Read Aramaic Peshita Nahum 2 Bible Online

Nahum 2 - Aramaic Peshita bible

Nahum 2

¹ܣ̣ܠܸܩ ܡܕܲܒ̇ܪܵܢܵܐ ܩܕ݂ܵܡܲܝܟ: ܘܢܵܛܲܪ ܡܲܛܲܪܬܵܐ ܘܚܵܐܲܪ ܐܘܼܪܚܵܐ: ܘܐܵܚܹ̇ܕ݂ ܒܚܲܨܹ̈ܐ: ܘܛܵܒ̣ ܚܲܣܝܼܢ ܚܲܝܠܹܗ.

²ܡܸܛܠ ܕܡܲܦܢܸܐ ܐ̄ܢܵܐ ܐܝܼܩܵܪܹܗ ܕܝܲܥܩܘܿܒ̣ ܐܲܝܟ݂ ܐܝܼܩܵܪܹܗ ܕܝܼܣܪܵܝܹܠ: ܡܸܛܠ ܕܕ݂ܵܫ̣ܘ ܐܸܢܘܿܢ ܕܵܝܘܿܫܹ̈ܐ: ܘܚܲܒܸ̇ܠܘ ܫܲܒ̇ܘܼܩܲܝ̈ܗܘܿܢ.

³ܣܲܟ̇ܪܹ̈ܐ ܕܓܲܢ̄ܒܵܪ̈ܲܝܗܘܿܢ ܡܲܣ̱ܡ̈ܩܵܢ: ܘܓܲܒ̣ܪܹ̈ܐ ܓܲܢ̄ܒܵܪܹ̈ܐ ܡܸܫܬܲܥܹܝܢ ܒܠܲܡܦܹܝ̈ܕܹܐ ܕܢܘܼܪܵܐ: ܘܲܒ̣ܡܲܪ̈ܟ̇ܒ̣ܵܬ̣ܵܐ ܒܝܵܘܡܵܐ ܕܡܸܬ̇ܛܲܝܒ̣ܝܼܢ: ܘܦܲܪ̈ܵܫܹܐ ܕܡܸܬ̣ܒܲܠܗܹܝܢ.

⁴ܘܲܒ̣ܫܘܼܩܹ̈ܐ ܡܸܫܬܲܒ̇ܚܝܼܢ ܒܡܲܪ̈ܟ̇ܒ̣ܵܬ̣ܗܘܿܢ ܘܡܸܫܬܲܒ̣ܗ̄ܪܝܼܢ: ܘܚܸܙ̱ܘܗܘܿܢ ܐܲܝܟ݂ ܠܲܡܦܹܝ̈ܕܹܐ: ܘܐܲܝܟ݂ ܒܲܪ̈ܩܹܐ ܪܵܗ̇ܛܝܼܢ.

⁵ܢܹܐܚܕ̇ܘܼܢ ܠܫܲܠܝܼܛܵܢܲܝ̈ܗܘܿܢ: ܘܢܸܬ̇ܬܲܩܠܘܼܢ ܒܗܲܠܟ݂ܵـ̈ـܬ̣ܗܘܿܢ: ܘܢܸܣܬܲܪܗܒ̣ܘܼܢ ܠܫܘܼܪܵܐ: ܘܲܢܛܲܝܒ̣ܘܼܢ ܥܵܥ̈ܝܵܬ̣ܵܐ.

⁶ܬܲܪ̈ܥܹܐ ܕܲܝܗܘܼܕ݂ܵܐ ܐܸܬ̣ܦܲܬܲܚܘ: ܘܗܲܝܟ̇ܠܵܐ ܙܵܥ̣.

⁷ܘܐܲܩܝܼܡܲܬ̤ ܦܲܪ̈ܵܫܹܝܗ̇ ܘܣܸܠܩܲܬ̤: ܘܐܲܡ̈ܗܵܬ̣ܵܗ̇ ܡܢܲܗ̈ܡܵܢ ܗ̄ܘܲܝ̈ ܒܠܸܒܲܝ̈ܗܹܝܢ ܐܲܝܟ݂ ܝܵܘܢܹ̈ܐ.

