Read Aramaic Peshita Mark 10 Bible Online

Mark 10 - Aramaic Peshita bible

Mark 10

¹ܘܩ̣ܵܡ ܡܸܢ ܬܲܡܵܢ ܘܐܸܬ݂ܵܐ ܠܲܬ݂ܚܘܼܡܵܐ ܕܲܝܗܘܼܕ݂. ܠܥܸܒ݂ܪܵܐ ܕܝܘܿܪܕܢܵܢ. ܘܐܸܙܲܠܘ ܠܬܲܡܵܢ ܠܘܵܬܹܗ ܟܸܢܫܹ̈ܐ ܣܲܓܝܼܐܹ̈ܐ ܘܡܲܠܸܦ ܗܘ̣ܵܐ ܠܗܘܿܢ ܬܘܼܒ݂. ܐܲܝܟ݂ ܕܲܡܥܵܕ݂ ܗ̄ܘܵܐ.

²ܘܲܩܪܸܒ݂ܘ ܦܪ̈ܝܼܫܹܐ ܡܢܲܣܹܝܢ ܠܹܗ ܘܲܡܫܲܐܠܝܼܢ ܕܐܢ ܫܲܠܝܼܛ ܠܓܲܒ݂ܪܵܐ. ܕܢܸܫܒܿܘܼܩ ܐܲܢ̄ܬ݁ܬܹܗ.

³ܐܵܡܲܪ ܠܗܘܿܢ ܡܵܢܵܐ ܦܲܩܸܕ݂ܟ݂ܘܿܢ ܡܘܼܫܹܐ.

⁴ܗܸܢܘܿܢ ܕܹܝܢ ܐܵܡܪܝܼܢ. ܡܘܼܫܹܐ ܐܲܦܸܣ ܠܲܢ ܕܢܸܟ݂ܬܘܼܒ݂ ܟܬ݂ܵܒ݂ܵܐ ܕܫܘܼܒ݂ܩܵܢܵܐ. ܘܢܸܫܪܹܐ.

⁵ܥܢܵܐ ܝܼܫܘܿܥ. ܘܐܸܡܲܪ ܠܗܘܿܢ. ܠܘܼܩܒܲܠ ܩܲܫܝܘܼܬ݂ ܠܸܒܟ݂ܘܿܢ ܟܬܲܒ݂ ܠܟ݂ܘܿܢ ܦܘܼܩܕܢܵܐ ܗܵܢܵܐ.

⁶ܡܸܢ ܒܪܵܫܝܼܬ݂ ܕܹܝܢ. ܕܸܟ݂ܪܵܐ ܘܢܸܩܒܬ݂ܵܐ ܥܒܲܕ݂ ܐܸܢܘܿܢ ܐܲܠܵܗܵܐ.

⁷ܡܛܠ ܗܵܢܵܐ ܢܸܫܒܿܘܼܩ ܓܲܒ݂ܪܵܐ ܠܐܲܒ݂ܘܼܗܝ ܘܠܸܐܡܹܗ. ܘܢܸܩܲܦ ܠܐܲܢ̄ܬ݁ܬܹܗ

⁸ܘܢܸܗܘܘܿܢ ܬܪܲܝܗܘܿܢ. ܚܲܕ݂ ܒܣܲܪ. ܡܸܟܹܝܠ ܠܵܐ ܗ̄ܘܼܵܘ ܬܪܹܝܢ ܐܸܠܵܐ ܚܲܕ݂ ܒܣܲܪ.

⁹ܡܸܕܸܡ ܕܐܲܠܵܗܵܐ ܗܵܟܹܝܠ ܙܲܘܸܓ݂ ܒܲܪܢܵܫܵܐ. ܠܵܐ ܢܦܲܪܸܫ.

¹⁰ܘܫܲܐܠܘܼܗܝ ܬܘܼܒ݂ ܬܲܠܡܝܼܕ݂ܵܘ̈ܗܝ ܒܒܲܝܬܵܐ ܥܲܠ ܗܵܕܹܐ.

