Read Aramaic Peshita Mark 1 Bible Online

Mark 1 - Aramaic Peshita bible

Mark 1

¹ܪܹܫܵܐ ܕܐܹܘܲܢܓܲܠܝܼܘܿܢ ܕܝܼܫܘܿܥ ܡܫܝܼܚܵܐ ܒܪܹܗ ܕܐܲܠܵܗܵܐ.

²ܐܲܝܟ݂ ܕܲܟܬ݂ܝܼܒ݂ ܒܹܐܫܲܥܝܵܐ ܢܒ݂ܝܼܵܐ. ܗܵܐ ܡܫܲܕܲܪ ܐ̄ܢܵܐ ܡܲܠܲܐܟ݂ܝ ܩܕ݂ܵܡ ܦܲܪܨܘܿܦܵܟ݂. ܕܢܲܬ݂ܩܸܢ ܐܘܼܪܚܵܟ݂.

³ܩܵܠܵܐ ܕܩܵܪܹܐ ܒܡܲܕ݂ܒܪܵܐ. ܛܲܝܼܒ݂ܘ ܐܘܼܪܚܹܗ ܕܡܵܪܝܵܐ. ܘܐܲܫܘܵܘ ܫ̈ܒ݂ܝܼܠܵܘܗܝ.

⁴ܗܘ̣ܵܐ ܝܘܿܚܲܢܵܢ ܒܡܲܕ݂ܒܪܵܐ ܡܲܥܡܸܕ݂ ܘܡܲܟ݂ܪܸܙ ܡܲܥܡܘܿܕ݂ܝܼܬ݂ܵܐ ܕܲܬ݂ܝܵܒ݂ܘܼܬ݂ܵܐ. ܠܫܘܼܒ݂ܩܵܢܵܐ ܕܲܚܛܵܗܹ̈ܐ.

⁵ܘܢܵܦܩܵܐ ܗ̄ܘܵܬ݂ ܠܘܵܬܹܗ ܟܠܵܗ̇ ܟܘܿܪ ܕܲܝܗܘܼܕ݂ ܘܟ݂ܠܗܘܿܢ ܒܢܲܝ̈ ܐܘܿܪܸܫܠܸܡ. ܘܡܲܥܡܸܕ݂ ܗܘ̣ܵܐ ܠܗܘܿܢ ܒܝܘܿܪܕܢܵܢ ܟܲܕ݂ ܡܵܘܕܹܝܢ ܒܲܚܛܵܗܲܝ̈ܗܘܿܢ.

⁶ܗܘܼ ܕܹܝܢ ܝܘܿܚܲܢܵܢ ܠܒ݂ܝܼܫ ܗܘ̣ܵܐ ܠܒ݂ܘܼܫܵܐ ܕܣܲܥܪܵܐ ܕܓܲܡܠܹ̈ܐ. ܘܐܲܣܝܼܪ ܗܘ̣ܵܐ ܥܪܲܩܬ݂ܵܐ ܕܡܸܫܟܵܐ ܒܚܲܨܵܘ̈ܗܝ. ܘܡܹܐܟ݂ܘܼܠܬܹ݁ܗ ܐܝܼܬܹܝܗ̇ ܗ̄ܘܵܬ݂ ܩܲܡܨܹ̈ܐ. ܘܕܸܒ݂ܫܵܐ ܕܒܲܪܵܐ.

⁷ܘܡܲܟ݂ܪܸܙ ܗ̄ܘܵܐ. ܘܐܵܡܲܪ. ܗܵܐ ܐܵܬܹܐ ܒܵܬܲܪܝ. ܕܚܲܝܠܬ݂ܵܢ ܡܹܢܝ. ܗܵܘ ܕܠܵܐ ܫܵܘܹܐ ܐ̄ܢܵܐ ܕܐܸܓܿܗܲܢ ܐܸܫܪܹܐ ܥܲܪ̈ܩܹܐ ܕܲܡܣܵܢܵܘ̈ܗܝ.

⁸ܐܸܢܵܐ ܐܲܥܡܸܕ݂ܬ݁ܟ݂ܘܿܢ. ܒܡܲܝ̈ܵܐ. ܗܘܼ ܕܹܝܢ ܢܲܥܡܸܕ݂ܟ݂ܘܿܢ. ܒܪܘܼܚܵܐ ܕܩܘܼܕ݂ܫܵܐ.

