Read Aramaic Peshita Matthew 24 Bible Online

Matthew 24 - Aramaic Peshita bible

Matthew 24

¹ܘܲܢܦܲܩ ܝܼܫܘܿܥ ܡܸܢ ܗܲܝܟܠܵܐ ܠܡܹܐܙܲܠ: ܘܲܩܪܸܒ݂ܘ ܬܲܠܡܝܼܕ݂ܵܘ̈ܗܝ. ܡܚܵܘܹܝܢ ܗ̄ܘܼܵܘ ܠܹܗ ܒܸܢܝܵܢܹܗ ܕܗܲܝܟܠܵܐ.

²ܗܘܼ ܕܹܝܢ ܐܸܡܲܪ ܠܗܘܿܢ ܠܵܐ ܗܵܐ ܚܵܙܹܝܢ ܐܢ̄ܬܘܿܢ ܗܵܠܹܝܢ ܟܠܗܹܝܢ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܠܵܐ ܬܸܫܬ݁ܒܸܩ ܗܵܪܟܵܐ ܟܹܐܦ ܥܲܠ ܟܹܐܦ: ܕܠܵܐ ܬܸܣܬܲܬܲܪ.

³ܘܟܲܕ݂ ܝܼܬܸܒ݂ ܝܼܫܘܿܥ ܥܲܠ ܛܘܼܪܵܐ ܕܙܲܝ̈ܬܹܐ: ܩܪܸܒ݂ܘ ܬܲܠܡܝܼܕ݂ܵܘ̈ܗܝ. ܘܐܵܡܪܝܼܢ ܒܲܝܢܲܝܗܘܿܢ ܘܠܹܗ. ܐܸܡܲܪ ܠܲܢ ܐܸܡܲܬ݂ܝ ܗܵܠܹܝܢ ܢܸܗܘܝܵܢ. ܘܡܵܢܵܐ ܗܝܼ ܐܵܬ݂ܵܐ ܕܡܹܐܬ݂ܝܼܬ݂ܵܟ݂ ܘܲܕ݂ܫܘܼܠܵܡܹܗ ܕܥܵܠܡܵܐ.

⁴ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܐܸܙܕܲܗ̄ܪܘ ܠܵܐ ܐ̄ܢܵܫ ܢܲܛܥܹܝܟ݂ܘܿܢ.

⁵ܣܲܓܝܼܐܹ̈ܐ ܓܹܝܪ ܢܹܐܬ݂ܘܿܢ ܒܫܹܡܝ: ܘܢܹܐܡܪܘܼܢ. ܕܐܸܢܵܐ ܐ̄ܢܵܐ ܡܫܝܼܚܵܐ. ܘܣܲܓܝܼܐܹ̈ܐ ܢܸܛܥܘܿܢ.

⁶ܥܬ݂ܝܼܕ݂ܝܼܢ ܐܢ̄ܬܘܿܢ ܕܹܝܢ ܠܡܸܫܡܲܥ ܩܹܐܪ̈ܣܹܐ ܘܫܸܡܥܵܐ ܕܲܩܪ̈ܵܒܹܐ. ܚܙܵܘ ܠܵܐ ܬܸܬ݁ܕܵܘܕ݂ܘܼܢ. ܘܵܠܹܐ ܓܹܝܪ ܕܟܠܗܹܝܢ ܢܸܗܘܝܵܢ. ܐܸܠܵܐ ܠܵܐ ܥܕ݂ܲܟܹܝܠ ܫܘܼܠܵܡܵܐ.

⁷ܢܩܘܼܡ ܓܹܝܪ ܥܲܡܵܐ ܥܲܠ ܥܲܡܵܐ: ܘܡܲܠܟܘܼܬ݂ܵܐ ܥܲܠ ܡܲܠܟܘܼܬ݂ܵܐ. ܘܢܸܗܘܘܿܢ ܟܲܦܢܹ̈ܐ ܘܡܵܘܬܵܢܹ̈ܐ ܘܙܵܘܥܹ̈ܐ. ܒܕ݂ܘܼܟܵܐ ܕܘܟܵܐ.

