Read Aramaic Peshita Matthew 26 Bible Online

Matthew 26 - Aramaic Peshita bible

Matthew 26

¹ܘܲܗܘܵܐ ܕܟܲܕ݂ ܫܲܠܸܡ ܝܼܫܘܿܥ ܟܠܗܹܝܢ ܡܸܠܹ̈ܐ ܗܵܠܹܝܢ: ܐܸܡܲܪ ܠܬܲܠܡܝܼܕ݂ܵܘ̈ܗܝ.

²ܝܵܕ݂ܥܝܼܢ ܐܢ̄ܬܘܿܢ ܕܒ݂ܵܬܲܪ ܬܪܹܝܢ ܝܵܘܡ̈ܝܼܢ ܗܵܘܹܐ ܦܸܨܚܵܐ. ܘܲܒ݂ܪܹܗ ܕܐ̄ܢܵܫܵܐ ܡܸܫܬ݁ܠܸܡ ܕܢܸܙܕܩܸܦ.

³ܗܵܝܕܹܝܢ ܐܸܬ݂ܟܲܢܲܫܘ ܪ̈ܲܒܲܝ ܟܵܗܢܹ̈ܐ. ܘܣܵܦܪܹ̈ܐ. ܘܩܲܫܝܼܫܹ̈ܐ ܕܥܲܡܵܐ: ܠܕ݂ܵܪܬܹܗ ܕܪܲܒ ܟܵܗܢܹ̈ܐ. ܕܡܸܬ݂ܩܪܹܐ ܩܲܝܵܦܵܐ.

⁴ܘܐܸܬ݂ܡܲܠܲܟ݂ܘ ܥܲܠ ܝܼܫܘܿܥ: ܕܲܒ݂ܢܸܟ݂ܠܵܐ ܢܹܐܚܕ݂ܘܢܵܝܗܝ. ܘܢܸܩܛܠܘܼܢܵܝܗܝ.

⁵ܘܐܵܡܪܝܼܢ ܗ̄ܘܼܵܘ: ܠܵܐ ܒܥܲܕ݂ܥܹܕ݂ܵܐ. ܕܠܵܐ ܢܸܗܘܹܐ ܫܓ݂ܘܼܫܝܵܐ ܒܥܲܡܵܐ.

⁶ܘܟܲܕ݂ ܗܘ̣ܵܐ ܝܼܫܘܿܥ ܒܒܹܝܬ݂ ܥܲܢܝܵܐ. ܒܒܲܝܬܹ݁ܗ ܕܫܸܡܥܘܿܢ ܓܲܪܒܵܐ

⁷ܩܸܪܒܲܬ݂ ܠܹܗ ܐܲܢ̄ܬ݁ܬ݂ܵܐ ܕܐܝܼܬ݂ ܥܠܹܝܗ̇ ܫܵܛܝܼܦ̮ܬܵܐ ܕܡܸܫܚܵܐ. ܕܒܸܣܡܵܐ ܣܲܓܿܝܼ ܕܡܲܝܵܐ. ܘܐܲܫܦܲܥܬ݂ܵܗ̇ ܥܲܠ ܪܹܫܹܗ ܕܝܼܫܘܿܥ. ܟܲܕ݂ ܣܡܝܼܟ݂.

⁸ܚܙܵܘ ܕܹܝܢ ܬܲܠܡܝܼܕ݂ܵܘ̈ܗܝ. ܘܐܸܬ݂ܒܐܸܫ ܠܗܘܿܢ. ܘܐܸܡܲܪܘ. ܠܡܵܢܵܐ ܐܲܒ݂ܕܵܢܵܐ ܗܵܢܵܐ.

⁹ܡܸܫܟܲܚ ܗܘ̣ܵܐ ܓܹܝܪ ܕܢܸܙܕܲܒܲܢ ܗܵܢܵܐ ܒܣܲܓܿܝܼ. ܘܢܸܬ݂ܝܼܗܸܒ݂ ܠܡܸܣܟܹܢܹ̈ܐ.

¹⁰ܝܼܫܘܿܥ ܕܹܝܢ ܝܼܕ݂ܲܥ. ܘܐܸܡܲܪ ܠܗܘܿܢ. ܡܵܢܵܐ ܡܲܠܐܹܝܢ ܐܢ̄ܬܘܿܢ ܠܵܗ̇ ܠܐܲܢ̄ܬ݁ܬ݂ܵܐ. ܥܒ݂ܵܕ݂ܵܐ ܫܲܦܝܼܪܵܐ ܥܸܒ݂ܕܲܬ݂ ܠܘܵܬ݂ܝ.

¹¹ܒܟ݂ܠܙܒܲܢ ܓܹܝܪ ܡܸܣܟܹܢܹ̈ܐ ܐܝܼܬ݂ ܠܟ݂ܘܿܢ ܥܲܡܟ݂ܘܿܢ. ܠܝܼ ܕܹܝܢ. ܠܵܐ ܒܟ݂ܠܙܒܲܢ ܐܝܼܬ݂ ܠܟ݂ܘܿܢ.

