Read Aramaic Peshita Mark 14 Bible Online

Mark 14 - Aramaic Peshita bible

Mark 14

¹ܒܵܬܲܪ ܕܹܝܢ ܬܪܹܝܢ ܝܵܘܡ̈ܝܼܢ ܗܵܘܹܐ ܗܘ̣ܵܐ ܦܸܨܚܵܐ ܕܦܲܛܝܼܪܹ̈ܐ. ܘܒ݂ܵܥܹܝܢ ܗ̄ܘܼܵܘ ܪ̈ܲܒܲܝ ܟܵܗܢܹ̈ܐ ܘܣܵܦܪܹ̈ܐ ܐܲܝܟܲܢܵܐ ܒܢܸܟ݂ܠܵܐ ܢܹܐܚܕ݂ܘܼܢ ܘܢܸܩܛܠܘܼܢܵܝܗܝ.

²ܘܐܵܡܪܝܼܢ ܗ̄ܘܼܵܘܠܵܐ ܒܥܲܕ݂ܥܹܕ݂ܵܐ. ܕܲܠܡܵܐ ܢܸܗܘܹܐ ܫܓ݂ܘܼܫܝܵܐ ܒܥܲܡܵܐ.

³ܘܟܲܕ݂ ܗܘܼ ܐܝܼܬ݂ܵܘܗܝ ܒܒܹܝܬ݂ ܥܲܢܝܵܐ ܒܒܲܝܬܹ݁ܗ ܕܫܸܡܥܘܿܢ ܓܲܪܒܵܐ. ܟܲܕ݂ ܣܡܝܼܟ݂ ܐܸܬܲܬܸ ܐܲܢ̄ܬ݁ܬ݂ܵܐ ܕܐܝܼܬ݂ ܥܠܹܝܗ̇ ܫܵܛܝܼܦ̮ܬܵܐ ܕܒܸܣܡܵܐ ܕܢܲܪܕܝܼܢ ܪܹܫܵܝܵܐ ܣܲܓܝܼ ܕܡܲܝ̈ܵܐ. ܘܲܦܬܲܚܬ݂ܵܗ̇. ܘܐܲܫܦܲܥܬ݂ܵܗ̇ ܥܲܠ ܪܹܫܹܗ ܕܝܼܫܘܿܥ.

⁴ܐܝܼܬ݂ ܗ̄ܘܼܵܘ ܕܹܝܢ ܐ̄ܢܵܫܵܐ ܡܸܢ ܬܲܠܡܝܼܕܹ̈ܐ ܕܐܸܬ݂ܒܿܐܸܫ ܠܗܘܿܢ ܒܢܲܦ̮ܫܗܘܿܢ. ܘܐܸܡܲܪܘ. ܕܲܠܡܵܢܵܐ ܗܘ̣ܵܐ ܐܲܒ݂ܕ݂ܵܢܵܐ ܕܗܵܢܵܐ ܒܸܣܡܵܐ.

⁵ܡܸܫܟܲܚ ܗܘ̣ܵܐ ܓܹܝܪ ܠܡܸܙܕܲܒܵܢܘܼ ܝܲܬ݁ܝܼܪ ܡܸܢ ܬܠܵܬ݂ܡܵܐܐ ܕܝܼܢܵܪ̈ܝܼܢ ܘܲܠܡܸܬ݂ܝܼܗܵܒ݂ܘܼ ܠܡܸܣܟܹܢܹ̈ܐ. ܘܡܸܙܕܲܥܦܝܼܢ ܗ̄ܘܼܵܘ ܒܹܗ.

⁶ܗܘܼ ܕܹܝܢ ܝܼܫܘܿܥ ܐܸܡܲܪ. ܫܘܼܒ݂ܩܘܼܗ̇. ܡܵܢܵܐ ܡܲܗܪܝܼܢ ܐܢ̄ܬܘܿܢ ܠܵܗ̇. ܥܒ݂ܵܕ݂ܵܐ ܫܲܦܝܼܪܵܐ ܥܸܒ݂ܕܲܬ݂ ܠܘܵܬ݂ܝ.

⁷ܒܟ݂ܠܙܒܲܢ ܓܹܝܪ ܡܸܣܟܹܢܹ̈ܐ ܐܝܼܬ݂ ܠܟ݂ܘܿܢ ܥܲܡܟ݂ܘܿܢ ܘܐܸܡܲܬ݂ܝ ܕܨܵܒܹܝܢ ܐܢ̄ܬܘܿܢ. ܡܸܫܟܿܚܝܼܢ ܐܢ̄ܬܘܿܢ ܕܬܸܥܒܕ݂ܘܼܢ ܠܗܘܿܢ ܕܫܲܦܝܼܪ. ܐܸܢܵܐ ܕܹܝܢ ܠܵܐ ܒܟ݂ܠܙܒܲܢ ܐܝܼܬܲܝ ܠܘܵܬ݂ܟ݂ܘܿܢ.