⁸ܗܵܠܹܝܢ ܕܹܝܢ ܟܠܗܹܝܢ ܪܹܫܵܐ ܐܸܢܹܝܢ ܕܚܸܒ݂ܠܹ̈ܐ.

⁹ܗܵܝܕܹܝܢ ܢܲܫܠܡܘܼܢܵܟ݂ܘܿܢ ܠܐܘܼܠܨܵܢܹ̈ܐ. ܘܢܸܩܛܠܘܼܢܵܟ݂ܘܿܢ. ܘܬܸܗܘܘܿܢ ܣܢܝܼܐܝܼܢ ܡܸܢ ܟܠܗܘܿܢ ܥܲܡ̈ܡܹܐ. ܡܛܠ ܫܹܡܝ.

¹⁰ܗܵܝܕܹܝܢ ܢܸܬ݂ܟܲܫܠܘܼܢ ܣܲܓܝܼܐܹ̈ܐ. ܘܢܸܣܢܘܿܢ ܚܲܕ݂ ܠܚܲܕ݂. ܘܢܲܫܠܡܘܼܢ ܚܲܕ݂ ܠܚܲܕ݂.

¹¹ܘܣܲܓܝܼܐܹ̈ܐ ܢܒ݂ܝܹ̈ܐ ܕܲܓܵܠܹ̈ܐ ܢܩܘܼܡܘܼܢ: ܘܢܲܛܥܘܿܢ ܠܣܲܓܝܼܐܹ̈ܐ.

¹²ܘܡܛܠ ܣܲܓܿܝܼܐܘܼܬ݂ ܥܵܘܠܵܐ: ܢܦܘܼܓ݂ ܚܘܼܒܵܐ ܕܣܲܓܝܼܐܹ̈ܐ.

¹³ܡܲܢ ܕܲܢܣܲܝܒܲܪ ܕܹܝܢ ܥܕ݂ܲܡܵܐ ܠܚܲܪܬ݂ܵܐ. ܗܘܼ ܢܸܚܹܐ.

¹⁴ܘܬܸܬ݂ܟܪܸܙ ܗܵܕܹܐ ܣܒܲܪܬ݂ܵܐ ܕܡܲܠܟܘܼܬ݂ܵܐ. ܒܟ݂ܠܹܗ ܥܵܠܡܵܐ: ܠܣܵܗܕ݂ܘܬ݂ܵܐ ܕܟ݂ܠܗܘܿܢ ܥܲܡ̈ܡܹܐ: ܘܗܵܝܕܹܝܢ ܢܹܐܬܹܐ ܫܘܼܠܵܡܵܐ.

¹⁵ܡܵܐ ܕܹܝܢ ܕܲܚܙܲܝܬ݁ܘܿܢ ܐܵܬ݂ܵܐ ܛܲܢܦܬ݂ܵܐ ܕܚܘܼܪܒܵܐ: ܕܐܸܬ݂ܐܡܲܪ ܒܕ݂ܵܢܝܼܐܹܝܠ ܢܒ݂ܝܼܵܐ: ܕܩܵܝܡܵܐ ܒܕ݂ܘܼܟܬ݂ܵܐ ܩܲܕܝܼܫܬܵܐ: ܗܵܘ ܕܩܵܪܹܐ ܢܸܣܬܲܟܲܠ

¹⁶ܗܵܝܕܹܝܢ ܐܲܝܠܹܝܢ ܕܒ݂ܝܼܗܘܼܕ݂ ܐܸܢܘܿܢ. ܢܸܥܪܩܘܼܢ ܠܛܘܼܪܵܐ.

¹⁷ܘܗܵܘ ܕܒܸܐܓܵܪܵܐ ܗ̄ܘܼ: ܠܵܐ ܢܸܚܘܿܬ݂ ܠܡܸܣܲܒ݂ ܕܲܒ݂ܒܲܝܬܹ݁ܗ.

¹⁸ܘܐܲܝܢܵܐ ܕܲܒ݂ܚܲܩܠܵܐ ܗ̄ܘܼ: ܠܵܐ ܢܸܬ݂ܗܦܸܟ݂ ܠܒܸܣܬ݁ܪܹܗ ܠܡܸܣܲܒ݂ ܠܒ݂ܵܫܹܗ.