¹¹ܘܐܸܡܲܪ ܠܗܘܿܢ. ܟܠܡܲܢ ܕܢܸܫܪܹܐ ܐܲܢ̄ܬ݁ܬܹܗ ܘܢܸܣܲܒ݂ ܐ̄ܚܪܹܬ݂ܵܐ. ܓܵܐܲܪ.

¹²ܘܐܸܢ ܐܲܢ̄ܬ݁ܬ݂ܵܐ ܬܸܫܪܹܐ ܒܲܥܠܵܗ̇ ܘܬܸܗܘܹܐ ܠܐܲܚܪܹܢܵܐ. ܓܵܝܪܵܐ.

¹³ܘܲܡܩܲܪܒ݂ܝܼܢ ܗ̄ܘܼܵܘ ܠܹܗ ܛܠܵܝܹ̈ܐ ܕܢܸܩܪܘܿܒ݂ ܠܗܘܿܢ ܬܲܠܡܝܼܕ݂ܵܘ̈ܗܝ ܕܹܝܢ. ܟܵܐܹܝܢ ܗ̄ܘܼܵܘ ܒܗܵܠܹܝܢ ܕܲܡܩܲܪܒ݂ܝܼܢ ܠܗܘܿܢ.

¹⁴ܝܼܫܘܿܥ ܕܹܝܢ ܚܙܵܐ. ܘܐܸܬ݂ܒܿܐܸܫ ܠܹܗ. ܘܐܸܡܲܪ ܠܗܘܿܢ. ܫܒ݂ܘܿܩܘ ܛܠܵܝܹ̈ܐ ܐܵܬܹ݁ܝܢ ܠܘܵܬ݂ܝ. ܘܠܵܐ ܬܸܟ݂ܠܘܿܢ ܐܸܢܘܿܢ. ܕܕܲܐܝܠܹܝܢ ܓܹܝܪ ܕܐܲܝܟ݂ ܗܵܠܹܝܢ ܐܸܢܘܿܢ. ܐܝܼܬܹܝܗ̇ ܡܲܠܟܘܼܬ݂ܵܐ ܕܐܲܠܵܗܵܐ.

¹⁵ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܟܠ ܕܠܵܐ ܢܩܲܒܸܠ ܡܲܠܟܘܼܬ݂ܵܐ ܕܐܲܠܵܗܵܐ ܐܲܝܟ݂ ܛܲܠܝܵܐ. ܠܵܐ ܢܸܥܘܠ ܠܵܗ̇.

¹⁶ܘܲܫܩܲܠ ܐܸܢܘܿܢ ܥܲܠ ܕܪ̈ܵܥܵܘܗܝ ܘܣܵܡ ܐܝܼܕ݂ܗ ܥܠܲܝܗܘܿܢ. ܘܒܲܪܸܟ݂ ܐܸܢܘܿܢ.

¹⁷ܘܟܲܕ݂ ܪܵܕܹܐ ܒܐܘܼܪܚܵܐ ܪܗܸܛ ܚܲܕ݂. ܢܦܲܠ ܥܲܠ ܒܘܼܪ̈ܟܵܘܗܝ ܘܲܡܫܲܐܸܠ ܗܘ̣ܵܐ ܠܹܗ. ܘܐܵܡܲܪ. ܡܲܠܦܵܢܵܐ ܛܵܒ݂ܵܐ. ܡܵܢܵܐ ܐܸܥܒܸܕ݂ ܕܐܹܬܲܪ (ܕܐܹܪܲܬ݂) ܚܲܝܹ̈ܐ ܕܲܠܥܵܠܲܡ.

¹⁸ܐܵܡܲܪ ܠܹܗ ܝܼܫܘܿܥ ܡܵܢܵܐ ܩܵܪܹܐ ܐܲܢ̄ܬ݁ ܠܝܼ ܛܵܒ݂ܵܐ. ܠܲܝܬ݁ ܛܵܒ݂ܵܐ ܐܸܠܵܐ ܐܸܢ ܚܲܕ݂ ܐܲܠܵܗܵܐ.

