Read Aramaic Peshita Matthew 13 Bible Online

Matthew 13 - Aramaic Peshita bible

Matthew 13

¹ܒܗܵܘ ܕܹܝܢ ܝܵܘܡܵܐ. ܢܦܲܩ ܝܼܫܘܿܥ ܡܸܢ ܒܲܝܬܵܐ: ܘܝܼܬܸܒ݂ ܥܲܠ ܝܲܕ݂ ܝܲܡܵܐ.

²ܘܐܸܬ݂ܟܲܢܲܫܘ ܠܘܵܬܹܗ ܟܸܢܫܹ̈ܐ̈ ܣܲܓܝܼܐܹ̈ܐ̈: ܐܲܝܟ݂ ܕܢܸܣܲܩ ܢܸܬܸ݁ܒ݂ ܠܹܗ ܒܐܸܠܦܵܐ. ܘܟ݂ܠܹܗ ܟܢܫܵܐ. ܩܵܐܹܡ ܗܘ̣ܵܐ ܥܲܠ ܣܦܵܪ ܝܲܡܵܐ.

³ܘܣܲܓܝܼ ܡܡܲܠܸܠ ܗܘ̣ܵܐ ܥܲܡܗܘܿܢ ܒܦܸܠܐܬ݂ܵܐ. ܘܐܵܡܲܪ. ܗܵܐ ܢܦܲܩ ܙܵܪܘܿܥܵܐ ܕܢܸܙܪܘܿܥ.

⁴ܘܟܲܕ݂ ܙܪܲܥ: ܐܝܼܬ݂ ܕܲܢܦܲܠ ܥܲܠ ܝܲܕ݂ ܐܘܼܪܚܵܐ ܘܐܸܬ݂ܵܬ݂ ܦܵܪܲܚܬ݂ܵܐ. ܘܐܸܟܲܠܬܹܗ.

⁵ܘܐܲܚܪܹܢܵܐ ܢܦܲܠ ܥܲܠ ܫܘܿܥܵܐ. ܐܲܝܟܵܐ ܕܠܲܝܬ݁ ܗܘ̣ܵܐ ܡܸܕ݂ܪܵܐ ܣܲܓܝܼܵܐܐ. ܘܒܲܪ ܫܵܥܬܹܗ ܫܘܲܚ: ܡܛܠ ܕܠܲܝܬ݁ ܗܘ̣ܵܐ ܥܘܼܡܩܵܐ ܕܐܲܪܥܵܐ.

⁶ܟܲܕ݂ ܕܢܲܚ ܕܹܝܢ ܫܸܡܫܵܐ. ܚܲܡ. ܘܡܛܠ ܕܠܲܝܬ݁ ܗܘ̣ܵܐ ܠܹܗ ܥܸܩܪܵܐ. ܝܼܒܸܫ.

⁷ܘܐܲܚܪܹܢܵܐ ܢܦܲܠ ܒܹܝܬ݂ ܟܘܼܒܹ̈ܐ. ܘܲܣܠܸܩܘ ܟܘܼܒܹ̈ܐ ܘܚܲܢܩܘܼܗܝ.

⁸ܘܐܲܚܪܹܢܵܐ ܢܦܲܠ ܒܐܲܪܥܵܐ ܛܵܒ݂ܬ݂ܵܐ: ܘܝܲܗ̄ܒ݂ ܦܹܐܪܹ̈ܐ. ܐܝܼܬ݂ ܕܲܡܵܐܐ ܘܐܝܼܬ݂ ܕܸܫܬ݁ܝܼܢ. ܘܐܝܼܬ݂ ܕܲܬ݂ܠܵܬ݂ܝܼܢ.

⁹ܡܲܢ ܕܐܝܬ݂ ܠܹܗ ܐܸܕ݂ܢܹ̈ܐ ܕܢܸܫܡܲܥ. ܢܸܫܡܲܥ.

