Read Aramaic Peshita Matthew 15 Bible Online

Matthew 15 - Aramaic Peshita bible

Matthew 15

¹ܗܵܝܕܹܝܢ ܩܪܸܒ݂ܘ ܠܘܵܬ݂ ܝܼܫܘܿܥ ܦܪ̈ܝܼܫܹܐ ܘܣܵܦܪܹ̈ܐ ܕܡܸܢ ܐܘܿܪܸܫܠܸܡ. ܘܐܵܡܪܝܼܢ.

²ܠܡܵܢܵܐ ܬܲܠܡܝܼܕ݂ܲܝ̈ܟ ܥܵܒ݂ܪܝܼܢ ܥܲܠ ܡܲܫܠܡܵܢܘܼܬ݂ܵܐ ܕܩܲܫܝܼܫܹ̈ܐ: ܘܠܵܐ ܡܫܝܼܓ݂ܝܼܢ ܐܝܼܕ݂ܲܝܗܘܿܢ. ܡܵܐ ܕܐܵܟ݂ܠܝܼܢ ܠܲܚܡܵܐ.

³ܥܢܵܐ ܝܼܫܘܿܥ ܘܐܸܡܲܪ ܠܗܘܿܢ. ܠܡܵܢܵܐ ܐܵܦ ܐܲܢ̄ܬ݁ܘܿܢ ܥܵܒ݂ܪܝܼܢ ܐܢ̄ܬܘܿܢ ܥܲܠ ܦܘܼܩܕܢܵܐ ܕܐܲܠܵܗܵܐ ܡܛܠ ܡܲܫܠܡܵܢܘܼܬ݂ܟ݂ܘܿܢ.

⁴ܐܲܠܵܗܵܐ ܓܹܝܪ ܐܸܡܲܪ. ܝܲܩܲܪ ܠܐܲܒ݂ܘܼܟ݂. ܘܠܸܐܡܵܟ݂. ܘܡܲܢ ܕܲܡܨܲܚܹܐ ܠܐܲܒ݂ܘܼܗܝ ܘܠܸܐܡܹܗ. ܡܡܵܬ݂ ܢܡܘܼܬ݂.

⁵ܐܲܢ̄ܬ݁ܘܿܢ ܕܹܝܢ ܐܵܡܪܝܼܢ ܐܢ̄ܬܘܿܢ ܟܠܡܲܢ ܕܢܹܐܡܲܪ ܠܐܲܒ݂ܵܐ ܐܵܘ ܠܐܸܡܵܐ. ܩܘܼܪܒܵܢܝ ܡܸܕܸܡ ܕܬܸܬ݂ܗܢܹܐ ܡܸܢܝ. ܘܠܵܐ ܢܝܲܩܲܪ ܠܐܲܒ݂ܘܼܗܝ ܐܵܘ ܠܐܸܡܹܗ

⁶ܘܒܲܛܸܠܬ݁ܘܿܢ ܡܸܠܬ݂ܵܐ ܕܐܲܠܵܗܵܐ ܡܛܠ ܡܲܫܠܡܵܢܘܼܬ݂ܵܐ ܕܝܼܠܟ݂ܘܿܢ.

⁷ܢܵܣܒܲܝ̈ ܒܐܲܦܹ̈ܐ. ܫܲܦܝܼܪ ܐܸܬ݂ܢܲܒܝܼ ܥܠܲܝܟܿܘܿܢ ܐܹܫܥܝܵܐ. ܘܐܸܡܲܪ.

⁸ܥܲܡܵܐ ܗܵܢܵܐ ܒܣܸܦܘܵܬܹ̈ܗ ܗ̄ܘܼ ܡܝܲܩܲܪ ܠܝܼ. ܠܸܒܗܘܿܢ ܕܹܝܢ ܣܲܓܿܝܼ ܪܲܚܝܼܩ ܡܹܢܝ.