¹⁹ܦܘܼܩܕܵܢܹ̈ܐ ܝܵܕܲܥ ܐܲܢ̄ܬ݁. ܠܵܐ ܬܓ݂ܘܼܪ. ܠܵܐ ܬܸܓ݂ܢܘܿܒ݂. ܠܵܐ ܬܸܩܛܘܼܠ. ܘܠܵܐ ܬܸܣܗܲܕ݂ ܣܵܗܕܘܬ݂ܵܐ ܕܲܓܵܠܬ݂ܵܐ. ܠܵܐ ܬܸܛܠܘܿܡ. ܝܲܩܲܪ ܠܐܲܒ݂ܘܼܟ݂. ܘܠܸܐܡܵܟ݂.

²⁰ܗܘܼ ܕܹܝܢ ܥܢܵܐ. ܘܐܸܡܲܪ ܠܹܗ. ܡܲܠܦܵܢܵܐ ܗܵܠܹܝܢ ܟܠܗܹܝܢ ܢܸܛܪܹܬ݂ ܐܸܢܹܝܢ. ܡܸܢ ܛܲܠܝܘܼܬ݂ܝ.

²¹ܝܼܫܘܿܥ ܕܹܝܢ ܚܵܪ ܒܹܗ. ܘܐܲܚܒܹܗ. ܘܐܸܡܲܪ ܠܹܗ. ܚܕ݂ܵܐ ܚܲܣܝܼܪܵܐ ܠܵܟ݂. ܙܸܠ ܙܲܒܸܢ ܟܠ ܡܸܕܸܡ ܕܐܝܼܬ݂ ܠܵܟ݂. ܘܗܲܒ݂ ܠܡܸܣܟܹܢܹ̈ܐ: ܘܬܸܗܘܹܐ ܠܵܟ݂ ܣܝܼܡܬ݂ܵܐ ܒܲܫܡܲܝ̈ܵܐ ܘܣܲܒ݂ ܨܠܝܼܒ݂ܵܐ. ܘܬ݂ܵܐ ܒܵܬܲܪܝ.

²²ܗܘܼ ܕܹܝܢ ܐܸܬ݂ܟܡܲܪ ܒܡܸܠܬ݂ܵܐ ܗܵܕܹܐ. ܘܐܸܙܲܠ. ܟܲܕ݂ ܥܲܝܼܝܩܵܐ ܠܹܗ. ܐܝܼܬ݂ ܗܘ̣ܵܐ ܠܹܗ ܓܹܝܪ ܢܸܟ݂ܣܹ̈ܐ ܣܲܓܝܼܐܹ̈ܐ.

²³ܚܵܪ ܕܹܝܢ ܝܼܫܘܿܥ ܒܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ. ܟܡܵܐ ܥܲܛܠܵܐ ܠܐܲܝܠܹܝܢ ܕܐܝܼܬ݂ ܠܗܘܿܢ ܢܸܟ݂ܣܹ̈ܐ ܕܢܸܥܠܘܼܢ ܠܡܲܠܟܘܼܬ݂ܵܐ ܕܐܲܠܵܗܵܐ.

²⁴ܬܲܠܡܝܼܕܹ̈ܐ ܕܹܝܢ ܡܸܬ݁ܕܲܡܪܝܼܢ ܗ̄ܘܼܵܘ ܥܲܠ ܡܸܠܵܘ̈ܗܝ. ܘܲܥܢܵܐ ܬܘܼܒ݂ ܝܼܫܘܿܥ. ܘܐܸܡܲܪ ܠܗܘܿܢ. ܒܢܲܝ̈ ܟܡܵܐ ܥܲܛܠܵܐ ܠܐܲܝܠܹܝܢ ܕܲܬ݂ܟ݂ܝܼܠܝܼܢ ܥܲܠ ܢܸܟ݂ܣܲܝ̈ܗܘܿܢ ܕܢܸܥܠܘܼܢ ܠܡܲܠܟܿܘܼܬܹܗ ܕܐܲܠܵܗܵܐ.