⁸ܗܵܘ ܕܐܝܼܬ݂ ܗܘ̣ܵܐ ܠܵܗ̇ ܠܗܵܕܹܐ. ܥܸܒ݂ܕܲܬ݂. ܘܩܲܕܡܲܬ݂ ܐܲܝܟ݂ ܕܠܲܩܒ݂ܘܼܪܬܵܐ. ܒܲܣܡܲܬܸ ܓܘܼܫܡܝ.

⁹ܘܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܟܠ ܐܲܝܟܵܐ ܕܬܸܬ݂ܟܪܸܙ ܣܒܲܪܬ݂ܝ ܗܵܕܹܐ ܒܟ݂ܠܹܗ ܥܵܠܡܵܐ ܘܐܵܦ ܡܸܕܸܡ ܕܥܸܒ݂ܕܲܬܸ ܗܵܕܹܐ. ܢܸܬ݂ܡܲܠܲܠ ܠܕ݂ܘܼܟ݂ܪܵܢܵܗ̇.

¹⁰ܝܼܗܘܼܕ݂ܵܐ ܕܹܝܢ ܣܟܲܪܝܘܿܛܵܐ ܚܲܕ݂ ܡܸܢ ܬܪܸܥܣܲܪ ܐܸܙܲܠ ܠܘܵܬ݂ ܪ̈ܲܒܲܝ ܟܵܗܢܹ̈ܐ. ܐܲܝܟ݂ ܕܢܲܫܠܡܝܼܘܗܝ ܠܗܘܿܢ ܠܝܼܫܘܿܥ.

¹¹ܗܸܢܘܿܢ ܕܹܝܢ ܟܲܕ݂ ܫܡܲܥܘ. ܚܕ݂ܝܼܘ. ܘܐܸܫܬܵܘܕܝܼܘ ܟܸܣܦܵܐ ܕܢܸܬ݁ܠܘܼܢ ܠܹܗ. ܘܒ݂ܵܥܹܐ ܗܘ̣ܵܐ ܠܹܗ ܦܸܠܥܵܐ. ܕܢܲܫܠܡܝܼܘܗܝ.

¹²ܘܲܒ݂ܝܵܘܡܵܐ ܩܲܕ݂ܡܵܝܵܐ ܕܦܲܛܝܼܪܹ̈ܐ: ܕܒ݂ܗ ܕܵܒ݂ܚܝܼܢ ܝܗ̄ܘܼܕ݂ܵܝܹ̈ܐ ܦܸܨܚܵܐ ܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܐܲܝܟܵܐ ܨܵܒܹܐ ܐܲܢ̄ܬ݁ ܕܢܹܐܙܲܠ ܢܛܲܝܼܒ݂ ܠܵܟ݂ ܕܬܹܐܟ݂ܘܿܠ ܦܸܨܚܵܐ.

¹³ܘܫܲܕܲܪ ܬܪܹܝܢ ܡܸܢ ܬܲܠܡܝܼܕ݂ܵܘ̈ܗܝ. ܘܐܸܡܲܪ ܠܗܘܿܢ ܙܸܠܘ ܠܲܡܕ݂ܝܼܢ̄ܬܵܐ ܘܗܵܐ ܦܵܓܲܥ ܒܟ݂ܘܿܢ ܓܲܒ݂ܪܵܐ ܕܲܫܩܝܼܠ ܡܵܐܢܵܐ ܕܡܲܝ̈ܵܐ. ܙܸܠܘ ܒܵܬ݂ܪܹܗ.

¹⁴ܘܠܲܐܝܟܵܐ ܕܥܵܐܹܠ. ܐܸܡܲܪܘ ܠܡܵܪܹܐ ܒܲܝܬܵܐ. ܪܲܒܲܢ ܐܵܡܲܪ ܐܲܝܟܵܘ ܒܹܝܬ݂ ܡܲܫܪܝܵܐ ܐܲܝܟܵܐ ܕܐܹܟ݂ܘܿܠ ܥܲܡ ܬܲܠܡܝܼ̈ܕܲܝ ܦܸܨܚܵܐ.

¹⁵ܘܗܵܐ ܡܚܵܘܹܐ ܠܟ݂ܘܿܢ ܥܸܠܝܼܬ݂ܵܐ ܪܲܒܬ݂ܵܐ ܕܲܡܫܵܘܝܵܐ. ܘܲܡܛܲܝܒ݂ܵܐ. ܬܲܡܵܢ ܬܲܩܸܢܘ ܠܲܢ.

