Read Aramaic Peshita Matthew 19 Bible Online

Matthew 19 - Aramaic Peshita bible

Matthew 19

¹ܘܲܗܘܵܐ ܕܟ݂ܲܕ݂ ܫܲܠܸܡ ܝܼܫܘܿܥ ܡܸܠܹ̈ܐ ܗܵܠܹܝܢ: ܫܩܲܠ ܡܸܢ ܓܠܝܼܠܵܐ: ܘܐܸܬ݂ܵܐ ܠܲܬ݂ܚܘܼܡܵܐ ܕܝܼܗܘܼܕ݂. ܠܥܸܒ݂ܪܵܐ ܕܝܘܿܪܕܢܵܢ.

²ܘܐܸܬ݂ܵܘ ܒܵܬ݂ܪܹܗ ܟܸܢܫܹ̈ܐ ܣܲܓܝܼܐܹ̈ܐ: ܘܐܲܣܝܼ ܐܸܢܘܿܢ ܬܲܡܵܢ.

³ܘܲܩܪܸܒ݂ܘ ܠܘܵܬܹܗ ܦܪ̈ܝܼܫܹܐ: ܘܲܡܢܲܣܹܝܢ ܗ̄ܘܼܵܘ ܠܹܗ ܘܐܵܡܪܝܼܢ. ܐܸܢ ܫܲܠܝܼܛ ܠܐ̄ܢܵܫ ܕܢܸܫܪܹܐ ܐܲܢ̄ܬ݁ܬܹܗ ܒܟ݂ܠ ܥܸܠܵܐ.

⁴ܗܘܼ ܕܹܝܢ ܥܢܵܐ ܘܐܸܡܲܪ ܠܗܘܿܢ ܠܵܐ ܩܪܲܝܬ݂ܘܿܢ ܕܗܵܘ ܕܲܥܒܲܕ݂ ܡܸܢ ܒܪܵܫܝܼܬ݂: ܕܸܟ݂ܪܵܐ ܘܢܸܩܒܬ݂ܵܐ ܥܒܲܕ݂ ܐܸܢܘܿܢ:

⁵ܘܐܸܡܲܪ. ܡܛܠ ܗܵܢܵܐ ܢܸܫܒܘܼܩ ܓܲܒ݂ܪܵܐ ܠܐܲܒ݂ܘܼܗܝ ܘܠܸܐܡܹܗ. ܘܢܸܩܲܦ ܠܐܲܢ̄ܬ݁ܬܹܗ. ܘܢܸܗܘܘܿܢ ܬܪܲܝܗܘܿܢ. ܚܲܕ݂ ܒܣܲܪ.

⁶ܡܵܕܹܝܢ ܠܵܐ ܗܘܵܘ ܬܪܹܝܢ ܐܸܠܵܐ ܚܲܕ݂ ܦܓܲܪ. ܡܸܕܸܡ ܗܵܟܹܝܠ ܕܐܲܠܵܗܵܐ ܙܵܘܸܓ: ܒܲܪܢܵܫܵܐ ܠܵܐ ܢܦܲܪܸܫ.

⁷ܐܵܡܪܝܼܢ ܠܹܗ. ܠܡܵܢܵܐ ܗܵܟܹܝܠ ܡܘܼܫܹܐ ܦܲܩܸܕ݂: ܕܢܸܬܸ݁ܠ ܟܬ݂ܵܒ݂ܵܐ ܕܫܘܼܒ݂ܩܵܢܵܐ. ܘܢܸܫܪܹܝܗ̇.

⁸ܐܵܡܲܪ ܠܗܘܿܢ. ܡܘܼܫܹܐ. ܠܘܼܩܒܲܠ ܩܲܫܝܘܼܬ݂ ܠܸܒܟ݂ܘܿܢ ܐܲܦܸܣ ܠܟ݂ܘܿܢ ܕܬܸܫܪܘܿܢ ܢܸܫܲܝ̈ܟܿܘܿܢ. ܡܸܢ ܒܪܵܫܝܼܬ݂ ܕܹܝܢ. ܠܵܐ ܗܘ̣ܵܐ ܗܵܟܲܢܵܐ.