⁹ܘܲܗܘܵܐ ܒܝܵܘ̈ܡܵܬ݂ܵܐ ܗܵܢܘܿܢ ܐܸܬ݂ܵܐ ܝܼܫܘܿܥ. ܡܸܢ ܢܵܨܪܲܬ݂ ܕܲܓ݂ܠܝܼܠܵܐ. ܘܐܸܬ݂ܥܡܸܕ݂ ܒܝܘܿܪܕܢܵܢ ܡܸܢ ܝܘܿܚܲܢܵܢ.

¹⁰ܘܡܸܚܕ݂ܵܐ ܕܲܣܠܸܩ ܡܸܢ ܡܲ̈ܝܵܐ ܚܙܵܐ ܕܐܣܬ݁ܕܸܩܘ ܫܡܲܝܵܐ. ܘܪܘܼܚܵܐ ܐܲܝܟ݂ ܝܵܘܢܵܐ ܕܢܸܚܬܲܬܸ ܥܠܵܘܗܝ.

¹¹ܘܩܵܠܵܐ ܗܘ̣ܵܐ ܡܸܢ ܫܡܲܝܵܐ ܐܲܢ̄ܬ݁ ܗܘܼ ܒܹܪܝ ܚܲܒܝܼܒ݂ܵܐ ܒܵܟ݂ ܐܸܨܛܒ݂ܝܼܬ݂.

¹²ܘܡܸܚܕ݂ܵܐ ܐܲܦܸܩܬܹ݁ܗ ܪܘܼܚܵܐ ܠܡܲܕ݂ܒܪܵܐ.

¹³ܘܲܗܘܵܐ ܬܲܡܵܢ ܒܡܲܕ݂ܒܪܵܐ ܝܵܘ̈ܡܵܬ݂ܵܐ ܐܲܪܒܥܝܼܢ ܟܲܕ݂ ܡܸܬ݂ܢܲܣܹܐ ܡܸܢ ܣܵܛܵܢܵܐ. ܘܐܝܼܬ݂ܵܘܗܝ ܗܘ̣ܵܐ ܥܲܡ ܚܲܝ̈ܘܵܬ݂ܵܐ. ܘܲܡܫܲܡܫܝܼܢ ܗ̄ܘܼܵܘ ܠܹܗ ܡܲܠܲܐܟܹ̈ܐ.

¹⁴ܒܵܬܲܪ ܕܐܫܬ݁ܠܸܡ ܕܹܝܢ ܝܘܿܚܲܢܵܢ ܐܸܬ݂ܵܐ ܠܹܗ ܝܼܫܘܿܥ ܠܲܓ݂ܠܝܼܠܵܐ. ܘܡܲܟ݂ܪܸܙ ܗܘ̣ܵܐ ܣܒܲܪܬ݂ܵܐ ܕܡܲܠܟܘܼܬܹܗ ܕܐܲܠܵܗܵܐ.

¹⁵ܘܐܸܡܲܪ. ܫܠܸܡ ܠܹܗ ܙܲܒ݂ܢܵܐ. ܘܲܡܛܵܬ݂ ܡܲܠܟܘܼܬ݂ܵܐ ܕܐܲܠܵܗܵܐ. ܬܘܼܒ݂ܘ. ܘܗܲܝܡܸܢܘ ܒܲܣܒܲܪܬ݂ܵܐ.

¹⁶ܘܟܲܕ݂ ܡܗܲܠܸܟ݂ ܚܕ݂ܵܪܲܝ ܝܲܡܵܐ ܕܲܓ݂ܠܝܼܠܵܐ ܚܙܵܐ ܠܫܸܡܥܘܿܢ ܘܠܲܐܢܕܪܹܐܘܿܣ ܐܲܚܘܼܗܝ. ܕܪܵܡܹܝܢ ܡܨ̈ܝܼܕ݂ܵܬ݂ܵܐ ܒܝܲܡܵܐ. ܐܝܼܬܲܝܗܘܿܢ ܗ̄ܘܼܵܘ ܓܹܝܪ ܨܲܝܵܕܹ̈ܐ.

¹⁷ܘܐܸܡܲܪ ܠܗܘܿܢ ܝܼܫܘܿܥ. ܬܵܘ ܒܵܬܲܪܝ. ܘܐܸܥܒܕ݂ܟ݂ܘܿܢ. ܨܲܝܵܕ݂ܹ̈ܐ ܕܲܒ݂ܢܲܝ̈ܢܵܫܵܐ.

