Read Aramaic Peshita Mark 5 Bible Online

Mark 5 - Aramaic Peshita bible

Mark 5

¹ܘܐܸܬ݂ܵܐ ܠܥܸܒ݂ܪܵܐ ܕܝܲܡܵܐ. ܠܐܲܬ݂ܪܵܐ ܕܓ݂ܵܕ݂ܪܵܝܼܐ.

²ܘܟܲܕ݂ ܢܦܲܩ ܡܸܢ ܣܦܝܼܢ̄ܬܵܐ ܦܓܲܥ ܒܹܗ ܡܸܢ ܒܹܝܬ݂ ܩܒ݂ܘܪܹ̈ܐ. ܓܲܒ݂ܪܵܐ ܕܐܝܼܬ݂ ܒܹܗ ܪܘܼܚܵܐ ܛܲܢܦܬ݂ܵܐ.

³ܘܥܵܡܲܪ ܗܘ̣ܵܐ ܒܹܝܬ݂ ܩܒ݂ܘܪܹ̈ܐ. ܘܲܒ݂ܫܸܫ̈ܠܵܬ݂ܵܐ ܐ̄ܢܵܫ ܠܵܐ ܡܸܫܟܲܚ ܗܘ̣ܵܐ ܠܡܹܐܣܪܹܗ.

⁴ܡܛܠ ܕܟܠ ܐܸܡܲܬ݂ܝ ܕܲܒ݂ܣܘܼܛܡܹ̈ܐ ܘܲܒ݂ܫܸܫ̈ܠܵܬ݂ܵܐ ܡܸܬ݂ܐܣܲܪ ܗ̄ܘܵܐ ܫܸܫ̈ܠܵܬ݂ܵܐ ܡܬܲܒܲܪ ܗ̄ܘܵܐ. ܘܣܘܼܛܡܹ̈ܐ ܡܦܲܣܸܩ ܗ̄ܘܵܐ. ܘܠܵܐ ܐ̄ܢܵܫ ܡܸܫܟܲܚ ܗܘ̣ܵܐ ܠܡܸܟ݂ܒܫܹܗ.

⁵ܘܲܒܟ݂ܠ ܙܒܲܢ ܒܠܸܠܝܵܐ ܘܒ݂ܐܝܼܡܵܡܵܐ ܒܒܹܝܬ݂ ܩܒ݂ܘܪܹ̈ܐ ܘܲܒ݂ܛܘܼܪܹ̈ܐ. ܐܝܼܬ݂ܵܘܗܝ ܗ̄ܘܵܐ. ܘܩܵܥܹܐ ܗ̄ܘܵܐ. ܘܲܡܨܲܠܸܦ ܢܲܦ̮ܫܹܗ ܒܟ݂ܹܐܦܹ̈ܐ.

⁶ܟܲܕ݂ ܚܙܵܐ ܕܹܝܢ ܠܝܼܫܘܿܥ ܡܸܢ ܪܘܼܚܩܵܐ ܪܗܸܛ ܣܓܸܕ݂ ܠܹܗ.

⁷ܘܲܩܥܵܐ ܒܩܵܠܵܐ ܪܵܡܵܐ. ܘܐܸܡܲܪ. ܡܵܐ ܠܝܼ ܘܠܵܟ݂ ܝܼܫܘܿܥ ܒܪܹܗ ܕܐܲܠܵܗܵܐ ܡܪܲܝܡܵܐ. ܡܵܘܡܹܐ ܐ̄ܢܵܐ ܠܵܟ݂ ܒܐܲܠܵܗܵܐ. ܕܠܵܐ ܬܫܲܢܩܲܢܝ.

⁸ܐܵܡܲܪ ܗܘ̣ܵܐ ܠܹܗ ܓܹܝܪ ܦܘܼܩ ܡܸܢ ܒܲܪܢܵܫܵܐ ܪܘܼܚܵܐ ܛܲܢܦܵܐ.

⁹ܘܫܲܐܠܹܗ. ܐܲܝܟܲܢܵܐ ܫܡܵܟ݂. ܐܵܡܲܪ ܠܹܗ ܠܸܓ݂ܝܘܼܢ ܫܡܲܢ. ܡܛܠ ܕܣܲܓܝܼܐܹ̈ܐ ܚ̱ܢܲܢ.

