Read Aramaic Peshita Zechariah 12 Bible Online

Zechariah 12 - Aramaic Peshita bible

Zechariah 12

¹ܚܸܙܘܵܐ ܕܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܥܲܠ ܝܑܼܣܪܵܝܹܠ: ܐܵܡܲܪ ܡܵܪܝܵܐ ܕܲܡ̣ܬܲܚ ܫܡܲܝܵܐ ܘܐܲܬ̣ܩܸܢ ܫܲܬ̣ܐ̱ܣܹܝ̈ܗ̇ ܕܐܲܪܥܵܐ: ܘܲܒ̣ܪܵܐ ܪܘܼܚܹܗ ܕܒܲܪܢܵܫܵܐ ܒܓ̣ܵܘܹܗ.

²ܗܵܢܵܐ ܐܸܢܵܐ ܥܵܒܹ̇ܕ݂ ܐ̄ܢܵܐ ܠܵܗ̇ ܠܐܘܿܪܸܫܠܸܡ: ܬܲܪܥܵܐ ܕܲܪܥܵܠܵܐ ܠܟ݂ܠܗܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ ܠܵܗ̇: ܐܵܦ ܥܲܠ ܝܑܼܗܘܼܕ݂ܵܐ ܢܸܗܘܸܐ ܐܘܼܠܨܵܢܵܐ ܥܲܡ ܐܘܿܪܸܫܠܸܡ.

³ܘܢܸܗܘܹܐ ܒܹܗ ܒܝܵܘܡܵܐ ܗܵܘܿ: ܐܸܥܒ̇ܕ݂ܝܼܗ̇ ܠܐܘܿܪܸܫܠܸܡ ܟܹܐܦܵܐ ܕܲܕ݂ܝܵܫܵܐ ܠܟ݂ܠܗܘܿܢ ܥܲܡܡܹ̈ܐ: ܘܟ݂ܠܗܘܿܢ ܕܵܝܘܿܫܹ̈ܝܗ̇ ܡܸܣܬܲܪܵܛܘܼ ܢܸܣܬܲܪܛܘܼܢ: ܘܢܸܬ̣ܟܲܢܫܘܼܢ ܥܠܹܝܗ̇ ܟܠܗܘܿܢ ܥܲܡܡܹ̈ܐ ܕܐܲܪܥܵܐ.

⁴ܒܹܗ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ: ܐܸܡܚܸܐ ܠܟ݂ܠܗܘܿܢ ܪ̈ܲܟ݂ܫܵܗ̇ ܒܬܸܡܗܵܐ: ܘܪ̈ܵܟ݂ܒܲܝܗܘܿܢ ܒܲܬ̣ܘܵܪܵܐ: ܘܥܲܠ ܕܒܹܝܬ̣ ܝܑܼܗܘܼܕ݂ܵܐ ܐܸܦ̮ܬܲܚ ܥܲܝ̈ܢܲܝ: ܘܟ݂ܠܗܘܿܢ ܪ̈ܲܟ݂ܫܵܐ ܕܥܲܡܡܹ̈ܐ ܐܸܡܚܸܐ ܒܲܥܘܵܪܵܐ.

⁵ܘܢܹܐܡܪܘܼܢ ܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ ܒܠܸܒ̇ܗܘܿܢ: ܥܫܸܢ̣ܘ ܡܸܢܲܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܒܡܵܪܝܵܐ ܚܲܝܠܬ̣ܵܢܵܐ ܐܲܠܵܗܗܘܿܢ.

⁶ܒܹܗ ܒܝܵܘܡܵܐ ܗܵܘ̇: ܐܸܥܒܸ̇ܕ݂ ܠܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ: ܐܲܝܟ݂ ܓܡܘܼܪܬܵܐ ܕܢܘܼܪܵܐ ܒܩܲܝ̈ܣܹܐ: ܘܐܲܝܟ݂ ܠܲܡܦܹܝܕ݂ܵܐ ܕܢܘܼܪܵܐ ܒܚܲܒ̇ܬ̣ܵܐ: ܘܢܹܐܟ݂ܠܘܼܢ ܠܝܲܡܝܼܢܵܐ ܘܲܠܣܸܡܵܠܵܐ: ܠܟ݂ܠܗܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ ܠܗܘܿܢ: ܘܬܸܬܸ̇ܒ̣ ܐܘܿܪܸܫܠܸܡ ܬܘܼܒ̣ ܒܕ݂ܘܼܟ̇ܬ̣ܵܗ̇ ܒܐܘܿܪܸܫܠܸܡ.