¹²ܗܵܕܹܐ ܕܹܝܢ ܕܐܲܪܡܝܲܬ݂ ܒܸܣܡܵܐ ܗܵܢܵܐ ܥܲܠ ܓܘܼܫܡܝ: ܐܲܝܟ݂ ܕܲܠܡܸܩܒܿܪܲܢܝ ܥܸܒ݂ܕܲܬ݂.

¹³ܘܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܐܲܝܟܵܐ ܕܬܸܬ݂ܟܪܸܙ ܣܒܲܪܬ݂ܝ ܗܵܕܹܐ. ܒܟ݂ܠܹܗ ܥܵܠܡܵܐ: ܢܸܬ݂ܡܲܠܲܠ ܐܵܦ ܡܸܕܸܡ ܕܥܸܒ݂ܕܲܬ݂ ܗܵܕܹܐ. ܠܕ݂ܘܼܟ݂ܪܵܢܵܗ̇.

¹⁴ܗܵܝܕܹܝܢ ܐܸܙܲܠ ܚܲܕ݂ ܡܸܢ ܬܪܸܥܣܲܪ. ܕܡܸܬ݂ܩܪܹܐ ܝܼܗܘܼܕ݂ܵܐ ܣܟܲܪܝܘܿܛܵܐ: ܠܘܵܬ݂ ܪ̈ܲܒܲܝ ܟܵܗܢܹ̈ܐ.

¹⁵ܘܐܸܡܲܪ ܠܗܘܿܢ. ܡܵܢܵܐ ܨܵܒܹܝܢ ܐܢ̄ܬܘܿܢ ܠܡܸܬܲܠ ܠܝܼ: ܘܐܸܢܵܐ ܡܲܫܠܸܡ ܐ̄ܢܵܐ ܠܹܗ ܠܟ݂ܘܿܢ. ܗܸܢܘܿܢ ܕܹܝܢ ܐܲܩܝܼܡܘ ܠܹܗ ܬܠܵܬ݂ܝܼܢ ܕܟܸܣܦܵܐ.

¹⁶ܘܡܸܢ ܗܵܝܕܹܝܢ. ܒܵܥܹܐ ܗܘ̣ܵܐ ܠܹܗ ܦܸܠܥܵܐ ܕܢܲܫܠܡܝܼܘܗܝ.

¹⁷ܒܝܵܘܡܵܐ ܕܹܝܢ ܩܲܕ݂ܡܵܝܵܐ ܕܦܲܛܝܼܪܹ̈ܐ: ܩܪܸܒ݂ܘ ܬܲܠܡܝܼܕ݂ܹ̈ܐ ܠܘܵܬ݂ ܝܼܫܘܿܥ. ܘܐܸܡܲܪܘ ܠܹܗ. ܐܲܝܟܵܐ ܨܵܒܹܐ ܐܲܢ̄ܬ݁ ܕܲܢܛܲܝܸܒ݂ ܠܵܟ݂. ܕܬܸܠܥܲܣ ܦܸܨܚܵܐ.

¹⁸ܗܘܼ ܕܹܝܢ ܐܸܡܲܪ ܠܗܘܿܢ. ܙܸܠܘ ܠܲܡܕ݂ܝܼܢ̄ܬܵܐ ܠܘܵܬ݂ ܦܠܵܢ. ܘܐܸܡܲܪܘ ܠܹܗ. ܪܲܒܲܢ ܐܵܡܲܪ: ܙܲܒ݂ܢܝ ܡܛܵܐ ܠܹܗ. ܠܘܵܬ݂ܵܟ݂ ܥܵܒܹ̇ܕ݂ ܐ̄ܢܵܐ ܦܸܨܚܵܐ. ܥܲܡ ܬܲܠܡ̈ܝܼܕ݂ܲܝ.

¹⁹ܘܬܲܠܡܝܼܕ݂ܵܘ̈ܗܝ ܥܒܲܕ݂ܘ ܐܲܝܟܲܢܵܐ ܕܲܦܩܲܕ݂ ܠܗܘܿܢ ܝܼܫܘܿܥ. ܘܛܲܝܸܒ݂ܘ ܦܸܨܚܵܐ.

²⁰ܘܟܲܕ݂ ܗܘ̣ܵܐ ܪܲܡܫܵܐ. ܣܡܝܼܟ݂ ܗܘ̣ܵܐ ܥܲܡ ܬܪܸܥܣܲܪ ܬܲܠܡܝܼܕ݂ܵܘ̈ܗܝ.

²¹ܘܟܲܕ݂ ܠܵܥܣܝܼܢ. ܐܸܡܲܪ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܚܲܕ݂ ܡܸܢܟ݂ܘܿܢ ܡܲܫܠܸܡ ܠܝܼ.