¹⁰ܘܒ݂ܵܥܹܐ ܗܘ̣ܵܐ ܡܸܢܹܗ ܣܲܓܝܼ ܕܠܵܐ ܢܫܲܕܪܝܼܘܗܝ ܠܒܲܪ ܡܸܢ ܐܲܬ݂ܪܵܐ.

¹¹ܐܝܼܬ݂ ܗܘ̣ܵܐ ܕܹܝܢ ܬܲܡܵܢ ܠܘܵܬ݂ ܛܘܼܪܵܐ ܒܲܩܪܵܐ ܪܲܒܬ݂ܵܐ ܕܲܚܙܝܼܪܹ̈ܐ. ܕܪܵܥܝܵܐ

¹²ܘܒ݂ܵܥܹܝܢ ܗ̄ܘܼܵܘ ܡܸܢܹܗ ܗܵܢܘܿܢ ܫܹܐܕܹ̈ܐ. ܘܐܵܡܪܝܼܢ. ܫܲܕܲܪܝܲܢ ܥܲܠ ܗܵܢܘܿܢ ܚܙܝܼܪܹ̈ܐ ܕܲܒ݂ܗܘܿܢ ܢܸܥܘܠ.

¹³ܘܐܲܦܸܣ ܠܗܘܿܢ. ܘܲܢܦܲܩ ܪܘܼܚܵܐ ܗܵܠܹܝܢ ܛܲܢܦܵܬ݂ܵܐ. ܘܥܲܠ ܒܲܚܙܝܼܪܹ̈ܐ. ܘܪܸܗܛܲܬ݂ ܗܵܝ ܒܲܩܪܵܐ ܠܲܫܩܝܼܦܵܐ ܘܢܸܦܠܲܬ݂ ܒܝܲܡܵܐ ܐܲܝܟ݂ ܬܪܹܝܢ ܐܲܠܦ̈ܝܼܢ. ܘܐܸܬ݂ܚܲܢܲܩܘ ܒܡܲ̈ܝܵܐ.

¹⁴ܘܗܵܢܘܿܢ ܕܪܵܥܹܝܢ ܗ̄ܘܼܵܘ ܠܗܘܿܢ ܥܪܲܩܘ ܘܐܸܡܲܪܘ ܒܲܡܕ݂ܝܼܢ̄ܬܵܐ. ܘܐܵܦ ܒܩܘܼܪܝܵܐ. ܘܲܢܦܲܩܘ ܠܡܸܚܙܵܐ ܡܸܕܸܡ ܕܲܗܘܵܐ.

¹⁵ܘܐܸܬ݂ܵܘ ܠܘܵܬ݂ ܝܼܫܘܿܥ ܘܲܚܙܵܐܘܼܗܝ ܠܗܵܘ ܕܫܹܐܕ݂ܵܘ̈ܗܝ. ܟܲܕ݂ ܠܒ݂ܝܼܫ ܘܲܡܢܲܟܲܦ. ܘܝܵܬܹ݁ܒ݂ ܗܵܘ ܕܐܝܼܬ݂ ܗܘ̣ܵܐ ܒܹܗ ܠܸܓ݂ܝܘܿܢ ܘܲܕ݂ܚܸܠܘ.

¹⁶ܘܐܸܫܬܲܥܝܼܘ ܠܗܘܿܢ ܗܵܢܘܿܢ ܕܲܚܙܵܘ ܕܐܲܝܟܲܢܵܐ ܗܘ̣ܵܐ ܠܗܵܘ ܕܫܹܐܕ݂ܵܘ̈ܗܝ. ܘܐܵܦ ܥܲܠ ܗܵܢܘܿܢ ܚܙܝܼܪܹ̈ܐ.

¹⁷ܘܫܲܪܝܼܘ ܒܵܥܹܝܢ ܡܸܢܹܗ ܕܢܹܐܙܲܠ ܠܹܗ ܡܸܢ ܬܚܘܼܡܗܘܿܢ.

¹⁸ܘܟܲܕ݂ ܣܠܸܩ ܠܲܣܦܝܼܢ̄ܬܵܐ ܒܵܥܹܐ ܗܘ̣ܵܐ ܡܸܢܹܗ ܗܵܘ ܕܫܹܐܕ݂ܵܘ̈ܗܝ ܕܥܲܡܹܗ ܢܸܗܘܹܐ.