¹⁹ܘܵܝ ܕܹܝܢ ܠܒܲܛ̈ܢܵܬ݂ܵܐ. ܘܠܲܐܝܠܹܝܢ ܕܡܲܝ̈ܢܩܵܢ ܒܗܵܢܘܿܢ ܝܵܘ̈ܡܵܬ݂ܵܐ.

²⁰ܨܲܠܵܘ ܕܹܝܢ ܕܠܵܐ ܢܸܗܘܹܐ ܥܪܘܼܩܝܼܟ݂ܘܿܢ ܒܣܲܬ݂ܘܵܐ. ܘܠܵܐ ܒܫܲܒܿܬ݂ܵܐ.

²¹ܢܸܗܘܹܐ ܓܹܝܪ ܗܵܝܕܹܝܢ ܐܘܼܠܨܵܢܵܐ ܪܲܒܵܐ: ܐܲܝܢܵܐ ܕܠܵܐ ܗܘ̣ܵܐ ܡܸܢ ܪܹܫܝܼܬܹܗ ܕܥܵܠܡܵܐ ܘܲܥܕ݂ܲܡܵܐ ܠܗܵܫܵܐ. ܘܠܵܐ ܢܸܗܘܹܐ.

²²ܘܐܸܠܘܼ ܠܵܐ ܐܸܬ݂ܟܲܪܝܼܘ ܝܵܘ̈ܡܵܬ݂ܵܐ ܗܵܢܘܿܢ: ܠܵܐ ܚܵܝܹܐ ܗܘ̣ܵܐ ܟܠܒܣܲܪ. ܡܛܠ ܓܒܲ̈ܝܵܐ ܕܹܝܢ. ܢܸܬ݂ܟܲܪܘܼܢ ܝܵܘ̈ܡܵܬ݂ܵܐ ܗܵܢܘܿܢ.

²³ܗܵܝܕܹܝܢ ܐܸܢ ܐ̄ܢܵܫ ܢܹܐܡܲܪ ܠܟ݂ܘܿܢ: ܗܵܐ ܗܵܪܟܵܐ ܗܘܼ ܡܫܝܼܚܵܐ: ܐܵܘ ܗܵܪܟܵܐ. ܠܵܐ ܬܗܲܝܡܢܘܼܢ.

²⁴ܢܩܘܼܡܘܼܢ ܓܹܝܪ ܡܫܝܼܚܹ̈ܐ ܕܲܓܵܠܹ̈ܐ. ܘܲܢܒ݂ܝܹ̈ܐ ܕܟ݂ܲܕܵܒ݂ܘܼܬ݂ܵܐ. ܘܢܸܬ݁ܠܘܼܢ ܐܵܬ݂ܘܵܬ݂ܵܐ ܪܵܘܪ̈ܒ݂ܵܬ݂ܵܐ: ܐܲܝܟ݂ ܕܢܲܛܥܘܿܢ ܐܸܢ ܡܸܫܟܿܚܵܐ. ܐܵܦ ܠܲܓ݂̈ܒܲܝܵܐ.

²⁵ܗܵܐ ܩܲܕܡܹܬ݂ ܐܸܡܪܶܬ݂ ܠܟ݂ܘܿܢ.

²⁶ܐܸܢ ܗܵܟܹܝܠ ܢܹܐܡܪܘܼܢ ܠܟ݂ܘܿܢ ܗܵܐ ܒܚܘܼܪܒܵܐ ܗ̄ܘܼ. ܠܵܐ ܬܸܦܩܘܼܢ. ܐܵܘ ܕܗܵܐ ܒܬ݂ܵܘܵܢܵܐ ܗ̄ܘܼ. ܠܵܐ ܬܗܲܝܡܢܘܼܢ.

