Read Aramaic Peshita Zechariah 4 Bible Online

Zechariah 4 - Aramaic Peshita bible

Zechariah 4

¹ܘܲܗܦܲܟ݂ ܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܘܐܲܥܝܼܪܲܢܝ ܐܲܝܟ݂ ܓܲܒ̣ܪܵܐ ܕܡܸܬ̇ܬ̇ܥܝܼܪ ܡ̣ܢ ܫܸܢܬܹܗ.

²ܘܐܸܡܲܪ ܠܝܼ ܡܵܢܵܐ ܚ̣ܙܲܝܬ̇: ܘܐܸܡ̇ܪܹܬ̣ ܚ̇ܙܹܝܬ̣ ܡܢܵܪܬܵܐ ܕܕܲܗܒ̣ܵܐ: ܘܟܲܦܬ̣ܵܐ ܥܲܠ ܪܹܫܵܗ̇: ܘܫܲܒ̣ܥܵܐ ܫܪ̈ܵܓ̣ܝܼܢ ܥܠܹܝܗ̇: ܘܫܲܒ̣ܥܵܐ ܫܲܒ̣ܥܵܐ ܦܘܼܡ̈ܝܼܢ ܠܲܫܪܵܓ̣ܵܐ ܕܐܝܼܬ̣ ܒܪܹܫܵܗ̇.

³ܘܲܬ̣ܪܹܝܢ ܙܲܝܬ̇ܝܼ̈ܢ ܐܝܼܬ̣ ܥܠܹܝܗ̇: ܚܲܕ݂ ܡ̣ܢ ܝܲܡܝܼܢܵܗ̇ ܕܟܲܦܬ̣ܵܐ ܘܚܲܕ݂ ܡ̣ܢ ܣܸܡܵܠܵܗ̇.

⁴ܘܲܥܢܹ̇ܝܬ̣ ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܡܵܢܵܐ ܐܸܢܘܿܢ ܗܵܠܹܝܢ ܡܵܪܝ.

⁵ܥܢ̣ܵܐ ܡܲܠܲܐܟ݂ܵܐ ܕܲܡܡܲܠܸܠ ܒܝܼ ܘܐܸܡ̣ܲܪ ܠܝܼ: ܠܵܐ ܝܵܕܲܥ ܐܲܢ̄ܬ̇ ܡܵܢܵܐ ܐܸܢܘܿܢ ܗܵܠܹܝܢ: ܘܐܸܡ̇ܪܹܬ̣ ܠܵܐ ܝܵܕܲܥ ܐ̄ܢܵܐ ܡܵܪܝ.

⁶ܘܐܸܡ̣ܲܪ ܠܝܼ: ܗܵܢܵܘ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܘܼܪܒܵܒܹܠ: ܠܵܐ ܒܚܲܝܠܵܐ ܘܠܵܐ ܒܥܘܼܫܢܵܐ: ܐܸܠܵܐ ܐܸܢ ܒܪܘܼܚ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

⁷ܡܵܢܵܐ ܐܲܢ̄ܬ̇ ܛܘܼܪܵܐ ܪܲܒܵܐ ܩܕ݂ܵܡ ܙܘܼܪܒܵܒܹܠ: ܐܸܠܵܐ ܐܲܝܟ݂ ܦܩܲܥܬ̣ܵܐ: ܘܐܲܦܸܩ ܠܟܹܐܦܵܐ ܪܹܫܵܝܬܵܐ ܕܫܲܘܝܘܼܬ̣ܵܐ ܘܲܕ݂ܪ̈ܲܚܡܹܐ.

⁸ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

⁹ܐܝܼܕ݂ܵܘ̈ܗܝ ܕܙܘܼܪܒܵܒܹܠ ܣܵܡ̣ ܫܲܬ̣ܐ̱ܣܵܘ̈ܗܝ ܕܒܲܝܬܵܐ ܗܵܢܵܐ: ܘܐܝܼܕ݂ܵܘ̈ܗܝ ܡܫܲܠ̈ܡܵܢ ܠܹܗ: ܘܬܸܕ̇ܥܘܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ ܠܘܵܬ̣ܟ݂ܘܿܢ.

¹⁰ܡܸܛܠ ܕܡܲܢ̣ܘܼ ܫܵܐܹ̇ܛ ܠܝܵܘ̈ܡܵܬ̣ܵܐ ܙܥܘܿܪܹ̈ܐ: ܘܲܢܚܘܼܪܘܼܢ ܘܢܸܚܙܘܿܢ ܠܟܹܐܦܵܐ ܕܦܘܼܪܫܵܢܵܐ ܒܐܝܼܕ݂ܵܘ̈ܗܝ: ܕܙܘܼܪܒܵܒܹܠ: ܗܵܠܹܝܢ ܐܸܢܹܝܢ ܫܒܲܥ ܥܲܝܢܵܘ̈ܗܝ ܕܡܵܪܝܵܐ ܕܚܵܝܪ̈ܵܢ ܒܟ݂ܠܵܗ̇ ܐܲܪܥܵܐ.

¹¹ܥ̇ܢܹܝܬ̣ ܘܐܸܡ̇ܪܹܬ̣ ܠܹܗ: ܘܡܵܢܵܐ ܐܸܢܘܿܢ ܗܵܠܹܝܢ ܬܪܹܝܢ ܙܲܝܬ̇ܝܼ̈ܢ: ܕܡ̣ܢ ܝܲܡܝܼܢܵܗ̇ ܕܟܲܦܬ̣ܵܐ ܘܡ̣ܢ ܣܡܵܠܵܗ̇.

¹²ܥܢܹ̇ܝܬ̣ ܕܬܲܪܬܹ̇ܝܢ ܙܲܒ̣ܢ̈ܝܼܢ ܘܐܸܡ̇ܪܹܬ̣ ܠܹܗ: ܘܡܵܢܵܐ ܐܸܢܹܝܢ ܗܵܠܹܝܢ ܬܲܧܬܹ̇ܝܢ ܣܵܘ̈ܟܹ̇ܐ ܕܙܲܝܬܵܐ: ܕܒܲܝܢܵܬ̣ ܬܪܹܝܢ ܢܚܝܼܪ̈ܝܼܢ ܕܕܲܗܒ̣ܵܐ: ܕܢܵܣܟ̇ܝܼܢ ܡܸܢܗܘܿܢ ܕܲܗܒ̣ܵܐ.

¹³ܘܐܸܡܲܪ ܠܝܼ: ܝܵܕܲܥ ܐܲܢ̄ܬ̇ ܡܵܢܵܐ ܐܸܢܘܿܢ ܗܵܠܹܝܢ: ܘܐܸܡ̇ܪܹܬ̣ ܠܵܐ ܡܵܪܝ.

¹⁴ܘܐܸܡܲܪ ܠܝܼ ܗܵܠܹܝܢ ܐܸܢܘܿܢ ܬܪܹܝܢ ܒܢܲܝ̈ ܕܘܼܗܵܢܵܐ: ܕܩܵܝ̇ܡܝܼܢ ܩܕ݂ܵܡ ܡܵܪܵܐ ܕܟ݂ܠܵܗ̇ ܐܲܪܥܵܐ.