¹⁹ܘܠܵܐ ܫܲܒ݂ܩܹܗ. ܐܸܠܵܐ ܐܸܡܲܪ ܠܹܗ ܙܸܠ ܠܒܲܝܬܵܟ݂ ܠܘܵܬ݂ ܐ̄ܢܵܫܲܝܟ ܘܐܸܫܬܲܥܵܐ ܠܗܘܿܢ ܡܸܕܸܡ ܕܲܥܒܲܕ݂ ܠܵܟ݂ ܡܵܪܝܵܐ. ܘܕܐܸܬ݂ܪܲܚܲܡ ܥܠܲܝܟ.

²⁰ܘܐܸܙܲܠ ܘܫܲܪܝܼ ܡܲܟ݂ܪܸܙ ܒܥܸܣܪܲܬ݂ ܡܕ݂ܝܼ̈ܢܵܬ݂ܵܐ. ܡܸܕܸܡ ܕܲܥܒܲܕ݂ ܠܹܗ ܝܼܫܘܿܥ. ܘܟ݂ܠܗܘܿܢ ܬܲܡܝܼܗܝܼܢ ܗܘܵܘ.

²¹ܘܟܲܕ݂ ܥܒܲܪ ܝܼܫܘܿܥ ܒܲܣܦܝܼܢ̄ܬܵܐ ܠܗܵܘ ܥܸܒ݂ܪܵܐ ܬܘܼܒ݂ ܐܸܬ݂ܟܲܢܲܫܘ ܥܠܵܘܗܝ ܟܸܢܫܹ̈ܐ ܣܲܓܝܼܐܹ̈ܐ ܟܲܕ݂ ܐܝܼܬ݂ܵܘܗܝ ܥܲܠ ܝܲܕ݂ ܝܲܡܵܐ.

²²ܘܐܸܬ݂ܵܐ ܚܲܕ݂ ܕܲܫܡܹܗ ܝܘܼܐܵܪܵܫ ܡܸܢ ܪܲܒܲܝ ܟܢܘܼܫܬܵܐ ܘܟܲܕ݂ ܚܙܵܝܗܝ. ܢܦܲܠ ܠܘܵܬ݂ ܪܸ̈ܓ݂ܠܵܘܗܝ.

²³ܘܒ݂ܵܥܹܐ ܗܘ̣ܵܐ ܡܸܢܹܗ ܣܲܓܝܼ. ܘܐܵܡܲܪ ܠܹܗ. ܒܪܲܬ݂ܝ ܒܝܼܫܵܐܝܼܬ݂ ܥܒ݂ܝܼܕ݂ܵܐ. ܬܵܐ ܣܝܼܡ ܐܝܼܕ݂ܵܟ݂ ܥܠܹܝܗ̇ ܘܬܸܬ݂ܚܠܸܡ. ܘܬܸܚܹܐ.

²⁴ܘܐܸܙܲܠ ܥܲܡܹܗ ܝܼܫܘܿܥ. ܘܕܲܒܝܼܩ ܗܘ̣ܵܐ ܠܹܗ ܟܸܢܫܵܐ ܣܲܓܿܝܼܐܵܐ ܘܚܵܒ݂ܨܝܼܢ ܗ̄ܘܼܵܘ ܠܹܗ. .

²⁵ܐܲܢ̄ܬ݁ܬ݂ܵܐ ܕܹܝܢ ܚܕ݂ܵܐ ܕܐܝܼܬܹܝܗ̇ ܗ̄ܘܵܬ݂ ܒܡܲܪܕܝܼܬ݂ܵܐ ܕܲܕ݂ܡܵܐ ܫܢܝܼܢ ܬܲܪܬܲܥܸܣܪܹ̈ܐ

²⁶ܐܲܝܕ݂ܵܐ ܕܣܲܓܝܼ ܣܸܒ݂ܠܲܬ݂ ܡܸܢ ܐܵܣܵܘܵܬ݂ܵܐ ܣܲܓܝܼܐܹ̈ܐ: ܘܐܲܦܩܲܬ݂ ܟܠܡܸܕܸܡ ܕܐܝܼܬ݂ ܠܵܗ: ܘܡܸܕܸܡ ܠܵܐ ܐܸܬ݂ܥܲܕܪܲܬ݂. ܐܸܠܵܐ ܐܵܦ ܝܲܬܝܼܪܵܐܝܼܬ݂ ܐܸܬ݂ܐܠܨܲܬ݂.