²⁵ܦܫܝܼܩ ܗܘܼ ܠܓܲܡܠܵܐ ܕܢܸܥܘܠ ܒܲܚܪܽܘܿܪܵܐ ܕܲܡܚܲܛܵܐ ܐܵܘ ܥܲܬ݁ܝܼܪܵܐ ܠܡܲܠܟܿܘܼܬܹܗ ܕܐܲܠܵܗܵܐ ܠܡܸܥܲܠ.

²⁶ܗܸܢܘܿܢ ܕܹܝܢ ܝܲܬܝܼܪܵܐܝܼܬ݂ ܡܸܬ݁ܕܲܡܪܝܼܢ ܗ̄ܘܼܵܘ. ܘܐܵܡܪܝܼܢ ܒܲܝܢܲܝܗܘܿܢ. ܡܲܢܘܼ ܡܸܫܟܲܚ ܠܡܸܚܵܐ.

²⁷ܚܵܪ ܕܹܝܢ ܒܗܘܿܢ ܝܼܫܘܿܥ. ܘܐܸܡܲܪ ܠܗܘܿܢ. ܠܘܵܬ݂ ܒܢܲܝ̈ܢܵܫܵܐ ܗܵܕܹܐ ܠܵܐ ܡܸܫܟܚܵܐ ܐܸܠܵܐ ܠܘܵܬ݂ ܐܲܠܵܗܵܐ. ܟܠ ܡܸܕܸܡ ܓܹܝܪ. ܡܸܫܟܚܵܐ ܠܘܵܬ݂ ܐܲܠܵܗܵܐ.

²⁸ܘܫܲܪܝܼ ܟܹܐܦܵܐ ܠܡܹܐܡܲܪ. ܗܵܐ ܚܢܲܢ ܫܒܲܩܢ ܟܠܡܸܕ݂ܡ. ܘܲܢܩܸܦܢܵܟ݂.

²⁹ܥܢܵܐ ܝܼܫܘܿܥ. ܘܐܸܡܲܪ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܠܲܝܬ݁ ܐ̄ܢܵܫ ܕܫܵܒܹܩ ܒܵܬܹ̈ܐ ܐܵܘ ܐܲܚܹ̈ܐ ܐܵܘ ܐܲܚ̈ܘܵܬ݂ܵܐ ܐܵܘ ܐܲܒ݂ܵܐ ܐܵܘ ܐܸܡܵܐ ܐܵܘ ܐܲܢ̄ܬ݁ܬ݂ܵܐ ܐܵܘ ܒ̈ܢܲܝܵܐ ܐܵܘ ܩܘܼܪ̈ܝܵܐ ܡܛܠܵܬ݂ܝ. ܘܡܛܠ ܣܒܲܪܬ݂ܝ

³⁰ܘܠܵܐ ܢܩܲܒܸܠ ܚܲܕ݂ ܒܲܡܵܐܐ. ܗܵܫܵܐ ܒܙܲܒ݂ܢܵܐ ܗܵܢܵܐ ܒܵܬܹ̈ܐ ܘܐܲܚܹ̈ܐ ܘܐܲܚ̈ܘܵܬ݂ܵܐ ܘܐܸܡ̈ܗܵܬ݂ܵܐ ܘܲܒ݂ܢܲܝܵܐ ܘܩܘܼܪ̈ܝܵܐ. ܥܲܡ ܪܕ݂ܘܼܦܝܵܐ. ܘܲܒ݂ܥܵܠܡܵܐ ܕܐܵܬܹܐ. ܚܲܝܹ̈ܐ ܕܲܠܥܵܠܲܡ.

³¹ܣܲܓܝܼܐܹ̈ܐ ܕܹܝܢ ܩܲܕ݂ܡܵܝܹ̈ܐ ܕܢܸܗܘܘܿܢ ܐ̄ܚܪ̈ܵܝܹܐ ܘܲܐ̄ܚܪ̈ܵܝܹܐ ܩܲܕ݂ܡܵܝܹ̈ܐ.

