Read Aramaic Peshita Matthew 2 Bible Online

Matthew 2 - Aramaic Peshita bible

Matthew 2

¹ܟܲܕ݂ ܕܹܝܢ ܐܸܬ݂ܝܼܠܸܕ݂ ܝܼܫܘܿܥ ܒܒܹܝܬ݂ܠܚܸܡ ܕܲܝܗܘܼܕ݂ܵܐ: ܒܝܲܘܡܲܝ̈ ܗܹܪܘܿܕܸܣ ܡܲܠܟܵܐ: ܐܸܬ݂ܵܘ ܡܓܹܘܼܫܹ̈ܐ ܡܸܢ ܡܲܕ݂ܢܚܵܐ ܠܐܘܿܪܸܫܠܸܡ.

²ܘܵܐܡܪܝܼܢ. ܐܲܝܟܵܘ ܡܲܠܟܵܐ ܕܲܝܗܘܼܕ݂ܵܝܹ̈ܐ ܕܐܸܬ݂ܝܼܠܸܕ݂. ܚܙܲܝܢ ܓܹܝܪ ܟܵܘܟܒܹܗ ܒܡܲܕ݂ܢܚܵܐ: ܘܐܸܬ݂ܲܝܢ ܠܡܸܣܓܲܕ݂ ܠܹܗ.

³ܫܡܲܥ ܕܹܝܢ ܗܹܪܘܿܕܸܣ ܡܲܠܟܵܐ. ܘܐܸܬ݁ܬ݁ܙܝܼܥ: ܘܟ݂ܠܵܗ̇ ܐܘܿܪܸܫܠܸܡ ܥܲܡܹܗ.

⁴ܘܟܲܢܸܫ ܟܠܗܘܿܢ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܕܥܲܡܵܐ: ܘܲܡܫܲܐܸܠ ܗܘ̣ܵܐ ܠܗܘܿܢ. ܕܲܐܝܟܵܐ ܡܸܬ݂ܝܼܠܸܕ݂ ܡܫܝܼܚܵܐ.

⁵ܗܸܢܘܿܢ ܕܹܝܢ ܐܸܡܲܪܘ. ܒܒܹܝܬ݂ܠܚܸܡ ܕܲܝܗܘܼܕ݂ܵܐ. ܗܵܟܲܢܵܐ ܓܹܝܪ ܟܬ݂ܝܼܒ݂ ܒܲܢܒ݂ܝܼܵܐ.

⁶ܐܵܦ ܐܲܢ̄ܬܝ ܒܹܝܬ݂ܠܚܸܡ ܕܲܝܗܘܼܕ݂ܵܐ: ܠܵܐ ܗܘܲܝܬܝ ܒܨܝܼܪܵܐ ܒܡܲܠܟܹ̈ܐ ܕܲܝܗܘܼܕ݂ܵܐ. ܡܸܢܹܟ݂ܝ ܓܹܝܪ ܢܸܦܘܼܩ ܡܲܠܟܵܐ: ܕܗܘܼ ܢܸܪܥܹܝܘܗܝ ܠܥܲܡܝ ܝܼܣܪܵܝܹܠ.

⁷ܗܵܝܕܹܝܢ ܗܹܪܘܿܕܸܣ ܡܲܛܫܝܵܐܝܼܬ݂ ܩܪܵܐ ܠܲܡܓ݂ܘܼܫܹ̈ܐ: ܘܝܼܠܸܦ ܡܸܢܗܘܿܢ ܒܐܲܝܢܵܐ ܙܲܒ݂ܢܵܐ ܐܸܬ݂ܚܙܝܼ ܠܗܘܿܢ ܟܲܘܟܒ݂ܵܐ.

⁸ܘܫܲܕܲܪ ܐܸܢܘܿܢ ܠܒܹܝܬ݂ܠܚܸܡ. ܘܐܸܡܲܪ ܠܗܘܿܢ: ܙܸܠܘ ܥܲܩܸܒ݂ܘ. ܥܲܠ ܛܲܠܝܵܐ. ܚܦܝܼܛܵܐܝܼܬ݂. ܘܡܵܐ ܕܐܫܟܲܚܬ݁ܘܿܢܵܝܗܝ. ܬܵܘ ܚܵܘܵܐܘܼܢܝ. ܕܐܵܦ ܐܸܢܵܐ ܐܹܙܲܠ ܐܸܣܓܘܿܕ݂ ܠܹܗ.