¹⁰ܘܲܩܪܸܒ݂ܘ ܬܲܠܡܝܼܕ݂ܵܘ̈ܗܝ̈ ܘܐܵܡܪܝܼܢ ܠܹܗ. ܠܡܵܢܵܐ ܒܦܸܠܐܬ݂ܵܐ̈ ܡܡܲܠܸܠ ܐܲܢ̄ܬ݁ ܥܲܡܗܘܿܢ.

¹¹ܗܘܼ ܕܹܝܢ ܥܢܵܐ. ܘܐܸܡܲܪ ܠܗܘܿܢ. ܕܲܠܟ݂ܘܿܢ ܗܘܼ ܝܼܗܝܼܒ݂ ܠܡܸܕ݂ܥ ܐ̄ܪܵܙܵܐ ܕܡܲܠܟܘܼܬ݂ܵܐ ܕܲܫܡܲܝܵܐ: ܠܗܵܢܘܿܢ ܕܹܝܢ ܠܵܐ ܝܼܗܝܼܒ݂.

¹²ܠܡܲܢ ܓܹܝܪ ܕܐܝܬ݂ ܠܹܗ ܢܸܬ݂ܝܗܸܒ݂ ܠܹܗ. ܘܢܸܬ݂ܝܲܬܲܪ ܠܹܗ.

¹³ܘܲܠܡܲܢ ܕܠܲܝܬ݁ ܠܹܗ ܘܗܲܘ ܕܐܝܬ݂ ܠܹܗ. ܢܸܫܬ݁ܩܸܠ ܡܸܢܗ. ܡܛܠ ܗܵܢܵܐ ܒܦܸܠܐܬ݂ܵܐ ܡܡܲܠܸܠ ܐ̄ܢܵܐ ܥܲܡܗܘܿܢ. ܡܛܠ ܕܚܵܙܹܝܢ. ܘܠܵܐ ܚܵܙܹܝܢ. ܘܫܵܡܥܝܼܢ ܘܠܵܐ ܫܵܡܥܝܼܢ. ܘܠܵܐ ܡܸܣܬܲܟܠܝܼܢ.

¹⁴ܘܫܵܠܡܵܐ ܒܗܘܿܢ ܢܒ݂ܝܼܘܼܬܹܗ ܕܐܹܫܲܥܝܵܐ. ܕܐܸܡܲܪ. ܕܫܸܡܥܵܐ ܬܸܫܡܥܘܼܢ. ܘܠܵܐ ܬܸܣܬܲܟܠܘܼܢ: ܘܡܸܚܙܵܐ ܬܸܚܙܘܿܢ. ܘܠܵܐ ܬܸܕ݂ܥܘܼܢ.

¹⁵ܐܸܬ݂ܥܲܒܝܼ ܠܹܗ ܓܹܝܪ ܠܸܒܹܗ ܕܥܲܡܵܐ ܗܵܢܵܐ. ܘܒܸܐܕ݂ܢܲܝ̈ܗܘܿܢ̈ ܝܲܩܝܼܪܵܐܝܼܬ݂ ܫܡܲܥܘ. ܘܥܲܝܢܲܝ̈ܗܘܿܢ. ܥܲܡܸܨܘ. ܕܠܵܐ ܢܸܚܙܘܿܢ ܒܥܲܝܢܲܝ̈ܗܘܿܢ. ܘܢܸܫܡܥܘܼܢ ܒܐܕ݂ܢܲܝ̈ܗܘܿܢ̈: ܘܢܸܣܬܲܟܠܘܼܢ ܒܠܸܒܗܘܿܢ: ܘܢܸܬ݂ܦܢܘܿܢ. ܘܐܲܣܹܐ ܐܸܢܘܿܢ.

¹⁶ܕܝܼܠܟ݂ܘܿܢ ܕܹܝܢ ܛܘܼܒܲܝܗܹܝܢ ܠܥܲܝܢܲܝ̈ܟܘܿܢ̈ ܕܚܵܙܝܵܢ̈. ܘܠܸܐܕ݂ܢܲܝ̈ܟܘܿܢ̈ ܕܫܵܡ̈ܥܵܢ̈.