²⁷ܐܲܝܟܲܢܵܐ ܓܹܝܪ ܕܒܲܪܩܵܐ ܢܵܦܹܩ ܡܸܢ ܡܲܕ݂ܢܚܵܐ: ܘܡܸܬ݂ܚܙܹܐ ܥܕ݂ܲܡܵܐ ܠܡܲܥܪܒ݂ܵܐ: ܗܵܟܲܢܵܐ ܬܸܗܘܹܐ ܡܹܐܬ݂ܝܼܬܹܗ ܕܲܒ݂ܪܹܗ ܕܐ̄ܢܵܫܵܐ.

²⁸ܐܲܝܟܵܐ ܕܐܸܢ ܢܸܗܘܹܐ ܦܲܓ݂ܪܵܐ: ܬܲܡܵܢ ܢܸܬ݂ܟܲܢܫܘܿܢ ܢܸܫܪܹ̈ܐ.

²⁹ܡܸܚܕ݂ܵܐ ܕܹܝܢ ܒܵܬܲܪ ܐܘܼܠܨܵܢܵܐ ܕܝܵܘ̈ܡܵܬ݂ܵܐ ܗܵܢܘܿܢ ܫܸܡܫܵܐ ܢܸܚܫܲܟ݂. ܘܣܲܗܪܵܐ ܠܵܐ ܢܚܵܘܹܐ ܢܘܼܗܪܹܗ. ܘܟܵܘܟܿܒܹ̈ܐ ܢܸܦܠܘܼܢ ܡܸܢ ܫܡܲܝܵܐ. ܘܚܲܝ̈ܠܹܐ ܕܲܫܡܲܝܵܐ ܢܸܬ݁ܬ݁ܙܝܼܥܘܼܢ.

³⁰ܘܗܵܝܕܹܝܢ ܢܸܬ݂ܚܙܹܐ ܢܝܼܫܹܗ ܕܲܒ݂ܪܹܗ ܕܐ̄ܢܵܫܵܐ ܒܲܫܡܲܝܵܐ. ܘܗܵܝܕܹܝܢ ܢܲܪܩܕ݂ܵܢ ܟܠܗܹܝܢ ܫܲܪ̈ܒ݂ܵܬ݂ܵܐ ܕܐܲܪܥܵܐ: ܘܢܸܚܙܘܿܢ ܠܲܒ݂ܪܹܗ ܕܐ̄ܢܵܫܵܐ. ܕܐܬܹܐ ܥܲܠ ܥܢܵܢܲܝ ܫܡܲܝܵܐ: ܥܲܡ ܚܲܝܠܵܐ ܘܫܘܼܒ݂ܚܵܐ ܣܲܓܿܝܼܐܵܐ.

³¹ܘܲܢܫܲܕܲܪ ܡܲܠܲܐܟ݂ܵܘܗܝ ܥܲܡ ܫܝܼܦܘܿܪܵܐ ܪܲܒܵܐ: ܘܲܢܟܲܢܫܘܿܢ ܠܲܓ݂̈ܒܲܝܵܐ ܕܝܼܠܹܗ. ܡܸܢ ܐܲܪܒܿܥܲܬ݂ ܪܘܼܚܵܐ. ܡܸܢ ܪܹܫܗܘܿܢ ܕܲܫܡܲܝܵܐ. ܘܲܥܕ݂ܲܡܵܐ ܠܪܹܫܗܘܿܢ.

³²ܡܸܢ ܬܹܬܵܐ ܕܹܝܢ ܝܼܠܲܦܘ ܦܸܠܐܬ݂ܵܐ. ܕܡܸܚܕ݂ܵܐ ܕܣܵܘܟܹ̈ܝܗ̇ ܪܵܟܵܢ ܘܦܵܪܥܝܼܢ ܛܲܪ̈ܦܹܝܗ̇: ܝܵܕ݂ܥܝܼܢ ܐܢ̄ܬܘܿܢ. ܕܲܡܛܵܐ ܩܲܝܛܵܐ.

³³ܗܵܟܲܢܵܐ ܐܵܦ ܐܲܢ̄ܬ݁ܘܿܢ ܡܵܐ ܕܲܚܙܲܝܬܘܿܢ ܗܵܠܹܝܢ ܟܠܗܹܝܢ: ܕܲܥܘ ܕܲܡܛܵܬܸ ܠܵܗ̇ ܠܬܲܪܥܵܐ.

