Read Aramaic Peshita Matthew 17 Bible Online

Matthew 17 - Aramaic Peshita bible

Matthew 17

¹ܘܒܵܬܲܪ ܫܬܵܐ ܝܲܘܡ̈ܝܼܢ: ܕܒܲܪ ܝܼܫܘܿܥ ܠܟܹܐܦܵܐ ܘܲܠܝܲܥܩܘܿܒ݂ ܘܲܠܝܘܿܚܲܢܵܢ ܐܲܚܘܼܗܝ: ܘܐܲܣܸܩ ܐܸܢܘܿܢ ܠܛܘܼܪܵܐ ܪܵܡܵܐ. ܒܲܠܚܘܿܕ݂ܲܝܗܘܿܢ.

²ܘܐܸܫܬܲܚܠܲܦ ܝܼܫܘܿܥ ܩܕ݂ܵܡܲܝܗܘܿܢ. ܘܲܢܗܲܪ ܦܲܪܨܘܿܦܹܗ. ܐܲܝܟ݂ ܫܸܡܫܵܐ. ܢܲܚܬܵܘ̈ܗܝ ܕܹܝܢ ܚܘܲܪܘ ܐܲܝܟ݂ ܢܘܼܗܪܵܐ.

³ܘܐܸܬ݂ܚܙܝܼܘ ܠܗܘܿܢ ܡܘܼܫܹܐ ܘܐܹܠܝܼܵܐ. ܟܲܕ݂ ܡܡܲܠܠܝܼܢ ܥܲܡܹܗ.

⁴ܥܢܵܐ ܕܹܝܢ ܟܹܐܦܵܐ. ܘܐܸܡܲܪ ܠܝܼܫܘܿܥ. ܡܵܪܝ: ܫܲܦܝܼܪ ܗܘܼ ܠܲܢ. ܕܲܬ݂ܢܵܢ ܢܸܗܘܹܐ. ܘܐܸܢ ܨܵܒܹܐ ܐܲܢ̄ܬ݁ ܢܸܥܒܸܕ݂ ܬܢܵܢ. ܬܠܵܬ݂ ܡܲܛ̈ܠܝܼܢ ܚܕ݂ܵܐ ܠܵܟ݂ ܘܲܚܕ݂ܵܐ ܠܡܘܼܫܹܐ. ܘܲܚܕ݂ܵܐ ܠܐܹܠܝܼܵܐ.

⁵ܘܥܲܕ݂ ܗܘܼ ܡܡܲܠܸܠ: ܗܵܐ ܥܢܵܢܵܐ ܢܲܗܝܼܪܬܵܐ ܐܲܛܠܲܬ݂ ܥܠܲܝܗܘܿܢ ܘܩܵܠܵܐ ܗܘ̣ܵܐ ܡܸܢ ܥܢܵܢܵܐ ܕܐܡܲܪ. ܗܵܢܵܘ ܒܹܪܝ ܚܲܒܝܼܒ݂ܵܐ ܕܒܹܗ ܐܸܨܛܒ݂ܝܼܬ݂. ܠܹܗ ܫܡܲܥܘ.

⁶ܘܟ݂ܲܕ݂ ܫܡܲܥܘ ܬܲܠܡܝܼܕ݂ܐ: ܢܦܲܠܘ ܥܲܠ ܐܲܦܲܝ̈ܗܘܿܢ. ܘܲܕ݂ܚܸܠܘ ܛܵܒ݂.

⁷ܘܐܸܬ݂ܩܲܪܲܒ݂ ܠܘܵܬ݂ܗܘܿܢ ܝܼܫܘܿܥ: ܘܲܩܪܸܒ݂ ܠܗܘܿܢ. ܘܐܸܡܲܪ. ܩܘܼܡܘ. ܠܵܐ ܬܸܕ݂ܚܠܘܼܢ.

⁸ܘܐܲܪܝܼܡܘ ܥܲܝܢܲܝ̈ܗܘܿܢ ܘܲܠܐ̄ܢܵܫ ܠܵܐ ܚܙܵܘ: ܐܸܠܵܐ ܐܸܢ ܠܝܼܫܘܿܥ ܒܲܠܚܘܿܕ݂ܵܘܗܝ.

⁹ܘܟ݂ܲܕ݂ ܢܵܚܬ݁ܝܼܢ ܡܸܢ ܛܘܼܪܵܐ: ܦܲܩܸܕ݂ ܐܸܢܘܿܢ ܝܼܫܘܿܥ. ܘܐܸܡܲܪ ܠܗܘܿܢ ܠܥܹܝܢ ܐ̄ܢܵܫ. ܠܵܐ ܬܹܐܡܪܘܼܢ ܚܸܙܘܵܐ ܗܵܢܵܐ: ܥܕ݂ܲܡܵܐ ܕܲܢܩܘܼܡ ܒܪܹܗ ܕܐ̄ܢܵܫܵܐ ܡܸܢ ܡ̈ܝܼܬܹܐ.