¹⁷ܐܵܡܹܝܢ ܓܹܝܪ ܐܵܡܲܪܢܵܐ ܠܟ݂ܘܿܢ: ܕܣܲܓܝܼܐܹ̈ܐ ܢܒ݂ܝܹ̈ܐ ܘܙܲܕܝܼܩܹ̈ܐ ܐܸܬ݂ܪܲܓ݂ܪܲܓ݂ܘ ܕܢܸܚܙܘܿܢ ܡܸܕܸܡ ܕܚܵܙܹܿܝܢ ܐܢ̄ܬܘܿܢ. ܘܠܵܐ ܚܙܵܘ: ܘܲܠܡܸܫܡܲܥ ܡܸܕܸܡ ܕܫܵܡܥܝܼܢ ܐܢ̄ܬܘܿܢ. ܘܠܵܐ ܫܡܲܥܘ.

¹⁸ܐܲܢ̄ܬ݁ܘܿܢ ܕܹܝܢ ܫܡܲܥܘ ܡܲܬ݂ܠܵܐ ܕܙܲܪܥܵܐ.

¹⁹ܟܠ ܕܫܵܡܲܥ ܡܸܠܬ݂ܵܐ ܕܡܲܠܟܘܼܬ݂ܵܐ ܘܠܵܐ ܡܸܣܬܲܟܲܠ ܒܵܗ̇: ܐܵܬܹܐ ܒܝܼܫܵܐ. ܘܚܵܛܹܦ ܡܸܠܬ݂ܵܐ ܕܲܙܪܝܼܥܵܐ ܒܠܸܒܹܗ. ܗܵܢܵܘ ܗܵܘ ܕܥܲܠ ܝܲܕ݂ ܐܘܼܪܚܵܐ ܐܸܙܕܪܲܥ.

²⁰ܗܵܘ ܕܹܝܢ ܕܥܲܠ ܫܘܿܥܵܐ ܐܸܙܕܪܲܥ: ܗܵܘ ܗܘܼ ܕܫܵܡܲܥ ܡܸܠܬ݂ܵܐ. ܘܒܲܪ ܫܵܥܬܹܗ ܒܚܲܕ݂ܘܼܬ݂ܵܐ ܡܩܲܒܸܠ ܠܵܗ̇.

²¹ܠܲܝܬ݁ ܠܵܗ̇ ܕܹܝܢ ܥܸܩܪܵܐ ܒܹܗ. ܐܸܠܵܐ ܕܙܲܒ݂ܢܵܐ ܗܘܼ. ܘܡܵܐ ܕܲܗܘܵܐ ܐܘܼܠܨܵܢܵܐ ܐܵܘ ܪܕ݂ܘܼܦܝܵܐ ܡܛܠ ܡܸܠܬ݂ܵܐ. ܥܓܲܠ ܡܸܬ݂ܟܿܫܸܠ.

²²ܗܵܘ ܕܹܝܢ ܕܒܹܝܬ݂ ܟܘܼܒܹ̈ܐ̈ ܐܸܙܕܪܲܥ: ܗܵܘ ܗܘܼ ܕܫܵܡܲܥ ܡܸܠܬ݂ܵܐ: ܘܪܸܢܝܵܐ ܕܥܵܠܡܵܐ ܗܵܢܵܐ. ܘܛܘܼܥܝܲܝ ܕܥܘܼܬ݂ܪܵܐ. ܚܵܢܩܝܼܢ ܠܵܗ̇ ܠܡܸܠܬ݂ܵܐ. ܘܲܕ݂ܠܵܐ ܦܹܐܪܹ̈ܐ ܗܵܘܝܵܐ.

