Read Aramaic Peshita Zechariah 11 Bible Online

Zechariah 11 - Aramaic Peshita bible

Zechariah 11

¹ܦܬܲܚ ܠܸܒ̣ܢܵܢ ܬܲܪ̈ܥܲܝܟ ܘܬܹܐܟ݂ܘܿܠ ܢܘܼܪܵܐ ܠܐܲܪ̈ܙܲܝܟ.

²ܢܲܝܠܸܠ ܫܲܪܘܲܝܢܵܐ ܡܸܛܠ ܕܲܢܦܲܠ̣ ܐܲܪܙܵܐ: ܘܥܲܫܝܼ̈ܢܹܐ ܐܸܬ̣ܒܲܙܸܙܘ: ܢܲܝܠܠܘܼܢ ܒܲܠܘܼܛܹ̈ܐ ܕܒܲܝܫܵܢ: ܕܲܢܦܲܠ̣ ܥܵܒ̣ܵܐ ܥܲܫܝܼܢܵܐ.

³ܩܵܠܵܐ ܕܝܼܠܲܠܬܵܐ ܕܪ̈ܵܥܵܘܵܬ̣ܵܐ ܕܐܸܬ̣ܒܲܙܙܲܬ̤ ܪܲܒ̇ܘܼܬ̣ܗܘܿܢ: ܩܵܠܵܐ ܕܐܲܪ̈ܝܵܘܵܬ̣ܵܐ ܕܢܵܗ̇ܡܝܼܢ: ܕܐܸܬ̣ܒܲܙܸܙ ܥܘܼܫܢܹܗ ܕܝܘܿܪܕ̇ܢܵܢ.

⁴ܗܵܟܲܢܵܐ ܐܸܡܲܪ ܠܝܼ ܡܵܪܝܵܐ ܐܲܠܵܗܝ: ܪܥܝܼ ܠܥܵـ̈ـܢܵܐ ܩܲܛܝܼܢܬܵܐ.

⁵ܕܙܵܒ̣ܘܿܢܲܝ̈ܗܹܝܢ ܩܵܛ̇ܠܝܼܢ ܠܗܹܝܢ: ܘܠܵܐ ܡܸܬ̣ܚܲܒ̣ܝܼܢ: ܘܲܡܙܲܒ̇ܢܵܢܲܝ̈ܗܹܝܢ ܐܵܡ̇ܪܝܼܢ: ܒܪܝܼܟ݂ ܡܵܪܝܵܐ ܕܐܲܥܬ̇ܪܲܢ: ܘܪ̈ܵܥܵܘܵܬ̣ܗܹܝܢ ܠܵܐ ܚܵܝ̇ܣܝܼܢ ܥܠܲܝܗܹܝܢ.

⁶ܡܸܛܠ ܕܠܵܐ ܚܵܐܹ̇ܣ ܐ̄ܢܵܐ ܬܘܼܒ̣ ܥܲܠ ܥܵܡܘܿܪܹ̈ܝܗ̇ ܕܐܲܪܥܵܐ ܐܵܡܲܪ ܡܵܪܝܵܐ: ܘܗܵܐ ܡܲܫܠܸܡ ܐ̄ܢܵܐ ܠܗܘܿܢ ܠܲܒ̣ܢܲܝ̈ ܐ̄ܢܵܫܵܐ: ܐ̄ܢܵܫ ܒܝܲܕ݂ ܚܲܒ̣ܪܹܗ ܘܲܒ̣ܝܲܕ݂ ܡܲܠܟܹ̇ܗ: ܘܲܢܦܲܠܓ̣ܘܼܢܵܗ̇ ܠܐܲܪܥܵܐ: ܘܠܵܐ ܐܸܦܲܨܸܝܗ̇ ܡ̣ܢ ܐܝܼܕܲܝ̈ܗܘܿܢ.

⁷ܘܲܪܥܹܝ̇ܬ̣ ܠܥܵـ̈ـܢܵܐ ܩܲܛܝܼܢܬܵܐ ܡܸܛܠ ܟܸܢܫܵܐ ܕܥܵـ̈ـܢܵܐ: ܘܢܸܣ̇ܒܹ̇ܬ̣ ܠܝܼ ܬܪܹܝܢ ܚܘܼܛܪ̈ܝܼܢ: ܠܚܲܕ݂ ܩܪܹܝ̇ܬ̣ ܒܲܣܝܼܡܵܐ: ܘܠܲܐܚܪܹܢܵܐ ܚܲܒ̣ܠܵܐ: ܘܲܪܥܹ̇ܝܬ̣ ܠܥܵـ̈ـܢܵܐ.

⁸ܘܐܵܘܒ̇ܕܹܬ̣ ܬܠܵܬ̣ܵܐ ܪ̈ܵܥܵܘܵܬ̣ܵܐ ܒܝܲܪܚܵܐ ܚܲܕ݂: ܘܡܸܐܢܲܬ̤ ܢܲܦ̮ܫܝ ܒܗܘܿܢ: ܘܐܵܦ ܢܲܦ̮ـ̈ـܫܵܬ̣ܗܘܿܢ ܥܘܲܝ̈ ܥܠܲܝ.

⁹ܘܐܸܡܪܹܬ̣ ܕܠܵܐ ܐܸܪܥܹܝܟ݂ܘܿܢ: ܕܡܵܝ̇ܬܵܐ ܬܡܘܼܬ̣: ܘܕ݂ܵܐܒ̣ܕܵܐ ܬܹܐܒܲܕ݂: ܘܐܲܝܕܵܐ ܕܡܸܫܬܲܚܪܵܐ ܬܹܐܟ݂ܘܿܠ ܒܸܣܪܵܐ ܕܚܲܒ̣ܪ̈ܵܬ̣ܵܗ̇.

