Read Aramaic Peshita Zephaniah 3 Bible Online

Zephaniah 3 - Aramaic Peshita bible

Zephaniah 3

¹ܐܘܿܝ ܡܕ݂ܝܼܢ̄ܬܵܐ ܝܑܼܕ݂ܝܼܥܬܵܐ ܘܲܦܪܝܼܩܬܵܐ: ܡܕ݂ܝܼܢ̄ܬܹ̇ܗ ܕܝܵܘܢܵܢ.

²ܕܠܵܐ ܫܸܡܥܲܬ̤ ܒܩܵܠܵܐ: ܘܠܵܐ ܩܲܒ̇ܠܲܬ̤ ܡܲܪܕ̇ܘܼܬ̣ܵܐ: ܘܲܒ̣ܡܵܪܝܵܐ ܠܵܐ ܣܲܒ̇ܪܲܬ̤: ܘܲܠܘܵܬ̣ ܐܲܠܵܗܵܗ̇ ܠܵܐ ܩܸܪܒܲܬ̤.

³ܪܵܘܪ̈ܒ̣ܵܢܹܝܗ̇ ܒܓ̣ܵܘܵܗ̇ ܐܲܝܟ݂ ܐܲܪ̈ܝܵܘܵܬ̣ܵܐ ܢܵܗ̇ܡܝܼܢ: ܘܕܲܝܵܢܹ̈ܝܗ̇ ܐܲܝܟ݂ ܕܐܸܒܹ̈ܐ ܕܪܲܡܫܵܐ: ܘܠܵܐ ܡܟܲܬ̇ܪܝܼܢ ܠܨܲܦܪܵܐ.

⁴ܢܒ̣̈ܝܹܝܗ̇ ܦܵܚܙܝܼܢ: ܘܓܲܒ̣ܪܹ̈ܐ ܐܸܢܘܿܢ ܥܵܘܿܠܹ̈ܐ: ܟܵܗ̈ܢܹܝܗ̇ ܛܵܘܸܫ̣ܘ ܡܲܩܕ̇ܫܵܐ: ܘܲܚܛܲܦ̣ܘ ܢܵܡܘܿܣܵܐ.

⁵ܘܡܵܪܝܵܐ ܙܲܕ̇ܝܼܩܵܐ ܒܓ̣ܵܘܵܗ̇ ܘܠܵܐ ܥܵܒܹ̇ܕ݂ ܥܵܘܼܠܵܐ: ܒܨܲܦܪܵܐ ܘܲܒ̣ܨܲܦܪܵܐ ܕܝܼܢܵܘ̈ܗܝ: ܝܵܗܹ̇ܒ̣ ܒܢܘܼܗܪܵܐ ܘܠܵܐ ܡܫܵܘܚܲܪ: ܘܥܵܘܿܠܵܐ ܠܵܐ ܝܵܕܲܥ̇ ܒܸܗܬ̇ܬ̣ܵܐ.

⁶ܐܵܘܒ̇ܕܹܬ̣ ܥܲܡܡܹ̈ܐ: ܘܐܸܬ̣ܚܒ̇ܠܲܬ̣ ܕܵܘܝܼܬ̣ܵܐ: ܐܲܚ̱ܪܒܹ̇ܬ̣ ܫܘܼܩܲܝ̈ܗܘܿܢ ܡ̣ܢ ܒܠܲܝ ܕܥܵܒܲܪ: ܨܕܲܝ̈ ܡܕ݂ܝܼ̈ܢܵܬ̣ܗܘܿܢ ܡ̣ܢ ܒܠܲܝ ܐ̄ܢܵܫ: ܘܡ̣ܢ ܒܠܲܝ ܕܝܵܬܹ̇ܒ̣.

⁷ܐܸܡ̇ܪܹܬ̣ ܕܠܝܼ ܬܸܕ݂ܚ̄ܠܘܼܢ: ܘܡܹܢܝ ܬܩܲܒ̇ܠܘܼܢ ܡܲܪܕ̇ܘܼܬ̣ܵܐ: ܘܠܵܐ ܢܹܐܒܲܕ݂ ܡ̣ܢ ܥܲܝܢܹܝ̈ܗ̇ ܟܠܡܸܕܸ̇ܡ ܕܦܲܩ̇ܕܹܬ̣ ܥܠܹܝܗ̇: ܐܸܬ̇ܛܲܝܲܒ̣ܘ ܘܲܩܪܘܿܒ̣ܘ ܘܚܲܒܸ̇ܠܘ ܟܠܗܹܝܢ ܨܸܢ̈ܥܵܬ̣ܗܘܿܢ.