²⁷ܟܲܕ݂ ܫܸܡܥܲܬ݂ ܥܲܠ ܝܼܫܘܿܥ ܐܸܬ݂ܵܬ݂ ܒܚܸܒ݂ܨܵܐ ܕܟ݂ܸܢܫܵܐ ܡܸܢ ܒܣܬ݁ܪܹܗ. ܩܸܪܒܲܬ݂ ܠܲܠܒ݂ܘܼܫܹܗ.

²⁸ܐܵܡܪܵܐ ܗ̄ܘܵܬ݂ ܓܹܝܪ ܕܐܦܸܢ ܠܲܠܒ݂ܘܼܫܹܗ ܩܵܪܒܵܐ ܐ̄ܢܵܐ. ܚܵܝܵܐ ܐ̄ܢܵܐ

²⁹ܘܡܸܚܕ݂ܵܐ ܝܼܒ݂ܫܲܬ݂ ܡܥܝܼܢܵܐ ܕܲܕ݂ܡܵܗ̇. ܘܐܲܪܓ݁ܫܲܬ݂ ܒܦܲܓ݂ܪܵܗ̇. ܕܐܬܲܐܣܝܲܬ݂ ܡܸܢ ܡܚܘܼܬ݂ܵܗ̇.

³⁰ܝܼܫܘܿܥ ܕܹܝܢ ܡܸܚܕ݂ܵܐ ܝܼܕܲܥ ܒܢܲܦ̮ܫܹܗ. ܕܚܲܝܠܵܐ ܢܦܲܩ ܡܸܢܹܗ. ܘܐܸܬ݂ܦܢܝܼ ܠܘܵܬ݂ ܟܸܢܫܵܐ. ܘܐܸܡܲܪ. ܡܲܢܘܼ ܩܪܸܒ݂ ܠܡܵܐܢܲܝ.

³¹ܘܐܵܡܪܝܼܢ ܠܹܗ ܬܲܠܡܝܼܕ݂ܵܘ̈ܗܝ. ܚܵܙܹܐ ܐܲܢ̄ܬ݁ ܠܟܸܢܫܹ̈ܐ ܕܚܵܒ݂ܨܝܼܢ ܠܵܟ݂ ܘܐܵܡܲܪ ܐܲܢ̄ܬ݁ ܡܲܢܘܼ ܩܪܸܒ݂ ܠܝܼ

³²ܘܚܵܐܲܪ ܗܘ̣ܵܐ ܕܢܸܚܙܹܐ ܡܲܢܘܼ ܗܵܕܹܐ ܥܒܲܕ݂.

³³ܗܵܝ ܕܹܝܢ ܐܲܢ̄ܬ݁ܬ݂ܵܐ ܟܲܕ݂ ܕܲܚܝܼܠܵܐ ܘܪܲܬ݁ܝܼܬ݂ܵܐ ܕܝܼܕ݂ܥܲܬ݂ ܡܵܐ ܕܲܗܘܵܐ ܠܵܗ̇ ܐܸܬ݂ܵܬ݂ ܢܸܦܠܲܬ݂ ܩܕ݂ܵܡܵܘܗܝ. ܘܐܸܡܪܲܬ݂ ܠܹܗ ܟܠܹܗ ܫܪܵܪܵܐ.

³⁴ܗܘܼ ܕܹܝܢ ܐܸܡܲܪ ܠܵܗ̇. ܒܪܲܬ݂ܝ. ܗܲܝܡܵܢܘܼܬܹܟ݂ܝ ܐܲܚܝܵܬܹܟ݂ܝ. ܙܸܠܝ ܒܲܫܠܵܡܵܐ. ܘܲܗܘܲܝܬ݁ܝ ܚܠܝܼܡܵܐ ܡܸܢ ܡܚܘܼܬܹܟ݂ܝ.

³⁵ܘܥܲܕ݂ ܗܘܼ ܡܡܲܠܸܠ ܐܸܬ݂ܘ ܡܸܢ ܕܒܹܝܬ݂ ܪܲܒ ܟܢܘܼܫܬܵܐ. ܘܐܵܡܪܝܼܢ. ܕܒܲܪܬ݂ܵܟ݂ ܡܝܼܬܲܬ݂. ܠܡܵܢܵܐ ܡܸܟܹܝܠ ܡܲܥܡܸܠ ܐܲܢ̄ܬ݁ ܠܡܲܠܦܵܢܵܐ.

