Read Aramaic Peshita Zechariah 9 Bible Online

Zechariah 9 - Aramaic Peshita bible

Zechariah 9

¹ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܲܪܥܵܐ ܕܚܸܕ݂ܪܵܟ݂. ܘܲܕ̇ܕܲܪܡܣܘܿܩ ܩܘܼܪܒܵܢܹܗ: ܡܸܛܠ ܕܲܠܡܵܪܝܵܐ ܓܠܹܝܢ ܒܢܲܝ̈ܢܵܫܵܐ: ܘܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ.

²ܐܵܦ ܚܡܵܬ̣ ܬܸܬܲܚܲܡ ܒܵܗ̇: ܘܨܘܿܪ ܘܨܲܝܕܵܢ ܕܛܵܒ̣ ܐܸܬ̣ܚܲܟܲܡ.

³ܘܲܒ̣ܢܵܬ̤ ܠܵܗ̇ ܨܘܿܪ ܚܸܣܢܵܐ: ܘܟܲܢܫܲܬ̤ ܣܹܐܡܵܐ ܐܲܝܟ݂ ܥܲܦܪܵܐ: ܘܕܲܗܒ̣ܵܐ ܐܲܝܟ݂ ܣܝܵܢܵܐ ܕܫܘܼܩܹ̈ܐ.

⁴ܡܸܛܠ ܗܵܢܵܐ ܡܵܪܝܵܐ ܢܵܘܒ̇ܕ݂ܝܼܗ̇: ܘܢܲܪܡܸܐ ܒܝܲܡܵܐ ܥܘܼܬ̣ܪܵܗ̇: ܘܗ̤ܝ ܒܢܘܼܪܵܐ ܬܸܬ̣ܐ̱ܟ݂ܠ.

⁵ܘܬܸܚܙܹܐ ܐܲܫܩܵܠܘܿܢ ܘܬܸܕ݂ܚܲܠ: ܘܥܵܐܙܵܐ ܬܸܬ̣ܟ̇ܪܲܗ ܛܵܒ̣: ܘܥܸܩܪܘܿܢ ܕܲܒ̣ܗܸܬ̣ ܠܹܗ ܣܲܒ̣ܪܵܗ̇: ܘܢܹܐܒܲܕ݂ ܡܲܠܟܵܐ ܡ̣ܢ ܥܵܐܙܵܐ: ܘܐܲܫܩܵܠܘܿܢ ܠܵܐ ܬܸܬܸ̇ܒ̣.

⁶ܘܢܸܬ̇ܒ̣ܘܼܢ ܢܘܼܟ݂ܪ̈ܵܝܹܐ ܒܐܲܫܕ̇ܘܿܕ݂: ܘܐܵܘܒܸ̇ܕ݂ ܓܲܐܝܘܼܬ̣ܗܘܿܢ ܕܲܦܠܸܫܬܵܝܹ̈ܐ.

⁷ܘܐܲܥܒܲܪ ܕܸܡܗܘܿܢ ܡ̣ܢ ܦܘܼܡܗܘܿܢ: ܘܛܲܢܦܘܼܬ̣ܗܘܿܢ ܡ̣ܢ ܒܹܝܬ̣ ܫܸܢܲܝ̈ܗܘܿܢ: ܘܢܸܫܬܲܚܪܘܿܢ ܐܵܦ ܗܸܢܘܿܢ ܠܐܲܠܵܗܵܐ: ܘܢܸܗܘܘܿܢ ܐܲܝܟ݂ ܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ: ܘܥܸܩܪܘܿܢ ܬܸܗܘܹܐ ܐܲܝܟ݂ ܥܸܒ̣ܪܘܿܢ.

⁸ܘܐܲܫܪܸܐ ܥܲܠ ܒܲܝܬ̇ܝ ܩܲܝܘܼܡܵܐ ܡ̣ܢ ܡܲܢ ܕܥܵܒܲܪ: ܘܡ̣ܢ ܕܬ̣ܵܐܹ̇ܒ̣: ܘܠܵܐ ܢܸܥܒܲܪ ܬܘܼܒ̣ ܥܠܲܝܗܘܿܢ ܡܫܲܥܒ̇ܕ݂ܵܢܵܐ: ܡܸܛܠ ܕܗܵܫܵܐ ܚܙܹ̇ܝܬ̣ ܒܥܲܝܢܲܝ̈.

⁹ܕܘܼܨܝ ܛܵܒ̣ ܒܲܪܬ̣ ܨܸܗܝܘܿܢ: ܘܲܩܥܵܝ ܒܲܪܬ̣ ܐܘܿܪܸܫܠܸܡ: ܗܵܐ ܡܲܠܟܹ̇ܟ݂ܝ ܐܵܬܹ̇ܐ ܠܹܟ݂ܝ: ܙܲܕ̇ܝܼܩܵܐ: ܘܦܵܪܘܿܩܵܐ: ܘܡܲܟ̇ܝܼܟ݂ܵܐ: ܘܲܪܟ݂ܝܼܒ̣ ܥܲܠ ܚܡܵܪܵܐ: ܘܥܲܠ ܥܝܼܠܵܐ ܒܲܪ ܐܲܬܵܢܵܐ.

