Read Aramaic Peshita Zechariah 10 Bible Online

Zechariah 10 - Aramaic Peshita bible

Zechariah 10

¹ܫܐܲܠܘ ܡܸܛܪܵܐ ܡ̣ܢ ܡܵܪܝܵܐ ܒܙܲܒ̣ܢܵܐ ܠܩܝܼܫܵܝܵܐ: ܘܡܵܪܝܵܐ ܥܵܒܹ̇ܕ݂ ܪ̈ܣܝܼܣܹܐ: ܘܡܸܛܪܵܐ ܒܟ݂ܝܼܪܵܝܵܐ ܢܸܬܸ̇ܠ ܠܟ݂ܘܿܢ ܕܲܢܪܲܒܸ̇ܐ ܥܸܣܒܵܐ ܒܕܲܒ̣ܪܵܐ.

²ܡܸܛܠ ܕܝܲܕ̇ܘܼ̈ܥܹܐ ܡܲܠܸܠ̣ܘ ܥܵܘܼܠܵܐ: ܘܩܵܨܘܿܡܹ̈ܐ ܚ̣ܙܵܘ ܕܲܓܵܠܘܼܬ̣ܵܐ: ܘܚܸܠܡܹ̈ܐ ܕܲܓܵܠܹ̈ܐ ܡܲܠܸܠ̣ܘ: ܘܒܲܝܲܐܘ ܒܲܣܪܝܼܩܘܼܬ̣ܵܐ: ܡܸܛܠ ܗܵܢܵܐ ܫܩܲܠ̣ܘ ܐܲܝܟ݂ ܥܵـ̈ـܢܵܐ: ܘܐܸܬ̣ܡܲܟܲܟ݂ܘ ܕܠܲܝܬ̇ ܠܗܘܿܢ ܪܵܥܝܵܐ.

³ܥܲܠ ܪ̈ܵܥܵܘܵܬ̣ܵܐ ܐܸܬ̣ܚܲܡܲܬ̣ ܪܙܼܓ̣ܙܝܼ: ܘܠܲܓ̣ܙܵܪܹ̈ܐ ܐܸܦܩܘܿܕ݂: ܡܸܛܠ ܕܦܵܩܹ̇ܕ݂ ܡܵܪܝܵܐ ܚܲܝܠܬ̣ܵܢܵܐ ܠܲܓ̣ܙܵܪܹܗ ܠܲܕ݂ܒܹܝܬ̣ ܝܑܼܗܘܼܕ݂ܵܐ: ܘܲܥ̣ܒܲܕ݂ ܐܸܢܘܿܢ ܐܲܝܟ݂ ܣܘܼܣܝܵܐ ܕܲܙܗܸܐ ܒܲܩܪܵܒ̣ܵܐ.

⁴ܡܸܢܗܘܿܢ ܙܵܘܝܼܬ̣ܵܐ: ܘܡܸܢܗܘܿܢ ܣܸܟ̇ܬ̣ܵܐ: ܘܡܸܢܗܘܿܢ ܩܸܫܬܵܐ ܒܲܩܪܵܒ̣ܵܐ: ܘܡܸܢܗܘܿܢ ܢܸܦܩܘܼܢ ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܐܲܟ݂ܚ̄ܕ݂ܵܐ.

⁵ܘܢܸܗܘܘܿܢ ܐܲܝܟ݂ ܓܲܒ̣ܪܹ̈ܐ ܕܕ݂ܵܝ̇ܫܝܼܢ ܣܝܵܢܵܐ ܒܫܘܼܩܹ̈ܐ: ܒܲܩܪܵܒ̣ܵܐ ܢܸܬ̣ܟܲܬ̇ܫܘܼܢ ܡܸܛܠ ܕܡܵܪܝܵܐ ܥܲܡܗܘܿܢ: ܘܢܸܒ̣ܗ̱ܬ̣ܘܼܢ ܪ̈ܵܟ݂ܒܲܝ ܪ̈ܲܟ݂ܫܵܐ.