¹⁰ܘܫܲܐܠܘܼܗܝ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܠܹܗ. ܡܵܢܵܐ ܗܵܟܹܝܠ ܣܵܦܪܹ̈ܐ ܐܵܡܪܝܼܢ: ܕܐܹܠܝܼܵܐ ܘܵܠܹܐ ܕܢܹܐܬܹܐ ܠܘܼܩܕ݂ܲܡ.

¹¹ܥܢܵܐ ܝܼܫܘܿܥ ܘܐܸܡܲܪ. ܐܹܠܝܼܵܐ ܐܵܬܹܐ ܠܘܼܩܕ݂ܲܡ: ܕܟܠ ܡܸܕܸܡ ܢܫܲܠܸܡ.

¹²ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ: ܕܗܵܐ ܐܹܠܝܼܵܐ ܐܸܬ݂ܵܐ. ܘܠܵܐ ܝܲܕ݂ܥܘܼܗܝ. ܘܲܥܒܲܕ݂ܘ ܒܹܗ ܟܠܡܵܐ ܕܲܨܒ݂ܵܘ. ܗܵܟܲܢܵܐ ܐܵܦ ܒܪܹܗ ܕܐ̄ܢܵܫܵܐ ܥܬ݂ܝܼܕ݂ ܕܢܸܚܲܫ ܡܸܢܗܘܿܢ.

¹³ܗܵܝܕܹܝܢ ܐܸܣܬܲܟܲܠܘ ܬܲܠܡܝܼܕܹ̈ܐ. ܕܥܲܠ ܝܘܿܚܲܢܵܢ ܡܲܥܡܕ݂ܵܢܵܐ ܐܸܡܲܪ ܠܗܘܿܢ.

¹⁴ܘܟ݂ܲܕ݂ ܐܸܬ݂ܵܘ ܠܘܵܬ݂ ܟܸܢܫܵܐ: ܩܪܸܒ݂ ܠܹܗ ܓܲܒ݂ܪܵܐ. ܘܲܒ݂ܪܸܟ݂ ܥܲܠ ܒܘܼܪ̈ܟܵܘܗܝ.

¹⁵ܘܐܸܡܲܪ ܠܹܗ. ܡܵܪܝ: ܐܸܬ݂ܪܲܚܲܡ ܥܠܲܝ. ܒܹܪܝ ܕܐܝܼܬ݂ ܠܹܗ ܒܲܪ ܐܸܓܵܪܵܐ. ܘܒ݂ܝܼܫܵܐܝܼܬ݂ ܥܒ݂ܝܼܕ݂. ܟܡܵܐ ܓܹܝܪ ܙܲܒ݂ܢܝܼ̈ܢ ܒܢܘܼܪܵܐ ܢܵܦܹܿܠ: ܘܲܟ݂ܡܵܐ ܙܲܒ݂ܢܝܼ̈ܢ ܒܡܲܝ̈ܵܐ.

¹⁶ܘܩܲܪܸܒ݂ܬܹܗ ܠܬܲܠܡܝܼܕ݂ܲܝ̈ܟ. ܘܠܵܐ ܐܸܫܟܲܚܘ ܠܡܲܐܣܵܝܘܼܬܹܗ.

¹⁷ܥܢܵܐ ܝܼܫܘܿܥ. ܘܐܸܡܲܪ. ܐܘܿܢ ܫܲܪܒܿܬ݂ܵܐ ܕܠܵܐ ܡܗܲܝܡܢܵܐ ܘܲܡܥܲܩܲܠܬܵܐ. ܥܕ݂ܲܡܵܐ ܠܐܸܡܲܬ݂ܝ ܐܸܗܘܹܐ ܥܲܡܟ݂ܘܿܢ ܘܲܥܕ݂ܲܡܵܐ ܠܐܸܡܲܬ݂ܝ ܐܹܣܲܝܒܲܪܟ݂ܘܿܢ ܐܲܝܬܵܝܗܝ ܠܝܼ ܠܟ݂ܐ.

¹⁸ܘܲܟ݂ܐܵܐ ܒܹܗ ܝܼܫܘܿܥ: ܘܲܢܦܲܩ ܡܸܢܗ ܫܹܐܕ݂ܵܐ. ܘܐܸܬ݂ܐܲܣܝܼ ܛܲܠܝܵܐ ܡܸܢ ܗܵܝ ܫܵܥܬ݂ܵܐ.

¹⁹ܗܵܝܕܹܝܢ ܩܪܸܒ݂ܘ ܬܲܠܡܝܼܕ݂ܹ̈ܐ ܠܘܵܬ݂ ܝܼܫܘܿܥ ܒܲܠܚܘܿܕ݂ܵܘܗܝ. ܘܐܸܡܲܪܘ ܠܹܗ. ܠܡܵܢܵܐ ܚܢܲܢ ܠܵܐ ܐܸܫܟܲܚܢ ܠܡܲܐܣܵܝܘܼܬܹܗ.