¹⁸ܘܡܸܚܕ݂ܵܐ ܫܒܲܩܘ ܡܨ̈ܝܼܕ݂ܵܬ݂ܗܘܿܢ. ܘܐܸܙܲܠܘ ܒܵܬ݂ܪܹܗ.

¹⁹ܘܟܲܕ݂ ܥܒܲܪ ܩܲܠܝܼܠ ܚܙܵܐ ܠܝܲܥܩܘܿܒ݂ ܒܲܪ ܙܲܒ݂ܕܲܝ. ܘܲܠܝܘܿܚܲܢܵܢ ܐܲܚܘܼܗܝ. ܘܐܵܦ ܠܗܘܿܢ ܒܲܣܦܝܼܢ̄ܬܵܐ. ܕܲܡܬܲܩܢܝܼܢ ܡܨܝܼܕ݂ܵܬ݂ܗܘܿܢ.

²⁰ܘܲܩܪܵܐ ܐܸܢܘܿܢ. ܘܡܸܚܕ݂ܵܐ ܫܒܲܩܘ ܠܙܲܒ݂ܕܲܝ ܐܲܒ݂ܘܼܗܘܿܢ ܒܲܣܦܝܼܢ̄ܬܵܐ ܥܲܡ ܐܲܓ݂ܝܼܪܹ̈ܐ. ܘܐܸܙܲܠܘ ܒܵܬ݂ܪܹܗ.

²¹ܘܟܲܕ݂ ܥܲܠܘ ܠܲܟ݂ܦܲܪܢܵܚܘܿܡ ܡܸܚܕ݂ܵܐ ܡܲܠܸܦ ܗܘ̣ܵܐ ܒܫܲܒܹ̈ܐ ܒܲܟ݂ܢܘܼܫܵܬ݂̈ܗܘܿܢ.

²²ܘܬܲܡܝܼܗܝܼܢ ܗܘܵܘ ܒܝܘܼܠܦܵܢܹܗ. ܡܲܠܸܦ ܗܘ̣ܵܐ ܠܗܘܿܢ ܓܹܝܪ ܐܲܝܟ݂ ܡܫܲܠܛܵܐ ܘܠܵܐ ܐܲܝܟ݂ ܣܵܦܪ̈ܲܝܗܘܿܢ.

²³ܘܐܝܼܬ݂ ܗܘ̣ܵܐ ܒܲܟ݂ܢܘܼܫܬ݁ܗܘܿܢ ܓܲܒ݂ܪܵܐ ܕܐܝܼܬ݂ ܒܹܗ. ܪܘܼܚܵܐ ܛܲܡܲܐܬ݂ܵܐ. ܘܲܩܥܵܐ.

²⁴ܘܐܸܡܲܪ. ܡܵܐ ܠܲܢ ܘܠܵܟ݂ ܝܼܫܘܿܥ ܢܵܨܪܵܝܵܐ. ܐܸܬܲܝܬ݁ ܠܡܵܘܒܵܕ݂ܘܼܬܲܢ. ܝܵܕܲܥ ܐ̄ܢܵܐ ܠܵܟ݂ ܡܲܢ ܐܲܢ̄ܬ݁ ܩܲܕܝܼܫܹܗ ܕܐܲܠܵܗܵܐ.

²⁵ܘܲܟ݂ܐܵܐ ܒܹܗ ܝܼܫܘܿܥ. ܘܐܸܡܲܪ. ܣܟ݂ܘܿܪ ܦܘܼܡܵܟ݂. ܘܦܘܿܩ ܡܸܢܹܗ.

²⁶ܘܲܫܕ݂ܵܬܹܗ ܪܘܼܚܵܐ ܛܲܢܦܬ݂ܵܐ. ܘܲܩܥܵܬ݂ ܒܩܵܠܵܐ ܪܵܡܵܐ. ܘܢܸܦܩܲܬ݂ ܡܸܢܹܗ.

²⁷ܘܐܸܬ݁ܕܲܡܲܪܘ ܟܠܗܘܿܢ ܘܒ݂ܵܥܹܝܢ ܗ̄ܘܼܵܘ ܚܲܕ݂ ܥܲܡ ܚܲܕ݂ ܘܐܵܡܪܝܼܢ. ܕܡܵܢܵܐ ܗܝ ܗܵܕܹܐ. ܘܡܲܢܘܼ ܝܘܼܠܦܵܢܵܐ ܗܵܢܵܐ ܚܲܕ݂ܬ݂ܵܐ ܕܲܒ݂ܫܘܼܠܛܵܢܵܐ ܘܐܵܦ ܠܪ̈ܘܼܚܹܐ ܛܲܢ̈ܦܵܬ݂ܵܐ ܦܵܩܸܕ݂. ܘܡܸܫܬܲܡܥܵܢ ܠܹܗ.

