Read Aramaic Peshita Matthew 20 Bible Online

Matthew 20 - Aramaic Peshita bible

Matthew 20

¹ܕܵܡܝܵܐ ܓܹܝܪ ܡܲܠܟܘܼܬ݂ܵܐ ܕܲܫܡܲܝܵܐ: ܠܓܲܒ݂ܪܵܐ: ܡܵܪܹܐ ܒܲܝܬܵܐ: ܕܲܢܦܲܩ ܒܨܲܦ݂ܪܵܐ ܕܢܹܐܓ݂ܘܼܪ ܦܵܥ̈ܠܹܐ ܠܟ݂ܲܪܡܹܗ.

²ܩܲܨ ܕܹܝܢ ܥܲܡ ܦܵܥ̈ܠܹܐ ܡܸܢ ܕܝܼܢܵܪܵܐ ܒܝܵܘܡܵܐ. ܘܫܲܕܲܪ ܐܸܢܘܿܢ ܠܟ݂ܲܪܡܹܗ.

³ܘܲܢܦܲܩ ܒܲܬ݂ܠܵܬ݂ ܫܵܥܝܼܢ: ܘܲܚܙܵܐ ܐ̱ܚܪܵܢܹ̈ܐ ܕܩܵܝܡܝܼܢ ܒܫܘܼܩܵܐ. ܘܒܲܛܝܼܠܝܼܢ.

⁴ܘܐܸܡܲܪ ܠܗܘܿܢ. ܙܸܠܘ ܐܵܦ ܐܲܢ̄ܬ݁ܘܿܢ ܠܟ݂ܲܪܡܵܐ. ܘܡܸܕܸܡ ܕܘܵܠܹܐ. ܝܵܗܹܒ݂ ܐ̄ܢܵܐ ܠܟ݂ܘܿܢ.

⁵ܗܸܢܘܿܢ ܕܹܝܢ ܐܸܙܲܠܘ. ܘܲܢܦܲܩ ܬܘܼܒ݂ ܒܫܸܬ݂. ܘܒܲܬ݂ܫܲܥ ܫܵܥ̈ܝܼܢ: ܘܲܥܒܲܕ݂ ܗܵܟ݂ܘܵܬ݂.

⁶ܘܠܲܐܦܲܝ̈ ܚܕ݂ܲܥܸܣܪܹ̈ܐ ܫܵܥ̈ܝܼܢ: ܢܦܲܩ ܘܐܸܫܟܲܚ ܐ̱ܚܪܵܢܹ̈ܐ ܕܩܵܝܡܝܼܢ ܘܒܲܛܝܼܠܝܼܢ. ܘܐܸܡܲܪ ܠܗܘܿܢ. ܡܵܢܵܐ ܩܵܝܡܝܼܢ ܐܢ̄ܬܘܿܢ ܝܵܘܡܵܐ ܟܠܹܗ: ܘܒܲܛܵܠܝܼܢ.

⁷ܐܵܡܪܝܼܢ ܠܹܗ. ܕܠܵܐ ܐ̄ܢܵܫ ܐܲܓ݂ܪܵܢ. ܐܵܡܲܪ ܠܗܘܿܢ. ܙܸܠܘ ܐܵܦ ܐܲܢ̄ܬ݁ܘܿܢ ܠܟ݂ܲܪܡܵܐ: ܘܡܸܕܸܡ ܕܘܵܠܹܐ ܢܵܣܒܿܝܼܢ ܐܢ̄ܬܘܿܢ.

⁸ܟܲܕ݂ ܗܘ̣ܵܐ ܕܹܝܢ ܪܲܡܫܵܐ: ܐܸܡܲܪ ܡܵܪܹܐ ܟܲܪܡܵܐ ܠܪܲܒܲܝܬܹ݁ܗ. ܩܪܝܼ ܦܵܥܠܹ̈ܐ. ܘܗܲܒ݂ ܠܗܘܿܢ ܐܲܓ݂ܪܗܘܿܢ. ܘܫܲܪܵܐ ܡܸܢ ܐ̄ܚܪ̈ܵܝܹܐ ܘܲܥܕ݂ܲܡܵܐ ܠܩܲܕ݂ܡܵܝܹ̈ܐ.

⁹ܘܐܸܬ݂ܵܘ ܗܵܢܘܿܢ ܕܲܚܕ݂ܲܥܸܣܪܹ̈ܐ ܫܵܥܝܼܢ: ܢܣܲܒ݂ܘ. ܕܝܼܢܵܪ ܕܝܼܢܵܪ.

