Read Aramaic Peshita Zephaniah 2 Bible Online

Zephaniah 2 - Aramaic Peshita bible

Zephaniah 2

³ܒܥܵܐܘܼܗܝ ܠܡܵܪܝܵܐ ܟܠܟ݂ܘܿܢ ܡܲܟ̇ܝܼܟܹ̈ܝܗ̇ ܕܐܲܪܥܵܐ: ܘܲܥܒܸܕ݂ܘ ܕܝܼܢܵܐ: ܘܲܒ̣ܥܵܘ ܙܲܕ̇ܝܼܩܘܼܬ̣ܵܐ ܘܡܲܟ̇ܝܼܟ݂ܘܼܬ̣ܵܐ: ܟܒܲܪ ܬܸܣܬܲܬ̇ܪܘܼܢ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ.

⁴ܡܸܛܠ ܕܥܵܐܙܵܐ ܫܒ̣ܝܼܩܬܵܐ ܬܸܗܘܹܐ: ܘܐܲܫܩܵܠܘܿܢ ܠܲܚܒ̣ܵܠܵܐ: ܠܐܲܫܕ̇ܘܿܕ݂ ܒܛܲܗܪܵܐ ܢܸܕ݂ܒ̇ܪܘܼܢ: ܘܥܸܩܪܘܿܢ ܬܸܬ̣ܥ̱ܩܲܪ.

⁵ܘܵܝ ܠܲܕ݂ܥܵܡ̇ܪܝܼܢ ܒܲܚܒܸܠ ܝܲܡܵܐ ܘܲܠܥܲܡܵܐ ܕܲܩܪܹܛܹܐ: ܦܸܬ̣ܓ̣ܵܡܹܗ ܕܡܵܪܝܵܐ ܥܠܲܝܟܹ̇ܝܢ ܟܢܲܥܢ ܘܐܲܪܥܵܐ ܕܲܦܠܸܫܬܵܝܹ̈ܐ: ܘܐܵܘܒܸ̇ܕ݂ܟܹܝܢ ܡ̣ܢ ܝܲܬ̣ܒܵܐ.

⁶ܘܢܸܗܘܹܐ ܚܒܸܠ ܝܲܡܵܐ ܕܲܝܪܹ̈ܐ: ܘܲܩܪܹܛܹܐ ܒܹܝܬ̣ ܡܲܪܥܝܼܬ̣ܵܐ ܠܲܓ̣ܙܵܪܹ̈ܐ ܕܥܵـ̈ـܢܵܐ.

⁷ܘܢܸܗܘܹܐ ܚܒܸܠ ܝܲܡܵܐ ܠܫܲܪܟܵܐ ܕܒܹܝܬ̣ ܝܑܼܗܘܼܕ݂ܵܐ: ܘܲܒ̣ܗܹܝܢ ܢܸܪܥܘܿܢ: ܘܲܒ̣ܒ̣ܵـ̈ـܬܹ̇ܐ ܕܐܲܫܩܵܠܘܿܢ ܒܪܲܡܫܵܐ ܢܸܪܒ̇ܥܘܼܢ: ܡܸܛܠ ܕܢܸܦܩܘܿܕ݂ ܐܸܢܘܿܢ ܡܵܪܝܵܐ ܐܲܠܵܗܗܘܿܢ: ܘܢܲܩܢܸܐ ܫܒ̣ܝܼܬ̣ܗܘܿܢ.

⁸ܫܸܡ̇ܥܹܬ̣ ܚܸܣܕܵܐ ܕܡܘܼܐܵܒ̣: ܘܓ̣ܘܼܕܵܦܵܐ ܕܲܒ̣ܢܲܝ̈ ܥܲܡܘܿܢ: ܕܚܲܣܸܕ݂ܘ ܠܥܲܡܝ: ܘܐܸܬ̣ܪܵܘܪܲܒ̣ܘ ܥܲܠ ܬܚܘܼܡܗܘܿܢ.

⁹ܡܸܛܠ ܗܵܠܹܝܢ ܚܲܝ ܐ̄ܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܕܡܘܼܐܵܒ̣ ܐܲܝܟ݂ ܣܕ݂ܘܿܡ ܬܸܗܘܹܐ: ܘܲܒ̣ܢܲܝ̈ ܥܲܡܘܿܢ ܐܲܝܟ݂ ܥܵܡܘܿܪܵܐ: ܕܐܸܬ̣ܚܲܒ̇ܠܲܬ̤ ܢܸܨܒܲܬ̣ܗܹܝܢ: ܘܐܸܒܲܕ݂ ܡܲܠܘܼܚܗܹܝܢ: ܘܲܗܸܘܲܝ̈ ܚܒ̣ܵܠܵܐ ܠܥܵܠܲܡ: ܫܲܪܟܹ̇ܗ ܕܥܲܡܝ ܒܸܒ̇ܙܘܼܢ ܐܸܢܹܝܢ: ܘܡܸܕܸ̇ܡ ܕܐܸܫܬ̇ܚܲܪ ܡ̣ܢ ܥܲܡܝ ܢܹܐܪܬ̇ܘܿܢ ܐܸܢܹܝܢ.

