Read Aramaic Peshita Matthew 1 Bible Online

Matthew 1 - Aramaic Peshita bible

Matthew 1

¹ܟܬ݂ܵܒ݂ܵܐ ܕܝܼܠܝܼܕ݂ܘܼܬܹܗ ܕܝܼܫܘܿܥ ܡܫܝܼܚܵܐ: ܒܪܹܗ ܕܕ݂ܵܘܝܼܕ݂ ܒܪܹܗ ܕܐܲܒ݂ܪܵܗܵܡ.

²ܐܲܒ݂ܪܵܗܵܡ ܐܲܘܠܸܕ݂ ܠܐܝܼܣܚܵܩ. ܐܝܼܣܚܵܩ ܐܲܘܠܸܕ݂ ܠܝܲܥܩܘܿܒ݂. ܝܲܥܩܘܿܒ݂ ܐܲܘܠܸܕ݂ ܠܝܼܗܘܼܕ݂ܵܐ ܘܠܲܐܚܵܘ̈ܗܝ.

³ܝܼܗܘܼܕ݂ܵܐ ܐܲܘܠܸܕ݂ ܠܦܲܪܨ ܘܲܠܙܲܪܚ ܡܸܢ ܬܵܡܵܪ. ܦܲܪܨ ܐܲܘܠܸܕ݂ ܠܚܸܨܪܘܿܢ. ܚܸܨܪܘܿܢ ܐܲܘܠܸܕ݂ ܠܐܵܪܵܡ.

⁴ܐܵܪܵܡ ܐܲܘܠܸܕ݂ ܠܥܲܡܝܼܢܵܕ݂ܵܒ݂. ܥܲܡܝܼܢܵܕ݂ܵܒ݂ ܐܲܘܠܸܕ݂ ܠܢܲܚܫܘܿܢ. ܢܲܚܫܘܿܢ ܐܲܘܠܸܕ݂ ܠܣܲܠܡܘܿܢ.

⁵ܣܲܠܡܘܿܢ ܐܲܘܠܸܕ݂ ܠܒ݂ܵܥܵܙ ܡܸܢ ܪܵܚܵܒ݂. ܒܵܥܵܙ ܐܲܘܠܸܕ݂ ܠܥܘܿܒ݂ܝܼܕ݂ ܡܸܢ ܪܥܘܿܬ݂. ܥܘܿܒ݂ܝܼܕ݂ ܐܲܘܠܸܕ݂ ܠܐܝܼܫܲܝ.

⁶ܐܝܼܫܲܝ ܐܲܘܠܸܕ݂ ܠܕ݂ܵܘܝܼܕ݂ ܡܲܠܟܵܐ. ܕܵܘܝܼܕ݂ ܐܲܘܠܸܕ݂ ܠܲܫܠܹܝܡܘܿܢ ܡܸܢ ܐܲܢܬܬܹܗ ܕܐܘܪܝܼܵܐ.

⁷ܫܠܹܝܡܘܿܢ ܐܲܘܠܸܕ݂ ܠܲܪܚܸܒ݂ܥܲܡ. ܪܚܸܒ݂ܥܲܡ ܐܲܘܠܸܕ݂ ܠܐܵܒ݂ܝܼܵܐ. ܐܲܒ݂ܝܼܵܐ ܐܲܘܠܸܕ݂ ܠܐܵܣܵܐ.

⁸ܐܵܣܵܐ ܐܲܘܠܸܕ݂ ܠܝܵܗܘܼܫܵܦܵܛ. ܝܵܗܘܼܫܵܦܵܛ ܐܲܘܠܸܕ݂ ܠܝܘܼܪܵܡ. ܝܘܼܪܵܡ ܐܲܘܠܸܕ݂ ܠܥܘܿܙܝܼܵܐ.

⁹ܥܘܿܙܝܼܵܐ ܐܲܘܠܸܕ݂ ܠܝܘܼܬ݂ܵܡ. ܝܘܼܬ݂ܵܡ ܐܲܘܠܸܕ݂ ܠܐܵܚܵܙ. ܐܵܚܵܙ ܐܲܘܠܸܕ݂ ܠܚܹܙܲܩܝܵܐ.