²²ܘܟܸܪܝܲܬܸ ܠܗܘܿܢ. ܛܵܒ݂. ܘܫܲܪܝܼܘ ܠܡܹܐܡܲܪ ܠܹܗ ܚܲܕ݂ ܚܲܕ݂ ܡܸܢܗܘܿܢ. ܠܡܵܐ: ܐܸܢܵܐ ܡܵܪܝ

²³ܗܘܼ ܕܹܝܢ ܥܢܵܐ. ܘܐܸܡܲܪ. ܡܲܢ ܕܨܵܒܲܥ ܐܝܼܕ݂ܗ ܥܲܡܝ ܒܠܲܓܿܬ݂ܵܐ. ܗܘܼ ܢܲܫܠܡܲܢܝ.

²⁴ܘܲܒ݂ܪܹܗ ܕܐ̄ܢܵܫܵܐ ܐܵܙܹܠ. ܐܲܝܟܲܢܵܐ ܕܲܟ݂ܬ݂ܝܼܒ݂ ܥܠܵܘܗܝ. ܘܵܝ ܠܹܗ ܕܹܝܢ ܠܓܲܒ݂ܪܵܐ. ܗܵܘ ܕܒ݂ܐܝܼܕ݂ܗ ܒܪܹܗ ܕܐ̄ܢܵܫܵܐ ܡܸܫܬ݁ܠܸܡ. ܦܲܩܵܚ ܗܘ̣ܵܐ ܠܹܗ ܠܓܲܒ݂ܪܵܐ ܗܵܘ. ܐܸܠܘܼ ܠܵܐ ܐܸܬ݂ܝܼܠܸܕ݂.

²⁵ܥܢܵܐ ܝܼܗܘܼܕ݂ܵܐ ܡܲܫܠܡܵܢܵܐ. ܘܐܸܡܲܪ. ܕܲܠܡܵܐ: ܐܸܢܵܐ ܗܘܼ ܪܲܒܝܼ. ܐܵܡܲܪ ܠܹܗ ܝܼܫܘܿܥ. ܐܲܢ̄ܬ݁ ܐܸܡܲܪܬ݁.

²⁶ܟܲܕ݂ ܕܹܝܢ ܠܵܥܣܝܼܢ: ܫܩܲܠ ܝܼܫܘܿܥ ܠܲܚܡܵܐ ܘܒܲܪܸܟ݂ ܘܲܩܨܵܐ. ܘܝܲܗ̄ܒ݂ ܠܬܲܠܡܝܼܕ݂ܵܘ̈ܗܝ ܘܐܸܡܲܪ. ܣܲܒ݂ܘ ܐܲܟ݂ܘܿܠܘ. ܗܵܢܵܘ ܦܲܓ݂ܪܝ.

²⁷ܘܲܫܩܲܠ ܟܵܣܵܐ ܘܐܵܘܕܝܼ: ܘܝܲܗ̄ܒ݂ ܠܗܘܿܢ. ܘܐܸܡܲܪ. ܣܲܒ݂ܘ ܐܸܫܬܵܘ ܡܸܢܹܗ. ܟܠܟ݂ܘܿܢ.

²⁸ܗܵܢܵܘ ܕܡܝ ܕܲܕ݂ܝܵܬܹܩܹܐ ܚܲܕ݂ܬ݂ܵܐ: ܕܲܚܠܵܦ ܣܲܓ̈ܝܼܐܹ̈ܐ ܡܸܬ݂ܐܫܸܕ݂ ܠܫܘܼܒ݂ܩܵܢܵܐ ܕܲܚܛܵܗܹ̈ܐ.

²⁹ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ: ܕܠܵܐ ܐܸܫܬܹܐ ܡܸܢ ܗܵܫܵܐ ܡܸܢ ܗܵܢܵܐ ܝܲܠܕܵܐ ܕܲܓ݂ܦܸܬܵܐ: ܥܕ݂ܲܡܵܐ ܠܝܵܘܡܵܐ ܕܒܹܗ ܐܸܫܬܝܼܘܗܝ ܥܲܡܟ݂ܘܿܢ ܚܲܕ݂ܬ݂ܵܐ. ܒܡܲܠܟܘܼܬܹܗ ܕܐܵܒ݂ܝ.

³⁰ܘܫܲܒܲܚܘ ܘܲܢܦܲܩܘ ܠܛܘܼܪ ܙܲܝ̈ܬܹܐ.

³¹ܗܵܝܕܹܝܢ ܐܸܡܲܪ ܠܗܘܿܢ ܝܼܫܘܿܥ. ܐܲܢ̄ܬ݁ܘܿܢ ܟܠܟ݂ܘܿܢ ܬܸܬ݂ܟܲܫܠܘܼܢ ܒܝܼ ܒܗܵܢܵܐ ܠܸܠܝܵܐ. ܟܬ݂ܝܼܒ݂ ܓܹܝܪ ܕܐܸܡܚܹܐ ܠܪܵܥܝܵܐ. ܘܢܸܬ݂ܒܲܕܪܘܼܢ ܥܸܪ̈ܒܹܐ ܕܥܵܢܹܗ.