⁹ܘܲܣܪܝܼܩܵܐܝܼܬ݂ ܕܵܚܠܝܼܢ ܠܝܼ. ܟܲܕ݂ ܡܲܠܦܝܼܢ ܝܘܼܠܦܵܢܹ̈ܐ ܕܦܘܩܕܢܹ̈ܐ ܕܲܒ݂ܢܲܝ̈ܢܵܫܵܐ.

¹⁰ܘܲܩܪܵܐ ܠܟܸܢܫܹ̈ܐ. ܘܐܸܡܲܪ ܠܗܘܿܢ ܫܡܲܥܘ ܘܐܸܣܬܲܟܲܠܘ.

¹¹ܠܵܐ ܗܘ̣ܵܐ ܡܸܕܸܡ ܕܥܵܐܹܠ ܠܦܘܼܡܵܐ ܡܣܲܝܸܒ݂ ܠܒܲܪܢܵܫܵܐ. ܐܸܠܵܐ ܡܸܕܸܡ ܕܢܵܦܹܩ ܡܸܢ ܦܘܼܡܵܐ: ܗܵܘ ܗܘܼ ܡܣܲܝܸܒ݂ ܠܒܲܪܢܵܫܵܐ.

¹²ܗܵܝܕܹܝܢ ܩܪܸܒ݂ܘ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܠܹܗ. ܝܵܕ݂ܲܥ ܐܲܢ̄ܬ݁: ܕܲܦܪ̈ܝܼܫܹܐ ܕܲܫܡܲܥܘ ܡܸܠܬ݂ܵܐ ܗܵܕܹܐ. ܐܸܬ݂ܟܫܸܠܘ.

¹³ܗܘܼ ܕܹܝܢ ܥܢܵܐ ܘܐܸܡܲܪ ܠܗܘܿܢ. ܟܠ ܢܸܨܒܬ݂ܵܐ ܐܲܝܕ݂ܵܐ ܕܠܵܐ ܢܲܨܒܵܗ̇ ܐܵܒ݂ܝ ܕܒܲܫܡܲܝܵܐ. ܬܸܬ݂ܥܩܲܪ.

¹⁴ܫܒ݂ܘܿܩܘ ܠܗܘܿܢ. ܣܡܲܝܵܐ ܐܸܢܘܿܢ ܢܵܓ݂ܘܿܕ݂ܹ̈ܐ ܕܲܣ̈ܡܲܝܵܐ. ܣܲܡܝܵܐ ܕܹܝܢ ܠܣܲܡܝܵܐ ܐܸܢ ܢܸܕ݂ܒܲܪ: ܬܪܲܝܗܘܿܢ. ܒܓ݂ܘܼܡܵܨܵܐ ܢܵܦܠܝܼܢ.

¹⁵ܘܲܥܢܵܐ ܫܸܡܥܘܿܢ ܟܹܐܦܵܐ. ܘܐܸܡܲܪ ܠܹܗ. ܡܵܪܝ. ܦܲܫܸܩ ܠܲܢ ܡܲܬ݂ܠܵܐ ܗܵܢܵܐ.

¹⁶ܗܘܼ ܕܹܝܢ ܐܸܡܲܪ ܠܗܘܿܢ ܥܕ݂ܲܡܵܐ ܠܗܵܫܵܐ ܐܵܦ ܐܲܢ̄ܬܘܿܢ: ܠܵܐ ܡܸܣܬܲܟܠܝܼܢ ܐܢ̄ܬܘܿܢ:

¹⁷ܠܵܐ ܝܵܕ݂ܥܝܼܢ ܐܢ̄ܬܘܿܢ ܕܡܸܕܸܡ ܕܥܵܐܹܠ ܠܦܘܼܡܵܐ ܠܟܲܪܣܵܐ ܗܘܼ ܐܵܙܹܠ: ܘܡܸܢ ܬܲܡܵܢ ܒܬܲܕ݂ܟ݂ܝܼܬ݂ܵܐ ܡܸܫܬ݁ܕܹܐ ܠܒܲܪ:

¹⁸ܡܸܕܸܡ ܕܹܝܢ ܕܡܸܢ ܦܘܼܡܵܐ ܢܵܦܹܩ. ܡܸܢ ܠܸܒܵܐ ܢܵܦܹܩ. ܘܗܸܘܝܘܼ ܡܣܲܝܸܒ݂ ܠܹܗ ܠܒܲܪܢܵܫܵܐ.