¹⁰ܗܵܕܹܐ ܬܸܗܘܹܐ ܠܗܘܿܢ ܚܠܵܦ ܓܲܐܝܘܼܬ̣ܗܘܿܢ: ܥܲܠ ܕܚܲܣܸܕ݂ܘ ܘܐܸܬ̣ܪܵܘܪܲܒ̣ܘ ܥܲܠ ܥܲܡܹܗ ܕܡܵܪܝܵܐ ܚܲܝܠܬ̣ܵܢܵܐ ܥܲܠ ܝܑܼܣܪܵܝܹܠ.

¹¹ܐܸܬ̣ܓ̇ܠܝܼ ܡܵܪܝܵܐ ܥܠܲܝܗܘܿܢ: ܕܢܵܘܒܸ̇ܕ݂ ܠܟ݂ܠܗܘܿܢ ܡܲܠܟܹ̇ܝ̈ܗ̇ ܕܐܲܪܥܵܐ: ܘܢܸܣܓ̇ܕ݂ܘܼܢ ܠܹܗ ܐ̄ܢܵܫ ܡ̣ܢ ܐܲܬ̣ܪܹܗ: ܟܠܗܹܝܢ ܓܵܙܪ̈ܵܬ̣ܵܐ ܕܝܲܡܡܹ̈ܐ.

¹²ܐܵܦ ܐܲܢ̄ܬ̇ܘܿܢ ܟܘܼܫܵܝܹ̈ܐ ܩܛܝܼܠܲܝ̈ ܚܲܪܒܵܐ.

¹³ܘܲܢܪܝܼܡ ܐܝܼܕܹܗ ܥܲܠ ܓܲܪܒ̇ܝܵܝܵܐ: ܘܢܵܘܒܸ̇ܕ݂ ܠܐܵܬ̣ܘܿܪܵܝܵܐ: ܘܢܸܥܒ̇ܕܹܝܗ̇ ܠܢܝܼܢܘܐ ܠܲܚܒ̣ܵܠܵܐ ܘܲܠܨܸܕ݂ܝܵܐ ܐܲܝܟ݂ ܡܲܕ݂ܒ̇ܪܵܐ.

¹⁴ܘܢܸܪܒ̇ܥܘܼܢ ܒܓ̣ܵܘܵܗ̇ ܓܙܵܪܹ̈ܐ: ܘܟ݂ܠܗܹܝܢ ܚܲܝ̈ܘܵܬ̣ܵܐ ܕܥܲܡܡܹ̈ܐ: ܐܵܦ ܩܵܩܹ̈ܐ ܘܩܘܼ̈ܦܕܹܐ ܒܒ̣ܵܬܹ̇ܝ̈ܗ̇ ܢܒ̣ܘܼܬ̣ܘܼܢ: ܘܚܲܝ̈ܘܵܬ̣ܵܐ ܢܸܢܗ̈ܡܵܢ ܒܓ̣ܵܘܵܗ̇: ܘܚܲܪܒܵܐ ܒܬܲܪ̈ܥܹܝܗ̇: ܡܸܛܠ ܕܥܸܩܵܪܵܗ̇ ܐܸܬ̣ܦܲܪܣܝܼ.

¹⁵ܗܵܕܲܐ ܗ̄ܝܼ ܡܕ݂ܝܼܢ̄ܬܵܐ ܥܲܫܝܼܢܬܵܐ ܕܝܵܬ̣ܒܵܐ ܗ̄ܘܼܵܬ̣ ܒܫܸܠܝܵܐ: ܘܐܵܡܪܵܐ ܗ̄ܘܼܵܬ̣ ܒܠܸܒܵܗ̇ ܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣ ܐܲܟ݂ܘܵܬ̣ܝ: ܐܲܝܟܲܢܵܐ ܗܘ̤ܵܬ̣ ܠܲܚܒ̣ܵܠܵܐ: ܘܒܹܝܬ̣ ܡܲܪܒ̇ܥܵܐ ܠܚܲܝ̈ܘܵܬ̣ܵܐ: ܟܠܡܲܢ ܕܢܸܥܒܲܪ ܥܠܹܝܗ̇ ܢܸܬ̣ܡܲܗ: ܘܢܲܫܪܸܩ: ܘܲܢܢܝܼܦ ܒܐܝܼܕܹܗ ܘܢܹܐܡܲܪ.