¹⁶ܘܲܢܦܲܩܘ ܬܲܠܡܝܼܕ݂ܵܘ̈ܗܝ. ܘܐܸܬ݂ܵܘ ܠܲܡܕ݂ܝܼܢ̄ܬܵܐ. ܘܐܸܫܟܲܚܘ ܐܲܝܟܲܢܵܐ ܕܐܵܡܲܪ ܠܗܘܿܢ ܘܛܲܝܸܒ݂ܘ ܦܸܨܚܵܐ.

¹⁷ܘܟܲܕ݂ ܗܘ̣ܵܐ ܪܲܡܫܵܐ. ܐܸܬ݂ܵܐ ܥܲܡ ܬܪܸܥܣܲܪܬܹ݁ܗ.

¹⁸ܘܟܲܕ݂ ܣܡܝܼܟ݂ܝܼܢ ܘܠܵܥܣܝܼܢ. ܐܸܡܲܪ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܚܲܕ݂ ܡܸܢܟ݂ܘܿܢ ܕܐܵܟܹܠ ܥܲܡܝ. ܗܘܼ ܢܲܫܠܡܲܢܝ.

¹⁹ܗܸܢܘܿܢ ܕܹܝܢ ܫܲܪܝܼܘ ܡܸܬ݁ܬ݁ܥܝܼܩܝܼܢ. ܘܐܵܡܪܝܼܢ ܠܹܗ. ܚܲܕ݂ ܚܲܕ݂. ܠܡܵܐ ܐܸܢܵܐ.

²⁰ܗܘܼ ܕܹܝܢ ܐܸܡܲܪ ܠܗܘܿܢ. ܚܲܕ݂ ܡܸܢ ܬܪܸܥܣܲܪ. ܕܨܵܒܲܥ ܥܲܡܝ ܒܠܲܓ݁ܬ݂ܵܐ.

²¹ܘܲܒ݂ܪܹܗ ܕܐ̄ܢܵܫܵܐ ܐܵܙܹܠ ܐܲܝܟܲܢܵܐ ܕܲܟ݂ܬ݂ܝܼܒ݂ ܥܠܵܘܗܝ. ܘܵܝ ܕܹܝܢ ܠܓܲܒ݂ܪܵܐ ܗܵܘ ܕܒ݂ܐܝܼܕܹܗ ܡܸܫܬ݁ܠܸܡ ܒܪܹܗ ܕܐ̄ܢܵܫܵܐ. ܦܲܩܵܚ ܗܘ̣ܵܐ ܠܹܗ ܠܓܲܒ݂ܪܵܐ ܗܵܘ. ܐܸܠܘ ܠܵܐ ܐܸܬ݂ܝܼܠܸܕ݂.

²²ܘܟܲܕ݂ ܗܸܢܘܿܢ ܠܵܥܣܝܼܢ ܢܣܲܒ݂ ܝܼܫܘܿܥ ܠܲܚܡܵܐ ܘܒܲܪܸܟ݂ ܘܲܩܨܵܐ ܘܝܲܗ̄ܒ݂ ܠܗܘܿܢ. ܘܐܸܡܲܪ ܠܗܘܿܢ. ܣܲܒ݂ܘ ܗܵܢܵܐ ܐܝܼܬ݂ܵܘܗܝ ܦܲܓ݂ܪܝ.

²³ܘܲܢܣܲܒ݂ ܟܵܣܵܐ ܘܐܵܘܕܝܼ ܘܒܲܪܸܟ݂. ܘܝܲܗ̄ܒ݂ ܠܗܘܿܢ. ܘܐܸܫܬ݁ܝܼܘ ܡܸܢܹܗ ܟܠܗܘܿܢ.

²⁴ܘܐܸܡܲܪ ܠܗܘܿܢ. ܗܵܢܵܘ ܕܡܝ ܕܲܕ݂ܝܵܬܹܩܹܐ ܚܕܲܬ݂ܵܐ ܕܲܚܠܵܦ ܣܲܓܝܼܐܹ̈ܐ ܡܸܬ݂ܐܫܸܕ݂.

²⁵ܐܵܡܹܝܢ ܐܵܡܲܪ ܐ̄ܢܵܐ ܠܟ݂ܘܿܢ ܕܬ݂ܘܼܒ݂ ܠܵܐ ܐܸܫܬܹܐ ܡܸܢ ܝܲܠܕܵܐ ܕܲܓ݂ܦܸܬܵܐ ܥܕܲܡܵܐ ܠܝܵܘܡܵܐ ܗܵܘ ܕܒܹܗ ܐܸܫܬܹ݁ܝܘܗܝ ܚܲܕ݂ܬ݂ܐܝܼܬ݂ ܒܡܲܠܟܘܼܬܹܗ ܕܐܲܠܵܗܵܐ.

²⁶ܘܫܲܒܲܚܘ. ܘܲܢܦܲܩܘ ܠܛܘܼܪ ܙܲܝ̈ܬܹܐ.