³²ܟܲܕ݂ ܣܵܠܩܝܼܢ ܗ̄ܘܼܵܘ ܕܹܝܢ ܒܐܘܼܪܚܵܐ ܠܐܘܿܪܸܫܠܸܡ ܗܘܼ ܝܼܫܘܿܥ ܩܕ݂ܝܼܡ ܗܘ̣ܵܐ ܠܗܘܿܢ ܘܡܸܬ݁ܬܲܡܗܝܼܢ ܗ̄ܘܼܵܘ. ܘܐܵܙܠ̄ܝܼܢ ܗ̄ܘܼܵܘ ܒܵܬ݂ܪܹܗ. ܟܲܕ݂ ܕܲܚܝܼܠܝܼܢ. ܘܲܕ݂ܒܲܪ ܠܲܬ݂ܪܸܥܣܲܪܬܹ݁ܗ ܘܫܲܪܝܼ ܕܢܹܐܡܲܪ ܠܗܘܿܢ ܡܸܕܸܡ ܕܲܥܬ݂ܝܼܕ݂ ܕܢܸܗܘܹܐ ܠܹܗ.

³³ܕܗܵܐ ܣܵܠܩܝܼܢ ܚ̱ܢܲܢ ܠܐܘܿܪܸܫܠܸܡ. ܘܲܒ݂ܪܹܗ ܕܐ̄ܢܵܫܵܐ ܡܸܫܬ݁ܠܸܡ ܠܪ̈ܲܒܲܝ ܟܵܗܢܹ̈ܐ. ܘܲܠܣܵܦܪܹ̈ܐ. ܘܲܢܚܲܝܒ݂ܘܼܢܵܝܗܝ ܠܡܵܘܬܵܐ. ܘܢܲܫܠܡܘܼܢܵܝܗܝ ܠܥܲܡ̈ܡܹܐ

³⁴ܘܲܢܒܲܙܚܘܼܢ ܒܹܗ ܘܲܢܢܲܓ݁ܕ݂ܘܼܢܵܝܗܝ ܘܢܸܪܩܘܼܢ ܒܐܲܦܵܘ̈ܗܝ. ܘܢܸܩܛܠܘܼܢܵܝܗܝ. ܘܲܠܝܵܘܡܵܐ ܕܲܬ݂ܠܵܬ݂ܵܐ. ܢܩܘܼܡ.

³⁵ܘܲܩܪܸܒ݂ܘ ܠܘܵܬܹܗ ܝܲܥܩܘܿܒ݂ ܘܝܘܿܚܲܢܵܢ ܒܢܲܝ̈ ܙܲܒ݂ܕܲܝ. ܘܐܵܡܪܝܼܢ ܠܹܗ. ܡܲܠܦܵܢܵܐ ܨܵܒܹܝܢ ܚ̱ܢܲܢ ܕܟܠ ܕܢܸܫܐܲܠ. ܬܸܥܒܸܿܕ݂ ܠܲܢ.

³⁶ܐܵܡܲܪ ܠܗܘܿܢ ܡܵܢܵܐ ܨܵܒܹܝܢ ܐܢ̄ܬܘܿܢ ܐܸܥܒܸܕ݂ ܠܟ݂ܘܿܢ.

³⁷ܐܵܡܪܝܼܢ ܠܹܗ. ܗܲܒ݂ ܠܲܢ ܕܚܲܕ݂ ܢܸܬܸܒ݂ ܡܸܢ ܝܲܡܝܼܢܵܟ݂. ܘܚܲܕ݂ ܡܸܢ ܣܸܡܵܠܵܟ݂ ܒܫܘܼܒ݂ܚܵܟ݂.