³²ܡܸܢ ܒܵܬܲܪ ܕܩܵܐܹܡ ܐ̄ܢܵܐ ܕܹܝܢ: ܩܵܕ݂ܡ ܐ̄ܢܵܐ ܠܟ݂ܘܿܢ ܠܲܓ݂ܠܝܼܠܵܐ.

³³ܥܢܵܐ ܟܹܐܦܵܐ. ܘܐܸܡܲܪ ܠܹܗ. ܐܵܦܸܢ ܟܠܢܵܫ ܢܸܬ݂ܟܫܸܠ ܒܵܟ݂: ܐܸܢܵܐ ܡܬ݂ܘܿܡ. ܠܵܐ ܐܸܬ݂ܟܫܸܠ ܒܵܟ݂.

³⁴ܐܵܡܲܪ ܠܹܗ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂. ܕܲܒ݂ܗܵܢܵܐ ܠܸܠܝܵܐ ܩܕ݂ܵܡ ܕܢܸܩܪܹܐ ܬܲܪܢܵܓ݂ܠܵܐ: ܬܠܵܬ݂ ܙܲܒ݂ܢ̈ܝܼܢ ܬܸܟ݂ܦܘܿܪ ܒܝܼ.

³⁵ܐܵܡܲܪ ܠܹܗ ܟܹܐܦܵܐ. ܐܸܢ ܢܸܗܘܹܐ ܠܝܼ ܠܲܡܡܵܬ݂ ܥܲܡܵܟ݂. ܠܵܐ ܐܸܟ݂ܦܘܿܪ ܒܵܟ݂. ܘܗܵܟ݂ܘܵܬ݂. ܐܵܦ ܟܠܗܘܿܢ ܬܲܠܡܝܼܕ݂ܹ̈ܐ ܐܸܡܲܪܘ.

³⁶ܗܵܝܕܹܝܢ ܐܸܬ݂ܵܐ ܥܲܡܗܘܿܢ ܝܼܫܘܿܥ ܠܕ݂ܘܼܟܬ݂ܵܐ ܕܡܸܬ݂ܩܲܪܝܵܐ ܓܲܕ݂ܣܹܡܵܢ. ܘܐܸܡܲܪ ܠܬܲܠܡܝܼܕ݂ܵܘ̈ܗܝ. ܬܸܒ݂ܘ ܗܵܪܟܵܐ. ܥܲܕ݂ ܐܹܙܲܠ ܐܹܨܲܠܹܐ.

³⁷ܘܲܕ݂ܒܲܪ ܠܟܹܐܦܵܐ. ܘܠܲܬ݂ܪܲܝܗܘܿܢ ܒܢܲܝ̈ ܙܲܒ݂ܕ݂ܲܝ. ܘܫܲܪܝܼ ܠܡܸܬ݂ܟܡܵܪܘܼ. ܘܲܠܡܸܬ݂ܥܵܩܘܼ.

³⁸ܘܐܸܡܲܪ ܠܗܘܿܢ. ܟܲܪܝܵܐ ܗܝܼ ܠܵܗ̇ ܠܢܲܦ̮ܫܝ. ܥܕ݂ܲܡܵܐ ܠܡܵܘܬܵܐ. ܩܵܘܵܘ ܠܝܼ ܗܵܪܟܵܐ. ܘܲܫܗܲܪܘ ܥܲܡܝ.

³⁹ܘܲܦܪܲܩ ܩܲܠܝܼܠ. ܘܲܢܦܲܠ ܥܲܠ ܐܲܦܵܘ̈ܗܝ. ܘܲܡܨܲܠܹܐ ܗ̄ܘܵܐ. ܘܐܵܡܲܪ. ܐܵܒ݂ܝ: ܐܸܢ ܡܸܫܟܚܵܐ. ܢܸܥܒܪܲܢܝ ܟܵܣܵܐ ܗܵܢܵܐ. ܒܪܲܡ ܠܵܐ ܐܲܝܟ݂ ܕܐܸܢܵܐ ܨܵܒܹܐ ܐ̄ܢܵܐ ܐܸܠܵܐ. ܐܲܝܟ݂ ܕܐܲܢ̄ܬ݁.

⁴⁰ܘܐܸܬ݂ܵܐ ܠܘܵܬ݂ ܬܲܠܡܝܼܕ݂ܵܘ̈ܗܝ: ܘܐܸܫܟܲܚ ܐܸܢܘܿܢ. ܟܲܕ݂ ܕܲܡܟܿܝܼܢ. ܘܐܸܡܲܪ ܠܟܹܐܦܵܐ. ܗܵܟܲܢܵܐ ܠܵܐ ܐܸܫܟܲܚܬ݁ܘܿܢ: ܚܕ݂ܵܐ ܫܵܥܵܐ: ܕܬܸܫܗܪܘܼܢ ܥܲܡܝ.