²⁷ܘܐܸܡܲܪ ܠܗܘܿܢ ܝܼܫܘܿܥ. ܕܟ݂ܠܟ݂ܘܼܢ ܬܸܬ݂ܟܲܫܠܘܼܢ ܒܝܼ ܒܗܵܢܵܐ ܠܸܠܝܵܐ. ܟܬ݂ܝܼܒ݂ ܓܹܝܪ ܕܐܸܡܚܹܐ ܠܪܵܥܝܵܐ. ܘܢܸܬ݂ܒܲܕܪܘܼܢ ܐܸܡܪ̈ܵܘܗܝ.

²⁸ܐܸܠܵܐ ܡܵܐ ܕܩܵܡܹܬ݂ ܩܵܕ݂ܡ ܐ̄ܢܵܐ ܠܟ݂ܘܿܢ ܠܲܓ݂ܠܝܼܠܵܐ.

²⁹ܐܵܡܲܪ ܠܹܗ ܟܹܐܦܵܐ. ܐܸܢ ܟܠܗܘܿܢ ܢܸܬ݂ܟܲܫܠܘܼܢ ܐܸܠܵܐ ܠܵܐ ܐܸܢܵܐ.

³⁰ܐܵܡܲܪ ܠܹܗ ܝܼܫܘܿܥ. ܐܵܡܹܝܢ ܐܵܡܲܪ ܐ̄ܢܵܐ ܠܵܟ݂ ܕܐܲܢ̄ܬ݁ ܝܵܘܡܵܢܵܐ ܒܠܸܠܝܵܐ ܗܵܢܵܐ ܩܕ݂ܵܡ ܕܢܸܩܪܹܐ ܬܲܪܢܵܓ݂ܠܵܐ ܬܲܪܬܹ݁ܝܢ ܙܲܒ݂ܢܝܼܢ ܬܠܵܬ݂ ܬܸܟ݂ܦܘܼܪ ܒܝܼ.

³¹ܗܘܼ ܕܹܝܢ ܝܲܬܝܼܪܵܐܝܼܬ݂ ܐܵܡܲܪ ܗ̄ܘܵܐ. ܕܐܸܢ ܢܸܗܘܹܐ ܠܝܼ ܠܲܡܡܵܬ݂ ܥܲܡܵܟ݂ ܠܵܐ ܐܸܟ݂ܦܘܼܪ ܒܵܟ݂. ܡܵܪܝ. ܘܐܲܟ݂ܘܵܬܹܗ ܐܵܦ ܟܠܗܘܿܢ ܐܸܡܲܪܘ.

³²ܘܐܸܬ݂ܵܘ ܠܕ݂ܘܼܟܬ݂ܵܐ ܐܲܝܕ݂ܵܐ ܕܡܸܬ݂ܩܲܪܝܵܐ. ܓܲܕ݂ܣܹܡܵܢ. ܘܐܸܡܲܪ ܠܬܲܠܡܝܼܕ݂ܵܘ̈ܗܝ. ܬܸܒ݂ܘ ܗܵܪܟܵܐ. ܥܲܕ݂ ܡܨܲܠܹܐ ܐ̄ܢܵܐ.

³³ܘܲܕ݂ܒܲܪ ܥܲܡܹܗ ܠܟܹܐܦܵܐ ܘܲܠܝܲܥܩܘܿܒ݂. ܘܲܠܝܘܿܚܲܢܵܢ ܘܫܲܪܝܼ ܠܡܸܬ݂ܟܡܵܪܘܼ. ܘܲܠܡܸܬ݁ܬ݁ܥܵܩܘܼ.

³⁴ܘܐܸܡܲܪ ܠܗܘܿܢ. ܟܲܪܝܵܐ ܗܝ ܠܵܗ̇ ܠܢܲܦ̮ܫܝ. ܥܕܲܡܵܐ ܠܡܵܘܬܵܐ. ܩܵܘܘ ܗܵܪܟܵܐ ܘܐܸܬ݁ܬ݁ܥܝܼܪܘ.

³⁵ܘܲܩܪܸܒ݂ ܩܲܠܝܼܠ. ܘܲܢܦܲܠ ܥܲܠ ܐܲܪܥܵܐ. ܘܲܡܨܲܠܹܐ ܗ̄ܘܵܐ ܕܐܸܢ ܡܸܫܟܚܵܐ. ܬܸܥܒܲܪ ܡܸܢܹܗ ܫܵܥܬ݂ܵܐ.