²⁰ܐܵܡܲܪ ܠܗܘܿܢ ܝܼܫܘܿܥ. ܡܛܠ ܠܵܐ ܗܲܝܡܵܢܘܼܬ݂ܟ݂ܘܿܢ. ܐܵܡܹܝܢ ܓܹܝܪ ܐܵܡܲܪ ܐ̄ܢܵܐ ܠܟ݂ܘܿܢ: ܕܐܢ ܬܸܗܘܹܐ ܒܟ݂ܘܿܢ ܗܲܝܡܵܢܘܼܬ݂ܵܐ ܐܲܝܟ݂ ܦܪܸܕ݂ܬܵܐ ܕܚܲܪܕܠܵܐ: ܬܹܐܡܪܘܼܢ ܠܛܘܼܪܵܐ ܗܵܢܵܐ: ܕܫܲܢܵܐ ܡܸܟܵܐ. ܘܲܢܫܲܢܹܐ: ܘܡܸܕܸܡ ܠܵܐ ܢܸܚܣܲܢܟ݂ܘܿܢ.

²¹ܗܵܢܵܐ ܕܹܝܢ ܓܸܢܣܵܐ ܠܵܐ ܢܵܦܹܩ ܐܸܠܵܐ ܒܨܵܘܡܵܐ. ܘܒܲܨܠܘܿܬ݂ܵܐ.

²²ܟܲܕ݂ ܡܸܬ݂ܗܲܦܟ݂ܝܼܢ ܕܹܝܢ ܒܲܓ݂ܠܝܼܠܵܐ: ܐܸܡܲܪ ܠܗܘܿܢ ܝܼܫܘܿܥ. ܥܬ݂ܝܼܕ݂ ܗܘܼ ܒܪܹܗ ܕܐ̄ܢܵܫܵܐ ܕܢܸܫܬ݁ܠܸܡ ܒܐܝܕ݂ܲܝ̈ ܒܢܲܝ̈ܢܵܫܵܐ.

²³ܘܢܸܩܛܠܘܼܢܵܝܗܝ ܘܲܠܝܵܘܡܵܐ ܕܲܬ݂ܠܵܬ݂ܵܐ ܢܩܘܼܡ. ܘܟܸܪܝܲܬܸ ܠܗܘܿܢ ܛܵܒ݂.

²⁴ܘܟܲܕ݂ ܐܸܬ݂ܵܘ ܠܲܟ݂ܦܲܪܢܵܚܘܿܡ: ܩܪܸܒ݂ܘ ܗܵܢܘܿܢ ܕܢܵܣܒܝܼܢ ܬܪܹܝܢ ܬܪܹܝܢ ܙܘܼܙ̈ܝܼܢ ܕܲܟ݂ܣܸܦ ܪܹܫܵܐ ܠܘܵܬ݂ ܟܹܐܦܵܐ. ܘܐܸܡܲܪܘ ܠܹܗ. ܪܲܒܟ݂ܘܿܢ ܠܵܐ ܝܵܗܹܒ݂ ܬܪܹܝܢ ܙܘܼܙܵܘ̈ܗܝ.

²⁵ܐܵܡܲܪ ܠܗܘܿܢ ܐܹܝܢ. ܘܟܲܕ݂ ܥܲܠ ܟܹܐܦܵܐ ܠܒܲܝܬܵܐ: ܩܲܕܡܹܗ ܝܼܫܘܿܥ. ܘܐܸܡܲܪ ܠܹܗ. ܡܵܢܵܐ ܡܸܬ݂ܚܙܹܐ ܠܵܟ݂ ܫܸܡܥܘܿܢ ܡܲܠܟܹܝ̈ܗ̇ ܕܐܲܪܥܵܐ: ܡܸܢ ܡܲܢ ܢܵܣܒܿܝܼܢ ܡܲܟ݂ܣܵܐ ܘܲܟ݂ܣܸܦ ܪܹܫܵܐ. ܡܲܢ ܒܢܲܝ̈ܗܘܿܢ. ܐܵܘ ܡܸܢ ܢܘܼܟ݂ܪ̈ܵܝܹܐ.

²⁶ܐܵܡܲܪ ܠܹܗ ܫܸܡܥܘܿܢ. ܡܸܢ ܢܘܼܟ݂ܪ̈ܵܝܹܐ. ܐܵܡܲܪ ܠܹܗ ܝܼܫܘܿܥ. ܡܵܕܹܝܢ ܒܢܲܝ̈ ܚܹܐܪܹ̈ܐ ܐܸܢܘܿܢ ܒܢܲܝܵܐ.

²⁷ܕܠܵܐ ܕܹܝܢ ܢܲܟ݂ܫܸܠ ܐܸܢܘܿܢ ܙܸܠ ܠܝܲܡܵܐ. ܘܐܲܪܡܵܐ ܒܲܠܘܼܥܵܐ. ܘܢܘܼܢܵܐ ܩܲܕ݂ܡܵܝܵܐ ܕܣܵܠܹܩ: ܦܬܲܚ ܦܘܼܡܹܗ. ܘܬܸܫܟܲܚ ܐܸܣܬܹܪܵܐ. ܗܵܝ ܣܲܒ݂: ܘܗܲܒ݂ ܚܠܵܦܲܝ. ܘܲܚܠܵܦܲܝܟ.