⁹ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ: ܕܡܲܢ ܕܫܵܒܹܩ ܐܲܢ̄ܬ݁ܬܹܗ ܕܠܵܐ ܓܵܘܪܵܐ: ܘܢܵܣܹܒ݂ ܐ̄ܚܪܹܬ݂ܵܐ. ܓܵܐܲܪ. ܘܡܲܢ ܕܢܵܣܹܒ݂ ܫܒ݂ܝܼܩܬܵܐ. ܓܵܐܲܪ.

¹⁰ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܐܸܢ ܗܵܟܲܢܵܐ ܐܝܼܬ݂ ܥܸܕ݂ܠܵܝܵܐ ܒܲܝܢܲܝ ܓܲܒ݂ܪܵܐ ܠܐܲܢ̄ܬ݁ܬ݂ܵܐ: ܠܵܐ ܦܲܩܵܚ ܠܡܸܣܒ݂ ܐܲܢ̄ܬ݁ܬ݂ܵܐ.

¹¹ܗܘܼ ܕܹܝܢ ܐܸܡܲܪ ܠܗܘܿܢ. ܠܵܐ ܟܠܢܵܫ ܣܵܦܹܩ ܠܵܗ̇ ܠܡܸܠܬ݂ܵܐ ܗܵܕܹܐ: ܐܸܠܵܐ ܡܲܢ ܕܝܼܗܝܼܒ݂ ܠܹܗ.

¹²ܐܝܼܬ݂ ܓܹܝܪ ܡܗܲܝܡܢܹ̈ܐ. ܕܡܸܢ ܟܲܪܣܵܐ ܕܐܸܡܗܘܿܢ ܐܸܬ݂ܝܼܠܸܕ݂ܘ ܗܵܟܲܢܵܐ. ܘܐܝܼܬ݂ ܡܗܲܝܡܢܹ̈ܐ. ܕܡܸܢ ܒܢܲܝ̈ܢܵܫܵܐ ܗܘܵܘ ܡܗܲܝܡܢܹ̈ܐ. ܘܐܝܼܬ݂ ܡܗܲܝܡܢܹ̈ܐ: ܕܗܸܢܘܿܢ ܥܒܲܕ݂ܘ ܢܲܦ̮ܫܗܘܿܢ ܡܗܲܝܡܢܹ̈ܐ. ܡܛܠ ܡܲܠܟܘܼܬ݂ܵܐ ܕܲܫܡܲܝܵܐ. ܡܲܢ ܕܡܸܫܟܲܚ ܕܢܸܣܦܲܩ. ܢܸܣܦܲܩ.

¹³ܗܵܝܕܹܝܢ ܩܲܪܸܒ݂ܘ ܠܹܗ ܛܠܵܝܹ̈ܐ ܕܲܢܣܝܼܡ ܐܝܼܕ݂ܗ ܥܠܲܝܗܘܿܢ. ܘܲܢܨܲܠܹܐ. ܘܲܟ݂ܐܵܘ ܒܗܘܿܢ ܬܲܠܡܝܼܕ݂ܵܘ̈ܗܝ.

¹⁴ܗܘܼ ܕܹܝܢ ܝܼܫܘܿܥ ܐܸܡܲܪ ܠܗܘܿܢ. ܫܒ݂ܘܿܩܘ ܛܠܵܝܹ̈ܐ ܐܵܬܹ݁ܝܢ ܠܘܵܬ݂ܝ. ܘܠܵܐ ܬܸܟ݂ܠܘܿܢ ܐܸܢܘܿܢ. ܕܕ݂ܲܐܝܠܹܝܢ ܓܹܝܪ ܕܐܲܝܟ݂ ܗܵܠܹܝܢ ܐܸܢܘܿܢ. ܐܝܼܬܹܝܗ̇ ܡܲܠܟܘܼܬ݂ܵܐ ܕܲܫܡܲܝܵܐ.

¹⁵ܘܣܵܡ ܐܝܼܕ݂ܗ ܥܠܲܝܗܘܿܢ. ܘܐܸܙܲܠ ܡܸܢ ܬܲܡܵܢ.

¹⁶ܘܐܸܬ݂ܵܐ ܚܲܕ݂ ܩܪܸܒ݂ ܘܐܸܡܲܪ ܠܹܗ. ܡܲܠܦܵܢܵܐ ܛܵܒ݂ܵܐ: ܡܵܢܵܐ ܕܛܵܒ݂ ܐܸܥܒܸܕ݂ ܕܢܸܗܘܘܿܢ ܠܝܼ ܚܲܝܹ̈ܐ ܕܲܠܥܵܠܲܡ.