¹⁰ܘܟܲܕ݂ ܐܸܬ݂ܘ ܩܲܕ݂ܡܵܝܹ̈ܐ: ܣܒܲܪܘ. ܕܝܲܬܝܼܪ ܫܵܩܠܝܼܢ. ܘܲܫܩܲܠܘ ܕܝܼܢܵܪ. ܕܝܼܢܵܪ. ܐܵܦ ܗܸܢܘܿܢ.

¹¹ܘܟܲܕ݂ ܫܩܲܠܘ: ܪܲܛܸܢܘ ܥܲܠ ܡܵܪܹܐ ܒܲܝܬܵܐ.

¹²ܘܐܵܡܪܝܼܢ. ܗܵܠܹܝܢ ܐ̄ܚܪ̈ܵܝܹܐ ܚܕ݂ܵܐ ܫܵܥܵܐ ܥܒܲܕ݂ܘ: ܘܐܲܫܘܝܼܬ݂ ܐܸܢܘܿܢ ܥܲܡܲܢ: ܕܲܫܩܲܠܢ ܝܘܼܩܪܹܗ ܕܝܵܘܡܵܐ ܘܚܘܼܡܹܗ.

¹³ܗܘܼ ܕܹܝܢ ܥܢܵܐ. ܘܐܸܡܲܪ ܠܚܲܕ݂ ܡܸܢܗܘܿܢ. ܚܲܒ݂ܪܝ. ܠܵܐ ܡܲܥܘܸܠ ܐ̄ܢܵܐ ܒܵܟ݂. ܠܵܐ ܗܘ̣ܵܐ ܒܕ݂ܝܼܢܵܪ ܩܲܨܬ݁ ܥܲܡܝ.

¹⁴ܣܲܒ݂ ܕܝܼܠܵܟ݂. ܘܙܸܠ. ܨܵܒܹܐ ܐ̄ܢܵܐ ܕܹܝܢ ܕܲܠܗܵܢܵܐ ܐ̄ܚܪܵܝܵܐ ܐܸܬܸ݁ܠ ܐܲܝܟ݂ ܕܠܵܟ݂.

¹⁵ܐܵܘ ܠܵܐ ܫܲܠܝܼܛ ܠܝܼ ܕܡܸܕܸܡ ܕܨܵܒܹܐ ܐ̄ܢܵܐ. ܐܸܥܒܸܕ݂ ܒܕ݂ܝܼܠܝ. ܐܵܘ ܥܲܝܢܵܟ݂ ܒܝܼܫܵܐ ܕܐܸܢܵܐ ܛܵܒ݂ ܐ̄ܢܵܐ.

¹⁶ܗܵܟܲܢܵܐ ܢܸܗܘܘܿܢ ܐ̄ܚܪ̈ܵܝܹܐ ܩܲܕ݂ܡܵܝܹ̈ܐ: ܘܩܲܕ݂ܡܵܝܹ̈ܐ ܐ̄ܚܪ̈ܵܝܹܐ. ܣܲܓܿܝܼܐܝܼܢ ܐܸܢܘܿܢ ܓܹܝܪ ܩܪܲ̈ܝܵܐ. ܘܲܙܥܘܿܪ̈ܝܼܢ ܓܒܲܝ̈ܵܐ.

¹⁷ܥܬ݂ܝܼܕ݂ ܗܘ̣ܵܐ ܕܹܝܢ ܝܼܫܘܿܥ ܕܢܸܣܲܩ ܠܐܘܿܪܸܫܠܸܡ. ܘܲܕ݂ܒܲܪ ܠܲܬ݂ܪܸܥܣܲܪ ܬܲܠܡܝܼܕ݂ܵܘ̈ܗܝ ܒܲܝܢܵܘܗܝ ܘܲܠܗܘܿܢ ܒܐܘܼܪܚܵܐ. ܘܐܸܡܲܪ ܠܗܘܿܢ.

¹⁸ܗܵܐ ܣܵܠܩܝܼܢ ܚ̄ܢܲܢ ܠܐܘܿܪܸܫܠܸܡ. ܘܲܒ݂ܪܹܗ ܕܐ̄ܢܵܫܵܐ ܡܸܫܬ݁ܠܸܡ ܠܪ̈ܲܒܲܝ ܟܵܗܢܹ̈ܐ. ܘܲܠܣܵܦܪܹ̈ܐ. ܘܲܢܚܲܝܒ݂ܘܼܢܵܝܗܝ ܠܡܵܘܬܵܐ.