³⁴ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܠܵܐ ܬܸܥܒܲܪ ܫܲܪܒܿܬ݂ܵܐ ܗܵܕܹܐ: ܥܕ݂ܲܡܵܐ ܕܗܵܠܹܝܢ ܟܠܗܹܝܢ ܢܸܗܘܝܵܢ.

³⁵ܫܡܲܝܵܐ ܘܐܲܪܥܵܐ ܢܸܥܒܿܪܘܼܢ: ܘܡܸܠܲܝ̈ ܠܵܐ ܢܸܥܒܿܪ̈ܵܢ.

³⁶ܥܲܠ ܝܵܘܡܵܐ ܕܹܝܢ ܗܵܘ ܘܥܲܠ ܫܵܥܬ݂ܵܐ ܗܵܝ: ܐ̄ܢܵܫ ܠܵܐ ܝܵܕ݂ܲܥ. ܐܵܦܠܵܐ ܡܲܠܲܐܟܹ̈ܐ ܕܲܫܡܲܝܵܐ. ܐܸܠܵܐ ܐܲܒ݂ܵܐ ܒܲܠܚܘܿܕ݂.

³⁷ܐܲܝܟܲܢܵܐ ܕܹܝܢ ܕܝܵܘܡܲܝ̈ ܢܘܿܚ: ܗܵܟܲܢܵܐ ܬܸܗܘܹܐ ܡܹܐܬ݂ܝܼܬܹܗ ܕܲܒ݂ܪܹܗ ܕܐ̄ܢܵܫܵܐ.

³⁸ܐܲܝܟܲܢܵܐ ܓܹܝܪ ܕܐܝܼܬܲܝܗܘܿܢ ܗ̄ܘܼܵܘ ܩܕ݂ܵܡ ܛܵܘܦܵܢܵܐ ܐܵܟ݂ܠܝܼܢ ܘܫܵܬܹܝܢ: ܘܢܵܣܒܿܝܼܢ ܢܸܫܹ̈ܐ ܘܝܵܗܒܿܝܼܢ ܠܓܲܒ݂ܪܹ̈ܐ: ܥܕ݂ܲܡܵܐ ܠܝܵܘܡܵܐ ܕܥܲܠ ܢܘܿܚ ܠܟܹܐܘܸܠܵܐ:

³⁹ܘܠܵܐ ܝܼܕ݂ܲܥܘ ܥܕ݂ܲܡܵܐ ܕܐܸܬ݂ܵܐ ܛܵܘܦܵܢܵܐ. ܘܲܫܩܲܠ ܠܟ݂ܠܗܘܿܢ: ܗܵܟܲܢܵܐ ܬܸܗܘܹܐ ܡܹܐܬ݂ܝܼܬܹܗ ܕܲܒ݂ܪܹܗ ܕܐ̄ܢܵܫܵܐ.

⁴⁰ܗܵܝܕܹܝܢ ܬܪܹܝܢ ܢܸܗܘܘܿܢ ܒܲܩܪܝܼܬ݂ܵܐ. ܚܲܕ݂ ܢܸܬ݁ܕܒܲܪ. ܘܚܲܕ݂ ܢܸܫܬ݁ܒܸܩ.

⁴¹ܘܬܲܪ̈ܬܹܝܢ ܢܸܗܘܝܵܢ ܛܵܚܢܵܢ ܒܪܲܚܝܵܐ. ܚܕ݂ܵܐ ܡܸܬ݁ܕܲܒ݂ܪܵܐ. ܘܲܚܕ݂ܵܐ ܡܸܫܬܲܒ݂ܩܵܐ.

⁴²ܐܸܬ݁ܬ݁ܥܝܼܪܘ ܗܵܟܹܝܠ: ܕܠܵܐ ܝܵܕ݂ܥܝܼܢ ܐܢ̄ܬܘܿܢ ܒܐܲܝܕ݂ܵܐ ܫܵܥܬ݂ܵܐ ܐܵܬܹܐ ܡܵܪܟ݂ܘܿܢ.