²⁸ܘܡܸܚܕ݂ܵܐ ܢܦܲܩ ܛܸܒܹܗ. ܒܟ݂ܠܹܗ ܐܲܬ݂ܪܵܐ ܕܲܓ݂ܠܝܼܠܵܐ.

²⁹ܘܲܢܦܲܩܘ ܡܸܢ ܟܢܘܼܫܬܵܐ ܘܐܸܬ݂ܵܘ ܠܒܲܝܬܹ݁ܗ ܕܫܸܡܥܘܿܢ ܘܕܲܐܢܕܪܹܐܘܿܣ ܥܲܡ ܝܲܥܩܘܿܒ݂ ܘܝܘܿܚܲܢܵܢ.

³⁰ܘܲܚܡܵܬܹܗ ܕܫܸܡܥܘܿܢ ܪܲܡܝܵܐ ܗ̄ܘܵܬ݂ ܒܐܫܵܬ݂ܵܐ. ܘܐܸܡܲܪܘ ܠܹܗ ܥܠܹܝܗ̇.

³¹ܘܲܩܪܸܒ݂ ܐܲܚܕܗ ܒܐܝܕ݂ܵܗ̇. ܘܐܲܩܝܼܡܵܗ̇. ܘܡܸܚܕ݂ܵܐ ܫܒܲܩܬ݂ܵܗ̇ ܐܸܫܬ݂ܵܗ̇. ܘܲܡܫܲܡܫܵܐ ܗ̄ܘܵܬ݂ ܠܗܘܿܢ.

³²ܒܪܲܡܫܵܐ ܕܹܝܢ ܒܡܲܥܪܵܒܲܝ ܫܸܡܫܵܐ ܐܲܝܬ݁ܝܼܘ ܠܘܵܬܹܗ ܟܠܗܘܿܢ ܐܲܝܠܹܝܢ ܕܒ݂ܝܼܫܵܐܝܼܬ݂ ܥܒ݂ܝܼܕ݂ܝܼܢ. ܘܕܲܝܘܵܢܹ̈ܐ.

³³ܘܲܡܕ݂ܝܼܢ̄ܬܵܐ ܟܠܵܗ̇. ܟܢܝܼܫܵܐ ܗ̄ܘܵܬ݂ ܥܲܠ ܬܲܪܥܵܐ.

³⁴ܘܐܲܣܝܼ ܠܣܲܓܝܼܐܹ̈ܐ ܕܒ݂ܝܼܫܵܐܝܼܬ݂ ܥܒ݂ܝܼܕ݂ܝܼܢ ܗ̄ܘܼܵܘ ܒܟ݂ܘܼܪܗܵܢܹ̈ܐ ܡܫܲܚܠܦܹ̈ܐ. ܘܕܲܝ̈ܘܹܐ ܣܲܓܝܼܐܹ̈ܐ ܐܲܦܸܩ. ܘܠܵܐ ܫܵܒܹܩ ܗܘ̣ܵܐ ܠܗܘܿܢ ܠܕܲܝ̈ܘܹܐ ܕܲܢܡܲܠܠܘܼܢ ܡܛܠ ܕܝܵܕ݂ܥܝܼܢ ܗ̄ܘܼܵܘ ܠܹܗ.

³⁵ܘܲܒ݂ܨܲܦܪܵܐ ܩܲܕܡ ܩܵܡ ܛܵܒ݂. ܘܐܸܙܲܠ ܠܐܲܬ݂ܪܵܐ ܚܘܼܪܒܵܐ. ܘܬܲܡܵܢ ܡܨܲܠܹܐ ܗ̄ܘܵܐ.

³⁶ܘܒ݂ܵܥܹܝܢ ܗ̄ܘܼܵܘ ܠܹܗ ܫܸܡܥܘܿܢ ܘܲܕ݂ܥܲܡܹܗ.

³⁷ܘܟܲܕ݂ ܐܸܫܟܚܽܘܼܗܝ. ܐܵܡܪܝܼܢ ܠܹܗ. ܟܠܗܘܿܢ ܐ̄ܢܵܫܵܐ ܒܵܥܹܝܢ ܠܵܟ݂.