¹⁰ܚܹܙܲܩܝܵܐ ܐܲܘܠܸܕ݂ ܠܲܡܢܲܫܹܐ. ܡܢܲܫܹܐ ܐܲܘܠܸܕ݂ ܠܐܲܡܘܿܢ. ܐܲܡܘܿܢ ܐܲܘܠܸܕ݂ ܠܝܘܼܫܝܼܵܐ.

¹¹ܝܘܼܫܝܼܵܐ ܐܲܘܠܸܕ݂ ܠܝܘܼܟܲܢܝܵܐ ܘܠܲܐܚܵܘ̈ܗܝ ܒܓ݂ܵܠܘܼܬ݂ܵܐ ܕܒ݂ܵܒܹܠ.

¹²ܡܸܢ ܒܵܬܲܪ ܓܵܠܘܼܬ݂ܵܐ ܕܹܝܢ ܕܒ݂ܵܒܹܠ: ܝܘܼܟܲܢܝܵܐ ܐܲܘܠܸܕ݂ ܠܫܸܠܬ݂ܐܹܝܠ. ܫܸܠܬ݂ܐܹܝܠ ܐܲܘܠܸܕ݂ ܠܙܘܼܪܒܵܒܹܠ.

¹³ܙܘܼܪܒܵܒܹܠ ܐܲܘܠܸܕ݂ ܠܐܲܒ݂ܝܼܘܼܕ݂. ܐܲܒ݂ܝܼܘܼܕ݂ ܐܲܘܠܸܕ݂ ܠܐܸܠܝܵܩܝܼܡ. ܐܸܠܝܵܩܝܼܡ ܐܲܘܠܸܕ݂ ܠܥܵܙܘܿܪ.

¹⁴ܥܵܙܘܿܪ ܐܲܘܠܸܕ݂ ܠܙܵܕ݂ܘܼܩ. ܙܵܕ݂ܘܼܩ ܐܲܘܠܸܕ݂ ܠܐܲܟ݂ܝܼܢ. ܐܲܟ݂ܝܼܢ ܐܲܘܠܸܕ݂ ܠܐܸܠܝܼܘܕ݂.

¹⁵ܐܸܠܝܼܘܕ ܐܲܘܠܸܕ݂ ܠܐܹܠܝܼܥܵܙܵܪ. ܐܸܠܝܼܥܵܙܵܪ ܐܲܘܠܸܕ݂ ܠܡܵܬ݂ܵܢ. ܡܵܬ݂ܵܢ ܐܲܘܠܸܕ݂ ܠܝܲܥܩܘܿܒ݂.

¹⁶ܝܲܥܩܘܿܒ݂ ܐܲܘܠܸܕ݂ ܠܝܵܘܣܸܦ ܓܲܒ݂ܪܵܗ ܕܡܲܪܝܲܡ: ܕܡܸܢܵܗ̇ ܐܸܬ݂ܝܼܠܸܕ݂ ܝܼܫܘܿܥ ܕܡܸܬ݂ܩܪܹܐ ܡܫܝܼܚܵܐ.

¹⁷ܟܠܗܹܝܢ ܗܵܟܹܝܠ ܫܲܪ̈ܒܵܬ݂ܵܐ ܡܸܢ ܐܲܒ݂ܪܵܗܵܡ ܥܕ݂ܲܡܵܐ ܠܕ݂ܲܘܝܼܕ݂: ܫܲܪܒܵܬ݂ܵܐ ܐܲܪܒܲܥܸܣܪܹ̈ܐ. ܘܡܸܢ ܕܲܘܝܼܕ݂ ܥܕ݂ܲܡܵܐ ܠܓ݂ܵܠܘܼܬ݂ܵܐ ܕܒ݂ܵܒܹܠ: ܫܲܪ̈ܒܵܬ݂ܵܐ ܐܲܪܒܲܥܸܣܪܹ̈ܐ. ܘܡܸܢ ܓܵܠܘܼܬ݂ܵܐ ܕܒ݂ܵܒܹܠ ܥܕ݂ܲܡܵܐ ܠܲܡܫܝܼܚܵܐ: ܫܲܪ̈ܒܵܬ݂ܵܐ ܐܲܪܒܲܥܸܣܪܹ̈ܐ.