¹⁹ܡܸܢ ܠܸܒܵܐ ܗܘܼ ܓܹܝܪ ܢܵܦܩܵܢ ܡܲܚܫ̈ܒ݂ܵܬ݂ܵܐ ܒܝܼ̈ܫܵܬ݂ܵܐ. ܓܲܘܪܵܐ. ܩܸܛܠܵܐ. ܙܵܢܝܘܼܬ݂ܵܐ. ܓܲܢܵܒ݂ܘܼܬ݂ܵܐ. ܣܵܗܕܘܼܬ݂ ܫܘܼܩܪܵܐ. ܓܘܼܕܿܦܵܐ.

²⁰ܗܵܠܹܝܢ ܐܸܢܹܝܢ ܕܲܡܣܲܝܒ݂ܵܢ ܠܒܲܪܢܵܫܵܐ. ܐܸܢ ܐ̄ܢܵܫ ܕܹܝܢ ܢܸܠܥܲܣ ܟܲܕ݂ ܠܵܐ ܡܫܵܓ݂ܵܢ ܐܝܼܕ݂ܵܘ̈ܗܝ. ܠܵܐ ܡܸܣܬܲܝܲܒ݂.

²¹ܘܲܢܦܲܩ ܡܸܢ ܬܲܡܵܢ ܝܼܫܘܿܥ: ܘܐܸܬ݂ܵܐ ܠܲܬ݂ܚܘܼܡܵܐ ܕܨܘܿܪ ܘܲܕ݂ܨܲܝܕܵܢ.

²²ܘܗܵܐ ܐܲܢ̄ܬ݁ܬ݂ܵܐ ܟܢܲܥܢܵܝܬܵܐ ܡܸܢ ܬܚܘܼܡܹ̈ܐ ܗܵܢܘܿܢ ܢܸܦܩܲܬ݂ ܟܲܕ݂ ܩܵܥܝܵܐ. ܘܐܵܡܪܵܐ. ܐܸܬ݂ܪܲܚܲܡ ܥܠܲܝ ܡܵܪܝ܅ ܒܪܹܗ ܕܕ݂ܵܘܝܼܕ݂. ܒܪܲܬ݂ܝ ܒܝܼܫܵܐܝܼܬ݂ ܡܸܬ݁ܕܲܒ݂ܪܵܐ ܡܸܢ ܫܹܐܕ݂ܵܐ.

²³ܗܘܼ ܕܹܝܢ ܠܵܐ ܦܲܢܝܵܗ̇ ܦܸܬ݂ܓ݂ܵܡܵܐ: ܘܲܩܪܸܒ݂ܘ ܬܲܠܡܝܼܕ݂ܵܘ̈ܗܝ ܒܥܵܘ ܡܸܢܗ. ܘܐܵܡܪܝܼܢ ܫܪܝܼܗ̇ ܕܩܵܥܝܵܐ ܒܵܬ݂ܪܲܢ.

²⁴ܗܘܼ ܕܹܝܢ ܥܢܵܐ ܘܐܸܡܲܪ ܠܗܘܿܢ ܠܵܐ ܐܸܫܬܲܕܪܹܬ݂. ܐܸܠܵܐ ܠܘܵܬ݂ ܥܸܪ̈ܒܹܐ ܕܲܛܥܵܘ ܡܸܢ ܒܹܝܬ݂ ܝܼܣܪܵܝܼܠ.

²⁵ܗܝܼ ܕܹܝܢ ܐܸܬ݂ܵܬ݂ ܣܸܓ݂ܕܲܬ݂ ܠܹܗ. ܘܐܸܡܪܲܬ݂. ܡܵܪܝ. ܥܲܕܲܪܲܝܢܝ.