⁸ܡܸܟܹ̇ܝܠ ܣܲܟܵܘ ܠܝܼ ܐܵܡܲܪ ܡܵܪܝܵܐ: ܠܝܵܘܡܵܐ ܕܩܵܐܹ̇ܡ ܐ̄ܢܵܐ ܠܣܵܗܕ̇ܘܼܬ̣ܵܐ: ܡܸܛܠ ܕܡܲܛܝܼ ܕܝܼܢܝ ܠܲܡܟܲܢܵܫܘܼ ܥܲܡܡܹ̈ܐ: ܘܠܲܡܩܲܪܵܒ̣ܘܼ ܡܲܠܟ̇ـ̈ـܘܵܬ̣ܵܐ: ܠܡܹܐܫܲܕ݂ ܥܠܲܝܗܘܿܢ ܪܘܼܓ̣ܙܝܼ: ܘܟ݂ܠܵܗ̇ ܚܸܡܬ̣ܵܐ ܕܪܘܼܓ̣ܙܝ: ܡܸܛܠ ܕܲܒ̣ܢܘܼܪܵܐ ܕܲܛܢܵܢܝ ܬܸܬ̣ܐ̱ܟܸܠ ܟܠܵܗ̇ ܐܲܪܥܵܐ.

⁹ܘܗܵܝܕܹ̇ܝܢ ܐܲܗܦܸܟ݂ ܥܲܠ ܥܲܡܡܹ̈ܐ ܣܸܦܬ̣ܵܐ ܓܒ̣ܝܼܬ̣ܵܐ: ܕܢܸܩܪܘܿܢ ܟܠܗܘܿܢ ܒܲܫܡܹܗ ܕܡܵܪܝܵܐ: ܘܢܸܦܠܚܘܼܢܹܗ ܒܢܝܼܪܵܐ ܚܲܕ݂.

¹⁰ܡ̣ܢ ܥܒ̣ܵܪ ܢܲܗܪ̈ܵܘܵܬ̣ܵܐ ܕܟ݂ܘܼܫ ܢܲܝܬ̇ܘܿܢ ܠܝܼ ܕܸܒ̣ܚܹ̈ܐ: ܒܝܵܘܡܵܐ ܗܵܘܿ.

¹¹ܠܵܐ ܬܸܒ̣ܗ̱ܬ̣ܝܼܢ ܡ̣ܢ ܟܠܗܹܝܢ ܨܸܢ̈ܥܵܬܹܟ݂ܝ ܕܐܲܥܠܝܼܬ̇ܝ ܒܝܼ: ܘܗܵܝܕܹ̇ܝܢ ܐܲܥܒܲܪ ܡܸܢܹܟ݂ܝ ܥܘܼܫܢܵܐ ܕܓܲܐܝܘܼܬܹܟ݂ܝ: ܘܠܵܐ ܬܵܘܣܦܝܼܢ ܬܘܼܒ̣ ܠܡܸܬ̣ܪܵܘܪܵܒ̣ܘܼ ܥܲܠ ܛܘܼܪܵܐ ܕܩܘܼܕ݂ܫܝ.

¹²ܘܐܵܘܬܲܪ ܒܓ̣ܵܘܹܟ݂ܝ ܥܲܡܵܐ ܡܸܣܟܹ̇ܢܵܐ ܘܡܲܟ̇ܝܼܟ݂ܵܐ: ܘܲܢܣܲܒ̇ܪܘܼܢ ܒܲܫܡܹܗ ܕܡܵܪܝܵܐ.

¹³ܘܐܲܝܠܹܝܢ ܕܐܸܫܬ̇ܚܲܪܘ ܡ̣ܢ ܒܹܝܬ̣ ܝܑܼܣܪܵܝܹܠ: ܠܵܐ ܢܸܥܒ̇ܕ݂ܘܼܢ ܥܵܘܼܠܵܐ: ܘܠܵܐ ܢܡܲܠܠܘܼܢ ܕܲܓܵܠܘܼܬ̣ܵܐ: ܘܠܵܐ ܢܸܫܬ̇ܟܲܚ ܒܦܘܼܡܗܘܿܢ ܠܸܫܵܢܵܐ ܕܢܸܟ݂ܠܵܐ: ܡܸܛܠ ܕܗܸܢ̣ܘܿܢ ܢܸܪܥܘܿܢ ܘܢܸܪܒ̇ܥܘܼܢ: ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.