⁴¹ܐܸܬ݁ܬ݁ܥܝܼܪܘ ܘܨܲܠܵܘ. ܕܠܵܐ ܬܸܥܠܘܼܢ ܠܢܸܣܝܘܼܢܵܐ. ܪܘܼܚܵܐ. ܡܛܲܝܒ݂ܵܐ. ܦܲܓ݂ܪܵܐ ܕܹܝܢ ܟܪܝܼܗ.

⁴²ܬܘܼܒ݂ ܐܸܙܲܠ ܕܬܲܪܬܹ݁ܝܢ ܙܲܒ݂ܢ̈ܝܼܢ ܨܲܠܝܼ. ܘܐܸܡܲܪ. ܐܵܒ݂ܝ: ܐܸܢ ܠܵܐ ܡܸܫܟܲܚ ܗܵܢܵܐ ܟܵܣܵܐ ܕܢܸܥܒܲܪ ܐܸܠܵܐ ܐܸܢ ܐܸܫܬ݁ܝܼܬܹܗ: ܢܸܗܘܹܐ ܨܸܒ݂ܝܵܢܵܟ݂.

⁴³ܘܐܸܬ݂ܵܐ ܬܘܼܒ݂. ܐܸܫܟܲܚ ܐܸܢܘܿܢ ܟܲܕ݂ ܕܲܡܟܿܝܼܢ. ܥܲܝܢܲܝܗܘܿܢ ܓܹܝܪ ܝܲܩܝܼܪ̈ܵܢ ܗ̄ܘܲܝ̈.

⁴⁴ܘܲܫܒܲܩ ܐܸܢܘܿܢ ܘܐܸܙܲܠ ܬܘܼܒ݂. ܨܲܠܝܼ ܕܲܬ݂ܠܵܬ݂ ܙܲܒ݂ܢ̈ܝܼܢ: ܘܠܵܗ̇ ܠܡܸܠܬ݂ܵܐ ܐܸܡܲܪ.

⁴⁵ܗܵܝܕܹܝܢ ܐܸܬ݂ܵܐ ܠܘܵܬ݂ ܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܕܡܲܟ݂ܘ ܡܸܟܹܝܠ ܘܐܸܬ݁ܬ݁ܢܝܼܚܘ. ܗܵܐ ܡܛܵܬ݂ ܫܵܥܬ݂ܵܐ. ܘܲܒ݂ܪܹܗ ܕܐ̄ܢܵܫܵܐ ܡܸܫܬ݁ܠܸܡ ܒܐܝܕ݂ܲܝ̈ܗܘܿܢ ܕܚܲܛܵܝܹ̈ܐ.

⁴⁶ܩܘܼܡܘ ܢܹܐܙܲܠ. ܗܵܐ ܡܛܵܐ ܗܵܘ ܕܡܲܫܠܸܡ ܠܝܼ.

⁴⁷ܘܥܲܕ݂ ܗܘܼ ܡܡܲܠܸܠ: ܗܵܐ ܝܼܗܘܼܕ݂ܵܐ ܡܲܫܠܡܵܢܵܐ ܚܲܕ݂ ܡܸܢ ܬܪܸܥܣܲܪܬܵܐ ܐܸܬ݂ܵܐ. ܘܟܸܢܫܵܐ ܥܲܡܹܗ ܣܲܓܿܝܼܐܵܐ. ܥܲܡ ܣܲܦ̮ܣܹܪܹ̈ܐ ܘܚܘܼܛܪܹ̈ܐ. ܡܸܢ ܠܘܵܬ݂ ܪ̈ܲܒܲܝ ܟܵܗܢܹ̈ܐ. ܘܩܲܫܝܼܫܹ̈ܐ ܕܥܲܡܵܐ.

⁴⁸ܘܝܲܗ̄ܒ݂ ܗܘ̣ܵܐ ܠܗܘܿܢ ܐܵܬ݂ܵܐ ܝܼܗܘܼܕ݂ܵܐ ܡܲܫܠܡܵܢܵܐ. ܘܐܸܡܲܪ. ܠܗܵܘ ܕܢܵܫܹܩ ܐ̄ܢܵܐ. ܗܘܸܝܘܼ ܠܹܗ ܐܲܚܘܿܕ݂ܘ.

⁴⁹ܘܡܸܚܕ݂ܵܐ ܩܪܸܒ݂ ܠܘܵܬ݂ ܝܼܫܘܿܥ. ܘܐܸܡܲܪ. ܫܠܵܡ ܪܲܒܝܼ. ܘܢܲܫܩܹܗ.