⁶ܘܐܹܚܲܝܸܠ ܠܲܕ݂ܒܹܝܬ̣ ܝܑܼܗܘܼܕ݂ܵܐ: ܘܐܸܦܪܘܿܩ ܠܲܕ݂ܒܹܝܬ̣ ܝܵܘܣܸܦ: ܘܐܲܦܢܸܐ ܐܸܢܘܿܢ: ܡܸܛܠ ܕܲܡܪܲܚܸܡ ܐ̄ܢܵܐ ܥܠܲܝܗܘܿܢ: ܘܢܸܗܘܘܿܢ ܐܲܝܟ݂ ܕܠܵܐ ܛܥܹ̇ܝܬ̣ ܐܸܢܘܿܢ: ܡܸܛܠ ܕܐܸܢܵܐ ܡܵܪܝܵܐ ܐܲܠܵܗܵܐ ܐܸܥܢܸܐ ܐܸܢܘܿܢ.

⁷ܘܢܸܗܘܘܿܢ ܐܲܝܟ݂ ܓܲܢ̄ܒܵܪܹ̈ܐ ܕܐܲܦܪܹܝܡ: ܘܢܸܚܕܸ̇ܐ ܠܸܒ̇ܗܘܿܢ ܐܲܝܟ݂ ܕܡ̣ܢ ܚܲܡܪܵܐ: ܘܲܒ̣ܢܲܝ̈ܗܘܿܢ ܢܸܚܙܘܿܢ ܘܢܸܚܕ̇ܘܿܢ: ܘܢܸܪܘܲܙ ܠܸܒ̇ܗܘܿܢ ܒܡܵܪܝܵܐ.

⁸ܐܲܫܪܸܩ ܠܗܘܿܢ ܘܐܹܟܲܢܸܫ ܐܸܢܘܿܢ: ܡܸܛܠ ܕܦܵܪܹܩ ܐ̄ܢܵܐ ܠܗܘܿܢ: ܘܢܸܣܓ̇ܘܿܢ ܐܲܝܟ݂ ܕܣܲܓ̇ܝܼܐܝܼܢ ܗ̄ܘܼܵܘ.

⁹ܘܐܸܙܪܘܿܥ ܐܸܢܘܿܢ ܒܥܲܡܡܹ̈ܐ: ܘܒܲܐܬ̣ܪ̈ܵܘܵܬ̣ܵܐ ܪ̈ܲܚܝܼܩܹܐ ܢܫܲܒ̇ܚܘܼܢܵܢܝ: ܘܲܢܬܲܪܣܘܿܢ ܠܲܒ̣ܢܲܝ̈ܗܘܿܢ ܘܢܸܗܦܟ݂ܘܿܢ.

¹⁰ܘܐܲܗܦܸܟ݂ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܡ̣ܢ ܐܵܬ̣ܘܿܪ ܐܸܟܲܢܸܫ ܐܸܢܘܿܢ: ܘܠܲܐܪܥܵܐ ܕܓܸܠܥܵܕ݂ ܘܲܠܠܸܒ̣ܢܵܢ ܐܲܝܬܸ̇ܐ ܐܸܢܘܿܢ: ܘܠܵܐ ܢܸܡ̱ܠ̈ܝܵܢ ܠܗܘܿܢ.

¹¹ܘܢܸܥܒܲܪ ܒܝܲܡܵܐ ܐܘܼܠܨܵܢܵܐ: ܘܢܲܗܦܸܟ݂ ܒܝܲܡܵܐ ܓܲܠܠܹ̈ܐ: ܘܢܸܒ̣ܗ̱ܬ̣ܘܼܢ ܟܠܗܘܿܢ ܥܘܼܡܩܵܘ̈ܗܝ ܕܢܲܗܪܵܐ: ܘܬܸܒ̣ܛܲܠ ܓܲܐܝܘܼܬܹܗ ܕܐܵܬ̣ܘܿܪܵܝܵܐ: ܘܫܘܼܠܛܵܢܹܗ ܕܡܸܨܪܵܝܵܐ ܢܸܥܒܲܪ.

¹²ܘܐܹܚܲܝܸܠ ܐܸܢܘܿܢ ܒܡܵܪܝܵܐ: ܘܠܲܫܡܹܗ ܢܣܲܒ̇ܪܘܼܢ ܐܵܡܲܪ ܡܵܪܝܵܐ.