³⁶ܝܼܫܘܿܥ ܕܹܝܢ ܫܡܲܥ ܠܡܸܠܬ݂ܵܐ ܕܐܡܲܪܘ. ܘܐܸܡܲܪ ܠܗܵܘ ܪܲܒ ܟܢܘܼܫܬܵܐ. ܠܵܐ ܬܸܕ݂ܚܲܠ. ܒܲܠܚܘܿܕ݂ ܗܲܝܡܸܢ.

³⁷ܘܠܵܐ ܫܒܲܩ ܠܐ̄ܢܵܫ ܕܢܹܐܙܲܠ ܥܲܡܹܗ ܐܸܠܵܐ ܠܫܸܡܥܘܿܢ ܟܹܐܦܵܐ ܘܲܠܝܲܥܩܘܿܒ݂ ܘܲܠܝܘܿܚܲܢܵܢ ܐܲܚܘܼܗܝ ܕܝܲܥܩܘܿܒ݂.

³⁸ܘܐܸܬ݂ܵܘ ܠܒܲܝܬܵܐ ܕܗܵܘ ܪܲܒ ܟܢܘܼܫܬܵܐ. ܘܲܚܙܵܐ ܕܲܪܗܝܼܒ݂ܝܼܢ ܘܒ݂ܵܟ݂ܹܝܢ. ܘܡܲܝܠܠܝܼܢ.

³⁹ܘܥܲܠ. ܘܐܸܡܲܪ ܠܗܘܿܢ. ܡܵܢܵܐ ܪܗܝܼܒ݂ܝܼܢ ܐܢ̄ܬܘܿܢ ܘܒ݂ܵܟܹܝܢ. ܛܠܝܼܬ݂ܵܐ ܠܵܐ ܡܝܼܬܲܬ݂ ܐܸܠܵܐ ܕܲܡܟܵܐ ܗܝ.

⁴⁰ܘܓ݂ܵܚܟܿܝܼܢ ܗ̄ܘܼܵܘ ܥܠܵܘܗܝ. ܗܘܼ ܕܹܝܢ ܐܲܦܸܩ ܠܟ݂ܠܗܘܿܢ. ܘܲܕ݂ܒܲܪ ܠܐܲܒ݂ܘܼܗ̇ ܕܲܛܠܝܼܬ݂ܵܐ ܘܠܸܐܡܵܗ̇. ܘܲܠܗܵܢܘܿܢ ܕܥܲܡܹܗ ܘܥܲܠ ܠܐܲܝܟܵܐ ܕܪܲܡܝܵܐ ܗ̄ܘܵܬ݂ ܛܠܝܼܬ݂ܵܐ.

⁴¹ܘܐܸܚܲܕ݂ ܒܐܝܕ݂ܵܗ̇ ܕܲܛܠܝܼܬ݂ܵܐ. ܘܐܸܡܲܪ ܠܵܗ̇. ܛܠܝܼܬ݂ܵܐ. ܩܘܼܡܝ.

⁴²ܘܒܲܪ ܫܵܥܬܹܗ ܩܵܡܲܬ݂ ܛܠܝܼܬ݂ܵܐ. ܘܲܡܗܲܠܟ݂ܵܐ ܗ̄ܘܵܬ݂. ܐܝܼܬܹܝܗ̇ ܗ̄ܘܵܬ݂ ܓܹܝܪ ܒܲܪ̱ܬ݂ ܫܢܝܼܢ ܬܲܪܬܲܥܸܣܪܹ̈ܐ. ܘܡܸܬ݁ܕܲܡܪܝܼܢ ܗ̄ܘܼܵܘ ܕܘܡܵܪܵܐ ܪܲܒܵܐ.

⁴³ܘܦܲܩܸܕ݂ ܐܸܢܘܿܢ ܣܲܓܝܼ. ܕܠܵܐ ܐ̄ܢܵܫ ܢܸܕ݂ܥ ܗܵܕܹܐ. ܘܐܸܡܲܪ ܕܢܸܬ݁ܠܘܼܢ ܠܵܗ̇ ܠܡܸܠܥܲܣ.