³⁸ܐܵܡܲܪ ܠܗܘܿܢ ܗܲܠܸܟ݂ܘ ܠܩܘܼܪܝܵܐ ܘܠܲܡܕ݂ܝܼ̈ܢܵܬ݂ܵܐ ܕܩܲܪ̈ܝܼܒ݂ܵܢ ܕܐܵܦ ܬܲܡܵܢ ܐܲܟ݂ܪܸܙ. ܠܗܵܕܹܐ ܓܹܝܪ ܐܸܬ݂ܝܬ݂.

³⁹ܘܡܲܟ݂ܪܸܙ ܗܘ̣ܵܐ ܒܟܠܗܹܝܢ ܟܢܘܼܫܵܬ݂ܗܘܿܢ ܒܟ݂ܠܵܗ̇ ܓ݁ܠܝܼܠܵܐ. ܘܡܲܦܸܩ ܫܹܐܕܹ̈ܐ.

⁴⁰ܘܐܸܬ݂ܵܐ ܠܘܵܬܹܗ ܓܲܪܒܵܐ ܘܲܢܦܲܠ ܥܲܠ ܪܸ̈ܓ݂ܠܵܘܗܝ. ܘܒ݂ܵܥܹܐ ܗܘ̣ܵܐ ܡܸܢܹܗ. ܘܐܸܡܲܪ ܠܹܗ. ܐܸܢ ܨܵܒܹܐ ܐܲܢ̄ܬ݁. ܡܸܫܟܲܚ ܐܲܢ̄ܬ݁ ܠܲܡܕܲܟܵܝܘܼܬ݂ܝ.

⁴¹ܗܘܼ ܕܹܝܢ ܝܼܫܘܿܥ. ܐܸܬ݂ܪܲܚܲܡ ܥܠܵܘܗܝ. ܘܲܦܫܲܛ ܐܝܼܕ݂ܗ ܩܪܸܒ݂ ܠܹܗ. ܘܐܸܡܲܪ. ܨܵܒܹܐ ܐ̄ܢܵܐ ܐܸܬ݁ܕܲܟܵܐ.

⁴²ܘܒ݂ܵܗ̇ ܒܫܵܥܬ݂ܵܐ. ܐܸܙܲܠ ܓܲܪܒ݂ܗ ܡܸܢܹܗ. ܘܐܸܬ݁ܕܲܟܝ.

⁴³ܘܲܟ݂ܐܵܐ ܒܹܗ ܘܐܲܦܩܹܗ.

⁴⁴ܘܐܸܡܲܪ ܠܹܗ. ܚܙܝܼ ܠܡܵܐ ܠܐ̄ܢܵܫ ܐܵܡܲܪ ܐܲܢ̄ܬ݁. ܐܸܠܵܐ ܙܸܠ ܚܵܘܵܐ ܢܲܦ̮ܫܵܟ݂ ܠܟ݂ܵܗܢܹ̈ܐ ܘܩܲܪܸܒ݂ ܩܘܼܪܒܵܢܵܐ ܚܠܵܦ ܬܲܕ݂ܟܝܬ݂ܵܟ݂ ܐܲܝܟܲܢܵܐ ܕܦܲܩܸܕ݂ ܡܘܼܫܹܐ. ܠܣܵܗܕܘܬ݂ܗܘܿܢ.

⁴⁵ܗܘܼ ܕܹܝܢ ܟܲܕ݂ ܢܦܲܩ ܫܲܪܝܼ ܗܘ̣ܵܐ ܡܲܟ݂ܪܸܙ ܣܲܓܝܼ. ܘܐܲܛܒܵܗ̇ ܠܡܸܠܬ݂ܵܐ ܐܲܝܟܲܢܵܐ ܕܠܵܐ ܢܸܫܟܲܚ ܗܘ̣ܵܐ ܝܼܫܘܿܥ ܓܲܠܝܵܐܝܼܬ݂ ܕܢܸܥܘܠ ܠܲܡܕ݂ܝܼܢ̄ܬܵܐ. ܐܸܠܵܐ ܠܒܲܪ ܗܘܵܐ. ܒܐܲܬ݂ܪܵܐ ܚܘܼܪܒܵܐ. ܘܐܵܬܹܝܢ ܗ̄ܘܼܵܘ ܠܘܵܬܹܗ. ܡܸܢ ܟܠ ܕܘܟܵܐ.