²³ܗܵܘ ܕܹܝܢ ܕܥܲܠ ܐܲܪܥܵܐ ܛܵܒ݂ܬ݂ܵܐ ܐܸܙܕܪܲܥ: ܗܵܘ ܗܘܼ ܕܫܵܡܲܥ ܡܸܠܲܬ݂ܝ: ܘܡܸܣܬܲܟܲܠ ܘܝܵܗܹܒ݂ ܦܹܐܪܹ̈ܐ. ܘܥܵܒܹ̇ܕ݂. ܐܝܼܬ݂ ܕܲܡܵܐܐ ܘܐܝܼܬ݂ ܕܸܫܬ݁ܝܼܢ. ܘܐܝܼܬ݂ ܕܲܬ݂ܠܵܬ݂ܝܼܢ.

²⁴ܐ̄ܚܪܹܢܵܐ ܡܲܬ݂ܠܵܐ ܐܲܡܬܸ݁ܠ ܠܗܘܿܢ. ܘܐܸܡܲܪ. ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܓܲܒ݂ܪܵܐ ܕܲܙܪܲܥ ܙܲܪܥܵܐ ܛܵܒ݂ܵܐ ܒܲܩܪܝܼܬܹܗ:

²⁵ܘܟ݂ܲܕ݂ ܕܡܸܟ݂ܘ ܐ̄ܢܵܫܵܐ: ܐܸܬ݂ܵܐ ܒܥܸܠܕܒ݂ܵܒܹܗ ܘܲܙܪܲܥ ܙܝܼܙܵܢܹ̈ܐ ܒܲܝܢܵܬ݂ ܚܸ̈ܛܹܐ. ܘܐܸܙܲܠ.

²⁶ܟܲܕ݂ ܕܹܝܢ ܝܼܥܵܐ ܥܸܣܒܵܐ. ܘܲܥܒܲܕ݂ ܦܹܐܪܹ̈ܐ: ܗܵܝܕܹܝܢ ܐܸܬ݂ܚܙܝܼܘ ܐܵܦ ܙܝܼܙܵܢܹ̈ܐ.

²⁷ܘܲܩܪܸܒ݂ܘ ܥܲܒ݂ܕܲܘܗܝ ܕܡܵܪܹܐ ܒܲܝܬܵܐ. ܘܐܸܡܲܪܘ ܠܹܗ. ܡܵܪܲܢ ܠܵܐ ܗܵܐ: ܙܲܪܥܵܐ ܛܵܒ݂ܵܐ ܙܪܲܥܬ݁ ܒܲܩܪܝܼܬ݂ܵܟ݂. ܡܸܢ ܐܲܝܡܸܟܵܐ ܐܝܼܬ݂ ܒܹܗ ܙܝܼܙܵܢܹ̈ܐ.

²⁸ܗܘܼ ܕܹܝܢ ܐܸܡܲܪ ܠܗܘܿܢ. ܓܲܒ݂ܪܵܐ ܒܥܸܠܕܒ݂ܵܒ݂ܵܐ ܥܒܲܕ݂ ܗܵܕܹܐ. ܐܵܡܪܝܼܢ ܠܹܗ ܥܲܒ݂ܕܵܘ̈ܗܝ̈. ܨܵܒܹܐ ܐܲܢ̄ܬ݁: ܢܹܐܙܲܠ ܢܓܲܒܹܐ ܐܸܢܘܿܢ.

²⁹ܗܘܼ ܕܹܝܢ ܐܸܡܲܪ ܠܗܘܿܢ. ܕܲܠܡܵܐ ܟܲܕ݂ ܡܓܲܒܝܼܢ ܐܢ̄ܬܘܿܢ ܙܝܼܙܵܢܹ̈ܐ̈: ܬܸܥܩܪܘܼܢ ܥܲܡܗܘܿܢ ܐܵܦ ܚܸ̈ܛܹܐ.

