Read Aramaic Peshita Zechariah 7 Bible Online

Zechariah 7 - Aramaic Peshita bible

Zechariah 7

¹ܘܲܗܘ̤ܵܐ ܒܲܫܢܲܬ̣ ܐܲܪܒܲܥ ܕܕܲܪܝܵܘܵܫ ܡܲܠܟܵܐ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ: ܒܐܲܪܒܲܥܬ̣ܵܐ ܒܝܲܪܚܵܐ ܕܬܸܫܥܵܐ ܕܗ̤ܘ ܟܵܢܘܿܢ.

²ܘܫܲܕܲܪ ܠܒܹܝܬ̣ ܐܹܝܠ: ܠܫܵܪܵܐܨܵܪ ܘܪܲܒ̇ܡܵܓ̣: ܘܲܫܠܲܚ ܡܲܠܟܵܐ ܘܓܲܢ̄ܒܵܪ̈ܵܘܗܝ ܠܲܡܨܲܠܵܝܘܼ ܥܠܵܘܗܝ ܩܕ݂ܵܡ ܡܵܪܝܵܐ.

³ܘܲܠܡܹܐܡܲܪ ܠܟ݂ܵܗ̈ܢܹܐ ܕܲܒ̣ܒܲܝܬܹ̇ܗ ܕܡܵܪܝܵܐ ܚܲܝܠـܬ̣ܵܢܵܐ: ܘܠܲܢܒ̣ܝܹ̈ܐ: ܐܸܒ̣ܟܸ̇ܐ ܒܝܲܪܚܵܐ ܚܡܝܼܫܵܝܵܐ ܐܵܘ ܐܸܬ̣ܢ̱ܙܲܪ: ܐܲܝܟ݂ ܡܵܐ ܕܥܵܒܹ̇ܕ݂ ܗ̄ܘܹܝܬ̣ ܗܵܐ ܟܡܵܐ ܫܢ̈ܝܼܢ.

⁴ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

⁵ܐܸܡܲܪ ܠܟ݂ܠܹܗ ܥܲܡܵܐ ܕܐܲܪܥܵܐ ܘܲܠܟ݂ܵܗܢܹ̈ܐ: ܕܨܵܡ̣ܬ̇ܘܿܢ ܘܐܲܪܩܸܕ̇ܬ̇ܘܿܢ ܒܝܲܪܚܵܐ ܚܡܝܼܫܵܝܵܐ ܘܲܫܒ̣ܝܼܥܵܝܵܐ: ܗܵܐ ܫܲܒ̣ܥܝܼܢ ܫ̈ܢܝܼܢ: ܕܲܠܡܵܐ ܨܵܘܡܵܐ ܨܵܡ̣ܬ̇ܘܿܢ ܠܝܼ.

⁶ܘܐܸܢ ܐܵܟ݂ܠܝܼܢ ܐ̄ܢ̇ܬ̇ܘܿܢ ܘܫܵܬܹ̇ܝܢ: ܘܠܵܐ ܗ̄ܘܼܵܐ ܐܲܢ̄ܬ̇ܘܿܢ ܐܵܟ݂ܠܝܼܢ ܘܫܵܬܹ̇ܝܢ.

⁷ܗܵܠܹܝܢ ܐܸܢܹܝܢ ܡܸܠܹ̈ܐ ܕܐܲܟ݂ܪܸܙ ܡܵܪܝܵܐ ܒܐܝܼܕ݂ܵܐ ܕܲܢܒ̣ܝܹ̈ܐ ܩܲܕ݂ܡܵܝܹ̈ܐ: ܟܲܕ݂ ܝܵܬ̣ܒܵܐ ܗ̄ܘܼܵܬ̣ ܐܘܿܪܸܫܠܸܡ ܘܫܲܠܝܵܐ: ܘܩܘܼܪ̈ܝܵܐ ܚܕ݂ܝܼܪ̈ܵܢ ܠܵܗ̇: ܘܛܘܼܪܹ̈ܐ ܘܦܲܩ̈ܥܵܬ̣ܵܐ ܝܵܬ̣ܒ̇ܝܼܢ ܗ̄ܘܼܵܘ.