³⁶ܘܐܸܡܲܪ. ܐܲܒ݂ܵܐ ܐܵܒ݂ܝ ܟܠܡܸܕܸܡ ܡܸܫܟܲܚ ܐܲܢ̄ܬ݁. ܐܲܥܒܲܪ ܡܹܢܝ ܟܵܣܵܐ ܗܵܢܵܐ. ܐܸܠܵܐ ܠܵܐ ܨܸܒ݂ܝܵܢܝ ܕܝܼܠܝ ܐܸܠܵܐ ܕܝܼܠܵܟ݂.

³⁷ܘܐܸܬ݂ܵܐ ܐܸܫܟܲܚ ܐܸܢܘܿܢ ܟܲܕ݂ ܕܲܡܟܿܝܼܢ. ܘܐܸܡܲܪ ܠܟܹܐܦܵܐ. ܫܸܡܥܘܿܢ ܕܡܸܟ݂ܬ݁ ܠܵܟ݂ ܠܵܐ ܐܸܫܟܲܚܬ݁ ܚܕ݂ܵܐ ܫܵܥܵܐ ܠܡܸܬ݁ܬ݁ܥܵܪܘܼ.

³⁸ܐܸܬ݁ܬ݁ܥܝܼܪܘ ܘܨܲܠܵܘ. ܕܠܵܐ ܬܸܥܠܘܼܢ ܠܢܸܣܝܘܼܢܵܐ. ܪܘܼܚܵܐ ܨܵܒ݂ܝܵܐ. ܘܲܡܛܲܝܒ݂ܵܐ. ܐܸܠܵܐ ܦܲܓ݂ܪܵܐ ܟܪܝܼܗ.

³⁹ܘܐܸܙܲܠ ܬܘܼܒ݂ ܨܲܠܝܼ. ܘܗܝܼ ܡܸܠܬ݂ܵܐ ܐܸܡܲܪ.

⁴⁰ܘܲܗܦܲܟ݂ ܐܸܬ݂ܵܐ ܬܘܼܒ݂. ܐܸܫܟܲܚ ܐܸܢܘܿܢ ܟܲܕ݂ ܕܲܡܟܿܝܼܢ. ܡܛܠ ܕܥܲܝܢܲܝ̈ܗܘܿܢ ܝܲܩܝܼܪ̈ܵܢ ܗ̄ܘܲܝ̈. ܘܠܵܐ ܝܵܕ݂ܥܝܼܢ ܗ̄ܘܼܵܘ ܡܵܢܵܐ ܢܹܐܡܪܘܼܢ ܠܹܗ.

⁴¹ܘܐܸܬ݂ܵܐ ܕܲܬ݂ܠܵܬ݂ ܙܲܒ݂ܢ̈ܝܼܢ. ܘܐܸܡܲܪ ܠܗܘܿܢ ܕܡܲܟ݂ܘ ܡܸܟܹܝܠ. ܘܐܸܬ݁ܬ݁ܢܝܼܚܘ. ܡܛܵܬ݂ ܚܲܪܬ݂ܵܐ ܘܐܸܬ݂ܵܬ݂ ܫܵܥܬ݂ܵܐ. ܘܗܵܐ ܡܸܫܬ݁ܠܸܡ ܒܪܹܗ ܕܐ̄ܢܵܫܵܐ ܒܐܝܼܕ݂ܲܝ̈ܗܘܿܢ ܕܚܲܛܵܝܹ̈ܐ.

⁴²ܩܘܼܡܘ ܢܹܐܙܲܠ. ܗܵܐ ܩܪܸܒ݂ ܗܵܘ ܕܡܲܫܠܸܡ ܠܝܼ.

⁴³ܘܥܲܕ݂ ܗܘܼ ܡܡܲܠܸܠ ܐܸܬ݂ܵܐ ܝܼܗܘܼܕ݂ܵܐ ܣܟܲܪܝܘܿܛܵܐ ܚܲܕ݂ ܡܸܢ ܬܪܸܥܣܲܪ: ܘܥܲܡܵܐ ܣܲܓܿܝܼܐܵܐ ܥܲܡ ܣܲܦ̮ܣܹܪܹ̈ܐ. ܘܚܘܼܛܪܹ̈ܐ ܡܸܢ ܠܘܵܬ݂ ܪ̈ܲܒܲܝ ܟܵܗܢܹ̈ܐ. ܘܣܵܦܪܹ̈ܐ ܘܩܲܫܝܼܫܹ̈ܐ.

⁴⁴ܘܝܲܗ̄ܒ݂ ܠܗܘܿܢ ܐܵܬ݂ܵܐ ܡܲܫܠܡܵܢܵܐ ܗܵܘ ܕܡܲܫܠܸܡ. ܘܐܸܡܲܪ. ܗܵܘ ܕܢܵܫܹܩ ܐ̄ܢܵܐ ܗܘܸܝܘܼ. ܐܘܼܚܕܿܘܼܗܝ ܙܗܝܼܪܵܐܝܼܬ݂. ܘܐܵܘܒܿܠܘܼܗܝ.