³⁰ܫܒ݂ܘܿܩܘ ܪܵܒܹ̇ܝܢ ܬܪܲܝܗܘܿܢ̈ ܐܲܟ݂ܚܕ݂ܵܐ. ܥܕ݂ܲܡܵܐ ܠܲܚܨܵܕ݂ܵܐ. ܘܲܒ݂ܙܲܒ݂ܢܵܐ ܕܲܚܨܵܕ݂ܵܐ ܐܵܡܲܪ ܐ̄ܢܵܐ ܠܚܵܨܘܿܕܹ̈ܐ: ܓܲܒܵܘ ܠܘܼܩܕ݂ܲܡ ܙܝܼܙܵܢܹ̈ܐ: ܘܐܲܣܘܿܪܘ ܐܸܢܘܿܢ ܡܹܐܣܵܪ̈ܝܵܬ݂ܵܐ. ܕܢܹܐܩܕ݂ܘܼܢ ܚܹ̈ܛܹܐ̈ ܕܹܝܢ. ܟܲܢܸܫܘ ܐܸܢܹܝܢ ܠܐܵܘܨܪ̈ܲܝ.

³¹ܐ̄ܚܪܹܢܵܐ ܡܲܬ݂ܠܵܐ ܐܲܡܬܸ݁ܠ ܠܗܘܿܢ. ܘܐܸܡܲܪ. ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܲܦܪܸܕ݂ܬܵܐ ܕܚܲܪܕܠܵܐ: ܕܲܢܣܲܒ݂ ܓܲܒ݂ܪܵܐ ܙܲܪܥܵܗ̇ ܒܲܩܪܝܼܬܹܗ.

³²ܘܗܝܼ ܙܥܘܿܪܝܵܐ ܗܝ ܡܸܢ ܟܠܗܘܿܢ ܙܲܪ̈ܥܘܿܢܹܐ. ܡܵܐ ܕܹܝܢ ܕܲܪܒ݂ܵܬ݂: ܪܲܒܵܐ ܗܝ ܡܸܢ ܟܠܗܘܿܢ ܝܲܪ̈ܩܘܼܢܹܐ. ܘܗܵܘܝܵܐ ܐܝܼܠܵܢܵܐ: ܐܲܝܟ݂ ܕܬܹܐܬܹܐ ܦܵܪܲܚܬ݂ܵܐ ܕܲܫܡܲܝܵܐ ܬܲܩܸܢ ܒܣܵܘܟܹܝ̈ܗ̇.

³³ܐ̄ܚܪܹܢܵܐ ܡܲܬ݂ܠܵܐ ܐܸܡܲܪ ܠܗܘܿܢ. ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܲܚܡܝܼܪܵܐ ܗܵܘ ܕܫܸܩܠܲܬ݂ ܐܲܢ̄ܬ݁ܬ݂ܵܐ. ܛܸܡܪܲܬ݂ ܒܲܬ݂ܠܵܬ݂ ܣ̈ܐܝܼܢ ܕܩܲܡܚܵܐ: ܥܕ݂ܲܡܵܐ ܕܟ݂ܠܹܗ ܚܡܲܥ.

³⁴ܗܵܠܹܝܢ ܟܠܗܹܝܢ ܡܲܠܸܠ ܝܼܫܘܿܥ ܒܦܸܠܐܬ݂ܵܐ ܠܟܸܢܫܹ̈ܐ. ܘܲܕ݂ܠܵܐ ܦܸܠܐܬ݂ܵܐ. ܠܵܐ ܡܡܲܠܸܠ ܗܘ̣ܵܐ ܥܲܡܗܘܿܢ.

³⁵ܐܲܝܟ݂ ܕܢܸܬ݂ܡܲܠܹܐ ܡܸܕܸܡ ܕܐܸܬ݂ܐܡܲܪ ܒܝܲܕ݂ ܢܒ݂ܝܼܵܐ ܕܐܸܡܲܪ: ܐܸܦ̮ܬܲܚ ܦܘܼܡܝ ܒܡܲܬ݂ܠܹܐ̈ ܘܐܲܒܲܥ ܟܲܣ̈ܝܵܬ݂ܵܐ ܕܡܸܢ ܩܕ݂ܵܡ ܬܲܪ̈ܡܝܵܬܹܗ ܕܥܵܠܡܵܐ.

