Read Aramaic Peshita Habakkuk 3 Bible Online

Habakkuk 3 - Aramaic Peshita bible

Habakkuk 3

¹ܡܵܪܝܵܐ ܫܸܡܥܹ̇ܬ̣ ܫܡܵܟ݂ ܘܕܸܚ̇ܠܹܬ̣.

²ܡܵܪܝܵܐ ܥܒ̣ܵܕܲܝ̈ܟ ܒܓ̣ܵܘ ܫܢܲـ̈ـܝܵܐ ܕܚܲܝܹ̈ܐ: ܒܓ̣ܵܘ ܫܢܲـ̈ـܝܵܐ ܬܸܬ̣̱ܝܼܕܲܥ: ܒܪܘܼܓ̣ܙܵܐ ܪ̈ܲܚܡܲܝܟ ܐܸܬ̇ܕܲܟ݂ܪ.

³ܐܲܠܵܗܵܐ ܡ̣ܢ ܬܲܝܡ̄ܢܵܐ ܐܸܬ̣ܵܐ: ܘܩܲܕ̇ܝܼܫܵܐ ܡ̣ܢ ܛܘܼܪܵܐ ܕܦܵܪܵܢ: ܐܸܬ̣ܟܲܣܝܼܘ ܫܡܲܝܵܐ ܡ̣ܢ ܙܝܼܘܹܗ ܕܲܡܫܲܒ̇ܚܵܐ: ܘܬܸܫܒ̇ܘܿܚܬܹ̇ܗ ܐܸܬ̣ܡܲܠܝܲܬ̤ ܐܲܪܥܵܐ.

⁴ܘܙܲܗܪܹܗ ܐܲܝܟ݂ ܢܘܼܗܪܵܐ ܢܸܗܘܹܐ: ܒܲܩܪܝܼܬ̣ܵܐ ܕܐܝܼܕ݂ܵܘ̈ܗܝ ܢܣܝܼܡ ܥܘܼܫܢܹܗ ܒܠܲܩܚܵܐ.

⁵ܩܕ݂ܵܡܵܘܗܝ ܐܵܙܹ̇ܠ ܡܵܘܬܵܐ: ܘܢܵܦ̇ܩܵܐ ܛܲܝܪܵܐ ܠܪܸܓ̣ܠܹܗ.

⁶ܩܵܡ̣ ܘܡܲܫ̣ܚܵܗ̇ ܠܐܲܪܥܵܐ: ܚ̣ܵܪ ܘܲܕ݂ܓܲܠ̣ܘ ܥܲܡܡܹ̈ܐ: ܐܸܬ̣ܒܲܕܲܪܘ ܛܘܼܪܹ̈ܐ ܕܡ̣ܢ ܥܵܠܲܡ: ܘܐܸܬ̣ܡܲܟܲܟ݂ ܪ̈ܵܡܵܬ̣ܵܐ ܕܡ̣ܢ ܥܵܠܡܝܼܢ: ܕܝܼܠܹܗ ܐܸܢܹܝܢ ܗܲܠ̈ܟ݂ܵܬ̣ܵܐ ܕܡ̣ܢ ܥܵܠܲܡ.

⁷ܬܚܹܝܬ̣ ܐܘܿܢ ܚܙܹ̇ܝܬ̣ ܡܲܫܟ̇ܢܵܐ ܕܟ݂ܘܼܫܵܢ: ܢܙܘܼ̈ܥܵܢ ܝܵܪ̈ܝܼܥܵܬ̣ܵܐ ܕܐܲܪܥܵܐ ܕܡܸܕ݂ܝܲܢ.

⁸ܥܲܠ ܢܲܗܪ̈ܵܘܵܬ̣ܵܐ ܪܓܸܙ̣ ܡܵܪܝܵܐ: ܒܢܲܗܪ̈ܵܘܵܬ̣ܵܐ ܪܘܼܓ̣ܙܵܟ݂: ܘܲܒ̣ܝܲܡܵܐ ܚܹܐܦܵܟ݂: ܪܟܸܒ̣ܬ̇ ܥܲܠ ܪ̈ܲܟ݂ܫܵܟ݂ ܘܥܲܠ ܡܲܪܟܲܒ̣ܬ̣ܵܐ ܕܦܘܼܪܩܵܢܵܟ݂.

⁹ܡܸܬ̇ܬ̇ܥܵܪܘܼ ܬܸܬ̇ܥܝܼܪ ܩܸܫܬܵܟ݂: ܘܢܸܣܒ̇ܥܘܼܢ ܓܹܐܪܹ̈ܐ ܒܡܹܐܡܪܵܟ݂ ܡܫܲܒ̇ܚܵܐ: ܘܐܲܪܥܵܐ ܒܢܲܗܪ̈ܵܘܵܬ̣ܵܐ ܬܸܬ̣ܚܲܪܲܬ̤.