⁴⁵ܘܒܲܪ ܫܵܥܬܹܗ ܩܪܸܒ݂. ܘܐܸܡܲܪ ܠܹܗ. ܪܲܒܝܼ ܪܲܒܝܼ. ܘܢܲܫܩܹܗ.

⁴⁶ܗܸܢܘܿܢ ܕܹܝܢ ܐܲܪܡܝܼܘ ܥܠܵܘܗܝ ܐܝܼܕܲܝܵܐ. ܘܐܲܚܕܿܘܼܗܝ.

⁴⁷ܚܲܕ݂ ܕܹܝܢ ܡܸܢ ܗܵܢܘܿܢ ܕܩܵܝܡܝܼܢ ܫܡܲܛ ܣܲܝܦܵܐ ܘܲܡܚܵܝܗܝ ܠܥܲܒ݂ܕܹܗ ܕܪܲܒ ܟܵܗܢܹ̈ܐ. ܘܫܲܩܠܵܗ̇ ܐܸܕ݂ܢܹܗ.

⁴⁸ܗܘܼ ܕܹܝܢ ܝܼܫܘܿܥ ܥܢܵܐ. ܘܐܸܡܲܪ ܠܗܘܿܢ. ܐܲܝܟ݂ ܕܥܲܠ ܓܲܝܵܣܵܐ ܢܦܲܩܬ݁ܘܿܢ ܒܣܲܝܦܹ̈ܐ ܘܲܒ݂ܚܘܼܛܪܹ̈ܐ. ܕܬܹܐܚܕ݂ܘܼܢܵܢܝ

⁴⁹ܟܠܝܘܼܡ ܠܘܵܬ݂ܟ݂ܘܿܢ ܗ̄ܘܹܝܬ݂ ܟܲܕ݂ ܡܲܠܸܦ ܐ̄ܢܵܐ ܒܗܲܝܟܠܵܐ ܘܠܵܐ ܐܸܚܲܕ݂ܬ݁ܘܿܢܵܢܝ. ܐܸܠܵܐ ܕܢܸܫܠܡܘܼܢ ܟܬ݂ܵܒܹ̈ܐ ܗܘܸܵܬ݂ ܗܵܕܹܐ.

⁵⁰ܗܵܝܕܹܝܢ ܫܼܲܒ݂ܩܘܼܗܝ ܬܲܠܡܝܼܕ݂ܵܘ̈ܗܝ. ܘܲܥܪܲܩܘ.

⁵¹ܘܲܥܠܲܝܡܵܐ ܚܲܕ݂ ܐܵܬܹܐ ܗܘ̣ܵܐ ܒܵܬ݂ܪܹܗ ܘܲܥܛܝܼܦ ܣܸܕ݂ܘܢܵܐ ܥܲܪܛܸܠ. ܘܐܲܚܕܿܘܼܗܝ.

⁵²ܗܘܼ ܕܹܝܢ ܫܒܲܩ ܣܸܕܿܘܿܢܵܐ. ܘܲܥܪܲܩ ܥܲܪܛܸܠ.

⁵³ܘܐܵܘܒܠܘܼܗܝ ܠܝܼܫܘܿܥ ܠܘܵܬ݂ ܩܲܝܵܦܵܐ ܪܲܒ ܟܵܗܢܹ̈ܐ. ܘܐܸܬ݂ܟܲܢܲܫܘ ܠܘܵܬܹܗ ܟܠܗܘܿܢ ܪ̈ܲܒܲܝ ܟܵܗܢܹ̈ܐ. ܘܣܵܦܪܹ̈ܐ ܘܩܲܫܝܼܫܹ̈ܐ.

⁵⁴ܫܸܡܥܘܿܢ ܕܹܝܢ ܡܸܢ ܪܘܼܚܩܵܐ ܐܵܬܹܐ ܗܘ̣ܵܐ ܒܵܬ݂ܪܹܗ ܥܕܲܡܵܐ ܠܓ݂ܵܘ ܕܵܪܬܵܐ ܕܪܲܒ ܟܵܗܢܹ̈ܐ. ܘܝܵܬܹ݁ܒ݂ ܗܘ̣ܵܐ ܥܲܡ ܡܫܲܡܫܵܢܹ̈ܐ. ܘܫܵܚܹܿܢ ܠܘܼܩܒܲܠ ܢܘܼܪܵܐ.

⁵⁵ܪ̈ܲܒܲܝ ܟܵܗܢܹ̈ܐ ܕܹܝܢ ܘܟ݂ܠܹܗ ܟܸܢܫܗܘܿܢ ܒܵܥܹܝܢ ܗ̄ܘܼܵܘ ܥܲܠ ܝܼܫܘܿܥ ܣܵܗܕܘܬ݂ܵܐ ܕܲܢܡܝܼܬ݂ܘܼܢܵܝܗܝ ܘܠܵܐ ܐܸܫܟܲܚܘ.