⁹ܗܸܢܘܿܢ ܕܹܝܢ ܟܲܕ݂ ܫܡܲܥܘ ܡܸܢ ܡܲܠܟܵܐ ܐܸܙܲܠܘ. ܘܗܵܐ ܟܵܘܟܒ݂ܵܐ ܗܵܘ ܕܲܚܙܵܘ ܒܡܲܕ݂ܢܚܵܐ ܐܵܙܹܠ ܗܘ̣ܵܐ ܩܕ݂ܵܡܲܝܗܘܿܢ: ܥܕ݂ܲܡܵܐ ܕܐܬ݂ܵܐ ܩܵܡ ܠܥܸܠ ܡܸܢ ܐܲܝܟܵܐ ܕܐܝܬ݂ܵܘܗܝ ܛܲܠܝܵܐ.

¹⁰ܟܲܕ݂ ܕܹܝܢ ܚܙܵܐܘܼܗܝ ܠܟ݂ܵܘܟܒ݂ܵܐ. ܚܕ݂ܝܼܘ ܚܲܕ݂ܘܼܬ݂ܵܐ ܪܲܒܬ݂ܵܐ ܕܛܵܒ݂.

¹¹ܘܥܲܠܘ ܠܒܲܝܬܵܐ: ܘܲܚܙܵܐܘܼܗܝ ܠܛܲܠܝܵܐ ܥܲܡ ܡܲܪܝܲܡ ܐܸܡܹܗ. ܘܲܢܦܲܠܘ ܣܓܸܕ݂ܘ ܠܹܗ. ܘܲܦܬܲܚܘ ܣܝܼܡܵܬ݂ܗܘܿܢ: ܘܩܲܪܸܒ݂ܘ ܠܹܗ ܩܘܼܪ̈ܒܵܢܹܐ. ܕܲܗܒ݂ܵܐ. ܘܡܘܼܪܵܐ. ܘܲܠܒ݂ܘܼܢ̄ܬ݂ܵܐ.

¹²ܘܐܸܬ݂ܚܙܝܼ ܠܗܘܿܢ ܒܚܸܠܡܵܐ: ܕܠܵܐ ܢܸܗܦܟ݂ܘܼܢ ܠܘܵܬ݂ ܗܹܪܘܿܕܸܣ. ܘܲܒ݂ܐܘܼܪܚܵܐ ܐ̄ܚܪܹܬ݂ܵܐ ܐܸܙܲܠܘ ܠܐܲܬ݂ܪܗܘܿܢ.

¹³ܟܲܕ݂ ܕܹܝܢ ܐܸܙܲܠܘ: ܐܸܬ݂ܚܙܝܼ ܡܲܠܲܐܟ݂ܵܐ ܕܡܵܪܝܵܐ ܒܚܸܠܡܵܐ ܠܝܵܘܣܸܦ. ܘܐܸܡܲܪ ܠܹܗ. ܩܘܼܡ ܕܒܲܪ ܠܛܲܠܝܵܐ ܘܠܸܐܡܹܗ. ܘܲܥܪܘܿܩ ܠܡܸܨܪܹܝܢ. ܘܬܲܡܵܢ ܗܘܝܼ ܥܕ݂ܲܡܵܐ ܕܐܵܡܲܪ ܐ̄ܢܵܐ ܠܵܟ݂. ܥܬ݂ܝܼܕ݂ ܗܘܼ ܓܹܝܪ ܗܹܪܘܿܕܸܣ ܠܡܸܒ݂ܥܝܹܗ ܠܛܲܠܝܵܐ. ܐܲܝܟ݂ ܕܢܵܘܒܕ݂ܝܼܘܗܝ.

¹⁴ܝܵܘܣܸܦ ܕܹܝܢ. ܩܵܡ ܫܲܩܠܹܗ ܠܛܲܠܝܵܐ ܘܠܸܐܡܹܗ ܒܠܸܠܝܵܐ. ܘܲܥܪܲܩ ܠܡܸܨܹܪܹܝܢ.

¹⁵ܘܲܗܘܵܐ ܬܲܡܵܢ ܥܕ݂ܲܡܵܐ ܠܡܵܘܬܹܗ ܕܗܹܪܘܿܕܸܣ. ܕܢܸܬ݂ܡܲܠܹܐ ܡܸܕܸܡ ܕܐܸܬ݂ܐܡܲܪ ܡܸܢ ܡܵܪܝܵܐ ܒܲܢܒ݂ܝܼܵܐ ܕܐܸܡܲܪ: ܕܡܸܢ ܡܸܨܪܹܝܢ ܩܪܹܝܬ݂ ܠܒܹܪܝ.