¹⁸ܝܲܠܕܗ ܕܹܝܢ ܕܝܼܫܘܿܥ ܡܫܝܼܚܵܐ ܗܵܟܲܢܵܐ ܗܘܵܐ. ܟܲܕ݂ ܡܟ݂ܝܼܪܵܐ ܗ̱ܘܵܬ݂ ܡܲܪܝܲܡ ܐܸܡܹܗ ܠܝܵܘܣܸܦ: ܥܲܕ݂ܠܵܐ ܢܸܫܬܲܘܬ݁ܦܘܼܢ: ܐܸܫܬܲܟ݂ܚܲܬ݂ ܒܲܛܢܵܐ ܡܸܢ ܪܘܼܚܵܐ ܕܩܘܼܕ݂ܫܵܐ.

¹⁹ܝܵܘܣܸܦ ܕܹܝܢ ܒܲܥܠܵܗ̇ ܟܹܐܢܵܐ ܗ̱ܘܵܐ. ܘܠܵܐ ܨܒ݂ܵܐ ܕܲܢܦܲܪܣܹܝܗ̇. ܘܐܸܬ݂ܪܲܥܝܼ ܗܘܵܐ. ܕܡܲܛܫܝܵܐܝܼܬ݂ ܢܸܫܪܹܝܗ̇.

²⁰ܟܲܕ݂ ܗܵܠܹܝܢ ܕܹܝܢ ܐܸܬ݂ܪܲܥܝܼ: ܐܸܬ݂ܚܙܝܼ ܠܹܗ ܡܲܠܲܐܟ݂ܵܐ ܕܡܵܪܝܵܐ ܒܚܸܠܡܵܐ. ܘܐܸܡܲܪ ܠܹܗ. ܝܵܘܣܸܦ ܒܪܹܗ ܕܕ݂ܵܘܝܼܕ݂: ܠܵܐ ܬܸܕ݂ܚܲܠ ܠܡܸܣܲܒ݂ ܠܡܲܪܝܲܡ ܐܲܢ̄ܬ݁ܬ݂ܵܟ݂. ܗܵܘ ܓܹܝܪ ܕܐܸܬ݂ܝܼܠܸܕ݂ ܒܵܗ̇: ܡܸܢ ܪܘܼܚܵܐ ܗܘܼ ܕܩܘܼܕ݂ܫܵܐ.

²¹ܬܹܐܠܲܕ݂ ܕܹܝܢ ܒܪܵܐ: ܘܬܸܩܪܹܐ ܫܡܹܗ ܝܼܫܘܿܥ. ܗܘܼ ܓܹܝܪ ܢܲܚܹܝܘܗܝ ܠܥܲܡܹܗ ܡܸܢ ܚܛܵܗܲܝܗ̈ܘܿܢ.

²²ܗܵܕܹܐ ܕܹܝܢ ܟܠܵܗ̇ ܕܲܗܘܵܬ݂: ܕܢܸܬ݂ܡܲܠܹܐ ܡܸܕܸܡ ܕܐܸܬ݂ܐܡܲܪ ܡܸܢ ܡܵܪܝܵܐ ܒܝܲܕ݂ ܢܒ݂ܝܼܵܐ:

²³ܕܗܵܐ ܒܬ݂ܘܼܠܬܵܐ ܬܸܒ݂ܛܲܢ ܘܬܹܐܠܲܕ݂ ܒܪܵܐ: ܘܢܸܩܪܘܿܢ ܫܡܹܗ ܥܲܡܵܢܘܼܐܹܝܠ ܕܡܸܬܬܲܪܓܲܡ ܥܲܡܲܢ ܐܲܠܵܗܲܢ.

²⁴ܟܲܕ݂ ܩܵܡ ܕܹܝܢ ܝܵܘܣܸܦ ܡܸܢ ܫܸܢܬܹܗ: ܥܒܲܕ݂ ܐܲܝܟܲܢܵܐ ܕܲܦܩܲܕ݂ ܠܹܗ ܡܲܠܲܐܟ݂ܹܗ ܕܡܵܪܝܵܐ. ܘܕ݂ܲܒ݂ܪܵܗ ܠܐܲܢ̄ܬ݁ܬܹܗ.

²⁵ܘܠܵܐ ܚܲܟ݂ܡܵܗ̇: ܥܕ݂ܲܡܵܐ ܕܝܼܠܸܕ݂ܬܹܗ ܠܲܒ݂ܪܵܗ̇ ܒܘܼܟ݂ܪܵܐ: ܘܲܩܪܵܬ݂ ܫܡܹܗ ܝܼܫܘܿܥ.