²⁶ܐܸܡܲܪ ܠܵܗ̇. ܠܵܐ ܫܲܦܝܼܪ ܠܡܸܣܲܒ݂ ܠܲܚܡܵܐ ܕܲܒ݂ܢܲܝܵܐ. ܘܲܠܡܲܪܡܵܝܘܼ ܠܟܲܠܒܹ̈ܐ.

²⁷ܗܝܼ ܕܹܝܢ ܐܸܡܪܲܬ݂. ܐܹܝܢ ܡܵܪܝ܅ ܐܵܦ ܟܲܠܒܹ̈ܐ ܐܵܟ݂ܠܝܼܢ ܡܸܢ ܦܲܪ̈ܬܘܼܬܹܐ ܕܢܵܦܠܝܼܢ ܡܸܢ ܦܵܬ݂ܘܿܪܹ̈ܐ ܕܡܵܪ̈ܲܝܗܘܿܢ. ܘܚܵܐܹܝܢ.

²⁸ܗܵܝܕܹܝܢ ܐܸܡܲܪ ܠܵܗ̇ ܝܼܫܘܿܥ. ܐܘܿ ܐܲܢ̄ܬ݁ܬ݂ܵܐ. ܪܲܒܵܐ ܗܝ ܗܲܝܡܵܢܘܼܬܹܟ݂ܝ. ܢܸܗܘܹܐ ܠܹܟ݂ܝ ܐܲܝܟ݂ ܕܨܵܒ݂ܝܵܐ ܐܲܢ̄ܬ݁ܝ. ܘܐܸܬ݂ܐܲܣܝܲܬ݂ ܒܲܪܬ݂ܵܗ̇. ܡܸܢ ܗܵܝ ܫܵܥܬ݂ܵܐ.

²⁹ܘܫܲܢܝܼ ܡܸܢ ܬܲܡܵܢ ܝܼܫܘܿܥ: ܘܐܸܬ݂ܵܐ ܥܲܠ ܓܸ̄ܢܒ݂ ܝܲܡܵܐ ܕܲܓ݂ܠܝܼܠܵܐ. ܘܲܣܠܸܩ ܠܛܘܼܪܵܐ. ܘܝܼܬܸܒ݂ ܬܲܡܵܢ.

³⁰ܘܲܩܪܸܒ݂ܘ ܠܘܵܬܹܗ ܟܸܢܫܹ̈ܐ ܣܲܓܝܼܐܹ̈ܐ: ܕܐܝܼܬ݂ ܗ̄ܘܼܵܘ ܥܲܡܗܘܿܢ ܚܓ݂ܝܼܪܹ̈ܐ. ܘܲܣ̈ܡܲܝܵܐ. ܘܚܲܪ̈ܫܹܐ. ܘܲܦܫ̈ܝܼܓܹܐ: ܘܐܲܚܪܵ̈ܢܹܐ ܣܲܓܝܼܐܹ̈ܐ. ܘܐܲܪܡܝܼܘ ܐܸܢܘܿܢ ܠܘܵܬ݂ ܪܸ̈ܓ݂ܠܘܵܗܝ ܕܝܼܫܘܿܥ. ܘܐܲܣܝܼ ܐܸܢܘܿܢ.

³¹ܐܲܝܟ݂ ܕܢܸܬ݁ܕܲܡܪܘܼܢ ܟܸܢܫܹ̈ܐ ܗܵܢܘܿܢ ܕܚܵܙܹܝܢ: ܚܲܪ̈ܫܹܐ ܕܲܡܡܲܠܠܝܼܢ: ܘܲܦܫ̈ܝܼܓܹܐ ܕܡܸܬ݂ܚܲܠܡܝܼܢ: ܘܲܚܓ݂ܝܼܪܹ̈ܐ ܕܲܡܗܲܠܟ݂ܝܼܢ: ܘܲܣ̈ܡܲܝܵܐ ܕܚܵܙܹܝܢ. ܘܫܲܒܲܚܘ ܠܐܲܠܵܗܵܐ ܕܝܼܣܪܵܝܼܠ.