⁵⁰ܗܘܼ ܕܹܝܢ ܝܼܫܘܿܥ. ܐܸܡܲܪ ܠܹܗ. ܥܲܠ ܗܵܝ ܕܐܬܲܝܬ݁ ܚܲܒ݂ܪܝ. ܗܵܝܕܹܝܢ ܐܸܬ݂ܩܲܪܲܒ݂ܘ: ܘܐܲܪܡܝܼܘ ܐܝܼܕ݂ܲܝ̈ܗܘܿܢ ܥܲܠ ܝܼܫܘܿܥ. ܘܐܲܚܕܿܘܼܗܝ.

⁵¹ܘܗܵܐ ܚܲܕ݂ ܡܸܢ ܗܵܢܘܿܢ ܕܥܲܡ ܝܼܫܘܿܥ ܐܵܘܫܸܛ ܐܝܼܕ݂ܗ. ܘܲܫܡܲܛ ܣܲܦ̮ܣܹܪܵܐ. ܘܲܡܚܵܝܗܝ ܠܥܲܒ݂ܕܹܗ ܕܪܲܒ ܟܵܗܢܹ̈ܐ. ܘܫܲܩܠܵܗ̇ ܐܸܕ݂ܢܹܗ.

⁵²ܗܵܝܕܹܝܢ ܐܸܡܲܪ ܠܹܗ ܝܼܫܘܿܥ. ܐܲܗܦܸܟ݂ ܣܲܦ̮ܣܹܪܵܐ ܠܕ݂ܘܼܟܬ݂ܵܗ̇. ܟܠܗܘܿܢ ܓܹܝܪ ܗܵܢܘܿܢ ܕܲܢܣܲܒ݂ܘ ܣܲܝܦܹ̈ܐ. ܒܣܲܝܦܹ̈ܐ ܢܡܘܼܬ݂ܘܼܢ.

⁵³ܐܵܘ ܣܵܒܲܪ ܐܲܢ̄ܬ݁ ܕܠܵܐ ܡܸܫܟܲܚ ܐ̄ܢܵܐ ܕܐܸܒ݂ܥܹܐ ܡܸܢ ܐܵܒ݂ܝ: ܘܲܢܩܝܼܡ ܠܝܼ ܗܵܫܵܐ ܝܲܬܝܼܪ ܡܸܢ ܬܲܪܬܲܥܸܣܪܹ̈ܐ ܠܸܓ݂ܝܘܿܢ̈ܝܼܢ ܕܡܲܠܲܐܟܹ̈ܐ.

⁵⁴ܐܲܝܟܲܢܵܐ ܗܵܟܹܝܠ ܢܸܬ݂ܡܲܠܘܿܢ ܟܬ݂ܵܒܹ̈ܐ: ܕܗܵܟܲܢܵܐ ܘܵܠܹܐ ܕܢܸܗܘܹܐ.

⁵⁵ܒܗܵܝ ܫܵܥܬ݂ܵܐ. ܐܸܡܲܪ ܝܼܫܘܿܥ ܠܟܸܢܫܹ̈ܐ. ܐܲܝܟ݂ ܕܥܲܠ ܓܲܝܵܣܵܐ ܢܦܲܩܬ݁ܘܿܢ ܒܣܲܦ̮ܣܹܪܹ̈ܐ ܘܲܒ݂ܚܘܼܛܪܹ̈ܐ. ܕܬܹܐܚܕ݂ܘܢܵܢܝ: ܟܠܝܘܿܡ ܠܘܵܬ݂ܟ݂ܘܿܢ ܒܗܲܝܟܠܵܐ ܝܵܬܹܒ݂ ܗ̄ܘܹܝܬ݂ ܘܡܲܠܸܦ. ܘܠܵܐ ܐܸܚܲܕܿܬ݁ܘܼܢܵܢܝ.

⁵⁶ܗܵܕܹܐ ܕܹܝܢ ܕܲܗܘܵܬ݂. ܕܢܸܬ݂ܡܲܠܘܿܢ ܟܬ݂ܵܒܹ̈ܐ ܕܲܢܒ݂ܝܹ̈ܐ. ܗܵܝܕܹܝܢ ܬܲܠܡܝܼܕ݂ܹ̈ܐ ܟܠܗܘܿܢ ܫܲܒ݂ܩܘܼܗܝ. ܘܲܥܪܲܩܘ.

⁵⁷ܘܗܵܢܘܿܢ ܕܐܲܚܕܿܘܼܗܝ ܠܝܼܫܘܿܥ. ܐܵܘܒܿܠܘܼܗܝ ܠܘܵܬ݂ ܩܲܝܵܦܵܐ ܪܲܒ ܟܵܗܢܹ̈ܐ: ܐܲܝܟܵܐ ܕܣܵܦܪܹ̈ܐ ܘܩܲܫܝܼܫܹ̈ܐ ܟܢܝܼܫܝܼܢ ܗ̄ܘܼܵܘ.