¹⁶ܗܵܝܕܹܝܢ ܗܹܪܘܿܕܸܣ ܟܲܕ݂ ܚܙܵܐ ܕܐܬ݂ܒܲܙܲܚ ܡܸܢ ܡܓ݂ܘܼܫܹ̈ܐ: ܐܸܬ݂ܚܲܡܲܬ݂ ܛܵܒ݂. ܘܫܲܕܲܪ ܩܲܛܸܠ ܛܠܵܝܹ̈ܐ ܟܠܗܘܿܢ ܕܒܹܝܬ݂ܠܚܸܡ. ܘܲܕ݂ܟ݂ܠܗܘܿܢ ܬܚܘܼܡܹܝ̈ܗ̇. ܡܸܢ ܒܲܪ ܬܲܪܬܹܝܢ ܫܢ̈ܝܼܢ ܘܲܠܬܲܚܬ݁. ܐܲܝܟ݂ ܙܲܒ݂ܢܵܐ ܕܥܲܩܸܒ݂ ܡܸܢ ܡܓ݂ܘܼܫܹ̈ܐ.

¹⁷ܗܵܝܕܹܝܢ ܐܸܬ݂ܡܲܠܝܼ ܡܸܕܸܡ ܕܐܸܬ݂ܐܡܲܪ ܒܝܲܕ݂ ܐܹܪܲܡܝܵܐ ܢܒ݂ܝܼܵܐ ܕܐܸܡܲܪ:

¹⁸ܩܵܠܵܐ ܐܸܫܬ݁ܡܲܥ ܒܪܵܡܬ݂ܵܐ: ܒܸܟ݂ܝܵܐ ܘܐܸܠܝܵܐ ܣܲܓ݁ܝܼܵܐܐ. ܪܵܚܹܝܠ ܒܵܟ݂ܝܵܐ ܥܲܠ ܒܢܹܝ̈ܗ̇: ܘܠܵܐ ܨܵܒ݂ܝܵܐ ܠܡܸܬ݂ܒܲܝܵܐܘܼ ܡܛܠ ܕܠܵܐ ܐܝܼܬܲܝܗܘܿܢ.

¹⁹ܟܲܕ݂ ܡܝܼܬ݂ ܕܹܝܢ ܗܹܪܘܿܕܸܣ ܡܲܠܟܵܐ: ܐܸܬ݂ܚܙܝܼ ܡܲܠܲܐܟ݂ܵܐ ܕܡܵܪܝܵܐ ܒܚܸܠܡܵܐ ܠܝܵܘܣܸܦ ܒܡܸܨܪܹܝܢ.

²⁰ܘܐܸܡܲܪ ܠܹܗ. ܩܘܼܡ. ܕܒܲܪ ܠܛܲܠܝܵܐ ܘܠܸܐܡܹܗ: ܘܙܸܠ ܠܐܲܪܥܵܐ ܕܝܼܣܪܵܝܹܠ. ܡܝܼܬ݂ܘ ܠܗܘܿܢ ܓܹܝܪ ܗܵܢܘܿܢ ܕܒ݂ܵܥܹܝܢ ܗܘܵܘ ܢܲܦ̮ܫܹܗ ܕܛܲܠܝܵܐ.

²¹ܘܝܵܘܣܸܦ. ܩܵܡ ܕܒܲܪ ܠܛܲܠܝܵܐ ܘܠܸܐܡܹܗ: ܘܐܸܬ݂ܵܐ ܠܐܲܪܥܵܐ ܕܝܼܣܪܵܝܹܠ.

²²ܟܲܕ݂ ܕܹܝܢ ܫܡܲܥ ܕܐܲܪܟܸܠܐܵܘܣ ܗܘ̣ܵܐ ܡܲܠܟܵܐ ܒܲܝܗܘܼܕ݂: ܚܠܵܦ ܗܹܪܘܿܕܸܣ ܐܲܒ݂ܘܼܗܝ: ܕܚܸܠ ܕܢܹܐܙܲܠ ܠܬܲܡܵܢ. ܘܐܸܬ݂ܚܙܝܼ ܠܹܗ ܒܚܸܠܡܵܐ ܕܢܹܐܙܲܠ ܠܐܲܬ݂ܪܵܐ ܕܲܓ݂ܠܝܼܠܵܐ.

²³ܘܐܸܬ݂ܵܐ ܥܡܲܪ ܒܲܡܕ݂ܝܼܢ̄ܬܵܐ ܕܡܸܬ݂ܩܲܪܝܵܐ ܢܵܨܪܲܬ݂. ܐܲܝܟ݂ ܕܢܸܬ݂ܡܲܠܹܐ ܡܸܕܸܡ ܕܐܸܬ݂ܐܡܲܪ ܒܲܢܒ݂ܝܼܵܐ. ܕܢܵܨܪܵܝܵܐ ܢܸܬ݂ܩܪܸܐ.