐܲܝܟ݂ ܚܘܼܠܕܲܝ̈ ܐܲܪܥܵܐ ܢܸܪܓ̇ܙܘܼܢ ܡ̣ܢ ܫܒ̣ܝܼܠܲܝ̈ܗܘܿܢ: ܘܡ̣ܢ ܡܵܪܝܵܐ ܐܲܠܵܗܲܢ ܢܙܘܼܥܘܼܢ ܘܢܸܕ݂ܚ̄ܠܘܼܢ.

¹⁸ܠܲܝܬ̇ ܐܲܠܵܗܵܐ ܐܲܟ݂ܘܵܬ̣ܵܟ݂: ܕܫܵܒܹ̇ܩ ܥܵܘܼܠܵܐ ܘܡܲܥܒܲܪ ܚܛܝܼܬ̣ܵܐ ܕܫܲܪܟܵܐ ܕܝܵܪܬ̇ܘܼܬܹܗ: ܘܠܵܐ ܐܵܚܹ̇ܕ݂ ܐܲܢ̄ܬ̇ ܐܲܟ̇ܬ̣ܵܐ ܠܥܵܠܲܡ: ܡܸܛܠ ܕܲܒ̣ܛܲܝܒ̇ܘܼܬ̣ܵܐ ܨܒܲܝ̣ܬ̇.

¹⁹ܢܸܬ̣ܦܢܸܐ ܘܲܢܪܲܚܸܡ ܥܠܲܝܢ: ܘܢܸܟ݂ܢܘܿܫ ܟܠܹܗ ܥܵܘܼܠܲܢ: ܘܢܸܫܕܸ̇ܐ ܒܥܘܼܡܩܵܘ̈ܗܝ ܕܝܲܡܵܐ ܟܠܗܘܿܢ ܚܛܵܗܲܝ̈ܢ.

²⁰ܬܸܬܸ̇ܠ ܩܘܼܫܬܵܐ ܠܝܲܥܩܘܿܒ̣: ܘܛܲܝܒ̇ܘܼܬ̣ܵܐ ܠܐܲܒ̣ܪܵܗܵܡ: ܕܝܼܡܲܝ̣ܬ̇ ܠܐܲܒ̣ܵܗܲܝ̈ܢ ܡ̣ܢ ܝܵܘ̈ܡܵܬ̣ܵܐ ܕܡ̣ܢ ܥܵܠܲܡ.