⁵⁶ܟܲܕ݂ ܣܲܓܝܼܐܹ̈ܐ ܓܹܝܪ ܡܲܣܗܕ݂ܝܼܢ ܗ̄ܘܼܵܘ ܥܠܵܘܗܝ ܠܵܐ ܫܵܘܝܵܢ ܗܘܲܝ ܣܵܗܕܘܵܬ݂ܗܘܿܢ.

⁵⁷ܐ̄ܢܵܫ̈ܝܼܢ ܕܹܝܢ ܩܵܡܘ ܥܠܵܘܗܝ ܣܵܗ̈ܕܹܐ ܕܫܘܼܩܪܵܐ. ܘܐܸܡܲܪܘ.

⁵⁸ܕܲܚܢܲܢ ܫܡܲܥܢܵܝܗܝ ܕܐܵܡܲܪ. ܕܐܸܢܵܐ ܫܵܪܹܐ ܐ̄ܢܵܐ ܗܲܝܟܠܵܐ ܗܵܢܵܐ ܕܲܥܒ݂ܝܼܕ݂ ܒܐܝ̈ܕܲܝܵܐ ܘܠܲܬ݂ܠܵܬ݂ܵܐ ܝܵܘܡ̈ܝܼܢ ܒܵܢܹܐ ܐ̄ܢܵܐ ܐ̄ܚܪܹܢܵܐ. ܕܠܵܐ ܥܒ݂ܝܼܕ݂ ܒܐܝ̈ܕܲܝܵܐ.

⁵⁹ܘܐܵܦܠܵܐ ܕܹܝܢ ܗܵܟܲܢܵܐ ܫܵܘܝܵܐ ܗ̄ܘܵܬ݂ ܣܵܗܕܘܼܬ݂ܗܘܿܢ.

⁶⁰ܘܩܼܵܡ ܪܲܒ ܟܵܗܢܹ̈ܐ ܒܲܡܨܲܥܬ݂ܵܐ. ܘܫܲܐܠܹܗ ܠܝܼܫܘܿܥ. ܘܐܸܡܲܪ. ܠܵܐ ܡܦܲܢܹܐ ܐܲܢ̄ܬ݁ ܦܸܬ݂ܓ݂ܵܡܵܐ ܡܵܢܵܐ ܡܲܣܗܕ݂ܝܼܢ ܥܠܲܝܟ ܗܵܠܹܝܢ

⁶¹ܗܘܼ ܕܹܝܢ ܫܲܬ݁ܝܼܩ ܗ̄ܘܵܐ. ܘܡܸܕܸܡ ܠܵܐ ܥܢܵܝܗܝ. ܘܬ݂ܘܼܒ݂ ܫܲܐܠܹܗ ܪܲܒ ܟܵܗܢܹ̈ܐ. ܘܐܸܡܲܪ. ܐܲܢ̄ܬ݁ ܗܘܼ ܡܫܝܼܚܵܐ ܒܪܹܗ ܕܲܡܒܲܪܟ݂ܐ.

⁶²ܗܘܼ ܕܹܝܢ ܝܼܫܘܿܥ ܐܸܡܲܪ ܠܹܗ. ܐܸܢܵܐ ܐ̄ܢܵܐ. ܘܬܸܚܙܘܿܢ ܠܲܒ݂ܪܹܗ ܕܐ̄ܢܵܫܵܐ ܕܝܵܬܹ݁ܒ݂ ܡܸܢ ܝܲܡܝܼܢܵܐ ܕܚܲܝܠܵܐ ܘܐܵܬܹܐ ܥܲܠ ܥܢܵܢܲܝ̈ ܫܡܲܝܵܐ.

⁶³ܪܲܒ ܟܵܗܢܹ̈ܐ ܕܹܝܢ ܨܪܵܐ ܟܘܿܬ݁ܝܼܢܹܗ. ܘܐܸܡܲܪ. ܡܵܢܵܐ ܡܸܟܹܝܠ ܡܸܬ݂ܒܿܥܹܝܢ ܠܲܢ ܣܵܗܕܹ̈ܐ.

⁶⁴ܗܵܐ ܡܸܢ ܦܘܼܡܹܗ ܫܡܲܥܬ݁ܘܿܢ ܓܘܼܕܦܵܐ. ܡܵܢܵܐ ܡܸܬ݂ܚܙܹܐ ܠܟ݂ܘܿܢ. ܗܸܢܘܿܢ ܕܹܝܢ ܟܠܗܘܿܢ ܕܵܢܘ. ܕܚܲܝܵܒ݂ ܗ̄ܘܼ ܡܵܘܬܵܐ.