⁸ܘܢܝܼܢܘܹܐ ܐܲܝܟ݂ ܝܲܡܬ̣ܵܐ ܗ̄ܝܼ ܕܡܲـ̈ـܝܵܐ ܘܒܹܝܬ̣ ܡܲـ̈ـܝܵܐ ܗ̄ܝܼ: ܘܗܸܢ̣ܘܿܢ ܥܵܪܩܝܼܢ: ܐܲܩܝܼܡܘ: ܐܲܩܝܼܡܘ ܘܠܲܝܬ̇ ܕܡܸܬ̣ܦܢܸܐ.

⁹ܒܲܙ̣ܘ ܣܹܐܡܵܐ ܘܒܲܙ̣ܘ ܕܲܗܒ̣ܵܐ: ܘܠܲܝܬ̇ ܣܵܟ݂ܵܐ ܠܨܸܒ̣ܬܵܗ̇: ܥܲܫܝܼܢܝܼܢ ܟܠܗܘܿܢ ܡܵܐܢܹ̈ܐ ܕܪܸܓ̇ܬ̣ܵܗ̇.

¹⁰ܕܝܼܫܬܵܐ ܘܲܣܝܼܦܬܵܐ ܘܲܡܬܲܪܲܥܬܵܐ: ܘܠܸܒܵܐ ܬܒ̣ܝܼܪܵܐ ܘܦܘܼܪܵܩ ܒܘܼܪ̈ܟܹ̇ܐ: ܘܲܪܥܵܠܵܐ ܒܟ݂ܠ ܚܲܨܝܼ̈ܢ: ܘܐܲܦܲܝ̈ ܟܠܗܘܿܢ ܐܲܟ݂ܘܼܡ ܐܲܝܟ݂ ܫܘܼܚܵܪܹ̈ܐ ܕܩܸܕ݂ܪܵܐ.

¹¹ܐܲܝܟܵܐ ܗ̄ܝܼ ܡܲܪܒ̇ܘܿܥܝܼܬ̣ܵܗ̇ ܕܐܲܪܝܘܿܬ̣ܵܐ: ܘܒܹܝܬ̣ ܪܸܥܝܵܐ ܕܓ̣ܘܼܪܝܵܐ ܕܐܲܪܝܘܼܬ̣ܵܐ: ܕܐܸܙܲܠ ܐܲܪܝܵܐ ܠܡܸܥܲܠ ܠܬܲܡܵܢ: ܘܓ̣ܘܼܪܝܵܐ ܕܐܲܪܝܵܐ ܘܠܲܝܬ̇ ܕܡܲܗܲܪ.

¹²ܐܲܪܝܵܐ ܬܒܲܪ ܡܸܣܲܬ̣ ܡܹܐܟ݂ܘܼܠܬܵܐ ܕܲܓ̣ܪ̈ܵܘܗܝ: ܘܲܦܣܲܩ̣ ܐܵܦ ܠܬܸܢܝܵܢܵܘ̈ܗܝ: ܘܲܡ̣ܠܵܐ ܢܸܩܥܵܘ̈ܗܝ ܘܡܲܪܒ̇ܘܿܥܝܼܬܹܗ ܬܒ̣ܵܪܵܐ.

¹³ܗܵܐ ܐܸܢܵܐ ܥܠܲܝܟ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܵܘܒܸ̇ܕ݂ ܒܬܸܢܵܢܵܐ ܟܸܢܫܲܝ̈ܟ̇ܝ: ܘܲܓ̣ܪ̈ܲܝܟ̇ܝ ܬܹܐܟ݂ܘܿܠ ܚܲܪܒܵܐ: ܘܐܵܘܒܸ̇ܕ݂ ܡ̣ܢ ܐܲܪܥܵܐ ܬܒ̣ܵܪܹܟ݂ܝ: ܘܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܵܐ ܕܲܥܒ̣ܵܕܲܝ̈ܟ̇ܝ.