³⁶ܗܵܝܕܹܝܢ ܝܼܫܘܿܥ ܫܒܲܩ ܠܟܸܢܫܹ̈ܐ̈. ܘܐܸܬ݂ܵܐ ܠܒܲܝܬܵܐ. ܘܲܩܪܸܒ݂ܘ ܠܘܵܬܹܗ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܠܹܗ. ܦܲܫܸܩ ܠܲܢ ܡܲܬ݂ܠܵܐ ܗܵܘ ܕܙܝܼܙܵܢܹ̈ܐ ܘܕ݂ܲܩܪܝܼܬ݂ܵܐ.

³⁷ܗܘܼ ܕܹܝܢ ܥܢܵܐ ܘܐܸܡܲܪ ܠܗܘܿܢ. ܗܵܘ ܕܲܙܪܲܥ ܙܲܪܥܵܐ ܛܵܒ݂ܵܐ ܐܝܼܬ݂ܵܘܗܝ ܒܪܹܗ ܕܐ̄ܢܵܫܵܐ.

³⁸ܘܲܩܪܝܼܬ݂ܵܐ ܐܝܼܬܹܝܗ̇ ܥܵܠܡܵܐ. ܙܲܪܥܵܐ ܕܹܝܢ ܛܵܒ݂ܵܐ. ܒܢܹܝ̈ܗ̇ ܐܸܢܘܿܢ ܕܡܲܠܟܘܼܬ݂ܵܐ. ܙܝܼܙܵܢܹ̈ܐ ܕܹܝܢ ܐܝܼܬܲܝܗܘܿܢ ܒܢܵܘ̈ܗܝ ܕܒ݂ܝܼܫܵܐ.

³⁹ܒܥܸܠܕܒ݂ܵܒ݂ܵܐ ܕܹܝܢ ܕܲܙܪܲܥ ܐܸܢܘܿܢ ܐܝܼܬ݂ܵܘܗܝ ܣܵܛܵܢܵܐ. ܚܨܵܕ݂ܵܐ ܕܹܝܢ ܐܝܼܬ݂ܵܘܗܝ ܫܘܼܠܵܡܹܗ ܕܥܵܠܡܵܐ. ܚܵܨܘܿܕ݂ܹ̈ܐ ܕܹܝܢ ܡܲܠܲܐܟܹ̈ܐ.

⁴⁰ܐܲܝܟܲܢܵܐ ܗܵܟܹܝܠ ܕܡܸܬ݂ܓܲܒܹ̇ܝܢ ܙܝܼܙܵܢܹ̈ܐ ܘܝܵܩܕ݂ܝܼܢ ܒܢܘܼܪܵܐ: ܗܵܟܲܢܵܐ ܢܸܗܘܹܐ ܒܫܘܼܠܵܡܹܗ ܕܥܵܠܡܵܐ ܗܵܢܵܐ.

⁴¹ܢܫܲܕܲܪ ܒܪܹܗ ܕܐ̄ܢܵܫܵܐ ܡܲܠܲܐܟ݂ܘ̈ܗܝ: ܘܲܢܓܲܒܘܼܢ ܡܸܢ ܡܲܠܟܘܬܹܗ ܟܠܗܘܿܢ ܡܲܟ݂ܫܘܼܠܹ̈ܐ: ܘܟ݂ܠܗܘܿܢ ܥܵܒ݂ܕܲܝ̈ ܥܵܘܠܵܐ.

⁴²ܘܢܲܪܡܘܿܢ ܐܸܢܘܿܢ ܒܐܲܬ݁ܘܿܢܵܐ ܕܢܘܼܪܵܐ. ܬܲܡܵܢ ܢܸܗܘܹܐ ܒܸܟ݂ܝܵܐ. ܘܚܘܼܪܵܩ ܫܸܢܹ̈ܐ.

