Read Aramaic Peshita Nahum 1 Bible Online

Nahum 1 - Aramaic Peshita bible

Nahum 1

¹ܡܚܘܿܬ̣ܵܐ ܕܢܝܼܢܘܹܐ ܕܲܒ̣ܣܸܦܪܵܐ ܕܚܸܙܘܵܢܹ̈ܐ ܕܢܵܚܘܿܡ ܐܲܠܩܘܿܫܵܝܵܐ.

²ܐܲܠܵܗܵܐ ܛܲܢܵܢܵܐ ܘܬ̣ܵܒ̣ܘܿܥܵܐ ܡܵܪܝܵܐ: ܬܵܒ̇ܲܥ ܡܵܪܝܵܐ ܒܪܘܼܓ̣ܙܵܐ: ܬܵܒܲܥ ܡܵܪܝܵܐ ܡ̣ܢ ܣܵܢܐܵܘ̈ܗܝ: ܘܢܵܛ̇ܲܪ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

³ܢܲܓܝܼܪܵܐ ܪܘܼܚܹܗ ܕܡܵܪܝܵܐ: ܘܣܲܓ̇ܝܼ ܚܲܝܠܹܗ: ܘܲܡܙܲܟܵܝܘܼ ܠܵܐ ܡܙܲܟܸ̇ܐ: ܡܵܪܝܵܐ ܒܥܲܠܥܵܠܵܐ ܘܲܒ̣ܟ݂ܘܿܟ݂ܝܼܬ̣ܵܐ ܐܘܼܪܚܹܗ: ܘܲܥܢܵܢܹ̈ܐ ܚܸܠܵܐ ܕܪܸ̈ܓ̣ܠܵܘܗܝ.

⁴ܟܵܐܹ̇ܐ ܒܝܲܡܵܐ ܘܡܵܘܒܸ̇ܫ ܠܹܗ: ܘܟ݂ܠܗܘܿܢ ܢܲܗܪ̈ܵܘܵܬ̣ܵܐ ܡܲܚܪܸܒ̣: ܐܲܠܵܬ̤ ܡܲܬ̣ܢܝܼܢ ܘܟܲܪܡ̄ܠܵܐ: ܘܦܸܪܥܵܐ ܕܠܸܒ̣ܢܵܢ ܝܑܼܒܸܫ̣.

⁵ܛܘܼܪܹ̈ܐ ܙܵܥ̣ܘܼ ܡ̣ܢ ܩܕ݂ܵܡܵܘܗܝ ܘܪ̈ܵܡܵܬ̣ܵܐ ܐܸܬ̣ܦܲܪܲܩ: ܙܵܥܲܬ̤ ܐܲܪܥܵܐ ܡ̣ܢ ܩܕ݂ܵܡܵܘܗܝ: ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇.

⁶ܩܕ݂ܵܡ ܪܘܼܓ̣ܙܹܗ ܡܲܢ̣ܘܼ ܩܵܐܹ̇ܡ: ܘܡܲܢ̣ܘܼ ܡܣܲܝܒܲܪ ܚܸܡܬ̣ܵܐ ܕܪܘܼܓ̣ܙܹܗ: ܚܸܡܬܹܗ ܝܵܩ̇ܕܵܐ ܐܲܝܟ݂ ܢܘܼܪܵܐ: ܘܛܘܼܪܹ̈ܐ ܐܸܬ̣ܦܲܫܲܪܘ ܡܸܢܹܗ.

⁷ܛܵܒ̣ ܗ̄ܘܼ ܡܵܪܝܵܐ ܠܲܡܣܲܝܵܥܘܼ ܒܝܵܘܡܵܐ ܕܐܘܼܠܨܵܢܵܐ: ܘܝܵܕܲܥ̇ ܠܐܲܝܠܹܝܢ ܕܲܬ̣ܟ݂ܝܼܠܝܼܢ ܥܠܵܘܗܝ.

⁸ܘܒܲܓ̣ܪܘܼܦܝܵܐ ܥܵܒܹ̇ܕ݂ ܓܡܘܼܪܝܵܐ. ܢܸܥܒܲܪ ܠܐܲܬ̣ܪܹܗ: ܘܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܢܸܪܕ̇ܘܿܦ ܚܸܫܘܿܟ݂ܵܐ.