⁶⁵ܘܫܲܪܝܼܘ ܐ̄ܢܵܫ̈ܝܼܢ ܪܵܩܝܼܢ ܒܦܲܪܨܘܿܦܹܗ. ܘܲܡܚܲܦܹܝܢ ܐܲܦܵܘ̈ܗܝ ܘܲܡܩܲܦܚܝܼܢ ܠܹܗ. ܘܐܵܡܪܝܼܢ. ܐܸܬ݂ܢܲܒܵܐ. ܘܕܲܚܫܹ̈ܐ ܡܵܚܹܝܢ ܗ̄ܘܼܵܘ ܠܹܗ ܥܲܠ ܦܲܟܵܘ̈ܗܝ.

⁶⁶ܘܟܲܕ݂ ܫܸܡܥܘܿܢ ܠܬܲܚܬ݁ ܒܕ݂ܵܪܬܵܐ ܐܸܬܲܬܸ ܥܠܲܝܡܬ݂ܵܐ ܚܕ݂ܵܐ ܕܪܲܒ ܟܵܗܢܹ̈ܐ.

⁶⁷ܚܙܵܬܹܗ ܕܫܵܚܹܢ. ܘܚܵܪܲܬ݂ ܒܹܗ. ܘܐܵܡܪܵܐ ܠܹܗ. ܘܐܵܦ ܐܲܢ̄ܬ݁ ܥܲܡ ܝܼܫܘܿܥ ܗܘܲܝܬ݁ ܢܵܨܪܵܝܵܐ.

⁶⁸ܗܘܼ ܕܹܝܢ ܟܦܲܪ. ܘܐܸܡܲܪ. ܠܵܐ ܝܵܕܲܥ ܐ̄ܢܵܐ ܡܵܢܵܐ ܐܵܡܪܵܐ ܐܲܢ̄ܬ݁ܝ. ܘܲܢܦܲܩ ܠܒܲܪ ܠܣܸܦܵܐ. ܘܲܩܪܵܐ ܬܲܪܢܵܓ݂ܠܵܐ.

⁶⁹ܘܲܚܙܵܬܹܗ ܬܘܼܒ݂ ܥܠܲܝܡܬ݂ܵܐ ܗܵܝ ܘܫܲܪܝܲܬ݂ ܕܬܹܐܡܲܪ ܠܐܲܝܠܹܝܢ ܕܩܵܝܡܝܼܢ ܕܐܵܦ ܗܵܢܵܐ ܡܸܢܗܘܿܢ ܗ̄ܘܼ.

⁷⁰ܗܘܼ ܕܹܝܢ ܬܘܼܒ݂ ܟܦܲܪ. ܘܒܵܬܲܪ ܩܲܠܝܼܠ ܬܘܼܒ݂ ܗܵܢܘܿܢ ܕܩܵܝܡܝܼܢ ܐܸܡܲܪܘ ܠܟܹܐܦܵܐ. ܫܲܪܝܼܪܵܐܝܼܬ݂ ܡܸܢܗܘܿܢ ܐܲܢ̄ܬ݁. ܐܵܦ ܓܹܝܪ ܓ݁ܠܝܼܠܵܝܵܐ ܐܲܢ̄ܬ݁ ܘܡܲܡܠ̱ܠܵܟ݂ ܕܵܡܹܐ.

⁷¹ܗܘܼ ܕܹܝܢ ܫܲܪܝܼ ܗ̄ܘܵܐ ܡܲܚܪܸܡ ܘܝܵܡܹܐ: ܕܠܵܐ ܝܵܕܲܥ ܐ̄ܢܵܐ ܠܓܲܒ݂ܪܵܐ ܗܵܢܵܐ. ܕܐܵܡܪܝܼܢ ܐܢ̄ܬܘܿܢ.

⁷²ܘܒ݂ܵܗ̇ ܒܫܵܥܬ݂ܵܐ. ܩܪܵܐ ܬܲܪܢܵܓ݂ܠܵܐ ܕܬܲܪܬܹ݁ܝܢ ܙܲܒ݂ܢܝܼܢ. ܘܐܸܬ݁ܕܟ݂ܲܪ ܫܸܡܥܘܿܢ ܡܸܠܬܹܗ ܕܝܼܫܘܿܥ ܕܐܵܡܲܪ ܗܘ̣ܵܐ ܠܹܗ ܕܲܩܕ݂ܵܡ ܕܢܸܩܪܹܐ ܬܲܪܢܵܓ݂ܠܵܐ ܬܲܪܬܹ݁ܝܢ ܙܲܒ݂ܢ̈ܝܼܢ ܬܠܵܬ݂ ܬܸܟ݂ܦܘܼܪ ܒܝܼ. ܘܫܲܪܝܼ ܕܢܸܒ݂ܟܹܐ.