¹⁰ܘܢܵܘܒܸ̇ܕ݂ ܡܲܪܟܲܒ̣ܬ̣ܵܐ ܡ̣̤ܢ ܐܲܦܪܹܝܡ: ܘܣܘܼܣܝܵܐ ܡ̣ܢ ܐܘܿܪܸܫܠܸܡ: ܢܸܬ̣ܒܲܪ ܩܸܫܬܵܐ ܒܲܩܪܵܒ̣ܵܐ: ܘܲܢܡܲܠܸܠ ܫܠܵܡܵܐ ܥܲܡ ܥܲܡܡܹ̈ܐ: ܘܢܸܫܠܲܛ ܡ̣ܢ ܝܲܡܵܐ ܠܝܲܡܵܐ: ܘܡ̣ܢ ܢܲܗܪܵܐ ܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ.

¹¹ܘܐܵܦ ܐܲܢ̄ܬ̇ ܒܲܕ݂ܡܵܐ ܕܲܕ݂ܝܵܬܹܩܹܐ ܕܝܼܠܵܟ݂: ܫ̣ܪܲܝܬ̇ ܐܲܣܝܼܪܹ̈ܐ ܡ̣ܢ ܓܘܼܒܵܐ ܕܠܲܝܬ̇ ܒܹܗ ܡܲـ̈ـܝܵܐ.

¹²ܬܸܒ̣ܘ ܒܚܸܣܢܵܐ ܐܲܣܝܼܪܹ̈ܐ ܕܲܟ݂ܢܘܼܫܬܵܐ: ܘܲܚܠܵܦ ܚܲܕ݂ ܢܘܿܡ ܬܪܹܝܢ ܦܵܪܲܥ ܐ̄ܢܵܐ ܠܟ݂ܘܿܢ.

¹³ܡܸܛܠ ܕܡܸܬ̣ܚܹ̇ܬ̣ ܩܸܫܬ̇ܝ ܥܲܠ ܝܑܼܗܘܼܕ݂ܵܐ: ܘܲܡܠܹܝܬ̣ ܥܲܠ ܐܲܦܪܹܝܡ: ܘܲܫܕܹܝ̇ܬ̣ ܒܢܲܝ̈ܟ̇ܝ ܨܸܗܝܘܿܢ ܥܲܠ ܒܢܲܝ̈ܟ̇ܝ ܝܵܘܵܢ: ܘܲܥܒܲܕ̇ܬܵܟ݂ ܐܲܝܟ݂ ܣܲܝܦܵܐ ܕܓܲܢ̄ܒܵܪܵܐ.

¹⁴ܘܡܵܪܝܵܐ ܥܠܲܝܗܘܿܢ ܢܸܬ̣ܓ̇ܠܹܐ: ܘܢܸܦܘܿܩ ܓܹܐܪܹܗ ܐܲܝܟ݂ ܒܲܪܩܵܐ: ܘܡܵܪܹܐ ܡܵܪ̈ܵܘܵܬ̣ܵܐ ܢܸܩܪܸܐ ܒܩܲܪܢܵܐ: ܘܢܹܐܙܲܠ ܒܥܲܠܥܵܠܵܐ ܠܬܲܝܡ̄ܢܵܐ.

¹⁵ܘܡܵܪܝܵܐ ܚܲܝܠܬ̣ܵܢܵܐ ܢܲܓܸ̇ܢ ܥܠܲܝܗܘܿܢ: ܘܢܹܐܟ݂ܠܘܼܢ ܘܢܸܟ݂ܒ̇ܫܘܼܢ ܟܹܐܦܹ̈ܐ ܒܩܸܠܥܵܐ: ܘܢܸܫܬ̇ܘܿܢ ܕܠܘܼܚܝܵܐ ܐܲܝܟ݂ ܚܲܡܪܵܐ: ܘܢܸܬ̣ܡ̱ܠܘܿܢ ܐܲܝܟ݂ ܡܙܵܓ̣ܵܐ ܘܐܲܝܟ݂ ܙܵܘܝܼܬ̣ܵܐ ܕܡܲܕ݂ܒ̇ܚܵܐ.

¹⁶ܘܢܸܦܪܘܿܩ ܐܸܢܘܿܢ ܡܲܪܝܵܐ ܐܲܠܵܗܗܘܿܢ ܒܝܵܘܡܵܐ ܗܵܘܿ ܠܥܲܡܹܗ ܐܲܝܟ݂ ܥܵـ̈ـܢܵܐ: ܡܸܛܠ ܕܟܹܐܦܹ̈ܐ ܗ̄ܘܲܝ̈ ܩܲܕ̇ܝܼ̈ܫܵܬ̣ܵܐ ܕܫܲܕ݂̈ܝܵܢ ܗ̄ܘܲܝ̈ ܒܐܲܪܥܹܗ.

¹⁷ܡܵܐ ܛܵܒ̣ ܘܡܵܐ ܫܲܦܝܼܪ ܥܒ̣ܘܼܪܵܐ ܠܓܕ̇ܘܼ̈ܕܹܐ ܘܚܲܡܪܵܐ ܡܒܲܣܸܡ ܒܬ̣ܘܼ̈ܠܵܬ̣ܵܐ.