⁹ܡܵܢܵܐ ܡܸܬ̣ܚܲܫܒ̣ܝܼܢ ܐ̄ܢܬ̇ܘܿܢ ܥܲܠ ܡܵܪܝܵܐ: ܕܲܓ̣ܡܘܼܪܝܵܐ ܥܵܒܹ̇ܕ݂: ܘܠܵܐ ܢܩܘܼܡ ܕܬܲܪܬܹ̇ܝܢ ܙܲܒ̣ܢܝܼ̈ܢ ܐܘܼܠܨܵܢܵܐ.

¹⁰ܡܸܛܠ ܕܲܥܕܲܡܵܐ ܠܫܲܠܝܼܛܵܢܲܝ̈ܗܘܿܢ ܡܵܪܘܿܕ݂ܝܼܢ: ܘܲܒ̣ܪܵܘܵܝܘܼܬ̣ܗܘܿܢ ܪܘܹܝܢ: ܘܐܸܟܲܠ̣ܘ ܘܐܸܬ̣ܡ̱ܠܝܼܘ ܚܲܒ̇ܬ̣ܵܐ ܝܲܒ̇ܝܼܫܬܵܐ.

¹¹ܡܸܢܹܟ݂ܝ ܢܸܦܘܿܩ ܕܡܸܬ̣ܚܲܫܲܒ̣ ܒܝܼܫܬܵܐ ܥܲܠ ܡܵܪܝܵܐ: ܘܡܸܬ̣ܪܲܥܸܐ ܥܵܘܼܠܵܐ.

¹²ܗܵܟܲܢܵܐ ܐܵܡ̇ܲܪ ܡܵܪܝܵܐ: ܥܲܠ ܪܹ̈ܫܲܝ ܡܲـ̈ـܝܵܐ ܣܲܓ̇ܝܼ̈ܐܹܐ ܕܓܲܪܘ ܘܲܥ̣ܒܲܪܘ: ܘܕܲܥܢܹܝܬܹܟ݂ܝ ܬܘܼܒ̣ ܠܵܐ ܐܸܥܢܹܝܟ݂ܝ.

¹³ܡܸܟܹ̇ܝܠ ܐܸܬ̣ܒܲܪ ܢܝܼܪܹܗ ܡܸܢܹܟ݂ܝ: ܘܲܚܢܵܩܲܝ̈ܟ̇ܝ ܐܹܦܲܣܸܩ.

¹⁴ܘܢܸܦܩܘܿܕ݂ ܥܠܲܝܟ̇ܝ ܡܵܪܝܵܐ: ܘܠܵܐ ܢܸܙܕ̇ܪܲܥ ܬܘܼܒ̣ ܡ̣ܢ ܫܡܹܟ݂ܝ ܒܹܝܬ̣ ܐܲܠܵܗܹܟ݂ܝ: ܘܐܵܘܒܸ̇ܕ݂ ܓܠܝܼ̈ܦܹܐ ܘܲܢܣܝܼܟܹ̈ܐ: ܘܐܸܥܒ̇ܕ݂ܝܼܘܗܝ ܩܲܒ̣ܪܹܟ݂ܝ ܒܲܥܓܲܠ.

¹⁵ܗܵܐ ܥܲܠ ܛܘܼܪܹ̈ܐ ܪܸ̈ܓ̣ܠܵܘܗܝ ܕܲܡܣܲܒ̇ܪܵܢܵܐ: ܘܲܕ݂ܡܲܫܡܲܥ ܫܠܵܡܵܐ. ܥܒܸܕ݂ ܝܑܼܗܘܼܕ݂ܵܐ ܥܹܐܕܲܝ̈ܟ ܘܫܲܠܸܡ ܢܸܕ݂ܪ̈ܲܝܟ: ܡܸܛܠ ܕܠܵܐ ܡܵܘܣܸܦ ܬܘܼܒ̣ ܠܡܸܥܒܲܕ݂ ܒܵܟ݂ ܥܵܘܼܠܵܐ: ܡܸܛܠ ܕܟ݂ܠܹܗ ܐܹܒܲܕ݂.