⁸ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ ܠܡܹܐܡܲܪ.

⁹ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܕܝܼܢܵܐ ܕܩܘܼܫܬܵܐ ܕܘܼܢܝ: ܘܛܲܝܒ̇ܘܼܬ̣ܵܐ ܘܪ̈ܲܚܡܹܐ ܥܒܸܕ݂ܘ ܐ̄ܢܵܫ ܥܲܡ ܐܲܚܘܼܗܝ.

¹⁰ܘܠܲܐܪ̈ܡܠܵܬ̣ܵܐ ܘܲܠܝܲܬ̣ܡܹ̈ܐ: ܘܲܠܡܸܣܟܹ̇ܢܹ̈ܐ: ܘܠܲܕ݂ܡܸܬ̣ܦ̄ܢܸܐ ܠܘܵܬ̣ܝ ܠܵܐ ܬܸܥܠ̱ܒ̣ܘܼܢ: ܘܠܵܐ ܬܸܛܠ̱ܡܘܼܢ: ܘܒ̣ܝܼܫܬܵܐ ܓܒܲܪ ܥܲܠ ܐܲܚܘܼܗܝ ܠܵܐ ܬܸܬ̣ܚܲܫܒ̣ܘܼܢ ܒܠܸܒ̇ܟ݂ܘܿܢ.

¹¹ܘܠܵܐ ܨܒ̣ܵܘ ܠܡܸܫ̱ܡܥܲܢܝ: ܘܲܥ̣ܒܲܕ݂ܘ ܟܲܬ̣ܦܗܘܿܢ ܡܵܪܘܿܕ̇ܬܵܐ: ܘܐܸܕ݂ܢܲܝ̈ܗܘܿܢ ܣܲܟܲܪܘ ܕܠܵܐ ܢܸܫ̱ܡܥܘܿܢ.

¹²ܘܠܸܒ̇ܗܘܿܢ ܥ̣ܒܲܕ݂ܘ ܐܲܝܟ݂ ܫܵܡܝܼܪܵܐ: ܕܠܵܐ ܢܸܫ̱ܡܥܘܼܢ ܢܵܡܘܿܣܹ̈ܐ ܘܦܘܼܩ̈ܕܵܢܹܐ: ܕܫܲܕܲܪ ܡܵܪܝܵܐ ܚܲܝܠܬ̣ܵܢܵܐ ܒܪܘܼܚܹܗ ܒܝܲܕ݂ ܢܒ̣̈ܝܹܐ ܩܲܕ݂ܡܵܝܹ̈ܐ: ܘܲܗܘ̤ܵܐ ܪܘܼܓ̣ܙܵܐ ܪܲܒܵܐ ܡ̣ܢ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ.

¹³ܥܲܠ ܕܲܩܪܹܝ̇ܬ̣ ܐܸܢܘܿܢ ܘܠܵܐ ܫܡܲܥ̣ܘ: ܗܵܟܲܢܵܐ ܢܸܩܪܘܿܢܵܢܝ ܘܠܵܐ ܐܸܫܡܲܥ ܐܸܢܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

¹⁴ܘܐܹܒܲܕܲܪ ܐܸܢܘܿܢ ܒܟ݂ܠܗܘܿܢ ܥܲܡܡܹ̈ܐ ܕܠܵܐ ܝܑܼܕܲܥ̣ܘ ܐܸܢܘܿܢ: ܘܐܲܪܥܵܐ ܬܸܨܕܹ̇ܐ ܒܵܬܲܪܗܘܿܢ ܡ̣ܢ ܒܠܲܝ ܕܥܵܒܲܪ ܘܲܕ̇ܬ̣ܵܐܹܒ̣: ܥܲܠ ܕܲܥ̣ܒܲܕ݂ܘ ܐܲܪܥܵܐ ܕܪܸܓ̇ܬ̣ܵܐ ܠܚܘܼܪܒܵܐ.