³⁸ܗܘܼ ܕܹܝܢ ܐܸܡܲܪ ܠܗܘܿܢ. ܠܵܐ ܝܵܕ݂ܥܝܼܢ ܐܢ̄ܬܘܿܢ ܡܵܢܵܐ ܫܵܐܠܝܼܢ ܐܢ̄ܬܘܿܢ. ܡܸܫܟܿܚܝܼܢ ܐܢ̄ܬܘܿܢ ܕܬܸܫܬ݁ܘܿܢ ܟܵܣܵܐ ܕܐܸܢܵܐ ܫܵܬܹܐ ܐ̄ܢܵܐ ܘܡܲܥܡܘܿܕ݂ܝܼܬ݂ܵܐ ܕܐܸܢܵܐ ܥܵܡܹܕ݂ ܐ̄ܢܵܐ ܬܸܥܡܕ݂ܘܼܢ

³⁹ܐܵܡܪܝܼܢ ܠܹܗ. ܡܸܫܟܿܚܝܼܢܲܢ. ܐܵܡܲܪ ܠܗܘܿܢ ܝܼܫܘܿܥ. ܟܵܣܵܐ ܕܫܵܬܹܐ ܐ̄ܢܵܐ. ܬܸܫܬ݁ܘܿܢ. ܘܡܲܥܡܘܿܕ݂ܝܼܬ݂ܵܐ ܕܥܵܡܹܕ݂ ܐ̄ܢܵܐ. ܬܸܥܡܕ݂ܘܼܢ.

⁴⁰ܕܬܸܬ݁ܒ݂ܘܼܢ ܕܹܝܢ ܡܸܢ ܝܲܡܝܼܢܝ ܘܡܸܢ ܣܸܡܵܠܝ ܠܵܐ ܗܘܵܬ݂ ܕܝܼܠܝ ܠܡܸܬܲܠ ܐܸܠܵܐ ܠܐܲܝܠܹܝܢ ܕܲܡܛܲܝܒ݂ܵܐ.

⁴¹ܘܟܲܕ݂ ܫܡܲܥܘ ܥܸܣܪܵܐ ܫܲܪܝܼܘ ܪܵܛܢܝܼܢ ܥܲܠ ܝܲܥܩܘܿܒ݂ ܘܝܘܿܚܲܢܵܢ.

⁴²ܘܲܩܪܵܐ ܐܸܢܘܿܢ ܝܼܫܘܿܥ. ܘܐܸܡܲܪ ܠܗܘܿܢ. ܝܵܕ݂ܥܝܼܢ ܐܢ̄ܬܘܿܢ ܕܐܲܝܠܹܝܢ ܕܡܸܣܬܲܒ݂ܪܝܼܢ ܪܹ̈ܫܹܐ ܕܥܲܡ̈ܡܹܐ. ܡܵܪ̈ܲܝܗܘܿܢ ܐܸܢܘܿܢ. ܘܪܵܘܪ̈ܒ݂ܵܢܲܝܗܘܿܢ ܫܲܠܝܼܛܝܼܢ ܥܠܲܝܗܘܿܢ.

⁴³ܠܵܐ ܕܹܝܢ ܗܵܟܲܢܵܐ ܢܸܗܘܹܐ ܒܲܝܢܵܬ݂ܟ݂ܘܿܢ. ܐܸܠܵܐ ܡܲܢ ܕܨܵܒܹܐ ܒܟ݂ܘܿܢ ܕܢܸܗܘܹܐ ܪܲܒܵܐ ܢܸܗܘܹܐ ܠܟ݂ܘܿܢ ܡܫܲܡܫܵܢܵܐ.

⁴⁴ܘܐܲܝܢܵܐ ܡܸܢܟ݂ܘܿܢ ܕܨܵܒܹܐ ܕܢܸܗܘܹܐ ܩܲܕ݂ܡܵܝܵܐ ܢܸܗܘܹܐ ܥܲܒ݂ܕܵܐ ܕܟ݂ܠܢܵܫ.