¹⁰ܘܢܸܣܒܹ̇ܬ̣ ܚܘܼܛܪܝ ܒܲܣܝܼܡܵܐ ܘܲܬ̣ܒܲܪܬܹ̇ܗ: ܕܢܸܒ̣ܛܲܠ ܩܝܵܡܵܐ ܕܐܲܩܝܼܡܹ̇ܬ̣ ܥܲܡ ܟܠܗܘܿܢ ܥܲܡܡܹ̈ܐ.

¹¹ܘܲܒ̣ܛܸܠ ܒܹܗ ܒܝܵܘܡܵܐ ܗܵܘܿ: ܘܝܼܕܲܥ̣ܘ ܡܲܟ̇ܝܼ̈ܟܹܐ ܕܥܵـ̈ـܢܵܐ ܕܢܵܛ̇ܪܝܼܢ ܗ̄ܘܼܵܘ ܠܝܼ: ܕܦܸܬ̣ܓ̣ܵܡܹܗ ܗ̄ܘܼ ܕܡܵܪܝܵܐ.

¹²ܘܐܸܡ̇ܪܹܬ̣ ܠܗܘܿܢ: ܐܸܢ ܫܲܦܝܼܪ ܒܥܲܝ̈ܢܲܝܟ̇ܘܿܢ ܗܲܒ̣ܘ ܠܝܼ ܐܲܓ̣ܪܝ: ܐܵܘ ܛܵܠ̇ܡܝܼܢ ܐ̄ܢܬ̇ܘܿܢ ܠܝܼ: ܘܬܲܩ̣ܠܘܼܗܝ ܠܐܲܓ̣ܪܝ ܬܠܵܬ̣ܝܼܢ ܕܟܸܣܦܵܐ.

¹³ܘܐܸܡܲܪ ܠܝܼ ܡܵܪܝܵܐ ܐܲܪܡܵܝܗܝ ܒܹܝܬ̣ ܓܲܙܵܐ: ܫܘܼܒ̣ܚܵܐ ܕܐܝܼܩܵܪܵܐ ܕܐܵܘܩ̇ܪܹܬ̣ ܡܸܢܗܘܿܢ: ܘܢܸܣܒܹ̇ܬ̣ ܬܠܵܬ̣ܝܼܢ ܕܟܸܣܦܵܐ ܘܐܲܪܡܝܼܬ̣ ܐܸܢܘܿܢ ܒܹܝܬ̣ ܓܲܙܵܐ ܒܒܲܝܬܹ̇ܗ ܕܡܵܪܝܵܐ.

¹⁴ܘܬܸܒ̣ܪܹܬ̣ ܠܚܲܒ̣ܠܵܐ ܚܘܼܛܪܝ ܐ̄ܚܪܹܢܵܐ: ܕܐܹܒܲܛܸܠ ܐܵܘܝܘܼܬ̣ܵܐ ܕܐܝܼܬ̣ ܗ̄ܘܼܵܬ̣ ܒܹܝܬ̣ ܝܑܼܗܘܼܕ݂ܵܐ ܠܝܼܣܪܵܝܹܠ.

¹⁵ܘܐܸܡܲܪ ܠܝܼ ܡܵܪܝܵܐ: ܬܘܼܒ̣ ܣܲܒ̣ ܠܵܟ݂ ܡܵܐܢܹ̈ܐ ܕܪܵܥܝܵܐ ܒܘܿܪܵܐ.

¹⁶ܡܸܛܠ ܕܗܵܐ ܐܸܢܵܐ ܡܩܝܼܡ ܐ̄ܢܵܐ ܪܵܥܝܵܐ ܒܐܲܪܥܵܐ: ܕܐܵܒ̣̈ܕܵܢ ܠܵܐ ܢܸܦܩܘܿܕ݂: ܘܲܕ݂ܛܵـ̈ـܥܝܵܢ ܠܵܐ ܢܸܒ̣ܥܸܐ: ܘܕܲܬ̣ܒ̣ܝܼܪ̈ܵܢ ܠܵܐ ܢܸܥܨܘܿܒ̣: ܘܕܲܟ݂ܪ̈ܝܼܗܵܢ ܠܵܐ ܢܲܐܣܸܐ: ܘܲܕ݂ܩܵܝ̈ܡܵܢ ܠܵܐ ܢܬܲܪܣܸܐ: ܘܒܸܣܪܵܐ ܕܫܲܡܝܼ̈ܢܵܬ̣ܵܐ ܢܹܐܟ݂ܘܿܠ: ܘܲܟ݂ܪ̈ܵܥܲܝܗܹܝܢ ܢܥܲܪܸܩ.

¹⁷ܐܘܿ ܪܵܥܝܵܐ ܒܘܿܪܵܐ: ܕܫܸܒ̣ܩܹ̇ܬ̣ ܥܵـ̈ـܢܵܐ ܥܲܠ ܕܪܵܥܵܟ݂: ܘܥܲܠ ܥܲܝܢܵܟ݂ ܕܝܲܡܝܼܢܵܐ: ܕܪܵܥܵܟ݂ ܕܝܲܡܝܼܢܵܐ ܢܹܐܒܲܫ: ܘܥܲܝܢܵܟ݂ ܕܝܲܡܝܼܢܵܐ ܬܸܣܡܸܐ.