¹⁷ܗܘܼ ܕܹܝܢ ܐܸܡܲܪ ܠܹܗ. ܡܵܢܵܐ ܩܵܪܹܐ ܐܲܢ̄ܬ݁ ܠܝܼ ܛܵܒ݂ܵܐ. ܠܲܝܬ݁ ܛܵܒ݂ܵܐ. ܐܸܠܵܐ ܐܸܢ ܚܲܕ݂ ܐܲܠܵܗܵܐ. ܐܸܢ ܕܹܝܢ ܨܵܒܹܐ ܐܲܢ̄ܬ݁ ܕܬܸܥܘܿܠ ܠܚܲܝܹ̈ܐ. ܛܲܪ ܦܘܼܩܕܵܢܹ̈ܐ.

¹⁸ܐܵܡܲܪ ܠܹܗ ܐܲܝܠܹܝܢ. ܗܘܼ ܕܹܝܢ ܝܼܫܘܿܥ. ܐܸܡܲܪ ܠܹܗ. ܕܠܵܐ ܬܸܩܛܘܼܠ. ܘܠܵܐ ܬܓ݂ܘܼܪ. ܘܠܵܐ ܬܸܓ݂ܢܘܼܒ݂. ܘܠܵܐ ܬܸܣܗܲܕ݂ ܣܵܗܕ݂ܘܼܬ݂ ܫܘܼܩܪܵܐ.

¹⁹ܘܝܲܩܲܪ ܠܐܲܒ݂ܘܼܟ݂. ܘܠܸܐܡܵܟ݂. ܘܬܲܚܸܒ݂ ܠܩܲܪܝܼܒ݂ܵܟ݂. ܐܲܝܟ݂ ܢܲܦ̮ܫܵܟ݂.

²⁰ܐܵܡܲܪ ܠܹܗ ܗܵܘ ܥܠܲܝܡܵܐ. ܗܵܠܹܝܢ ܟܠܗܹܝܢ ܢܸܛܪܹܬ݂ ܐܸܢܹܝܢ ܡܸܢ ܛܲܠܝܘܼܬ݂ܝ. ܡܵܢܵܐ ܚܣܝܼܪ ܐ̄ܢܵܐ.

²¹ܐܵܡܲܪ ܠܹܗ ܝܼܫܘܿܥ. ܐܸܢ ܨܵܒܹܐ ܐܲܢ̄ܬ݁ ܓܡܝܼܪܵܐ ܠܡܸܗܘܵܐ: ܙܸܠ ܙܲܒܸܢ ܩܸܢܝܵܢܵܟ݂. ܘܗܲܒ݂ ܠܡܸܣܟܹܢܹ̈ܐ. ܘܬܸܗܘܹܐ ܠܵܟ݂ ܣܝܼܡܬ݂ܵܐ ܒܲܫܡܲܝܵܐ. ܘܬ݂ܵܐ ܒܵܬܲܪܝ.

²²ܫܡܲܥ ܕܹܝܢ ܗܵܘ ܥܠܲܝܡܵܐ ܡܸܠܬ݂ܵܐ ܗܵܕܹܐ: ܘܐܸܙܲܠ. ܟܲܕ݂ ܟܲܪܝܵܐ ܠܹܗ. ܐܝܼܬ݂ ܗܘ̣ܵܐ ܠܹܗ ܓܹܝܪ ܩܸܢܝܵܢܵܐ ܣܲܓܿܝܼܵܐܐ.

²³ܝܼܫܘܿܥ ܕܹܝܢ ܐܸܡܲܪ ܠܬܲܠܡܝܼܕ݂ܵܘ̈ܗܝ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܥܲܛܠܵܐ ܗܝ ܠܥܲܬ݁ܝܼܪܵܐ ܕܢܸܥܘܿܠ ܠܡܲܠܟܿܘܼܬ݂ ܫܡܲܝܵܐ.