⁵⁸ܫܸܡܥܘܿܢ ܕܹܝܢ ܟܹܐܦܵܐ. ܐܵܙܹܠ ܗܘ̣ܵܐ ܒܵܬ݂ܪܹܗ ܡܸܢ ܪܘܼܚܩܵܐ: ܥܕ݂ܲܡܵܐ ܠܕ݂ܵܪܬܹ݁ܗ ܕܪܲܒ ܟܵܗܢܹ̈ܐ. ܘܥܲܠ ܝܼܬܸܒ݂ ܠܓ݂ܵܘ ܥܲܡ ܕܲܚܫܹ̈ܐ ܕܢܸܚܙܹܐ ܚܲܪܬ݂ܵܐ.

⁵⁹ܪ̈ܲܒܲܝ ܟܵܗܢܹ̈ܐ ܕܹܝܢ ܘܩܲܫܝܼܫܹ̈ܐ ܘܲܟ݂ܢܘܼܫܬܵܐ ܟܠܵܗ̇: ܒܵܥܹܝܢ ܗ̄ܘܼܵܘ ܥܲܠ ܝܼܫܘܿܥ ܣܵܗܕܵܐ ܐܲܝܟ݂ ܕܲܢܡܝܼܬ݂ܘܼܢܵܝܗܝ.

⁶⁰ܘܠܵܐ ܐܸܫܟܲܚܘ. ܘܐܸܬ݂ܵܘ ܣܲܓܿܝܼܐܹ̈ܐ ܣܵܗܕܵܐ ܕܫܘܼܩܪܵܐ. ܐ̄ܚܪܵܝܲܬ݂ ܕܹܝܢ ܩܪܸܒ݂ܘ ܬܪܹܝܢ.

⁶¹ܘܐܵܡܪܝܼܢ. ܗܵܢܵܐ ܐܸܡܲܪ: ܕܡܸܫܟܲܚ ܐ̄ܢܵܐ ܕܐܸܫܪܹܐ ܗܲܝܟܠܵܐ ܕܐܲܠܵܗܵܐ. ܘܠܲܬ݂ܠܵܬ݂ܵܐ ܝܵܘܡ̈ܝܼܢ ܐܸܒ݂ܢܝܼܘܗܝ.

⁶²ܘܩܵܡ ܪܲܒ ܟܵܗܢܹ̈ܐ. ܘܐܸܡܲܪ ܠܹܗ. ܠܵܐ ܡܸܕܸܡ ܡܦܲܢܹܐ ܐܲܢ̄ܬ݁ ܦܸܬ݂ܓ݂ܵܡܵܐ: ܡܵܢܵܐ ܡܲܣܗܕ݂ܝܼܢ ܥܠܲܝܟ ܗܵܠܹܝܢ.

⁶³ܝܼܫܘܿܥ ܕܹܝܢ. ܫܲܬ݁ܝܼܩ ܗ̄ܘܵܐ. ܘܲܥܢܵܐ ܪܲܒ ܟܵܗܢܹ̈ܐ. ܘܐܸܡܲܪ ܠܹܗ. ܡܵܘܡܹܐ ܐ̄ܢܵܐ ܠܵܟ݂ ܒܐܲܠܵܗܵܐ ܚܲܝܵܐ: ܕܬܹܐܡܲܪ ܠܲܢ. ܐܸܢ ܐܲܢ̄ܬ݁ ܗܘܼ ܡܫܝܼܚܵܐ ܒܪܹܗ ܕܐܲܠܵܗܵܐ.

⁶⁴ܐܵܡܲܪ ܠܹܗ ܝܼܫܘܿܥ. ܐܲܢ̄ܬ݁ ܐܸܡܲܪܬ݁. ܐܵܡܲܪܢܵܐ ܠܟ݂ܘܿܢ ܕܹܝܢ: ܕܡܸܢ ܗܵܫܵܐ ܬܸܚܙܘܿܢܵܝܗܝ ܠܲܒ݂ܪܹܗ ܕܐ̄ܢܵܫܵܐ ܕܝܵܬܹܒ݂ ܡܸܢ ܝܲܡܝܼܢܵܐ ܕܚܲܝܠܵܐ: ܘܐܵܬܹܐ ܥܲܠ ܥܢܵܢܲܝ̈ ܫܡܲܝܵܐ.

⁶⁵ܗܵܝܕܹܝܢ ܪܲܒ ܟܵܗܢܹ̈ܐ ܨܲܪܝܼ ܡܵܐܢܵܘ̈ܗܝ. ܘܐܸܡܲܪ. ܗܵܐ ܓܲܕܸܿܦ. ܡܵܢܵܐ ܡܸܟܹܝܠ ܡܸܬ݂ܒܿܥܹܝܢ ܠܲܢ ܣܵܗܕܵܐ. ܗܵܐ ܗܵܫܵܐ ܫܡܲܥܬ݁ܘܿܢ ܓܘܼܕܵܦܹܗ.

⁶⁶ܡܵܢܵܐ ܨܵܒܹܝܢ ܐܢ̄ܬܘܿܢ. ܥܢܵܘ. ܘܐܵܡܪܝܼܢ. ܚܲܝܵܒ݂ ܗܘܼ ܡܵܘܬܵܐ.

⁶⁷ܗܵܝܕܹܝܢ ܪܲܩܘ ܒܐܲܦܵܘ̈ܗܝ. ܘܲܡܩܲܦܚܝܼܢ ܗ̄ܘܼܵܘ ܠܹܗ. ܐ̄ܚܪ̈ܵܢܹܐ ܕܹܝܢ ܡܵܚܹܝܢ ܗ̄ܘܼܵܘ ܠܹܗ:

⁶⁸ܘܐܵܡܪܝܼܢ. ܐܸܬ݂ܢܲܒܵܐ ܠܲܢ ܡܫܝܼܚܵܐ: ܡܲܢܘܼ ܗܵܘ ܕܲܡܚܵܟ݂.

⁶⁹ܟܹܐܦܵܐ ܕܹܝܢ ܝܵܬܹܒ݂ ܗܘ̣ܵܐ ܠܒܲܪ ܒܕ݂ܵܪܬܵܐ: ܘܩܸܪܒܲܬ݂ ܠܘܵܬܹܗ ܐܲܡܬ݂ܵܐ ܚܕ݂ܵܐ. ܘܐܵܡܪܵܐ ܠܹܗ. ܐܵܦ ܐܲܢ̄ܬ݁. ܥܲܡ ܝܼܫܘܿܥ ܗ̄ܘܲܝܬ݁ ܢܵܨܪܵܝܵܐ.

⁷⁰ܗܘܼ ܕܹܝܢ ܟܦܲܪ ܩܕ݂ܵܡ ܟܠܗܘܿܢ. ܘܐܸܡܲܪ. ܠܵܐ ܝܵܕ݂ܲܥ ܐ̄ܢܵܐ ܡܵܢܵܐ ܐܵܡܪܵܐ ܐܲܢ̄ܬ݁ܝ.

⁷¹ܘܟܲܕ݂ ܢܦܲܩ ܠܣܸܦܵܐ: ܚܙܵܬܹܗ ܐ̄ܚܪܹܬ݂ܵܐ. ܘܐܵܡܪܵܐ ܠܗܘܿܢ. ܕܬܲܡܵܢ ܗܘ̣ܵܐ ܐܵܦ ܗܵܢܵܐ. ܥܲܡ ܝܼܫܘܿܥ ܢܵܨܪܵܝܵܐ.

⁷²ܘܬ݂ܘܼܒ݂ ܟܦܲܪ ܒܡܵܘ̈ܡܵܬ݂ܵܐ: ܕܠܵܐ ܝܵܕ݂ܲܥ ܐ̄ܢܵܐ ܠܹܗ ܠܓܲܒ݂ܪܵܐ.

⁷³ܡܸܢ ܒܵܬܲܪ ܩܲܠܝܼܠ ܕܹܝܢ: ܩܪܸܒ݂ܘ ܗܵܢܘܿܢ ܕܩܵܝܡܝܼܢ. ܘܐܸܡܲܪܘ ܠܟܹܐܦܵܐ. ܫܲܪܝܼܪܵܐܝܼܬ݂ ܐܵܦ ܐܲܢ̄ܬ݁. ܡܸܢܗܘܿܢ ܐܲܢ̄ܬ݁. ܐܵܦ ܡܲܡܠܠܵܟ݂ ܓܹܝܪ ܡܵܘܕܲܥ ܠܵܟ݂.

⁷⁴ܗܵܝܕܹܝܢ ܫܲܪܝܼ ܠܡܲܚܪܵܡܘܼ ܘܲܠܡܹܐܡܵܐ: ܕܠܵܐ ܝܵܕ݂ܲܥܢܵܐ ܠܹܗ ܠܓܲܒ݂ܪܵܐ. ܘܒ݂ܵܗ̇ ܒܫܵܥܬ݂ܵܐ. ܩܪܵܐ ܬܲܪܢܵܓ݂ܠܵܐ.

⁷⁵ܘܐܸܬ݁ܕܟܲܪ ܟܹܐܦܵܐ ܡܸܠܬ݂ܵܐ ܕܝܼܫܘܿܥ ܕܐܸܡܲܪ ܠܹܗ: ܕܲܩܕ݂ܵܡ ܕܢܸܩܪܹܐ ܬܲܪܢܵܓ݂ܠܵܐ ܬܠܵܬ݂ ܙܲܒ݂ܢ̈ܝܼܢ ܬܸܟ݂ܦܘܿܪ ܒܝܼ. ܘܲܢܦܲܩ ܠܒܲܪ. ܒܟ݂ܵܐ ܡܲܪܝܼܪܵܐܝܼܬ݂.