⁴³ܗܵܝܕܹܝܢ ܙܲܕܝܼܩܹ̈ܐ ܢܸܢܗܪܘܼܢ ܐܲܝܟ݂ ܫܸܡܫܵܐ ܒܡܲܠܟܘܬܹܗ ܕܐܲܒ݂ܘܼܗܘܿܢ. ܡܲܢ ܕܐܝܬ݂ ܠܹܗ ܐܸܕ݂ܢܹ̈ܐ ܕܢܸܫܡܲܥ. ܢܸܫܡܲܥ.

⁴⁴ܬܘܼܒ݂ ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܣܝܼܡܬ݂ܵܐ ܕܲܡܛܲܫܝܵܐ ܒܲܩܪܝܼܬ݂ܵܐ ܗܵܝ ܕܐܸܫܟܚܵܗ̇ ܓܲܒ݂ܪܵܐ. ܘܛܲܫܝܵܗ̇: ܘܡܸܢ ܚܲܕ݂ܘܼܬܹܗ ܐܸܙܲܠ ܙܲܒܸܢ ܟܠ ܕܐܝܼܬ݂ ܠܹܗ. ܘܙܲܒ݂ܢܵܗ̇ ܠܲܩܪܝܼܬ݂ܵܐ ܗܵܝ.

⁴⁵ܬܘܼܒ݂ ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܓܲܒ݂ܪܵܐ ܬܲܓܵܪܵܐ ܕܒ݂ܵܥܹܐ ܗܘ̣ܵܐ ܡܲܪ̈ܓܵܢܝܵܬ݂ܵܐ ܛܵܒ݂̈ܵܬ݂ܵܐ:

⁴⁶ܟܲܕ݂ ܕܹܝܢ ܐܸܫܟܲܚ ܡܲܪܓܵܢܝܼܬ݂ܵܐ ܚܕ݂ܵܐ ܝܲܩܝܼܪܲܬ݂ ܕܡܲܝܵܐ: ܐܸܙܲܠ ܙܲܒܸܢ ܟܠܡܵܐ ܕܐܝܼܬ݂ ܠܹܗ. ܘܙܲܒ݂ܢܵܗ̇.

⁴⁷ܬܘܼܒ݂ ܕܵܡܝܵܐ ܡܲܠܟܘܼܬ݂ܵܐ ܕܲܫܡܲܝܵܐ: ܠܲܡܨܝܼܕ݂ܬܵܐ ܕܢܸܦܠܲܬ݂ ܒܝܲܡܵܐ: ܘܡܸܢ ܟܠ ܓܢܸܣ ܟܲܢܫܲܬ݂.

⁴⁸ܘܟ݂ܲܕ݂ ܡܠܵܬ݂: ܐܲܣܩܘܼܗ̇ ܠܲܣܦܵܪܲܝ ܝܲܡܵܐ. ܘܝܼܬܸܒ݂ܘ ܓܲܒܝܼܘ. ܘܛܵܒܹ̈ܐ ܐܲܪܡܝܼܘ ܒܡܵܐܢܹ̈ܐ: ܘܒ݂ܝܼܫܹ̈ܐ ܫܕ݂ܵܘ ܠܒܲܪ.

⁴⁹ܗܵܟܲܢܵܐ ܢܸܗܘܹܐ ܒܫܘܼܠܵܡܹܗ ܕܥܵܠܡܵܐ. ܢܸܦܩܘܼܢ ܡܲܠܲܐܟܹ̈ܐ ܘܲܢܦܲܪܫܘܼܢ ܒܝܼܫܹ̈ܐ ܡܸܢ ܒܲܝܢܲܝ ܙܲܕܝܼܩܹ̈ܐ:

⁵⁰ܘܢܲܪܡܘܿܢ ܐܸܢܘܿܢ ܒܐܲܬܘܿܢܵܐ ܕܢܘܼܪܵܐ. ܬܲܡܵܢ ܢܸܗܘܹܐ ܒܸܟ݂ܝܵܐ. ܘܚܘܼܪܵܩ ܫܸܢܹ̈ܐ.