³²ܗܘܼ ܕܹܝܢ ܝܼܫܘܿܥ ܩܪܵܐ ܠܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܡܸܬ݂ܪܲܚܲܡ ܐ̄ܢܵܐ ܥܲܠ ܟܸܢܫܵܐ ܗܵܢܵܐ: ܕܗܵܐ ܬܠܵܬ݂ܵܐ ܝܵܘܡ̈ܝܼܢ ܩܵܘܝܼܘ ܠܘܵܬ݂ܝ: ܘܠܲܝܬ݁ ܠܗܘܿܢ ܡܵܐ ܕܢܹܐܟ݂ܠܘܼܢ. ܘܕܸܐܫܪܹܐ ܐܸܢܘܿܢ ܟܲܕ݂ ܨܵܝܡܝܼܢ. ܠܵܐ ܨܵܒܹܐ ܐ̄ܢܵܐ. ܕܲܠܡܵܐ ܢܥܘܼܦܘܼܢ ܒܐܘܼܪܚܵܐ.

³³ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܐܲܝܡܸܟܵܐ ܠܲܢ ܒܚܘܼܪܒܵܐ ܠܲܚܡܵܐ ܕܲܢܣܲܒܲܥ ܟܸܢܫܵܐ ܗܵܢܵܐ ܟܠܹܗ.

³⁴ܐܵܡܲܪ ܠܗܘܿܢ ܝܼܫܘܿܥ: ܟܡܵܐ ܠܲܚܡ̈ܝܼܢ ܐܝܼܬ݂ ܠܟ݂ܘܿܢ. ܐܵܡܪܝܼܢ ܠܹܗ ܫܲܒ݂ܥܵܐ. ܘܩܲܠܝܼܠ ܢܘܼܢܹ̈ܐ ܕܲܩܕܩܹ̈ܐ.

³⁵ܘܲܦܩܲܕ݂ ܠܟܸܢܫܹ̈ܐ ܕܢܸܣܬܲܡܟ݂ܘܼܢ ܥܲܠ ܐܲܪܥܵܐ.

³⁶ܘܲܫܩܲܠ ܠܗܵܠܹܝܢ ܫܲܒ݂ܥܵܐ ܠܲܚܡ̈ܝܼܢ ܘܲܠܢܘܼܢܹ̈ܐ: ܘܫܲܒܲܚ ܘܲܩܨܵܐ ܘܝܲܗ̄ܒ݂ ܠܬܲܠܡܝܼܕ݂ܵܘ̈ܗܝ. ܘܬܲܠܡܝܼܕ݂ܐ. ܝܲܗ̄ܒ݂ܘ ܠܟܸܢܫܹ̈ܐ.

³⁷ܘܐܸܟ݂ܲܠܘ ܟܠܗܘܿܢ. ܘܲܣܒܲܥܘ. ܘܲܫܩܲܠܘ ܬܲܘܬܵܪܹ̈ܐ ܕܲܩܨܵܝܹ̈ܐ ܡܠܹܐ ܫܲܒ݂ܥܵܐ ܐܸܣܦܪ̈ܝܼܕ݂ܝܼܢ.

³⁸ܗܵܢܘܿܢ ܕܹܝܢ ܕܐܸܟܲܠܘ: ܗܵܘܹܝܢ ܗ̄ܘܼܵܘ ܐܲܪܒܥܵܐ ܐܲܠܦ̈ܝܼܢ ܓܲܒ݂ܪܹ̈ܐ. ܣܛܲܪ ܡܸܢ ܢܸܫܹ̈ܐ ܘܲܛܠܵܝܹ̈ܐ.

³⁹ܘܟ݂ܲܕ݂ ܫܪܵܐ ܠܟܸܢܫܹ̈ܐ: ܣܠܸܩ ܠܐܸܠܦܵܐ. ܘܐܸܬ݂ܵܐ ܠܲܬ݂ܚܘܼܡܵܐ ܕܡܲܓ݂ܕ݁ܘܿ.