¹⁹ܘܢܲܫܠܡܘܼܢܵܝܗܝ ܠܥܲܡ̈ܡܹܐ. ܘܲܢܒܲܙܚܘܼܢ ܒܹܗ ܘܲܢܢܲܓ݁ܕ݂ܘܼܢܵܝܗܝ. ܘܢܸܙܩܦܘܼܢܵܝܗܝ. ܘܲܠܝܵܘܡܵܐ ܕܲܬ݂ܠܵܬ݂ܵܐ. ܢܩܘܼܡ.

²⁰ܗܵܝܕܹܝܢ ܩܸܪܒܲܬ݂ ܠܹܗ ܐܸܡܗܘܿܢ ܕܲܒܢܲܝ̈ ܙܲܒ݂ܕ݂ܲܝ ܗܝܼ ܘܲܒܢܹܝ̈ܗ̇ ܘܣܸܓ݂ܕܲܬ݂ ܠܹܗ. ܘܫܵܐܠܵܐ ܗ̄ܘܵܬ݂ ܠܹܗ ܡܸܕ݂ܡ.

²¹ܗܘܼ ܕܹܝܢ ܐܸܡܲܪ ܠܵܗ̇. ܡܵܢܵܐ ܨܵܒ݂ܝܵܐ ܐܲܢ̄ܬ݁ܝ. ܐܵܡܪܵܐ ܠܹܗ. ܐܸܡܲܪ ܕܢܸܬ݁ܒ݂ܘܼܢ ܗܵܠܹܝܢ ܬܪܹܝܢ ܒܢܲܝ̈: ܚܲܕ݂ ܡܸܢ ܝܲܡܝܼܢܵܟ݂ ܘܚܲܕ݂ ܡܸܢ ܣܸܡܵܠܵܟ݂. ܒܡܲܠܟܘܬ݂ܵܟ݂.

²²ܥܢܵܐ ܝܼܫܘܿܥ. ܘܐܸܡܲܪ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܡܵܢܵܐ ܫܵܐܠܝܼܢ ܐܢ̄ܬܘܿܢ. ܡܸܫܟܚܝܼܢ ܐܢ̄ܬܘܿܢ ܠܡܸܫܬܵܐ ܟܵܣܵܐ. ܕܐܢܵܐ ܥܬ݂ܝܼܕ݂ ܠܡܸܫܬܵܐ: ܐܵܘ ܡܲܥܡܘܿܕ݂ܝܼܬ݂ܵܐ ܕܐܸܢܵܐ ܥܵܡܸܕ݂ ܐ̄ܢܵܐ. ܬܸܥܡܕ݂ܘܼܢ: ܐܵܡܪܝܼܢ ܠܹܗ. ܡܸܫܟܚܝܼܢ ܚ̄ܢܲܢ.

²³ܐܵܡܲܪ ܠܗܘܿܢ. ܟܵܣܝ ܬܸܫܬ݁ܘܿܢ. ܘܡܲܥܡܘܿܕ݂ܝܼܬ݂ܵܐ ܕܐܸܢܵܐ ܥܵܡܹܕ݂ ܐ̄ܢܵܐ. ܬܸܥܡܕ݂ܘܼܢ. ܕܬܸܬ݁ܒܘܼܢ ܕܹܝܢ ܡܸܢ ܝܲܡܝܼܢܝ ܘܡܸܢ ܣܸܡܵܠܝ: ܠܵܐ ܗ̄ܘܵܬ݂ ܕܝܼܠܝ ܕܐܸܬܸ݁ܠ: ܐܸܠܵܐ ܠܐܲܝܠܹܝܢ ܕܐܬ݁ܛܲܝܒܲܬܸ ܡܸܢ ܐܵܒ݂ܝ.

²⁴ܟܲܕ݂ ܕܹܝܢ ܫܡܲܥܘ ܥܸܣܪܵܐ: ܪܓܸܙܘ ܥܲܠ ܗܵܢܘܿܢ ܬܪܹܝܢ ܐܲܚ̈ܝܼܢ.

²⁵ܘܲܩܪܵܐ ܐܸܢܘܿܢ ܝܼܫܘܿܥ. ܘܐܸܡܲܪ ܠܗܘܿܢ. ܝܵܕ݂ܥܝܼܢ ܐܢ̄ܬܘܿܢ ܕܪܹ̈ܫܲܝܗܘܿܢ ܕܥܲܡ̈ܡܹܐ. ܡܵܪ̈ܲܝܗܘܿܢ ܐܸܢܘܿܢ. ܘܪܵܘܪ̈ܒ݂ܵܢܲܝܗܘܿܢ ܫܲܠܝܼܛܝܼܢ ܥܠܲܝܗܘܿܢ.

