Read Aramaic Peshita Habakkuk 1 Bible Online

Habakkuk 1 - Aramaic Peshita bible

Habakkuk 1

¹ܚܸܙܘܵܐ ܕܲܚ̣ܙܵܐ ܚܲܒ̣ܩܘܿܩ ܢܒ̣ܝܼܵܐ.

²ܥܕܲܡܵܐ ܠܐܸܡܲܬ̣ܝ ܡܵܪܝܵܐ ܓܵܥܹ̇ܐ ܐ̄ܢܵܐ ܘܠܵܐ ܫܵܡܲܥ ܐܲܢ̄ܬ̇: ܘܩܵܥܹ̇ܐ ܐ̄ܢܵܐ ܠܘܵܬ̣ܵܟ݂ ܥܲܠ ܚܵܛ̇ܘܿܦܹ̈ܐ ܘܠܵܐ ܡܦܲܨܹܐ ܐܲܢ̄ܬ̇.

³ܠܡܵܢܵܐ ܚܵܘ̣ܝܼܬܵܢܝ ܥܵܘܼܠܵܐ ܘܥܸܬܵܐ: ܘܚܵܙܹ̇ܐ ܐ̄ܢܵܐ ܚܛܘܼܦܝܵܐ ܘܒ̣ܝܼܫܬܵܐ: ܩܕ݂ܵܡܲܝ ܗܘ̤ܵܐ ܕܝܼܢܵܐ: ܘܕܲܝܵܢܵܐ ܩܲܒܸ̇ܠ̣ ܫܘܼܚܕܵܐ.

⁴ܡܸܛܠ ܗܵܢܵܐ ܦܵܓ̣ ܢܵܡܘܿܣܵܐ: ܘܠܵܐ ܢ̣ܦܲܩ ܕܝܼܢܵܐ ܒܙܲܕ̇ܝܼܩܵܐ: ܘܲܢ̣ܦܲܩ ܕܝܼܢܵܐ ܕܒܲܪ ܒܝܼܫ ܒܝܼܫ ܠܙܲܕ̇ܝܼܩܵܐ: ܘܲܢ̣ܦܲܩ ܕܝܼܢܵܐ ܟܲܕ݂ ܡܥܲܩܲܡ.

⁵ܚܙܵܘ ܡܲܪ̈ܵܚܹܐ: ܘܚܘܼܪܘ ܘܐܸܬ̇ܕܲܡܲܪܘ: ܘܲܬ̣ܡܲܗܘ: ܡܸܛܠ ܕܲܥܒ̣ܵܕ݂ܵܐ ܥܵܒܹ̇ܕ݂ ܐ̄ܢܵܐ ܒܝܵܘ̈ܡܲܝܟ̇ܘܿܢ: ܘܠܵܐ ܡܗܲܝܡܢܝܼܢ ܐ̄ܢ̇ܬ̇ܘܿܢ ܐܸܢ ܐ̄ܢܵܫ ܡܸܫܬܲܥܸܐ ܠܟ݂ܘܿܢ.

⁶ܡܸܛܠ ܕܗܵܐ ܐܸܢܵܐ ܡܩܝܼܡ ܐ̄ܢܵܐ ܠܟܲܠܕ݂ܵܝܹ̈ܐ: ܥܲܡܵܐ ܡܲܪܵܚܵܐ ܘܡܲܪܝܼܪܵܐ: ܕܐܵܙܹ̇ܠ ܒܲܦܬ̣ܵܝܵܗ̇ ܕܐܲܪܥܵܐ ܠܡܹܐܪܲܬ̣ ܡܲܫܟ̇ܢܹ̈ܐ ܕܠܵܐ ܕܝܼܠܹܗ.

⁷ܥܲܫܝܼܢ ܗ̄ܘܼ ܘܲܕ݂ܚܝܼܠ: ܘܕ݂ܝܼܢܹܗ ܡܸܢܹܗ: ܘܚܸܙܘܹܗ ܡܲܦܲܩ.

⁸ܩܲܠܝܼܠܝܼܢ ܪ̈ܲܟ݂ܫܹܗ ܡ̣ܢ ܢܸܫܪܹ̈ܐ: ܘܚܲܪܝܼܦܝܼܢ ܡ̣ܢ ܕܹܐܒܹ̈ܐ ܕܪܲܡܫܵܐ: ܘܲܢܛܘܼܣܘܼܢ ܦܲܪ̈ܵܫܵܘܗܝ ܘܢܹܐܬ̣ܘܿܢ ܦܲܪ̈ܵܫܵܘܗܝ ܡ̣ܢ ܪܘܼܚܩܵܐ: ܘܲܢܛܘܼܣܘܼܢ ܐܲܝܟ݂ ܢܸܫܪܵܐ ܕܲܟ݂ܦܸܢ ܠܡܹܐܟ݂ܘܼܠܬܵܐ.