⁷ܘܢܸܦܩܘܿܕ݂ ܡܵܪܝܵܐ ܠܡܲܫܟ̇ܢܵܐ ܕܲܝܗܘܼܕ݂ܵܐ ܐܲܝܟ݂ ܕܡ̣ܢ ܠܘܼܩܕܲܡ: ܡܸܛܠ ܕܠܵܐ ܬܸܣܓܸ̇ܐ ܬܸܫܒ̇ܘܿܚܬܵܐ ܕܒܹܝܬ̣ ܕܵܘܝܼܕ݂: ܘܬܸܫܒ̇ܘܿܚܬܵܐ ܕܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܥܲܠ ܕܒܹܝܬ̣ ܝܑܼܗܘܼܕ݂ܵܐ.

⁸ܒܹܗ ܒܝܵܘܡܵܐ ܗܵܘ̇ ܢܲܓܸ̇ܢ ܡܵܪܝܵܐ ܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܢܸܗܘܹܐ ܟܪܝܼܗܵܐ ܕܲܒ̣ܗܘܿܢ ܒܝܵܘܡܵܐ ܗܵܘܿ ܐܲܝܟ݂ ܕܵܘܝܼܕ݂: ܘܒܹܝܬ̣ ܕܵܘܝܼܕ݂ ܐܲܝܟ݂ ܐܲܠܵܗܵܐ: ܐܲܝܟ݂ ܡܲܠܲܐܟܹܗ ܕܡܵܪܝܵܐ ܕܲܩܕ݂ܵܡܲܝܗܘܿܢ.

⁹ܘܢܸܗܘܹܐ ܒܹܗ ܒܝܵܘܡܵܐ ܗܵܘܿ: ܐܸܒ̣ܥܸܐ ܠܡܵܘܒܵܕ݂ܘܼ ܠܟ݂ܠܗܘܿܢ ܥܲܡܡܹ̈ܐ ܕܐܵܬܹ̇ܝܢ ܥܲܠ ܐܘܿܪܸܫܠܸܡ.

¹⁰ܘܐܹܫܘܼܕ݂ ܥܲܠ ܕܒܹܝܬ̣ ܕܵܘܝܼܕ݂ ܘܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܪܘܼܚܵܐ ܕܪܘܼܚܵܦܵܐ ܘܲܕ݂ܪܵܚܡܹܐ: ܘܲܢܚܘܼܪܘܼܢ ܠܘܵܬ̣ܝ ܒܡܲܢ ܕܲܕ݂ܩܲܪܘ: ܘܢܲܪܩ̄ܕ݂ܘܼܢ ܥܠܵܘܗܝ ܐܲܝܟ݂ ܕܡܲܪܩܕ݂ܝܼܢ ܥܲܠ ܝܑܼܚܝܼܕ݂ܵܐ: ܘܢܸܬ̇ܬܲܒ̣ܪܘܼܢ ܥܠܵܘܗܝ ܐܲܝܟ݂ ܕܡܸܬ̇ܬܲܒ̣ܪܝܼܢ ܥܲܠ ܒܘܼܟ݂ܪܵܐ.

¹¹ܒܹܗ ܒܝܵܘܡܵܐ ܗܵܘܿ: ܬܸܣܓܸ̇ܐ ܡܲܪܩܘܼܕ̇ܬܵܐ ܒܐܘܿܪܸܫܠܸܡ: ܐܲܝܟ݂ ܡܲܪܩܘܼܕ̇ܬܵܐ ܕܒܲܪ ܐܲܡܘܿܢ ܕܲܒ̣ܦܲܩܥܲܬ̣ ܡܲܓܕ̇ܘܿ.

¹²ܘܬܲܪܩܸܕ݂ ܐܲܪܥܵܐ ܫܲܪ̈ܒ̣ܵܢ ܫܲܪ̈ܒ̣ܵܢ ܐܲܟ݂ܚ̄ܕ݂ܵܐ: ܫܲܪܒ̇ܬ̣ܵܐ ܕܒܹܝܬ̣ ܕܵܘܝܼܕ݂ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ: ܫܲܪܒ̇ܬ̣ܵܐ ܕܒܹܝܬ̣ ܢܵܬ݂ܵܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.

¹³ܫܲܪܒ̇ܬ̣ܵܐ ܕܒܹܝܬ̣ ܠܹܘܝܼ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ: ܘܫܲܪܒ̇ܬ̣ܵܐ ܕܒܹܝܬ̣ ܫܸܡܥܘܿܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.

¹⁴ܟܠܗܹܝܢ ܫܲܪ̈ܒ̣ܵܬ̣ܵܐ ܕܐܸܫܬ̇ܚܲܪ: ܢܲܪ̈ܩ̄ܕ݂ܵܢ ܫܲܪ̈ܒ̣ܵܢ ܫܲܪ̈ܒ̣ܵܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.