Read Aramaic Peshita Zechariah 6 Bible Online

Zechariah 6 - Aramaic Peshita bible

Zechariah 6

¹ܘܗܸܦܟܹ̇ܬ̣ ܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܐܲܪܒܲܥ ܡܲܪ̈ܟ̇ܒ̣ܵܢ ܢܵܦ̈ܩܵܢ ܡ̣ܢ ܒܲܝܢܵܬ̣ ܬܪܹܝܢ ܛܘܼܪ̈ܝܼܢ: ܘܛܘܼܪܹ̈ܐ ܗܵܢ̇ܘܿܢ ܛܘܼܪܹ̈ܐ ܐܸܢܘܿܢ ܕܲܢܚܵܫܵܐ.

²ܒܡܲܪܟ݂ܒ̣ܬ̣ܵܐ ܩܲܕ݂ܡܵܝܬܵܐ ܪ̈ܲܟ݂ܫܵܐ ܣܘܼܡܵܩܹ̈ܐ: ܘܲܒ̣ܡܲܪܟܲܒ̣ܬ̣ܵܐ ܕܬܲܪܬܹ̇ܝܢ ܪ̈ܲܟ݂ܫܵܐ ܐܘܼܟܵܡܹ̈ܐ.

³ܘܲܒ̣ܡܲܪܟܲܒ̣ܬ̣ܵܐ ܕܲܬ̣ܠܵܬ̣ ܪ̈ܲܟ݂ܫܵܐ ܚܸܘܵܪܹ̈ܐ: ܘܲܒ̣ܡܲܪܟܲܒ̣ܬ̣ܵܐ ܕܐܲܪܒܲܥ ܪ̈ܲܟ݂ܫܵܐ ܐܘܼܪ̈ܵܓܹܐ.

⁴ܘܲܥܢܹ̇ܝܬ̣ ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܡܵܢܵܐ ܐܸܢܘܿܢ ܗܵܠܹܝܢ ܡܵܪܝ.

⁵ܥܢ̣ܵܐ ܡܲܠܲܐܟ݂ܵܐ ܘܐܸܡܲܪ ܠܝܼ: ܗܵܠܹܝܢ ܐܸܢܹܝܢ ܐܲܪܒܲܥ ܪ̈ܘܼܚܲܝ ܫܡܲܝܵܐ: ܕܩܵܝ̈ܡܵܢ ܗ̄ܘܲܝ̈ ܩܕ݂ܵܡ ܡܵܪܵܐ ܕܟ݂ܠܵܗ̇ ܐܲܪܥܵܐ.

⁶ܕܐܝܼܬ̣ ܒܵܗ̇ ܪ̈ܲܟ݂ܫܵܐ ܐܘܼܟܵܡܹ̈ܐ: ܢܵܦ̇ܩܝܼܢ ܠܐܲܪܥܵܐ ܕܓܲܪܒ̇ܝܵܐ: ܘܚܸܘܵܪܹ̈ܐ ܢܵܦ̇ܩܝܼܢ ܒܵܬܲܪܗܘܿܢ: ܘܐܘܼܪ̈ܵܓܹܐ ܢܵܦ̇ܩܝܼܢ ܠܐܲܪܥܵܐ ܕܬܲܝܡ̄ܢܵܐ.

⁷ܘܣܘܼܡܵܩܹ̈ܐ ܢܦܲܩ̣ܘ: ܘܲܒ̣ܥܵܘ ܠܡܹܐܙܲܠ ܠܲܡܗܲܠܵܟ݂ܘܼ ܒܐܲܪܥܵܐ: ܘܐܸܡܲܪ ܠܗܘܿܢ ܙܸܠܘ ܗܲܠܸܟ݂ܘ ܒܐܲܪܥܵܐ: ܘܗܲܠܸܟ݂ܘ ܒܐܲܪܥܵܐ.

⁸ܘܲܩܥ̣ܵܐ ܘܐܸܡܲܪ ܠܝܼ: ܚܙܝܼ ܗܵܠܹܝܢ ܕܢܵܦ̇ܩܝܼܢ ܠܐܲܪܥܵܐ ܕܓܲܪܒ̇ܝܵܐ: ܘܲܡܢܝܼܚܝܼܢ ܪܘܼܚܝ ܒܐܲܪܥܵܐ ܕܓܲܪܒ̇ܝܵܐ.

⁹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁰ܣܲܒ̣ ܡ̣ܢ ܫܒ̣ܝܼܬ̣ܵܐ: ܡ̣ܢ ܚܘܼܠܕ̇ܝܼ: ܘܡ̣ܢ ܛܘܿܒ̇ܝܼܵܐ: ܘܡ̣ܢ ܝܑܼܕܲܥܝܵܐ: ܘܬ̣ܵܐ ܒܝܵܘܡܵܐ ܗܵܘܿ: ܘܥܘܿܠ ܠܒܹܝܬ̣ ܝܘܿܫܝܼܵܐ ܒܲܪ ܨܦܲܢܝܵܐ ܕܐܸܬ̣ܵܐ ܡ̣ܢ ܒܵܒܹܠ.

¹¹ܣܲܒ̣ ܣܹܐܡܹܗ ܘܕܲܗܒܹܗ: ܘܲܥܒܸܕ݂ ܟܠܝܼܠܵܐ: ܘܣܝܼܡ ܒܪܹܫܹܗ ܕܝܼܫܘܿܥ ܒܲܪ ܝܘܿܙܵܕ݂ܵܩ ܟܵܗܢܵܐ ܪܲܒܵܐ.

¹²ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܓܲܒ̣ܪܵܐ ܘܲܫܡܹܗ ܕܸܢܚܵܐ: ܘܡ̣ܢ ܠܬܲܚܬ̇ ܢܸܕ݂ܢܲܚ.

¹³ܘܗ̤ܘ ܢܸܒ̣ܢܸܐ ܗܲܝܟ̇ܠܹܗ ܕܡܵܪܝܵܐ: ܘܗ̤ܘ ܢܩܲܒܸ̇ܠ ܫܘܼܒ̣ܚܵܐ: ܘܢܸܬܸ̇ܒ̣ ܘܢܸܫܬܲܠܲܛ ܥܲܠ ܟܘܼܪܣܝܹܗ: ܘܢܸܗܘܹܐ ܟܵܗܢܵܐ ܥܲܠ ܟܘܼܪܣܝܹܗ: ܘܡܸܠܟܵܐ ܕܲܫܠܵܡܵܐ ܢܸܗܘܹܐ ܒܹܝܬ̣ ܬܪ̈ܲܝܗܘܿܢ.

¹⁴ܘܲܟ݂ܠܝܼܠܵܐ ܢܸܗܘܹܐ ܠܚܘܼܠܕ̇ܝܼ ܘܲܠܛܘܼܒ̇ܝܼܵܐ ܘܠܝܼܕܲܥܝܵܐ: ܘܲܠܝܵܘܫܝܼܵܐ ܒܲܪ ܨܦܲܢܝܵܐ ܠܕ݂ܘܼܟ݂ܪܵܢܵܐ ܒܗܲܝܟ̇ܠܹܗ ܕܡܵܪܝܵܐ.

¹⁵ܘܢܹܐܬ̣ܘܿܢ ܪ̈ܲܚܝܼܩܹܐ ܘܢܸܒ̣ܢܘܿܢ ܗܲܝܟ̇ܠܹܗ ܕܡܵܪܝܵܐ: ܘܬܸܕ̇ܥܘܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ ܠܘܵܬ̣ܟ݂ܘܿܢ: ܐܸܢ ܬܸܫ̱ܡܥܘܼܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ.