Read Aramaic Peshita Matthew 8 Bible Online

Matthew 8 - Aramaic Peshita bible

Matthew 8

¹ܟܲܕ݂ ܢܚܸܬ݂ ܕܹܝܢ ܡܸܢ ܛܘܼܪܵܐ: ܢܲܩܦܘܼܗܝ ܟܸܢܫܹ̈ܐ ܣܲܓܝܼܐܹ̈ܐ.

²ܘܗܵܐ ܓܲܪܒܵܐ ܚܲܕ݂ ܐܸܬ݂ܵܐ ܣܓܸܕ݂ ܠܹܗ ܘܐܸܡܲܪ. ܡܵܪܝ: ܐܸܢ ܨܵܒܹܐ ܐܲܢ̄ܬ݁ ܡܸܫܟܲܚ ܐܲܢ̄ܬ݁ ܠܲܡܕ݂ܲܟܵܝܘܼܬ݂ܝ.

³ܘܲܦ݂ܫܲܛ ܐܝܼܕ݂ܗ ܝܼܫܘܿܥ ܩܪܸܒ݂ ܠܹܗ. ܘܐܸܡܲܪ: ܨܵܒܹܐ ܐ̄ܢܵܐ. ܐܸܬ݁ܕܲܟܵܐ. ܘܒ݂ܵܗ̇ ܒܫܵܥܬ݂ܵܐ ܐܸܬ݁ܕܲܟܝ ܓܲܪܒܹܗ.

⁴ܘܐܸܡܲܪ ܠܹܗ ܝܼܫܘܿܥ: ܚܙܝܼ ܠܡܵܐ ܠܐ̄ܢܵܫ ܐܵܡܲܪ ܐܲܢ̄ܬ݁. ܐܸܠܵܐ ܙܸܠ ܚܵܘܵܐ ܢܲܦ̮ܫܵܟ݂ ܠܟ݂ܵܗܢܹ̈ܐ: ܘܩܲܪܸܒ݂ ܩܘܼܪܒܵܢܵܐ ܐܲܝܟ݂ ܕܦܲܩܸܕ݂ ܡܘܼܫܹܐ. ܠܣܵܗܕܘܬ݂ܗܘܿܢ.

⁵ܟܲܕ݂ ܥܲܠ ܕܹܝܢ ܝܼܫܘܿܥ ܠܲܟ݂ܦܲܪܢܵܚܘܿܡ: ܩܪܸܒ݂ ܠܹܗ ܩܸܢܛܪܘܿܢܵܐ ܚܲܕ݂: ܘܒ݂ܵܥܹܐ ܗܘ̣ܵܐ ܡܸܢܗ.

⁶ܘܐܵܡܲܪ. ܡܵܪܝ: ܛܲܠܝܼܝ ܪܡܹܐ ܒܒܲܝܬܵܐ: ܘܲܡܫܲܪܲܝ: ܘܒ݂ܝܼܫܵܐܝܼܬ݂ ܡܸܫܬܲܢܲܩ.

⁷ܐܵܡܲܪ ܠܹܗ ܝܼܫܘܿܥ: ܐܸܢܵܐ ܐܹܬܹܐ ܘܐܲܣܹܝܘܗܝ.

⁸ܥܢܵܐ ܩܸܢܛܪܘܿܢܵܐ ܗܵܘ ܘܐܸܡܲܪ. ܡܵܪܝ: ܠܵܐ ܫܵܘܹܐ ܐ̄ܢܵܐ ܕܬܸܥܘܠ ܬܚܹܝܬ݂ ܡܲܛܲܠܠ̄ܝ. ܐܸܠܐ ܒܲܠܚܘܿܕ݂ ܐܸܡܲܪ ܒܡܸܠܬ݂ܵܐ. ܘܢܸܬ݂ܐܲܣܹܐ ܛܲܠܝܝ.

⁹ܐܵܦ ܐܸܢܵܐ ܓܹܝܪ ܓܲܒ݂ܪܵܐ ܐ̄ܢܵܐ ܕܲܬ݂ܚܹܝܬ݂ ܫܘܼܠܛܵܢܵܐ. ܘܐܝܼܬ݂ ܬܚܹܝܬ݂ ܐܝܼܕ݂ܝ. ܐܸܣܛܪ̈ܵܛܝܼܘܼܛܹܐ. ܘܐܵܡܲܪ ܐ̄ܢܵܐ ܠܗܵܢܵܐ ܕܙܸܠ. ܘܐܵܙܸܠ. ܘܠܲܐܚܪܹ̈ܢܵܐ ܕܬ݂ܵܐ. ܘܐܵܬܹܐ. ܘܲܠܥܲܒ݂ܕܝ ܕܲܥܒܸܕ݂ ܗܵܕܹܐ. ܘܥܵܒܹ̇ܕ݂.

¹⁰ܟܲܕ݂ ܫܡܲܥ ܕܹܝܢ ܝܼܫܘܿܥ: ܐܸܬ݁ܕܲܡܲܪ. ܘܐܸܡܲܪ ܠܲܕ݂ܐܵܬܹܝܢ ܥܲܡܹܗ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ: ܕܐܵܦ ܠܵܐ ܒܝܼܣܪܵܝܹܠ ܐܸܫܟܚܹܬ݂ ܐܲܝܟ݂ ܗܵܕܹܐ ܗܲܝܡܵܢܘܼܬ݂ܵܐ.

¹¹ܐܵܡܲܪ ܐ̄ܢܵܐ ܠܟ݂ܘܿܢ ܕܹܝܢ: ܕܣܲܓܝܼܐܹ̈ܐ ܢܹܐܬ݂ܘܿܢ ܡܸܢ ܡܲܕ݂ܢܚܵܐ ܘܡܸܢ ܡܲܥܪܒ݂ܵܐ: ܘܢܸܣܬܲܡܟܘܢ ܥܲܡ ܐܲܒ݂ܪܵܗܵܡ ܘܐܝܼܣܚܵܩ ܘܝܲܥܩܘܿܒ݂. ܒܡܲܠܟܘܼܬ݂ܵܐ ܕܲܫܡܲܝܵܐ.

¹²ܒܢܹܝ̈ܗ̇ ܕܹܝܢ ܕܡܲܠܟܘܼܬ݂ܵܐ ܢܸܦܩܘܼܢ ܠܚܸܫܘܿܟ݂ܵܐ ܒܲܪܵܝܵܐ. ܬܲܡܵܢ ܢܸܗܘܹܐ ܒܸܟ݂ܝܵܐ. ܘܚܘܼܪܵܩ ܫܸܢܹ̈ܐ.

¹³ܘܐܸܡܲܪ ܝܼܫܘܿܥ ܠܩܸܢܛܪܘܿܢܵܐ ܗܵܘ. ܙܸܠ: ܐܲܝܟܲܢܵܐ ܕܗܲܝܡܸܢܬ݁ ܢܸܗܘܹܐ ܠܵܟ݂. ܘܐܸܬܲܐܣܝܼ ܛܲܠܝܹܗ ܒܵܗ̇ ܒܫܵܥܬ݂ܵܐ.

¹⁴ܘܐܸܬ݂ܵܐ ܝܼܫܘܿܥ ܠܒܲܝܬܹܗ ܕܫܸܡܥܘܿܢ. ܘܲܚܙܵܐ ܠܲܚܡܵܬܹܗ ܕܪܲܡܝܵܐ. ܘܐܲܚܝܼܕ݂ܵܐ ܠܵܗ̇ ܐܸܫܬ݂ܵܐ.

¹⁵ܘܲܩܪܸܒ݂ ܠܐܝܼܕ݂ܵܗ̇. ܘܲܫܒܲܩܬ݂ܵܗ̇ ܐܸܫܬ݂ܵܐ. ܘܩܵܡܲܬ݂. ܘܲܡܫܲܡܫܵܐ ܗ̄ܘܵܬ݂ ܠܹܗ.

¹⁶ܟܲܕ݂ ܗܘ̣ܵܐ ܕܹܝܢ ܪܲܡܫܵܐ: ܩܲܪܸܒ݂ܘ ܩܕ݂ܵܡܵܘܗ̱ܝ ܕܲܝܘܵܢܹ̈ܐ ܣܲܓܝܼܐܹ̈ܐ. ܘܐܲܦܸܩ ܕܲܝܘܲܝ̈ܗܘܿܢ ܒܡܸܠܬ݂ܵܐ. ܘܲܠܟ݂ܠܗܘܿܢ ܐܲܝܠܹܝܢ ܕܒ݂ܝܼܫܵܐܝܼܬ݂ ܥܒ݂ܝܼܕ݂ܝܼܢ ܗ̄ܘܵܘ ܐܲܣܝܼ ܐܸܢܘܿܢ.

¹⁷ܐܲܝܟ݂ ܕܢܸܬ݂ܡܲܠܹܐ ܡܸܕܸܡ ܕܐܸܬ݂ܐܡܲܪ ܒܝܲܕ݂ ܐܸܫܥܝܵܐ ܢܒ݂ܝܼܵܐ ܕܐܡܲܪ: ܕܗܘܼ ܢܸܣܒ݂ ܟܹܐܒܲܝ̈ܢ. ܘܟ݂ܘܼܪ̈ܗܵܢܲܝܢ ܢܸܛܥܲܢ.

¹⁸ܟܲܕ݂ ܚܙܵܐ ܕܹܝܢ ܝܼܫܘܿܥ ܟܸܢܫܹ̈ܐ ܣܲܓܝܼܐܹ̈ܐ ܕܲܚܕ݂ܝܼܪܝܼܢ ܠܹܗ: ܦܩܲܕ݂ ܕܢܹܐܙܠ̄ܘܿܢ ܠܥܸܒ݂ܪܵܐ.

¹⁹ܘܲܩܪܸܒ݂ ܣܵܦܪܵܐ ܚܲܕ݂ ܘܐܸܡܲܪ ܠܹܗ. ܪܲܒܝܼ: ܐܹܬܹܐ ܒܵܬ݂ܪܵܟ݂ ܠܐܲܬܲܪ ܕܐܵܙܹܠ ܐܲܢ̄ܬ݁.

²⁰ܐܵܡܲܪ ܠܹܗ ܝܼܫܘܿܥ. ܠܬܲܥ̈ܠܹܐ ܢܸܩܥܹܐ ܐܝܼܬ݂ܠܗܘܿܢ: ܘܲܠܦܵܪܲܚܬܵܐ ܕܲܫܡܲܝܵܐ ܡܲܛܠ̱ܠܵܐ. ܒܪܹܗ ܕܹܝܢ ܕܐ̄ܢܵܫܵܐ: ܠܲܝܬ݁ ܠܹܗ ܐܲܝܟܵܐ ܕܢܸܣܡܘܿܟ݂ ܪܹܫܹܗ.

²¹ܐ̱ܚܪܺܢܵܐ ܕܹܝܢ ܡܸܢ ܬܲܠܡܝܼܕ݂ܲܘܗ̱ܝ ܐܸܡܲܪ ܠܹܗ. ܡܵܪܝ: ܐܲܦܸܣ ܠܝܼ ܠܘܼܩܕ݂ܲܡ ܐܹܙܲܠ ܐܸܩܒܘܼܪ ܐܵܒ݂ܝ.

²²ܝܼܫܘܿܥ ܕܹܝܢ ܐܸܡܲܪ ܠܹܗ. ܬܵܐ ܒܵܬܲܪܝ: ܘܲܫܒ݂ܘܿܩ ܠܡܝܼܬܹܐ ܩܵܒ݂ܪܝܼܢ ܡܝܼܬܲܝܗܘܿܢ.

²³ܘܟ݂ܲܕ݂ ܣܠܸܩ ܝܼܫܘܿܥ ܠܲܣܦܝܼܢ̄ܬܵܐ: ܣܠܸܩܘ ܥܲܡܹܗ ܬܲܠܡܝܼܕ݂ܵܘ̈ܗܝ.

²⁴ܘܗܵܐ ܙܲܘܥܵܐ ܪܲܒܵܐ ܗܘ̣ܵܐ ܒܝܲܡܵܐ: ܐܲܝܟܲܢܵܐ ܕܐܸܠܦܵܐ ܬܸܬ݂ܟܲܣܹܐ ܡܸܢ ܓܲܠ̈ܠܹܐ. ܗܘܼ ܕܹܝܢ ܝܼܫܘܿܥ ܕܲܡܝܼܟ݂ ܗ̄ܘܵܐ.

²⁵ܘܲܩܪܸܒ݂ܘ ܬܲܠܡܝܼܕ݂ܵܘ̈ܗܝ ܐܲܥܝܼܪܘܿܗܝ ܘܐܵܡܪܝܼܢ ܠܹܗ. ܡܵܪܲܢ ܦܲܨܵܢ: ܐܵܒ݂ܕܝܼܢ ܚܢܲܢ.

²⁶ܐܵܡܲܪ ܠܗܘܿܢ ܝܼܫܘܿܥ: ܠܡܵܢܵܐ ܕܲܚܘܼܠܬ݂ܵܢ̈ܝܼܢ ܐܢ̄ܬܘܿܢ: ܙܥܘܿܪ̈ܲܝ ܗܲܝܡܵܢܘܼܬ݂ܵܐ ܗܵܝܕܹܝܢ ܩܵܡ ܘܲܟ݂ܐܵܐ ܒܪܘܼܚܵܐ ܘܲܒ݂ܝܲܡܵܐ: ܘܲܗܘܵܐ ܫܸܠܝܵܐ ܪܲܒܵܐ.

²⁷ܐ̄ܢܵܫܵܐ ܕܹܝܢ ܐܸܬ݁ܕܲܡܲܪܘ ܘܐܵܡܪܝܼܢ: ܡܲܢܘܼ ܗܵܢܵܐ. ܕܪܘܼܚܵܐ ܘܝܲܡܵܐ ܡܸܫܬܲܡܥܝܼܢ ܠܹܗ.

²⁸ܘܟ݂ܲܕ݂ ܐܸܬ݂ܵܐ ܝܼܫܘܿܥ ܠܥܸܒ݂ܪܵܐ: ܠܐܲܬ݂ܪܵܐ ܕܓ݂ܵܕ݂ܪ̈ܵܝܹܐ: ܐܲܪܥܘܿܗܝ ܬܪܹܝܢ ܕܲܝܘܵܢܹ̈ܐ. ܕܢܵܦܩܝܼܢ ܡܸܢ ܒܹܝܬ݂ ܩܒ݂ܘܼܪܹ̈ܐ. ܒܝܼܫܹ̈ܐ ܕܛܵܒ݂: ܐܲܝܟ݂ ܕܠܵܐ ܐ̄ܢܵܫ ܢܸܫܟܲܚ ܢܸܥܒܲܪ ܒܗܵܝ ܐܘܼܪܚܵܐ.

²⁹ܘܲܩܥܵܘ ܘܐܵܡܪܝܼܢ: ܡܵܐ ܠܲܢ ܘܠܵܟ݂ ܝܼܫܘܿܥ܅ ܒܪܹܗ ܕܐܲܠܵܗܵܐ. ܐܸܬ݂ܲܝܬ݁ ܠܟ݂ܵܐ ܩܕ݂ܵܡ ܙܲܒ݂ܢܵܐ ܕܲܬ݂ܫܲܢܩܲܢ.

³⁰ܐܝܼܬ݂ ܗܘ̣ܵܐ ܕܹܝܢ ܠܗܲܠ ܡܸܢܗܘܿܢ: ܒܲܩܪܵܐ ܕܲܚܙܝܼܪܹ̈ܐ ܣܲܓܝܼܐܹ̈ܐ ܕܪܵܥܝܵܐ.

³¹ܗܵܢܘܿܢ ܕܹܝܢ ܫܹܐܕ݂ܹ̈ܐ ܒܵܥܹܝܢ ܗ̄ܘܼܵܘ ܡܸܢܗ. ܘܐܵܡܪܝܼܢ. ܐܸܢ ܡܲܦܸܩ ܐܲܢ̄ܬ݁ ܠܲܢ: ܐܲܦܸܣ ܠܲܢ ܕܢܹܐܙܲܠ ܠܒܲܩܪܵܐ ܕܲܚܙܝܼܪܹ̈ܐ.

³²ܐܵܡܲܪ ܠܗܘܿܢ ܝܼܫܘܿܥ: ܙܸܠܘ. ܘܡܸܚܕ݂ܵܐ ܢܦܲܩܘ ܘܥܲܠܘ ܒܲܚܙܝܼܪܹ̈ܐ. ܘܟ݂ܠܵܗ̇ ܒܲܩܪܵܐ ܗܵܝ: ܬܸܪܨܲܬ݂ ܠܥܸܠ ܠܲܫܩܝܼܦܵܐ: ܘܲܢܦܲܠܘ ܒܝܲܡܵܐ: ܘܡܝܼܬ݂ܘ ܒܡܲܝܵܐ.

³³ܗܵܢܘܿܢ ܕܹܝܢ ܕܪܵܥܹܝܢ ܗ̄ܘܵܘ: ܥܪܲܩܘ ܘܐܸܙܲܠܘ ܠܲܡܕ݂ܝܼܢ̄ܬܵܐ: ܘܚܵܘܝܼܘ ܟܠܡܸܕܸܡ ܕܲܗܘܵܐ: ܘܲܕ݂ܗܵܢܘܿܢ ܕܲܝܘܵܢܹ̈ܐ.

³⁴ܘܢܸܦܩܲܬ݂ ܟܠܵܗ̇ ܡܕ݂ܝܼܢ̄ܬܵܐ ܠܐܘܼܪܥܹܗ ܕܝܼܫܘܿܥ. ܘܟ݂ܲܕ݂ ܚܙܵܐܘܿܗܝ: ܒܥܵܘ ܡܸܢܗ ܕܲܢܫܲܢܹܐ ܡܸܢ ܬܚܘܼܡܲܝ̈ܗܘܿܢ.