²⁴ܬܘܼܒ݂ ܕܹܝܢ ܐܵܡܲܪܢܵܐ ܠܟ݂ܘܿܢ: ܕܲܕ݂ܠܝܼܠ ܗܘܼ ܠܓܲܡܠܵܐ ܠܡܸܥܠ ܒܲܚܪܘܿܪܵܐ ܕܲܡܚܲܛܵܐ. ܐܵܘ ܥܲܬ݁ܝܼܪܵܐ ܕܢܸܥܘܿܠ ܠܡܲܠܟܘܼܬ݂ܵܐ ܕܐܲܠܵܗܵܐ.

²⁵ܬܲܠܡܝܼܕ݂ܹ̈ܐ ܕܹܝܢ ܟܲܕ݂ ܫܡܲܥܘ: ܬܲܗܝܼܪ̈ܝܼܢ ܗ̄ܘܼܵܘ ܛܵܒ݂. ܘܐܵܡܪܝܼܢ. ܡܲܢܘܼ ܟܲܝ ܡܸܫܟܲܚ ܕܢܸܚܹܐ.

²⁶ܚܵܪ ܒܗܘܿܢ ܝܼܫܘܿܥ. ܘܐܸܡܲܪ ܠܗܘܿܢ. ܠܘܵܬ݂ ܒܢܲܝ̈ܢܵܫܵܐ ܗܵܕܹܐ ܠܵܐ ܡܸܫܟܚܵܐ. ܠܘܵܬ݂ ܐܲܠܵܗܵܐ ܕܹܝܢ ܟܠܡܸܕܸܡ ܡܸܫܟܚܵܐ.

²⁷ܗܵܝܕܹܝܢ ܥܢܵܐ ܟܹܐܦܵܐ. ܘܐܸܡܲܪ ܠܹܗ. ܗܵܐ ܐܸܢܲܚܢܲܢ ܫܒܲܩܢ ܟܠܡܸܕܸܡ ܘܐܸܬܲܝܢ ܒܵܬ݂ܪܵܟ݂. ܡܵܢܵܐ ܟܲܝ ܢܸܗܘܹܐ ܠܲܢ.

²⁸ܐܵܡܲܪ ܠܗܘܿܢ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܐܲܢ̄ܬ݁ܘܿܢ ܕܐܬܲܝܬ݁ܘܿܢ ܒܵܬܲܪܝ: ܒܥܵܠܡܵܐ ܚܲܕ݂ܬ݂ܵܐ ܡܵܐ ܕܝܵܬܹܒ݂ ܒܪܹܗ ܕܐ̄ܢܵܫܵܐ ܥܲܠ ܬܪܘܿܢܘܿܣ ܕܫܘܼܒ݂ܚܹܗ ܬܸܬ݁ܒ݂ܘܼܢ ܐܵܦ ܐܲܢ̄ܬ݁ܘܿܢ ܥܲܠ ܬܪܸܥܣܲܪ ܟܘܼܪ̈ܣܵܘܵܢ: ܘܲܬ݁ܕ݂ܘܼܢܘܼܢ ܬܪܸܥܣܲܪ ܫܲܒ݂̈ܛܹܐ ܕܝܼܣܪܵܝܹܠ.

²⁹ܘܟ݂ܠܢܵܫ ܕܫܵܒܹܩ ܒܵܬܹ̈ܐ: ܐܵܘ ܐܲܚܹ̈ܐ ܐܵܘ ܐܲܚ̈ܘܵܬ݂ܵܐ: ܐܵܘ ܐܲܒ݂ܵܐ ܐܵܘ ܐܸܡܵܐ: ܐܵܘ ܐܲܢ̄ܬ݁ܬ݂ܵܐ ܐܵܘ ܒ̈ܢܲܝܵܐ: ܐܵܘ ܩܘܼܪ̈ܝܵܐ ܡܛܠ ܫܹܡܝ: ܚܲܕ݂ ܒܲܡܵܐܐ ܢܩܲܒܸܠ: ܘܚܲܝܹ̈ܐ ܕܲܠܥܵܠܲܡ ܢܹܐܪܲܬ݂.

³⁰ܣܲܓܝܼܐܹ̈ܐ ܕܹܝܢ ܩܲܕ݂ܡܵܝܹ̈ܐ ܕܢܸܗܘܘܿܢ ܐ̄ܚܪ̈ܵܝܹ̈ܐ: ܘܐܲܚܪ̈ܵܝܹ̈ܐ. ܩܲܕ݂ܡܵܝܹ̈ܐ.