⁹ܟܠܗܘܿܢ ܠܲܚܛܘܼܦܝܵܐ ܐܵܬܹ̇ܝܢ: ܚܸܙܘܵܐ ܕܐܲܦܲܝ̈ܗܘܿܢ ܥܲܫܝܼܢ: ܘܟ݂ܵܢ̇ܫܝܼܢ ܫܒ̣ܝܼܬ̣ܵܐ ܐܲܝܟ݂ ܚܵܠܵܐ.

¹⁰ܘܗ̤ܘ ܒܡܲܠ̈ܟܹ̇ܐ ܡܡܲܝܸܩ: ܘܲܒ̣ܫܲܠܝܼܛܵܢܹ̈ܐ ܡܒܲܙܲܚ: ܘܥܲܠ ܟܠ ܟܲܪ̈ܟ݂ܝܼܢ ܓܵܚܹ̇ܟ: ܘܲܡܩܲܒܲܪ ܥܲܦܪܵܐ ܘܐܵܚܹ̇ܕ݂ ܠܹܗ.

¹¹ܗܵܝܕܹ̇ܝܢ ܬܸܚܠܲܦ ܪܘܼܚܹܗ ܘܬܸܥܒܲܪ: ܘܢܸܬ̣ܚܲܝܲܒ̣ ܚܲܝܠܹܗ ܠܐܲܠܵܗܹܗ.

¹²ܡܸܛܠ ܕܐܲܢ̄ܬ̇ ܗ̄ܘܼ ܡ̣ܢ ܪܹܫܝܼܬ̣ܵܐ ܡܵܪܝܵܐ ܐܲܠܵܗܝ ܩܲܕ̇ܝܼܫܵܐ: ܕܠܵܐ ܢܵܡܘܿܣ ܐܲܢ̄ܬ̇ ܡܵܪܝܵܐ: ܣܵܡ̣ܬܵܝܗܝ ܠܕ݂ܝܼܢܵܐ ܘܲܓ̣ܒܲܠ̣ܬܵܢܝ ܠܡܲܟܵܣܘܼܬܹܗ.

¹³ܕܲܟ݂̈ܝܵܢ ܐܸܢܹܝܢ ܥܲܝܢܲܝ̈ܟ ܘܠܵܐ ܚܵܙ̈ܝܵܢ ܒܝܼܫܬܵܐ: ܘܠܲܡܚܵܪ ܒܥܵܘܿܠܹ̈ܐ ܠܵܐ ܡܸܫܟܲܚ ܐܲܢ̄ܬ̇: ܠܡܵܢܵܐ ܐܲܢ̄ܬ̇ ܒܡܲܪ̈ܵܚܹܐ ܘܫܲܬ̇ܝܼܩ ܐܲܢ̄ܬ̇: ܟܲܕ݂ ܒܵܠܲܥ ܥܵܘܵܠܵܐ ܠܙܲܕ̇ܝܼܩܵܐ.

¹⁴ܘܲܥ̣ܒܲܕ̇ܬ̇ ܐܸܢܘܿܢ ܠܲܒ̣ܢܲܝ̈ܢܵܫܵܐ ܐܲܝܟ݂ ܢܘܼܢܹ̈ܐ ܕܲܒ̣ܝܲܡܵܐ: ܘܐܲܝܟ݂ ܪ̈ܲܚܫܵܐ ܕܠܲܝܬ̇ ܠܹܗ ܡܕܲܒ̇ܪܵܢܵܐ.

¹⁵ܕܟ݂ܠܹܗ ܒܨܸܢܵܪܬܵܐ ܣܵܠܹ̇ܩ: ܘܡܸܬ̣̱ܢܓܸܕ݂ ܒܲܡܨܝܼܕ̇ܬܵܐ ܘܡܸܬ̣ܟ̇ܢܸܫ ܒܓ̣ܵܘܦܵܐ: ܘܟܲܕ݂ ܟܢܫ̣ ܚ̣ܕ݂ܝܼ ܘܕ݂ܵܨ.

¹⁶ܘܕܲܒܲܚ̣ ܠܲܡܨܝܼܕ̇ܬܹܗ: ܘܣܵܡ̣ ܒܸܣܡܹ̈ܐ ܠܓ̣ܵܘܦܹܗ: ܡܸܛܠ ܕܲܒ̣ܗܹܝܢ ܫܸܡܢܲܬ̤ ܡܢܵܬܹܗ ܘܡܹܐܟ݂ܘܼܠܬܹ̇ܗ ܓܒ̣ܝܼܬ̣ܵܐ.

¹⁷ܡܸܛܠܗܵܢܵܐ ܫܵܕܹ̇ܐ ܡܨܝܼܕ̇ܬܹ̇ܗ ܒܟ݂ܠܙܒܲܢ: ܘܩܵܛܹ̇ܠ ܥܲܡܡܹ̈ܐ ܘܠܵܐ ܚܵܐܹ̇ܣ.