⁴³ܗܵܕܹܐ ܕܹܝܢ ܕܲܥܘ. ܕܐܸܠܘܼ ܝܵܕ݂ܲܥ ܗܘ̣ܵܐ ܡܵܪܹܐ ܒܲܝܬܵܐ ܒܐܲܝܕ݂ܵܐ ܡܲܛܲܪܬ݂ܵܐ ܐܵܬܹܐ ܓܲܢܵܒ݂ܵܐ: ܡܸܬ݁ܬ݁ܥܝܼܪ ܗ̄ܘܵܐ. ܘܠܵܐ ܫܵܒܹܩ ܗܘ̣ܵܐ ܕܢܸܬ݂ܦܠܸܫ ܒܲܝܬܹ݁ܗ.

⁴⁴ܡܛܠ ܗܵܢܵܐ ܐܵܦ ܐܲܢ̄ܬ݁ܘܿܢ ܗܘܵܘ ܡܛܲܝܒ݂ܝܼܢ. ܕܲܒ݂ܫܵܥܬ݂ܵܐ ܕܠܵܐ ܣܵܒ݂ܪܝܼܢ ܐܢ̄ܬܘܿܢ. ܢܹܐܬܹܐ ܒܪܹܗ ܕܐ̄ܢܵܫܵܐ.

⁴⁵ܡܲܢܘܼ ܟܲܝ ܐܝܼܬ݂ܵܘܗܝ ܥܲܒ݂ܕܵܐ ܡܗܲܝܡܢܵܐ ܘܚܲܟܿܝܼܡܵܐ: ܕܐܲܩܝܼܡܹܗ ܡܵܪܹܗ ܥܲܠ ܒܢܲܝ̈ ܒܲܝܬܹ݁ܗ: ܕܢܸܬܸܠ ܠܗܘܿܢ ܣܲܝܒܵܪܬܵܐ ܒܙܲܒ݂ܢܵܗ̇.

⁴⁶ܛܘܼܒ݂ܵܘܗܝ. ܠܥܲܒ݂ܕܵܐ ܗܵܘ: ܕܢܹܐܬܹܐ ܡܵܪܹܗ ܢܸܫܟܿܚܝܼܘܗܝ ܕܥܵܒܹ̇ܕ݂ ܗܵܟܲܢܵܐ.

⁴⁷ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܲܢܩܝܼܡܝܼܘܗܝ ܥܲܠ ܟܠ ܕܐܝܼܬ݂ ܠܹܗ.

⁴⁸ܐܸܢ ܕܹܝܢ ܢܹܐܡܲܪ ܥܲܒ݂ܕܵܐ ܗܵܘ ܒܝܼܫܵܐ ܒܠܸܒܹܗ. ܕܡܵܪܝ ܡܵܘܚܲܪ ܠܡܹܐܬ݂ܵܐ:

⁴⁹ܘܲܢܫܲܪܹܐ ܠܡܸܡܚܵܐ ܟܢܵܘܵܬܹ̈ܗ: ܘܢܸܗܘܹܐ ܐܵܟܹܠ ܘܫܵܬܹܐ ܥܲܡ ܪ̈ܵܘܵܝܹܐ:

⁵⁰ܢܹܐܬܹܐ ܡܵܪܹܗ ܕܥܲܒ݂ܕܵܐ ܗܵܘ ܒܝܵܘܡܵܐ ܕܠܵܐ ܣܵܒܲܪ. ܘܲܒ݂ܫܵܥܬ݂ܵܐ ܕܠܵܐ ܝܵܕ݂ܲܥ:

⁵¹ܘܢܸܦܠܓ݂ܝܘܗܝ ܘܲܢܣܝܼܡ ܡܢܵܬܹܗ. ܥܲܡ ܢܵܣܒܲܝ̈ ܒܐܲܦܹ̈ܐ. ܬܲܡܵܢ ܢܸܗܘܹܐ ܒܸܟ݂ܝܵܐ. ܘܚܘܼܪܵܩ ܫܸܢܹ̈ܐ.