²⁶ܠܵܐ ܗܵܟܲܢܵܐ ܢܸܗܘܹܐ ܒܲܝܢܵܬ݂ܟ݂ܘܿܢ. ܐܸܠܵܐ ܡܲܢ ܕܨܵܒܹܐ ܒܟ݂ܘܿܢ ܕܢܸܗܘܹܐ ܪܲܒܵܐ: ܢܸܗܘܹܐ ܠܟ݂ܘܿܢ ܡܫܲܡܫܵܢܵܐ.

²⁷ܘܡܲܢ ܕܨܵܒܹܐ ܒܟ݂ܘܿܢ ܕܢܸܗܘܹܐ ܩܲܕ݂ܡܵܝܵܐ: ܢܸܗܘܹܐ ܠܟ݂ܘܿܢ ܥܲܒ݂ܕܵܐ.

²⁸ܐܲܝܟܲܢܵܐ ܕܲܒ݂ܪܹܗ ܕܐ̄ܢܵܫܵܐ: ܠܵܐ ܐܸܬ݂ܵܐ ܕܢܸܫܬܲܡܲܫ ܐܸܠܵܐ ܕܲܢܫܲܡܸܫ. ܘܲܕ݂ܢܸܬܸ݁ܠ ܢܲܦ̮ܫܹܗ ܦܘܼܪܩܵܢܵܐ ܚܠܵܦ ܣܲܓܝܼܐܹ̈ܐ.

²⁹ܘܟܲܕ݂ ܢܦܲܩ ܝܼܫܘܿܥ ܡܸܢ ܐܝܼܪܝܼܚܘܿ: ܐܵܬܹܐ ܗܘ̣ܵܐ ܒܵܬ݂ܪܹܗ ܟܸܢܫܵܐ ܣܲܓܿܝܼܐܵܐ.

³⁰ܘܗܵܐ ܣ̈ܡܲܝܵܐ ܬܪܹܝܢ ܝܵܬ݂ܒܿܝܼܢ ܗ̄ܘܼܵܘ ܥܲܠ ܝܲܕ݂ ܐܘܼܪܚܵܐ. ܘܟܲܕ݂ ܫܡܲܥܘ ܕܝܼܫܘܿܥ ܥܵܒܲܪ: ܝܲܗ̄ܒ݂ܘ ܩܵܠܵܐ. ܘܐܵܡܪܝܼܢ. ܐܸܬ݂ܪܲܚܲܡ ܥܠܲܝܢ ܡܵܪܝ ܒܪܹܗ ܕܕ݂ܵܘܝܼܕ݂.

³¹ܟܸܢܫܹ̈ܐ ܕܹܝܢ ܟܵܐܹܝܢ ܗ̄ܘܼܵܘ ܒܗܘܿܢ. ܕܢܸܫܬ݁ܩܘܼܢ. ܘܗܸܢܘܿܢ ܝܲܬ݁ܝܼܪܵܐܝܼܬ݂ ܐܲܪܝܼܡܘ ܩܵܠܗܘܿܢ. ܘܐܵܡܪܝܼܢ. ܡܵܪܲܢ ܐܸܬ݂ܪܲܚܲܡ ܥܠܲܝܢ ܒܪܹܗ ܕܕ݂ܵܘܝܼܕ݂.

³²ܘܩܵܡ ܝܼܫܘܿܥ ܘܲܩܪܵܐ ܐܸܢܘܿܢ. ܘܐܸܡܲܪ. ܡܵܢܵܐ ܨܵܒܹܝܢ ܐ̄ܢܬܘܿܢ ܕܐܸܥܒܸܕ݂ ܠܟ݂ܘܿܢ.

³³ܐܵܡܪܝܼܢ ܠܹܗ. ܡܵܪܲܢ ܕܢܸܬ݂ܦܲܬ݁ܚܵܢ ܥܲܝܢܲܝ̈ܢ.

³⁴ܘܐܸܬ݂ܪܲܚܲܡ ܥܠܲܝܗܘܿܢ ܝܼܫܘܿܥ. ܘܲܩܪܸܒ݂ ܠܥܲܝܢܲܝ̈ܗܘܿܢ. ܘܒܲܪ ܫܵܥܬܹܗ ܐܸܬ݂ܦܲܬܲܚ ܥܲܝܢܲܝ̈ܗܘܿܢ. ܘܐܸܙܲܠܘ ܒܵܬ݂ܪܹܗ.