⁵¹ܐܸܡܲܪ ܠܗܘܿܢ ܝܼܫܘܿܥ ܐܸܣܬܲܟܲܠܬ݁ܘܿܢ: ܟܠܗܹܝܢ ܗܵܠܹܝܢ. ܐܵܡܪܝܼܢ ܠܹܗ ܐܹܝܢ ܡܵܪܲܢ:

⁵²ܐܵܡܲܪ ܠܗܘܿܢ ܡܛܠ ܗܵܢܵܐ ܟܠ ܣܵܦܪܵܐ ܕܡܸܬ݁ܬܲܠܡܲܕ݂ ܠܡܲܠܟܘܼܬ݂ ܫܡܲܝܵܐ: ܕܵܡܹܐ ܠܓܲܒ݂ܪܵܐ ܡܵܪܹܐ ܒܲܝܬܵܐ: ܕܡܲܦܸܩ ܡܸܢ ܣܝܼܡܵܬܹ̈ܗ ܚܲܕ݂̈ܬܵܬ݂ܵܐ. ܘܥܲܬ݁ܝܼ̈ܩܵܬ݂ܵܐ.

⁵³ܘܲܗܘܵܐ ܕܟ݂ܲܕ݂ ܫܲܠܸܡ ܝܼܫܘܿܥ ܡܲܬ݂ܠܹܐ ܗܵܠܹܝܢ: ܫܲܢܝܼ ܡܸܢ ܬܲܡܵܢ.

⁵⁴ܘܐܸܬ݂ܵܐ ܠܲܡܕ݂ܝܼܢ̄ܬܹ݁ܗ. ܘܡܲܠܸܦ ܗܘ̣ܵܐ ܠܗܘܿܢ ܒܲܟ݂ܢ̈ܘܼܫܵܬ݂ܗܘܿܢ ܐܲܝܟܲܢܵܐ ܕܢܸܬ݂ܗܪܘܼܢ. ܘܢܹܐܡܪܘܼܢ. ܐܲܝܡܸܟܵܐ ܠܹܗ ܠܗܵܢܵܐ ܚܸܟ݂ܡܬ݂ܵܐ ܗܵܕܹܐ ܘܚܲܝ̈ܠܹܐ.

⁵⁵ܠܵܐ ܗܘ̣ܵܐ ܗܵܢܵܐ ܒܪܹܗ ܕܢܲܓܵܪܵܐ. ܠܵܐ ܐܸܡܹܗ ܡܸܬ݂ܩܲܪܝܵܐ ܡܲܪܝܲܡ: ܘܐܲܚܵܘ̈ܗܝ ܝܲܥܩܘܿܒ݂ ܘܝܵܘܣܹܐ: ܘܫܸܡܥܘܿܢ ܘܝܼܗܘܼܕ݂ܵܐ:

⁵⁶ܘܐܲܚ̈ܘܵܬܹܗ ܟܠܗܹܝܢ: ܠܵܐ ܗܵܐ ܠܘܵܬܲܢ ܐܸܢܹܝܢ: ܐܲܝܡܸܟܵܐ ܠܹܗ ܗܵܟܹܝܠ ܠܗܵܢܵܐ ܗܵܠܹܝܢ ܟܠܗܹܝܢ.

⁵⁷ܘܡܸܬ݂ܟܲܫܠܝܼܢ ܗ̄ܘܼܵܘ ܒܹܗ. ܗܘܼ ܕܹܝܢ ܝܼܫܘܿܥ ܐܸܡܲܪ ܠܗܘܿܢ ܠܲܝܬ݁ ܢܒ݂ܝܼܵܐ ܕܲܨܥܝܼܪ: ܐܸܠܵܐ ܒܲܡܕ݂ܝܼܢ̄ܬܹ݁ܗ. ܘܲܒ݂ܒܲܝܬܹ݁ܗ.

⁵⁸ܘܠܵܐ ܥܒܲܕ݂ ܬܲܡܵܢ ܚܲܝ̈ܠܹܐ ܣܲܓܝܼܐܹ̈ܐ: ܡܛܠ ܠܵܐ ܗܲܝܡܵܢܘܼܬ݂ܗܘܿܢ.