⁴⁵ܐܵܦ ܒܪܹܗ ܓܹܝܪ ܕܐ̄ܢܵܫܵܐ ܠܵܐ ܐܸܬ݂ܵܐ ܕܢܸܫܬܲܡܲܫ ܐܸܠܵܐ ܕܲܢܫܲܡܸܫ. ܘܲܕ݂ܢܸܬ݁ܠ ܢܲܦ̮ܫܹܗ ܦܘܼܪܩܵܢܵܐ ܚܠܵܦ ܣܲܓܝܼܐܹ̈ܐ.

⁴⁶ܘܐܸܬ݂ܵܘ ܠܐܝܼܪܝܼܚܘܿ. ܘܟܲܕ݂ ܢܦܲܩ ܝܼܫܘܿܥ ܡܸܢ ܐܝܼܪܝܼܚܘܿ: ܗܘܼ ܘܬܲܠܡܝܼܕ݂ܵܘ̈ܗܝ ܘܟܸܢܫܵܐ ܣܲܓܿܝܼܐܵܐ ܛܝܼܡܲܝ ܒܲܪ ܛܝܼܡܲܝ ܣܲܡܝܵܐ ܝܵܬܹ݁ܒ݂ ܗܘ̣ܵܐ ܥܲܠ ܝܲܕ݂ ܐܘܼܪܚܵܐ. ܘܚܵܕܲܪ.

⁴⁷ܘܲܫܡܲܥ ܕܝܼܫܘܿܥ ܗܘܼ ܢܵܨܪܵܝܵܐ. ܘܫܲܪܝܼ ܠܡܸܩܥܵܐ. ܘܲܠܡܹܐܡܲܪ. ܒܪܹܗ ܕܕ݂ܵܘܝܼܕ݂ ܐܸܬ݂ܪܲܚܲܡ ܥܠܲܝ.

⁴⁸ܘܟܵܐܹܝܢ ܗ̄ܘܼܵܘ ܒܹܗ ܣܲܓܝܼܐܹ̈ܐ ܕܢܸܫܬ݁ܘܿܩ. ܗܘܼ ܕܹܝܢ ܝܲܬܝܼܪܵܐܝܼܬ݂ ܩܵܥܹܐ ܗ̄ܘܵܐ. ܘܐܵܡܲܪ. ܒܪܹܗ ܕܕ݂ܵܘܝܼܕ݂ ܐܸܬ݂ܪܲܚܲܡ ܥܠܲܝ.

⁴⁹ܘܩܵܡ ܝܼܫܘܿܥ. ܘܲܦܩܲܕ݂ ܕܢܸܩܪܘܿܢܵܝܗܝ. ܘܲܩܪܵܐܘܼܗܝ ܠܣܲܡܝܵܐ. ܘܐܵܡܪܝܼܢ ܠܹܗ. ܐܸܬ݂ܠܲܒܒ݂ ܩܘܼܡ ܩܵܪܹܐ ܠܵܟ݂.

⁵⁰ܗܘܼ ܕܹܝܢ ܣܲܡܝܵܐ ܫܕ݂ܵܐ ܠܒ݂ܵܫܹܗ ܘܩܼܵܡ ܐܸܬ݂ܵܐ ܠܘܵܬ݂ ܝܼܫܘܿܥ.

⁵¹ܐܵܡܲܪ ܠܹܗ ܝܼܫܘܿܥ. ܡܵܢܵܐ ܨܵܒܹܐ ܐܲܢ̄ܬ݁ ܐܸܥܒܸܕ݂ ܠܵܟ݂. ܗܘܼ ܕܹܝܢ ܣܲܡܝܵܐ. ܐܸܡܲܪ ܠܹܗ. ܪܲܒܝܼ. ܕܐܸܚܙܹܐ.

⁵²ܘܝܼܫܘܿܥ ܐܸܡܲܪ ܠܹܗ. ܚܙܝܼ ܗܲܝܡܵܢܘܼܬ݂ܵܟ݂ ܐܲܚܝܵܬ݂ܵܟ݂. ܘܡܸܚܕ݂ܵܐ ܐܸܬ݂ܚܙܝܼ ܠܹܗ ܘܐܵܙܹܠ ܗܘ̣ܵܐ ܒܐܘܼܪܚܵܐ.