¹⁰ܚ̣ܙܵܐܘܼܟ݂ ܛܘܼܪܹ̈ܐ ܘܙܵܥ̣ܘ: ܘܙܵܪܝܼܦ̮ܬܵܐ ܕܡܲـ̈ـܝܵܐ ܥܸܒ̣ܪܲܬ̣: ܘܐܲܪܝܼܡ ܬܗܘܿܡܵܐ ܩܵܠܹܗ: ܘܪܵܘܡܵܐ ܕܐܝܼܕ݂ܵܘ̈ܗܝ ܫܩܲܠ̣ܘ

¹¹ܫܸܡܫܵܐ ܘܣܲܗܪܵܐ ܩܵܡ̣ܘ ܒܡܸܕ݂ܝܵܪ̈ܲܝܗܘܿܢ: ܘܲܒ̣ܢܘܼܗܪܵܐ ܕܓܹܐܪ̈ܲܝܟ ܡܗܲܠܟ݂ܝܼܢ: ܘܲܒ̣ܙܲܗܪܵܐ ܕܒܲܪ̈ܩܹܐ ܕܢܲܝ̈ܙܟܲܝܟ.

¹²ܒܚܸܡܬ̣ܵܟ݂ ܬܸܕ݂ܪܘܿܟ݂ ܥܲܠ ܐܲܪܥܵܐ: ܘܲܒ̣ܪܘܼܓ̣ܙܵܟ݂ ܬܕ݂ܘܼܫ ܥܲܡܡܹ̈ܐ.

¹³ܢܦܲܩܬ̇ ܠܡܸܦܪܲܩ ܠܥܲܡܵܟ݂: ܘܲܠܡܸܦܪܲܩ ܠܲܡܫܝܼܚܵܟ݂: ܦܣܲܩ̣ܬ̇ ܪܹܫܵܐ ܡ̣ܢ ܒܲܝܬܹ̇ܗ ܕܥܵܘܵܠܵܐ: ܘܐܲܫܠܲܚ̣ܬܵܝܗܝ ܡ̣ܢ ܫܲܬ̣ܐ̱ܣܵܘ̈ܗܝ ܘܲܥܕܲܡܵܐ ܠܨܵܘܪܹܗ ܠܥܵܠܡܝܼܢ.

¹⁴ܦܲܚܸܬ̇ܬ̇ ܒܚܘܼܛܪ̈ܵܘܗܝ ܪܹ̈ܫܹܐ ܕܫܲܠܝܼܛܵܢܵܘ̈ܗܝ: ܕܐܸܬ̇ܬ̇ܟܸܠܘ ܒܫܲܝܚܵܢܘܼܬ̣ܗܘܿܢ ܕܢܹܐܟ݂ܠܘܼܢ ܒܛܘܼܫܝܵܐ ܠܡܸܣܟܹ̇ܢܹ̈ܐ.

¹⁵ܕܪܲܟ݂ܬ̇ ܒܝܲܡܵܐ ܥܲܠ ܪ̈ܲܟ݂ܫܵܟ݂: ܘܟܸܢܫܵܐ ܕܡܲـ̈ـܝܵܐ ܣܲܓ̇ܝܼ̈ܐܹܐ.

¹⁶ܫܸܡܥܹ̇ܬ̣ ܘܙܵܥܲܬ̤ ܟܲܪܣܝ ܠܘܼܩܒܲܠ ܡܲܡܠܠܵܐ ܕܣܸܦ̈ܘܵܬ̣ܝ: ܥܲܠ̣ ܪܬܹܝܬ̣ܵܐ ܒܓܲܪ̈ܡܲܝ: ܘܒ̣ܘܼܪ̈ܟܲܝ ܙܵܥ̣ ܕܒܲܕܸ̇ܩ ܠܝܼ ܘܚܵܘܝܲܢܝ ܝܵܘܡܵܐ ܕܐܘܼܠܨܵܢܵܐ ܕܐܵܬܹ̇ܐ ܥܲܠ ܥܲܡܵܐ.

¹⁷ܡܸܛܠ ܕܬܹܬܵܐ ܠܵܐ ܦܸܪܥܲܬ̤: ܘܠܲܝܬ̇ ܛܲܪ̈ܦܹܐ ܒܲܓܦܸܬܵܐ: ܟܲܕܸ̇ܒ̣ ܐܸܒܹ̇ܗ ܕܙܲܝܬܵܐ: ܘܐܸܕ̇ܪܹ̈ܐ ܥܒܲܕ݂ܘ ܥܒ̣ܘܼܪܵܐ: ܓܸܡܪܲܬ̤ ܥܵـ̈ـܢܵܐ ܡ̣ܢ ܓܙܵܪܹ̈ܐ: ܘܠܲܝܬ̇ ܬܵܘܪܹ̈ܐ ܒܒܲܩܪܹ̈ܐ.

¹⁸ܐܸܢܵܐ ܕܹܝܢ ܒܡܵܪܝܵܐ ܐܸܕ̇ܘܼܨ: ܘܐܸܪܘܲܙ ܒܐܲܠܵܗܵܐ ܦܵܪܘܿܩܝ.

¹⁹ܡܵܪܹܐ ܡܵܪ̈ܵܘܵܬ̣ܵܐ ܚܲܝܠܝ: ܕܲܥܒܲܕ݂ ܪܸ̈ܓ̣ܠܲܝ ܐܲܝܟ݂ ܕܐܲܝܠܵܐ: ܘܥܲܠ ܪܵܘܡܝ ܐܲܩܝܼܡܲܢܝ: ܕܐܸܙܡܲܪ ܒܬܸܫ̈ܒ̇ܚܵܬܹܗ.