¹⁴ܫܲܒܲܚܝ ܒܲܪܬ̣ ܨܸܗܝܘܿܢ: ܘܝܲܒܸ̇ܒ̣ ܝܑܼܣܪܵܝܹܠ: ܚܕ݂ܵܝ ܘܕ݂ܘܼܨܝ ܒܟ݂ܠܹܗ ܠܸܒܹ̇ܟ݂ܝ ܒܲܪܬ̣ ܐܘܿܪܸܫܠܸܡ.

¹⁵ܐܲܥܒܲܪ ܡܵܪܝܵܐ ܕܝܼܢܲܝ̈ܟ̇ܝ: ܘܐܲܦܪܸܩ ܡܸܢܹܟ݂ܝ ܒܥܸܠܕ̇ܒ̣ܵܒܲܝ̈ܟ̇ܝ ܡܲܠܟܹ̇ܗ ܕܝܼܣܪܵܝܹܠ: ܡܵܪܝܵܐ ܒܓ̣ܵܘܹܟ݂ܝ ܬܘܼܒ̣ ܠܵܐ ܬܸܚܙܹܝܢ ܒܝܼܫܬܵܐ.

¹⁶ܒܹܗ ܒܝܵܘܡܵܐ ܗܵܘܿ: ܢܸܬ̣ܐ̱ܡܲܪ ܠܐܘܿܪܸܫܠܸܡ ܠܵܐ ܬܸܕ݂ܚ̄ܠܝܼܢ: ܘܲܠܨܸܗܝܘܿܢ ܠܵܐ ܢܸܬ̣ܪ̈ܲܦܝܵܢ ܐܝܼܕܲܝ̈ܟ̇ܝ.

¹⁷ܡܵܪܝܵܐ ܐܲܠܵܗܹܟ݂ܝ ܒܓ̣ܵܘܹܟ݂ܝ: ܓܲܢ̄ܒܵܪܵܐ ܘܦܵܪܘܿܩܵܐ: ܢܒܲܣܡܹܟ݂ܝ ܒܚܲܕ݂ܘܼܬ̣ܵܐ ܘܲܢܚܲܕ̇ܬܹܟ݂ܝ ܒܚܘܼܒܹ̇ܗ: ܘܲܢܕܲܝܨܹܟ݂ܝ ܒܬܸܫܒ̇ܘܿܚܬܵܐ ܐܲܝܟ݂ ܕܲܒ̣ܝܵܘܡܵܐ ܕܥܲܕ݂ܥܸܕ݂ܵܐ.

¹⁸ܘܐܲܥܒܲܪ ܡܸܢܹܟ݂ܝ ܐܲܝܠܹܝܢ ܕܲܡܡܲܠܠܝܼܢ ܗ̄ܘܼܵܘ ܥܠܲܝܟ̇ܝ ܚܸܣܕܵܐ.

¹⁹ܗܵܐ ܥܵܒܹ̇ܕ݂ ܐ̄ܢܵܐ ܠܟ݂ܠܗܘܿܢ: ܟܲܕ݂ ܡܡܲܟ̇ܟ݂ܝܼܢ ܒܓܵܘܹܟ݂ܝ ܒܙܲܒ̣ܢܵܐ ܗܵܘܿ: ܘܐܸܦܪܘܿܩ ܠܲܟ݂ܒ̣ܝܼܫܬܵܐ: ܘܲܠܪܲܚ̣ܝܼܩܬܵܐ ܐܹܟܲܢܸܫ: ܘܐܸܥܒܸ̇ܕ݂ ܐܸܢܘܿܢ ܠܲܫܡܵܐ ܘܲܠܬܸܫܒ̇ܘܿܚܬܵܐ ܒܟ݂ܠܵܗ̇ ܐܲܪܥܵܐ ܕܒܸܗܬܲܬ̣ܗܘܿܢ.

²⁰ܒܹܗ ܒܙܲܒ̣ܢܵܐ ܗܵܘܿ ܐܲܝܬܹ̇ܿܝܟ݂ܘܿܢ: ܘܒܹܗ ܒܙܲܒ̣ܢܵܐ ܗܵܘܿ ܐܹܟܲܢܸܫܟ݂ܘܿܢ: ܘܐܸܬܸ̇ܠܟ݂ܘܿܢ ܠܲܫܡܵܐ ܘܲܠܬܸܫܒ̇ܘܿܚܬܵܐ ܒܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ: ܡܵܐ ܕܡܲܗܦܸܟ݂ ܐ̄ܢܵܐ ܫܒ̣ܝܼܬ̣ܟ݂ܘܿܢ ܠܥܹܢܲܝܗܘܿܢ ܐܵܡܲܪ ܡܵܪܝܵܐ.